1 Peterus 1 - Eipomek

Yesus arye wibuka deibuknye, el si Peterus arye, minop talak sekuk yupu

¹ Na Peterus arye asurat sekeipsene. Yesus Kristus arye, ‘Na yupu dobuka peterepra banamle’ tenen, wibuka deipnukba, Rasulnye unune. Anggun mutuku si ara, Pontus ap, Galatia ap, Kapadokia ap, Asia tam ap, Bitinia ap bokuka, yuk-yuk ululum ninye ati asurat sekeipsene. Allah arye, ‘Na mapu unamak’ tenen, tenyamsuk touk, anggunce akunum diba teneluluma anya arye, tukwak mutuku ara, tia talakuk ululume. Allah el mapu ululuma anya arye, tukwak mutuku noutamak ara, ninye asik nang atonun ululume. Nun mutuku sirika ara, im deice uka.

² Nun ni Allah arye minop talak akunum wiamsukce tenyamsuk touk, Allah El Dib Kanye arye, anggun talima noutamak malye ning kum deipsukce, teleb kipdeilisulul deice, Allah arye wibuka deipsuke. ‘Wininamak’ tenen, Allah arye wibuka deiamsuka deiyok ara, nyapnusine. Ara, ‘Yesus Kristus el ining biyuka deice arye, anggun malye ning kum danyaipsilirce, lyepsiliryopura, el yupu uk talibuka dobolbanamak’ tenen, wibuka deipsuke. Allah arye bico tenepsilirye, nun patapsilye ning talye arisulul ning ap, Allah ap kanye dukdongobuka umunce, yuk ninye ap kanye deibuka, teleb ubuka neika unamlulum ap, ‘Aning nirya weik upnin banamsil’ tenen, Allah morosunune.

Nun ni Allah ati, el si erebuka, “Pia telebe,” nyanamap ati, nyabuk yupu

³ Nun Deiyoknye Yesus Kristus, el Li Koprop Allah ati, “Telebe,” nyabuka, el si pia erenamabe. ‘Telebe’ tenen, nun malye winina ati, adiparyuk wenebuka opsutu bukni, bico tenepsukce namin kipsuke. Winipsukce, winiryuk ninye atonun akunum kipdeipsukce, pia kam una deiyok ning akunum arepsuke. Winiryuk ninye kipsuka ara, Yesus Kristus dibuk bukni, kam bukeibuka deice arye, el mapu kilisulule. Winisululbuk, nun kanye talima Allah el deiceuk deibuka, kam pia unamabe. Wininap ning ati, kanye teniltona kum aniryuk, ‘Aning ara, pia dipkoprop unamabe’ tenen, kanye deibuka unyabe.

⁴ Tonda Allah arye, ‘Na mapu unyak’ tenen, pia teleb ning arenamsil ning ara, lyuna ap, kum danana ap, malye una ap pia kum uptue. Aning ara kum upmanto. ‘Aning ara, im deice arye kintinibuka, ‘Na’ tenen, deipsuka anya arye, tuba aupsuke. Aning min kum danamsile.

⁵ Anggunda, Allah ati diba teneluluma ati, Allah arye, ‘Na mapu malye ubicak’ tenen, el mikip deice arye kalekuka lelilongosulule. Wini talak arye dipdongobuka, dotalak yanamle talak nirya ara, el mikip arye kalekuka lelisilyebuk, sirya daknamle talak akunum uplyopura, Allah arye lyen ning akunum kintiniyeiamsuk ati, Yesus aminyan talak tamubuka yalyopura, lyepnamsile. Atalak ara alyen ning nirya laka daneipnamsile.

⁶ Yesus arye tamubuka yanuka lyepsilirye, lyen ning nirya lakak nyapdeipnamsil ning ati ara, weik arye kanye deibuka ululume. Winilulum bukni, wini talak ap, oyanamle talak mitik anun ap, talima winilden ning yala-yala weik usilibuk, kanye imun kanye bobuka ikin unamsile.

⁷ Kanye winilden ning usilye ning ara, deiyok nyapnusine. Ara, anggun diba tenebuka, Yesus talibuka umunye ning nirya ara, winilesilyebuk, talima wisipsilye, ‘Dipkoprop pia gat uk, dipkoprop ninguk unamsil’ tenen, yangalule. Dekna weik ning emas ara, ‘Malye ning ubuk ning, kum uptue’ tenen, uku dongopmacebuk, malye ning diplyopura, teleb ubuka delinyak bukni, emas babye kum uptue. Emas ara, dekna weik ning ulul bukni, mitik mambul ninguk ulule. Anggunce diba tenebuka, Yesus talibuka umunye ning nirya ara, weik dekna weik ning atonun, weik mambul ulule. Diba tenelulum ning winilesilyebuk, akunum teleb uplyopura, Allah arye nyapdeiplibuk, Yesus Kristus tamubuka lakak yanamle talak ara, Allah arye telebe nyana ap, si erena ap, weik dirina ap, weik si ap, arepsilirye, erelinamsile.

⁸ Yesus Kristus ara, minop talak kum elilamlum bukni, elti, kanye arepbuka, anggun kanye talima el deice deililulume. Wini talak babye, el nong kum elilulum bukni, elti, diba tenebuka, eluk talibuka umunyeura, elce anggun talima noutam, kanye deibuka pin-pin kilisulule. Kanye deibuka pin-pin kilisulul ning ara, talye ninye yupu deice arye, nun kum laka nyaptibye.

⁹ Kanye pin-pin kilisulul ning ara, talya ati kum usulule. Deiyok ara, Allah arye, ‘Wininamak’ tenen, Allah diba tenelulum ning ara, akunum dololuluma anya arye, weik arye kanye deililulume. Ara, anggun kanye ap, talima ap, kanye ap nirya ara, lyepsilirye, teleb ulisul ning dololuluma ati nyapsine.

¹⁰ Allah el yupu laka nyalamik nang, nabi nang ara, Allah bico tenepsilirye, talye arisilye ning, lyesulul ning yanamsuka ati, yupu laka nyalamik talak nirya ara, ‘Deiyok ara, moubuka kel biktibye’ tenen, pia moubuka lilibuka dilelamik bukni, Allah arye lyesulul ning deiyok ning ara, atalak moubuka kum kel bikamik.

¹¹ Ara, Kristus El Dib Kanye arye, nabi nang sik talima noutamak yupu laka nyalamuk. Laka nyalamuk yupu ara, Kristus ikin upnamuk ning ap, ikin ubukura, aminyan sirya talak, weik mambul ning, pia teleb ubuka dirina weik ning upnamuk ning ap ati, yupu laka nyalamuk. Ayupu laka nyalamukbuk, sik nabi-nabi nang arye, ‘Se ayanamle ning yanamle talak ara ani, ayanamle talak noutamak winipnamle ning ara, anye moubuka kel kiptibye,’ tenelamikce, pia piriltaklamik. Piriltaklamik bukni, aning deiyok ara, moubuka kel kum bikmanto ulamik.

¹² Atalak ara, Allah arye el yupu laka nyalamik nang, sik nabi nang ati, sik talima noutam arye laka nyabuk. “Kume, na Dib Kanye arye anggun talima noutamak nyapdeipsilyeura, aminyan talak winipnamle ning ati, yupu laka nyalulum ning ara, anggun wini talak ululum ninye ati kume. Aning ara, aminyan talak unamak ninye ati winipnamle,” Allah arye nyabuk. Allah arye apia teleb kilinamsil ning nirya ara, Allah el im deice pil don nang, sik malaikat babye, ‘Se, Allah arye apil dolye ning ara, pia teleb ulule’ tenen, kanye deibikirye moubuka dinyake.

“Pia teleb ubuka diksukumuk unamlulume,” nyabuk yupu

¹³ Aning ati ara, diksukumuk una ati, anggun kanye moupmunce, ‘Allah el piluk donamap’ tenen, kintinibuka dinauk unamlulume. Tonda, ‘Malye ubibyak’ tenen, kanye moubuka kalikildanamlulume. Aning pia wininamlulume. Allah arye, Yesus laka kiplibuk, Yesus Kristus tamubuka yanamle talak ara, bico tenepsilirye, talyeuk arenamsil ning ati, ‘Dipkoprop wininamsil’ tenen, diba tenebuka, anggun kanye Allah deiceuk delinamlulume.

¹⁴ Yesus min kum diba tenyamlum talak noutamak ara, walwal ninye ulamlumce, malye ninguk patalamsukbuk, malye ulamlum touk, ulamlume. Minop talak ulamlum bukni, wini talak ara, aning atonun kum wininamlulume. Aning kum bukni, teleb mapu arye sik ni yapu yupu moubuka kekebikirye, dobolbalamak touk, anggun babye, Allah el yupu kekebuka, el teleb bisikuk dobolbanamlulume.

¹⁵ Anggun yukupsuknye, Allah ara, malye winina tonok ning babye, kum ulirye, el diksukum ulye touk, anggun babye, anggun malye ning nirya batakuka, anggun unamlulum ning nirya ara, diksukumuk wininamlulume.

¹⁶ Wininamluma deiyok ara, Allah yupu noutam sekuka deiamsuk yupu ara, ani. ‘Allah arye nyabuk, “Na diksukum unye touk, anggun babye, diksukumuk unamlulume,” nyapsuk.’ (Imamat 20:7)

¹⁷ Anggun Allah morolulum talak arye, nun Ni nyalulumnye Allah ara, ninye tukwak ninye nirya, sik wininyak ning dipdesilirye, sik wininyak ning atonun yupu bokeipsilirye, wenesulule. Ninye yuk-yuk ulamak touk, yupu bokuka kintinilisulule. Allah arye ninye urasin dipdebuka, ‘Na ka,’ tenena kum aniryuk, nun wininyap touk, yupu yuk-yuk bokuka kintinilisulul anya arye, anggun tukwak mutuku tia unamlum talak nirya ara, ‘Allah elda weik mambule. Malye winibibyopura wenepnamsile’ tenen, ilil uplibuk,pia leibuka diksukumuk unamlulume.

¹⁸ Wininamluma ara, talya ati kume. Deiyok ara, anggun kele, Yesus deksukce, lyepsuk ning ara, talye ning, kum winipnamle ning perak ap, emas ap, atonun ning deice arye kum deksuke. Anggun apu yapu nang arye, “Wininamlulume,” nyabuka, talye-talye peterelamsikbuk, ulalum ning talyamsuka noutam arye, Yesus arye min kum winipmanto ning deice arye, dekuka lyepsuke.

¹⁹ Talye kum ulul ning arye kum deksuk bukni, Yesus Kristus ara, domba yok kwanena ap, nong bol malye una ap, kum wamlye ning atonun ulamukce, el bidamnye ining pia mambul ning deice arye dekuka lyepsuke.

²⁰ Allah arye, aning-aning nirya min kum kwepdeiamuk talak ara, ‘Yesus arye ninye lyepnamle’ tenen, akunum wibuka deibuk bukni, winira sirya talak ara, anggun lyena ati akunum lakak arepsukbuk, kel kibape.

²¹ Yesus pil dopsukce, melisilya deice arye, Allah diba tenelulume. Yesus dibukura, Allah arye kam bukeibukce, weik dirina ap, mambul una ap deice arye, ereibuka ati, anggunce Allah ati diba teneplulume. Diba teneplumce, ‘Allah arye wininamsile’ tenen, kintinibuka dinauk ululum ning ap, ‘Allah elcuk melinamsile,’ tenena ap ara, anggun kanye talima Allah el deiceuk deililulume.

²² Ara, Allah el dipkoprop yupu talibuka dobolbalamunya deice arye, malye un ning nirya akunum batakluma anya arye, yuk diba tenena ninye ati, dipkorop kanye deipdanuka, melilanauk ululume. Aning ati ara, pia dipkoprop anggun talima ap, kanye ap, arepdamunce, bico tenebuka, weik arye melinlanauk unamlulume.

²³ Wininamluma deiyok ara, Allah arye anggun kanye talima winiryuk ning atonun ubuka arepsuka ara, talye kum ulul ning deice arye kume. Aning kum bukni, Allah el kam ulisulul yupu, min kum uptu ura, pia unamle yupu deice arye, winiryuk ninye atonun ubuka deipsuke.

²⁴ “Allah el yupu pia unamle,” nyapsin yupu ati ara, ayupu dipdelulume. Yesaya arye sekeiyamsuk yupu ara ani. ‘Ninye tukwak nang nirya ara, mutmuta atonun unyake. Sik urasin teleb unyaka ap, sikce memenyak ning teleb ning nirya ap, dolkua deice kita popmalya ani, kuluplyeura, dakalsakalamle touk unyake.’

²⁵ ‘Ninye nirya ara, wininyak bukni, Allah el yupu ara, tonok ton min kum, kum danamle. Pia ati, aupnamle.’ (Yesaya 40:6-8) Yesaya arye sekeiayamukak peterelamsikbuk, kekelamlum yupu ara, anyapsine.