1 Peterus 4 - Eipomek

Winiryuk kam una ati, nyabuk yupu

¹ Aning ati ara, Kristus ninye nong atonun dayukce ulamuk talak noutamak ara, el nong deice ikin ning weik deililamikura, kanye imun kanye bobuka ulamuk. Yesus ara, winibuka ulamuka anya arye, anggun diba tenelulum nang babye, el ulamuk atonun, akanyeuk tenebuka unamlulume. Ara, yata ninye do nirya, sik nong deice ikin uplibuk, kanye imun kanye bobuka unyak ninye ara, malye un ning tonap, kum patalyeba batakalongonyake.

² Malye winin ning akunum batakanyak ninye ara, kanye imun kanye bobuka, akunum ulamik ati, sik tukwak mutuku tuba unamak talak noutamak nirya ara, ninye talima ak, malye un ning pataplibuk kum wininamake. Malye un ning pataplibuk, ‘Malye winipnuyap’ tenen, kum unyak bukni, Allah arye, ‘Wininamak,’ tenesulul ninguk tenebuka, aninguk talibuka diksukumuk unamake.

³ “Anggun babye, wininamlulume,” nyapmasina ara, talya urdem ati kum nyapne. Anggun kele, sik diba kum tenenyak ninye arye, malye-malye wininyak ning ara, minop talak weika arye akunum ulalum bukni, wini talak ara, aning nirya ara, akunum batakmalume. Aning ati ara, amalye un ning tonap, pia kum wininamlulume. Sik diba tenena kum ninye arye, malye-malye wininyak ning ara ani. Sikda, kil talye yona ap, ubula dona ap, malye un ning patana ap, kanye wangalamak mek weik arye dina ap, weik kwalina kwalibikirye malye-malye ubuka kouldana ap unyake. Tonda, sik puturubuka memenyak ning do, isa mer do, talye ning si erenyak ara, Allah arye, ‘Aning na like,’ tenelule.

⁴ Sik malye-malye ubuka wininyak ning, yala-yala weik unyak bukni, anggun diba tenelulum nang arye, neika kum umunyopura, amalye un ninye arye, ‘Yata ati, nun ap, talye luba kibuka malye kum unyap do?’ tenen, yu ubuka malye yupu weik arye, anggun nong deice delisinyake.

⁵ Winisinyak bukni, sik malye-malye ulamice ning ati ara, sik bidamang nang arye, adiparyuk Allah ati, “Nun malye ulamubu ning ara, ani-ani,” nyabuka, laka nyanamake. Allah arye, ‘Kam tuba unyak ninye babye, unum diplamik ninye babye, yuk-yuk bokuka deipnirye wenepnamne’ tenen, akunum kintinipdeibuka ulule. El teneplye talak arye, yupu bokeipnamsile.

⁶ Yesus arye akunum diplamik ninye dam binuka, Allah el laka teleb yupu peterelbiyuka deiyok ara, nyapnusine. Ara, ninye tukwak ninye atonun ubuka ulamika anya arye, ninye nirya malye ubica deice dibilamak touk, anang babye, akunum diamik bukni, sik kam ulamik talak ulamik ning ati, Allah arye bokuka wenepnamle. Bukni, diba tenelamik nang babye, diamik bukni, Allah pia kam ulye touk, diba tenebika ati, sik nong dibik bukni, sik kanye pia kam unamak. ‘Wininamak’ tenen, Yesus el ninye lyen yupu peterelamikbuk, anang arye diba tenelamik.

Allah arye, ‘Na pil donamak’ tenen, mambul pil dona deiyok ning talye arisulula ati, nyabuk yupu

⁷ Aning-aning nirya sirya daknamle talak akunum dam upsil ati, pia moubuka tenepmunce, teniltona kum arye, ‘Malye ubibyak’ tenen, moubuka kalikilanamlulume. Winibuka upmunyopura, Allah ati moronamlulume. Moubuka kum kalikdamunyopura, Allah ati teleb nyabuka kum moroptume.

⁸ Anyapmasin ning nirya wininamlulum bukni, weik mambul ning ara, winira nyapnusine. Anggun nirya arye, yuk diba tenena ninye nirya ati, pia dipkoprop talima arepdamunce, bico tenebuka melilanauk unamlulume. Yuk nang ati pia bico tenebuka melipmunyopura, sik anang malye wininyak ning ati ara, talye luba kibuka mangkau kipnamlulume. Yuk nang ati pia bico tenebuka, kum melipmunyopura, sikce malye updeipsikce ning ati, tuba tenenauk unamlulume.

⁹ Anggunce yuk ninye ati sik din ap, aik manak ap, si erebuka yukulonamlulume. Wininamlum talak ara, malye yupu nyabuka, lik kanye bona kum arye, teleb kanye bobuka unamlulume.

¹⁰ Allah arye anggun nirya yuk-yuk ati, ‘Na mambul pil donamak’ tenen, ‘Pil dona deiyok ning mikip akunum talye arepsukbuk, doproplum ning deice arye, yuk diba’ tenen, ninye ati melilanauk unamlulume. Allah arye talye arisulul pil dona deiyok ning ara, yala yuk-yuk awabsilya deice arye, yuk ninye ati, batakna kum arye pia melinamlulume.

¹¹ Winipmanto ning ara, yatanye do, Allah yupu nyalulnye bira, Allah el dam yaturye, nyaptubuk elce ila tamubuka nyapsutu touk, pia mikip deice arye peternamsile. Aning atonun, yuk ninye ati, melibuka pil dolulnye bira, Allah arye el mikip arisilya deice arye, yuk ninye ati melibuka pil donamle. Allah arye, ‘Na pil donamak’ tenen, talye arisilye pil dona deiyok ning deice arye, Yesus Kristus ap, kanye dukdongobuka umunce, anggun wininamlulum ning nirya ara, teleb ubuka unamlulume. Winibuka umunyopura, yuk nang eipsikirye, Allah el si weik arye erebikirye, elti, “Telebe,” nyanamake. Ninye mutuku-mutuku nirya arye, Allah el si erebikirye, ‘Weik mikip ululnye bira, Allah eluk,’ tenebuka, ‘Pia unamak’ tenen, Allah moronune. Akunuma.

Yesus diba tenemunyebuk, yuk nang arye, ikin ning anggun nong deice deilinamsiaka ati, nyabuk yupu

¹² Na kayapu, na kanye delisunune. Ikin ning weik, anggun nong deice deipsikceura, kanye imun kanye bobuka, umunye talak noutamak ara, anggunce, ‘Se, aning kum winipsutue. Yata deiyok ati, aikin ning, nun dam yanmasil do? Kum winipmanto ning upsile’ tenen, mambul kanye bobuka, kum unamlulume.

¹³ Mambul kanye bobuka, ‘Se,’ kum tenenamlulume bukni, Yesus Kristus nong deice, ikin ning deibikbuk, ikin kanye bobuk touk, nun babye atonun, ‘Ikin ning, nun nong deice deipsikca babye, telebuka’ tenen, kanye weik arye delinamlulume. Yesus, ikin ning weik ulamuk touk, upsiliba, kanye deibuka umunyopura, aminyan talak Allah arye, Yesus el weik mambul ulul ning ap, pia teleb-teleb ubuka ulul ning ap, dirina weik uplibuk, lakak nyapnamsil talak ara, kanye pia weik arye deibuka, pin-pin asa unamlulume.

¹⁴ Yesus Kristus diba tenebuka, el yupu kekebuka dobolbalamunye anya arye, yuk ninye eipsikirye, yu bobuka, malye yupu nyapsikcopura babye, kanye delinamlulume. Ara, ‘Nunda mambule, Allah arye nunti, teleb kilinamsil’ tenen, kanye delinamlulume. Ara, talye ati kume. Allah El Dib Kanye, teleb ubuka dirina weik ulirye, anggun talima noutamak ulula anya arye, kanye deibuka unamlulume.

¹⁵ Yata malye winin ning do nirya, ninye oltakana ap, ubula dona ap, yuk pia malye winina ap ara, ‘Yuk nang ara, malye unyak do, teleb unyak do?’ tenen, dipdebuka, minina yupu nyabuka bana ap babye, winipdebuka, anggun nong deice, ikin ning delisinyaka deiyok ning ati, anirya pia kum wininamlulume. Ikin ning anggun nong deice delinamsiaka ara, deiyok kum uaplyopura, telebuk bukni, malye winipmunyak, deiyok dipkoprop uaplyopura, ara malye ati nyapsine.

¹⁶ Amalye winin ning nirya kum wininamlulum bukni, Yesus diba tenepmunce, el yupu kekebuka, dobolbalamluma ati ara, yuk nang arye, ikin ning, anggun nong deice deipsikcopura, alye kum unamsile. Alye kum upnamsil bukni, Allah lyepsukce, el mapu kipsukbuk, Kristen ninye nyasinyaka ati, ‘Aning ara, pia teleb’ tenen, Allah arye winipsuka ati, “Telebe,” nyabuka, el si erenamlulume.

¹⁷ Allah arye ninye mutuku sirya im sirya nirya ati, yupu yuk-yuk bokeiplirye, wenepnamla ara, el mapu kan-kan arye deiyok koupnamla anya arye, ikin ning anggun nong deice deipsikce talak ara, kanye deibuka, Allah el siuk erenamlulume. Tonda, el mapu kan-kan arye deiyok koupsilyeura, mitik ikin usilye bukni, aminyan daknamle talak ara, diba tenena kum arye, Allah el laka teleb yupu ati, yaniltanyak ninye ati ara, yupu bokeiplirye, wenepnamle ning ara, weik mambule. Sik pia ikin weik unamake.

¹⁸ Aning atonun, Allah yupu noutamak, buku Amsal deice sekik ning ara, nyapnusine. Ara, ‘Diksukum ubuka unyak ninye ara, ikin ulya deice arye diba tenenyakbuk, Allah arye lyelula anya arye, sik malye winin nang arye, ‘Allah elda talinye,’ tenebuka, el yupu yaniltanyak ninye ati ara, yata wiribuka arye, dib teneptingbuk lyeptu do? Kume, kum lyepnamle.’ (Amsal 11:31)

¹⁹ Aning ati ara, na kayapu, Allah arye tenyamsuk touk, malye nang arye ikin ning anggun nong deice deipsikcopura, teniltona kum arye, anggun kwepdeisuknye Allah ati, anggun nong ap, anggun kanye talima ap, anirya dobuka, Allah el deice delinamlulume. Anggunce, anggun bidamang nong ap, kanye ap, Allah ati arepmunyopura, batakna kum, teleb un ninguk ubuka, pia diksukumuk unamlulume. Nun kwepdeisuknye Allah ara, pia batakna kum, melibuka dinauk usulule.