1 Korintus 9 - Eipomek

Yuk nang arye, “Paulus ara, Allah yupu peterena deiyoknye, Rasulnye kum ulule,” nyabik ati, Paulus arye, tamubuka nyabuk yupu

¹ Ara, yuk yupu ton nyapnusine. Nara, yatanye birye, tapu koubuka talipnuka ati, na tenepnye touk kum winiptinye do? Kume, narye, ‘Winipnune,’ tenepnye touk wininune. Allah arye nati, ‘Na yupu peterelbana ati, deiya kouna deiyoknye, Rasulnye unamle’ tenen, Wibuka kum deipnukbuk, pil kum donun do? Wibuka deipnukbuk, el piluk donun do? Kume, elce wipdeipnukba, apiluk talibuka donune. Tonda, nun Deiyoknye Yesus na asing arye, kum eiyamse do? Kume, na asing arye, eiyamse. Yuk nang arye nati, “Kume, elda talinye,” nyaninyak bukni, anggun Korintus mutuku ninye tenipdelulume. Yesus ap kanye talima dukdongobuka pil dolamsibuk, apil dolamsa nong ubuk ning ara, anggun dib kum teneplum do, kum do? Kume, na wa wiamsa nong ara, anggun akunum dib teneluluma ati nyapne. Na wa wiamsa nong ubuk ning ara, anggun uka.

² Ara, yuk mutuku ninye ati ara, “Elce deiyok koubuka kum peterelamsukba, dib kum tenebupe. Nun Allah yupu peterena deiyoknye kum usulule,” nyapniting bukni, anggun Korintus mutuku ninye ati ara, dipkoprop Allah yupu peterelamsibuk, dib teneluluma anya arye, nara anggunti, anggun ni koprop atonun usunune. Na ap, Kristus ap kanye talima dukdongobuka unyamce, anggun Korintus mutuku ninye ati, el yupu peterelamsisiba, dib teneluluma ati, apil dolamsa nong lakak ubuka deice arye, nun nirya kele, ‘Paulus ara, dipkoprop Allah el yupu peterena ati, deiya kouna deiyoknye, Rasulnye ulule’ tenen, bikinyabe.

³ Sik yuk nang arye nati, “El Paulus ara kume. Talinye atonun ulule,” nyaninyak ninye ati, arup nyapmasin yupu uk laka nyalinune. Ayupu nyapnyopura, kekebikcopura, adeice aryuk kel kipnitinge. Dipkoprop Allah arye, wipdeipnukba, el yupu dobuka peterelbanauk unune.

“Nun Allah yupu peterena deiyok nang ababye, yuk nang sik nong deice, ikin ning kum delinyabe,” nyabuk yupu

⁴ Ura, na kayapu, na ap, nun Allah yupu peterena deiyok nang ap nirya arye, Allah yupu peterebibibuk kekenyak nang arye, din ap, mek ap arepsikibuk, kum diptibye do? Kume, nun deiyok anya arye, aning arepsikcopura diptibye.

⁵ Tonda, sik Allah yupu peterena deiyok nang bukni, yuk Rasul nang ap, Yesus el weit yapu ap, Peterus ap sik nirya ara, sik domik kilapu ap, neika peterelbanyake. Sikda sik kilapu ap peterepra banyak touk, narye ton, ato kil Yesus dib tenebuk kil ton kum dopnamtinya ati, nyanululum do? Kume, na deiyok ati, ‘Dopnune,’ teneptinyopura, kil doptinye.

⁶ Yuk peteren nang ara, yuk nang melikca deice arye, wininyak bukni, na ap, Barnabas ap, yuk nang arye nunti ton melibuka arena kumce, nun bitinye tonok ara, nun yuk talye pil dopnimnya deice aryuk, din dibuka unanam do? Nun bitinye tonok ara, yuk ninye arye, kum melipsiting do?

⁷ Ara, anggun ton tenipdelulume. Winipmanto ning ara, yata yin talinanye birye, el pil dolul ning ati, el dekna arena kum bukni, el bidamnye yo bok deice aryuk ulul do? Kume. Yatanye birye, wa wiamlibani, wa kouamlye ning nong upturye wisiptopura, kum libuka diptu do? Yata kil arye, basam weilamtua, obuka kwaliptingce, akil ati areptingba kum diptu do? Kume, anirya ara, kum winipmanto.

⁸ Ayupu nyapmasina ara, talye ninye kanye deice aniryuk nyapmasin do? Kume, Allah arye, nyapdeibukura, Musa arye, sekeiamuk yupu noutamak ara, ayupu deiyok atonun kum nyasulul do? Anggun ton tenipdelulume.

⁹ Allah arye, nyapdeibukura, Musa arye ayupu sekeiamuk. ‘Sapi basam arye, anggun pil donmasilye talak ara, ‘Elce ton nun yakong dobuka diplyak’ tenen, el si bam bol tapu arye, kum kopdongopnamlulume.’ (Ulangan 25:4) Allah arye, ayupu nyapdeibuk ning deiyok ara, sapi basamuk ati nyabuk do? Ninye ton tenena ati ayupu nyapsuk do?

¹⁰ Gume, dipkoprop Allah arye, ninye ap ati tenebukce, ayupu nyapdeipsuke. ‘Dipkoprop ninye bico’ tenen, melilana ati ayupu nyapdeipsuke. Wa tuku palinanye ap kouamikiba, nong uplirye, wisipliba, lilbananye ap, ‘Wa wiamikca ani, aminyan nong uplibuk, lipnamak nang ara, bokuka arepsikibuk, nun ap neika dinamabe’ tenen, wa wipdatingtoura, telebuka. Talya demuk pil dobicopura, aminyan talak ara, bokuka kum arepdanamake ara, pia malye. Ati ara, Allah arye, nun nirya ati tenenyamsukce, ayupu nyapdeibukura, Musa arye, sekamuk.

¹¹ Ati ara, sik wa wibuka koulamak ninye arye, yala ning kouamikiba, aminyan talak ara, paplirye, nong ubuka wisiplyopura, bokuka arepdanuka dilamak touk, nunce Allah yupu deiya koubuka yala ning atonun peterelamsupu. Winilamubu anya arye, wini talak ara, talye awabtu ning arepsutumba, kum doproptibye do? Arepsumunba doprobibyopura, anggunce, ‘Se aning ara, ikin weik ning nun nong deice deipsikirye, moropmasiake,’ tenenamsulum do?

¹² Ara, yuk peteren nang aminyan talak yayikce, wini talak peterenyakba, talye kanye deibuka arinyak ning ara, teleb bukni, nun minop talak peterelamsupu. Ati, weik teleb ning ara, nun babye ati ara, aning arepsutume. Dipkoprop nyapman do, tilila nyapman do? Dipkoprop ninguk nyapmasine. Peterena deiyok nang ulamubu deice arye, aning nirya morolamtibye bukni, nunce peterelamsupu talak ara, ‘Kristus arye ninye lyena laka teleb yupu ati, lik upliba, kum kekebikcak’ tenen, aning-aning nirya kum morolamsupu. Aninguk kum bukni, ikin wamsuk ning nirya ara, ‘Dauplye’ tenen, nunce anggunti pia kum morolamsupu.

¹³ Ura, aning atonun ton nyapnusine. Allah el si erena ati, arilbalamak aik pum pil donyaka deiyok nang arye, anyasik aril yangalamak ning arye bokuka, sik din ning dolonyake. Tonda, Yahudi yala ninye ara, ‘Allah arye, nun malye ning kum kipdeipnamsil’ tenen, kam un ning obuka, keil yangabuka deiyamik deice, uku seklamikak deililyanganyake. Aning delinyak pil donyaka deiyok nang arye, kam ning obuka delinyak ning bokuka, sik dina ati dolonyake. Aning wininyaka ara, anggun ton kum tenepmalumce, moubuka kum kel kiplum do?

¹⁴ Ayupu nyapmasin touk, Yesus arye, nyapdeipsuke. “Yatanye do nirya, sikce na laka teleb yupu, ninye lyen yupu peterenyak nang ara, peterebikiba, sik yupu kekebice ninye arye, apeterenyak nang sik makuna ati, sik talinyak ning bokuka melibuka arenamake. Sik peterenyaka deice arye, yuk nang arepmakibuk, din dibuka unamake,” nyapdeipsuke.

¹⁵ ‘Aning-aning nirya, na dekna ning atonun anya arye, merekuka arepnamniak’ tenen, morolamsitinye bukni, aning kum morolamsise. Tonda, asurat sekeipmasina ara, ‘Anggun Korintus mutuku ninye arye, aning-aning arenamake’ tenen, kum sekmasine. Kume. “Allah yupu peterenye talak nirya ara, dekna ning morona kumce, urdem aryuk peterenune,” nyabuka, yuk nang ati kanye deibuka laka nyanune anya arye, anggunce ato ning arepnumunyopura, ayupu ara tonap kum nyaptinye. Na dipnyopura, ara mitik ikin uka bukni, narye Allah yupu urdem aryuk kum peterepsitinyopura, weik ikin kanye bobuka unamne.

¹⁶ Ayupu nyapmasin bukni, Allah el yupu, ninye lyena ati laka teleb yupu peterenye talak ara, kanye erepnirye, “Nara, pia telebnye unune,” nyabuka kum erepdatinye. Aning ara, kume. Yesus arye nati, ‘Paulus ara, na yupu dobuka peterelbinamle’ tenen, wipdeipnuke. Yesus arye, wibuka deipnuka anya arye, apil ara, kum bataktinye. Allah yupu peterenye pil bataknyopura, pia ikin upnutue. Winipnyopura, Allah arye, weik wenepnutue.

¹⁷ Bukni, Allah arye, “Apil doplyame,” nyabuka kum nyapdeipnutuba, na kanye aryuk Allah yupu petereptinyetoura, sik keken ninye ati, dekna ning moroptinyeba, arepnitingopura, ‘Moubuka arepniyake,’ teneptinye. Bukni, na kanye aryuk kum peterenune. Allah arye, “Na yupu, ninye lyen yupu dobuka peterenamlyame,” nyapnukce, wipdeipnuka ati, elce nyapnuk touk, el pil dopra unune.

¹⁸ Aning ati ara, yatato dekna ning dopropnamne do? Na dekna dolona atonun ning nyapnusine. Ara, ani. Peterena deiyoknye ununa anya arye, adeice arye, yo bok moroptinye bukni, aning kume. Aning-aning morona kum aniryuk, urdem aryuk peterepnyopura, na kanye deipnamne. Na kanye delina ati peteresunune. Na dekna atonun ning dolona ati ara, aninguka.

¹⁹ Yuk nang sik yo bok deice dekuka deipnikce, “Nun pil urdem aryuk talye pil dopsilyame,” nyabuka pil dipnikiba, sik talininyakba, sik pil melinanye kum unune. Talinye unun bukni narye, ‘Allah yupu peterepnibuk, ninye weik kekebikirye, weik arye dib tenepnamak’ tenen, yuk ninye nirya, sik amu tam bukuka, sik talye pil melin nang atonun kibuka unune.

²⁰ Yahudi yala ninye ap neika ulamse talak ara, ‘Yahudi yala ninye winilamik atonun winipnyopura, Allah yupu peterepnibuk kekebikirye, Yesus dib tenepnamak’ tenen, sik winilamik ninguk talibuka winilamse. Nara, mem yupu Musa sekamuk yupu amu tam bukuka, amem ning nirya talibuka kum unun bukni, sik yuk ninye arye, ‘Ayupu ara, weik mambul’ tenen, talibuka unyak ninye ap, neika ulamse talak ara, sik winilamik touk winilamse. Winibuka ulamse deiyok ara, ‘Allah yupu peterepnibuk, kekebikirye, Yesus dib tenepnamak’ tenen, winilamse.

²¹ Yahudi yala kum ninye nirya ara, Allah arye, ‘Wininamlume, aning ara, kum wininamlume,’ nyapdeibukba, Musa arye sekamuk yupu, mem yupu kum kekelamika anya arye, ayupu talibuka kum unyake. Sikce aning-aning nirya tenena kumce talye kanye bobuka ulamak ninye ap neika ulamse talak ara, sik winilamak touk winilamse. Musa sekamuk yupu nirya tenena kumce, talye winilamse ning deiyok ara, ‘Winipnyopura, Allah yupu peterepnibuk kekebikirye, Yesus dib tenepnamak’ tenen, winilamse. (Dipkoprop Allah arye, “Aning ara wininamlume, aning ara, kum wininamlume,” nyasulul yupu ara, kum batakanune. Kristus arye, nyasilye yupu talibuka diksukumuk unune. Aning ara, pia kum bataktinye.)

²² Bukni, sik kanye talima noutam dib tenenyaka ara, min kum wisiamuk ninye ap, neika ulamubu talak ara, ‘Yesus dib tenepnamak’ tenen, sikce winilamik touk winilamse. Ara, sik anang arye, ‘Se, mankau arye, malye unyap’ tenen, aning-aning batakuka winilamik touk, na babye aning batakuka ulamse. Yatato ninye do nirya, ayala-ayala ninye nirya, sik winilamik touk, sik ap neika ulamubu talak ara, malye winina kum bukni, sik winilamik ninguk talibuka ulamse. Deiyok ara, ‘Winipnyopura, Allah yupu, ninye lyena ati teleb yupu peterepnibuk kekebikirye, Yesus dib tenepnamak’ tenen, winilamse.

²³ Awinilamse nirya ap, aning tuba wininye ning nirya ap deiyok ara, ‘Ninye im sirya, mutuku sirya, Allah el ninye lyen yupu, el laka teleb yupu kekebikirye, Yesus dib tenepnamak’ tenen, wininune. Tonda, winipnyopura, Allah arye, “Na mapu ati, teleb ning arenamsine,” nyabuka nyapdeiamsuk touk, ‘Na ap, anggun ap, nun nirya arye, neika dopropbibirye, telebuk unamap’ tenen, wininune.

“ ‘Allah el pil teleb ubuka donamap’ tenen, pia pi dobuka, mikip arye, pil donamape,” nyabuk yupu

²⁴ Na kayapu, tenipdenamlume. Sik bik-bik alamak nang ara, ‘Dekne ning dopropnamap’ tenen, ninye yupa weik arye, bik-bik abuka banyak bukni, minop menekuka bilinye binyuk, dekne ning dololule. Aning kum kel bikmalum do? Aning ati anggun babye, ‘Allah arye, dekne ning dipkoprop ning arepnamsil ning ara, dopropnamap’ tenen, pia piribuka teleb ubuka wininamlulume.

²⁵ ‘Dekne ning doproptibye’ tenen, piribuka bik-bik alamak ninye ara, min kum winipmace talak ara, minopce kintinina ati, ‘Nun nong mikip kipnamsil’ tenen, kelina ati, bik-bik abuka banyake. Pil weik donyaka ara, ‘Dekne ning dopropnamap’ tenen, wininyake. Bukni, sik dolonyak ning ara, tia talak talin ning ati, dolonyake. Anya arye, sik bik-bik alamak nang arye, dololamak ning ara, aminyan tuba pia kum upnamle. Bukni nunda, ‘Nun kanye talima mikip kilina ap, teleb unamsil,’ tenena ap, pia mikip arye, pirinyaba ara, dekne ning, kum danamle ning dolona ati, kume. Nunda, ‘Allah arye, arenamsil ning ara, kum danamle ninguk, dopropnamap’ tenen, wininyabe. Aning ara, pia unamle.

²⁶ Aning tenena ati ara, na tonok ara, yuk nang arye winilamak touk kum wininune. Ara, sikce, ilil upliba, ‘Amutuku binune,’ tenena kumce, kanye bona kum arye, lukdakirye, kwepdanin banyak touk kum wininune. Tonda, yuk nang arye, taruk pinibuka olalamak nang ara, sik kirikuka talye-talye olamak atonun kum wininune. Nara, kelnye birye, yuknye el nong deiceuk dipdongobuka olamle touk wininune.

²⁷ Ara, narye talye-talyeuk kum wininune. ‘Allah arye, nyasilye touk diksukumuk unamne’ tenen, na nong ap, na kanye talima ap ati, pia moubuka kalikilanune. Ara, talye ati kume. ‘Yuk nang kekepnamak’ tenen, Allah yupu akunum peterenye bukni, aminyan ara, na babye malye winipnyopura, Allah arye, dekne ning arepnamnil ning ara, ‘Na babye kum dopropnyak’ tenen, pia pi dobuka piripdenirye, na talima kalikildanune. Na Paulus arye, nyapsine.