1 Peterus 2 - Eipomek

“Malye winin ning nirya batakuka, Allah el yupu uk, talibuka wininamlulume,” nyabuk yupu

¹ Allah el pia ati, upnamle yupu peterelamsika ati, malye winin ning nirya ara, batakanamlulume. Ara, yuk nang ati, yu una ap, ‘Na’ tenen arye, talye nyana ap, ‘Yuk nang ning, na ton doproptinye’ tenen, talima noutamak pataplibuk tenena ap, malye winin ning aupmalye bukni, nong bol deiceuk teleb una ap, yuk nang ati talye yupu nyabuka lulundana ap, amalye winin ning yala-yala nirya ara, batakanamlulume.

² Winiryuk deibice mapu, sik nin yapu moum ati pia patalamle touk, Allah el pia teleb yupu, talima ak wisibuka teleb ulisulul yupu ati, pia patanamsile. Winibuka patapsilyeura, kekebuka dolonauk upmunyopura, Allah arye lyepsuk ak, el ap talima dukdongobuka umunya ara, pia wisipnin balamlya ani, telebuk unamsile.

³ Yesus ap, talima dukdongobuka umunya ara, ‘Teleb ulule’ tenen, akunum kel kipmaluma ati, apia unamlulume.

“Allah arye wibuka deipsuka ati, diksukumuk unamlulume,” nyabuk yupu

⁴ Ara, winipmanto yupu nyapnusine. Ara, Yesus ara, aik don keil atonun ulul bukni, elda pia Kam Keil ulule. Ninye mutuku-mutuku nirya arye, ‘Keil talye keil’ tenen, bataklamik bukni, Allah arye Yesus ati, ‘Akeil ara, weik mambule,’ tenebuka wibuka deiamuk.

⁵ Anggun babye, kam keil atonun ululuma anya arye, Yesus ap kanye dukdongobuka ululum talak nirya ara, el dopropsilirye, aik atonun dobuka teleb updeipnamsile. Tonda, ‘Allah ap, malye winin ninye ap, ansinibuka neika utibye’ tenen, ansinilina deiyok nang ati, Allah arena deiyok nang atonun kilisulule. Winisilyopura, Yesus Kristus ap, talima dukdongobuka diksukum umunye deice arye, Allah ati teleb ning arenamlume. Ara asing elinyap ning kum bukni, tonda nong kipman talye ning ati arenamlulum bukni, Allah arye, ‘Aning teleb,’ tenelye ning uk, anggun kanye talima noutam arye arilulum ning, elti, arenamlume. Winipmunyopura, kanye delinamsile.

⁶ Wininamlum ning ati ara, Yesaya arye Allah el yupu noutamak nyabuka sekeipsuke. El domon yupu arye nyabuk yupu ara, ani. ‘Allah arye nyabuk. “Anggun dipdelulume, pia mambul keil tonok, Sion mutuku noutamak wibuka deiamsise. Yata nang do nirya, elti, diba tenebuka akeil deice kanye delinyak nang ara, dipkoprop alye kum dakdanamake. Tonda, narye aninye ati, pia kum bataknamne,” Allah arye nyabuk.’ (Yesaya 28:16)

⁷ Wini talak, anggunce Yesus ati diba tenelulum ninye babye, akeil ati ara, ‘Weik mambule,’ tenelulume. Bukni, sik diba kum tenenyak ninye ati ara, Allah yupu buku Mazmur noutamak arye ayupu nyabuk. ‘Sik aik dona deiyok nang arye, ‘Akeil ara, malye keil’ tenen, batakik ning ara, wini talak weik mambul keil akunum upsile.’ (Mazmur 118:22)

⁸ Tonda ayupu dipdelulume. Yesaya arye ayupu sekeipsuke. ‘Akeil ara, ninye balelamice anyak, yan dum duklyopura, kwelanyake. Tonda akeil arye, yan dum duklyopura, sakanyake.’ (Yesaya 8:14) Sik diba tenena kum nang arye, Yesus el yupu kum kekenyakce, talibuka kum dobolbanyak anya arye, ninye arye yan dum duklyopura, sakalamak atonun, malyeuk unyake. Ara, talya ati kume. Allah arye aninye ati, ‘Wininamak,’ tenyamuk touk unyake.

⁹ Diba tenena kum nang arye, wininyak bukni, anggunda diba tenelulum ninye ara, Allah arye, ‘Na mapu kibikirye, diksukumuk unamak’ tenen, akunum wibuka deiamsuke. Tonda, ‘Na piluk dokirye, ninye ap, Allah ap, ansinilina deiyok nang unamak’ tenen, wibuka deiamsuke. Anggunda kunuknak noutam atonun, malye ulamluma noutam ulamlumbuk, Allah yukubsukce, dobuka teleb dirinak atonun delilbisuke. Winipsuka deiyok ara, ‘Allah el si erebuka, elti, telebe nyabuka, pia unamak’ tenen, dirinak delilbisuke.

¹⁰ Minop ara, pia mambul ninye kum ulalum bukni, wini talak ara, ‘Allah arye el ‘Na’ tenen ati, el mapu akunum kipdeipsuke. Aning atouk, minopce wenena kum arye, namin kipsilirye, talye melibuka lyesulul ning, minop talak kum dololalum bukni, wini talak ara, aning akunum dololulume.

¹¹ Na kayapu, bico tenesunune. Anggun mutuku sirika ara, im deice ulula anya arye, tukwak mutuku noutamak, ninye asik ninye atouk ubuka ululum talak nirya ara, malye winin ning patasilye ning nirya ara, batakuka lubakilongonamlulume. Amalye winin ning patasilye deice arye, nun kanye talima ap, kanye ap opbisibuka, malye ulisulule. Ati amalye winin ning nirya ara, batakanamlulume.

¹² Sik dib kum tenenyak ninye kan-kan ululum talak ara, anang arye anggunti, “Anang ara, malye ninye,” nyabuka lululinamsiak bukni, anggun pia dipkoprop diksukumuk ulamunyopura, anggun teleb ululum ning eipsikirye, Allah dolyanamsil talak ara, anang arye lopdeipsikirye, Allah el si ereipnamake.

“Ninye deiyok nang, sik amutamak ubuka, nimalye arye unamlulume,” nyabuk yupu

^13-14 Nun Deiyoknye Yesus ati, ‘Malye yupu nyapsikcak’ tenen, weik ninye deiyok nang yala-yala nirya ara, sik amuak bukuka nimalye arye unamlulume. Ara, aning-aning nirya deice tam talibuka ululnye Raja babye, el amutamak unyakce malye nang wibuka weneplirye, ‘Teleb nang melipnamle’ tenen, dolkwetelye nang, Gubernur yala nang babye, sik amutamak bukuka nimalye aryuk unamlulume.

¹⁵ Wininamluma deiyok ara, ani. Ara, sik walwal nang arye, talye yupu nyabuka lululinamsiyak bukni, anggun teleb diksukum umunya deice arye, ‘Anang arye malye yupu nyasinyake, yupu sekelongonamlulum’ tenen, Allah arye akunum tenyamsuke.

¹⁶ Anggunda, malye winin ning noutamak, Allah arye lyebuka lopdeipsuk nang, diksukum una nang atonun unamlulume. Winibuka unamlulum bukni, ‘Nunda Allah arye akunum lyebuka lopdeipsuka anya arye, nun tenepmabye ninguk, talye luba kibuka unamabe,’ tenena meme. Malye un ning duknubuka kum unamlulume. Allah el yupu kekebuka, el piluk dobuka, diksukum unyak nang ulamak touk, anggun babye, wininamlulume.

¹⁷ Yata ninye do nirya, si erebuka unamlulume. Anggun, Allah diba tenemunya atonun, yuk diba tenenyak nang ati, bico tenebuka melilanauk unamlulume. ‘Allah ati malye ubibyak’ tenen, leibuka unamlulume. Ninye talina weik Deiyok nang, Raja yala nang nirya ati, si erebuka unamlulume.

¹⁸ Anggun yuk nang ati pil melin nang ara, anggun deiyok nang ati nimalye arye, sik yupu kekebuka, sik amutamak unamlulume. Ara, nun patapsilye ning tenebuka, nunti teleb unyaka deiyok nang atibuk kume. Tonda yuk deiyok nang arye anggunti yu nyabuka, ikin pil deipsikce nang babye, anggun tibuk sik amutamak bukuka nimalye arye unamlulume.

¹⁹ Wininamluma ara, talya ati kume. Ara, malye kum unyak bukni, sik deiyok nang arye, ikin ning weik sik nong deice deibikibuk, ikin weik uplibuk unyak nang babye, ‘Allah arye kanye deipnamnil’ tenen, sikce malye yupu tamubuka kum nyanyake. Talya tunim abuka, sik deiyok nang amutamak nimalye aryuk unyake. Wininyaka ati ara, Allah arye sikti, kanye deililule.

²⁰ Bukni, anggun malye upmunyebuk, anggun nong deice ikin ning deipsikceura, nimalye arye namin kibuka ulamluma babye, Allah arye kanye kum deipnamsile. Ara malye akunum winipluma ati, ikin ning, anggun nong deice delisinyaka atia. Winipmunyopura, Allah arye kanye kum delinamsile. Bukni, anggun teleb-telebuk umunce, deiyok kum upmalyebuk, yuk nang arye, anggun nong deice ikin ning deipsikceura, nimalye arye namin kibuka ulalumopura, Allah arye kanye delinamsile.

²¹ Anggunce telebuk upmunyeura, deiyok kum, kum upmali bukni, yu nang arye, anggun nong deice, ikin ning delisinyaka ara, Allah arye aning akunum tenyamsukce, ‘Sikda namin kipliba teleb arye dakeiyam asa unamak’ tenen, Allah arye nyapsuke. ‘Wininamak’ tenen, nyapsuka deiyok ara, nyapnusine. Ara, Yesus Kristus arye lyepnamsuka ati, el nong deice ikin ning weik deibik ati, ikin kanye bobuka, uk weik ati donmoka ara, Allah arye, ‘Anggun bapye unamlume’ tenen, winipmanto ning ati, kunum pitin kipdeipsuke. Ara, ‘Yesus ikin weik ubuk bukni, namin asa arye, namin kibuka, teleb kibuk touk, anggun bapye atonun wininamlum’ tenen, wipsukce, nun diba tenenyab nang ati, pitin kilin nang atonun kunum kipdeipsuke.

²² Yesaya sekeibuk yupu noutamak arye, ayupu nyabuk. ‘Yesus ara, malye winin ning tonok babye, kum ulamuk. Tonda, tenepce arye talye nyana yupu ara, pia kum nyalamuk.’ (Yesaya 53:9)

²³ Sik malye nang arye, Yesus ati malye-malye yupu nyabuka, el nong deice deipmik bukni, elce ton sikti, tamubuka kum nyabuk. Ikin ubukura, donmok talak ara, anang ati kwang dakna yupu ton kum nyabuk. Kwang dakna yupu nyana kum aniryuk, elce el bidamnye nonguk Allah ati aribuk. Allah ara, dipkoprop teleb ubuka diksukum yupu uk bokolilulnye.

²⁴ Allah arye nunti, dalubuka opsutu bukni, nun opsutu ning nirya ara, Yesus Kristus arye dobuka, el nong deice deipdayukce, wanwanun yo deice delil bisukce dibuk. Nun malye un ning ati dipsuk ning ara, talye ati kume. Ara, sik yupa ninye malye un ning kum teneptingce, kum pataptu touk, nun babye, malye ning patana ap, malye winina ap, pia kum arye, ‘Diksukumuk unamak’ tenen, dibukce lyepsuke. Sikce Yesus ati obikak, dibuk deice arye, nunti akunum teleb ubuka deipsuke.

²⁵ Minop talak ara, anggun nirya domba teleb bisik batakuka, malye bisik kwekdanin balamak touk ulalum bukni, wini talak ara, sik domba weilamak Deiyoknye damuk tamubuka yangalamak touk, akunum yanuka ululume. Ara, anggun kanye talima ap, kanye ap, melipsilirye, ‘Malye ubicak’ tenen, dilesilya Deiyoknye dam, akunum yanuka ululuma ati nyapsine.