1 Korintus 6 - Eipomek

Ninye walakcopura, yupu bokolina ap, lipsisikilina ap ati, nyabuk yupu

¹ Winira yuk yupu ton nyapnusine. Tonoknye birye yuknye biti, ‘El malye winipnile’ tenen, yu uplibuk, yupu deice walanyak talak ara, ‘Anang ara, yupu lipsisiknamsiak’ tenen, dib tenena kum ninye dam, laka nyalbalulum ning ara, yata ati do? Teleb ning ara, nun Allah dib tenenyap ninye, nun dem aryuk, ‘Yupu talibuka lipsisikibirye, yupu bokeipnamabe’ tenen, angguncuk, anggun kan-kan unyak ninye ati, yupu talibuka bokeiptumopura, aning ara, telebuka. Dib tenena kum ninye dam bobana meme.

² Sirya talak ara, Allah ati dib tenenyak ninye arye, ninye im sirya, mutuku sirya ati yupu talibikirye, “Anang ara teleb, anang ara malye,” nyabuka, yupu melibuka bokolinamak ning ara, anggun ton kum kekeplumce, kum kel kiplum do? Ura, sirya talak arye, deiya koubuka, doyanamle talak nirya ara, Allah dib tenena ninye arye, melibuka yupu lipsisikuka bokolina deiyok nang unamabe. Winipnamapa anya arye, wini talak ara, anggun yata ati mitik mambul ning ababye, yupu talipmunce, lipsisikuka kum bokolilalulum do?

³ Tonda, aning atonun, nun dib tenenyap ninye arye, im deice pil melin nang, malaikat sik malye wininyak ning ababye, nunce melibuka yupu lipsisikuka bokeipnamap ning ara, kum kel kiplum do? Sirya talak ara, nun nirya arye, weik mambul ning ati, yupu lipsisikuka bokona deiyok nang unamaba anya arye, yata ati, atukwak unyap talak noutamak ara, talye mitik ning ababye, yupu talibuka lipsisikuka kum bokolilalulum do?

⁴ Yupu lipsisikuka bokolina deiyok nang unamaba ati ara, anggun kan-kan arye, ton nang arye, ton nang ati, “Malye Winipmasiake,” nyabuka walacopura, anggun kan-kan arye, dib tenena nanguk wibuka deipmunba, yupu talibuka lipsisiknamake. ‘Anang ara, ninye deiyok nang kumanya arye, sik weik mambul gume,’ teneplum nang ababye, erena telebe. Sikda dib tenena nang unyaka ati nyapne. Bukni, anggun walamunye talak ara, ayupu lipsisikna ati ara, Allah ati, dib tenena kum ninye arye, ‘Yupu lipsisikdeipnamsiak’ tenen, sik dam bana kume.

⁵ “Diba tenen, nang bukni, weik mambul kum nang babye, erena telebe,” nyapmasina ara, ‘Kekepmunce, alye dakdanamlum’ tenen, nyapmasine. Dib tenena nang bitinye arye, malye kanye bobuka, wamdaricopura, sik kan-kan arye, tonok kel bikamuknye, ayupu talibuka lipsisikmantonye, tonok babye ton dipkoprop kum ulul do? Aning ara, kum winipmanto tenepne.

⁶ Nyapmasin bukni, anggun noutamak arye, ton dib tenenyak nang arye, yuk dib tenenyak nang ati, bobikirye, ‘Anang arye, yupu lipsisikuka bokeipnusiak’ tenen, yupu lipsisikuka bokolina deiyok nang bukni, dib tenena kum ninye dam bobanyake. Aning winilulum ning ara, pia malye winilulume, nyapsine.

⁷ Ura, akunum lak upsile. Ton nang arye, yuk nang ati, “E, sikce malye winipmasiake,” nyabuka, yu upliba, yupu deice waldakirye, yupu lipsisikuka bokolina deiyok nang dam bobalulum deice arye, akunum bikmasine. Allah arye, ‘Na mapu teleb ubuka unamake,’ tenyamsuk ning ara, akunum batakuka, talye-talyeuk winilulume. Winimunya arye, malye winilulume. Teleb ning ara, yuk nang arye, anggunti malye winipsikcopura, talye lamapdongobuka, nimalye arye, unamlulume. Anggun ning ubula dopropsikcopura, talye kanye bobuka, ‘Adopropmak ning ara, aupmalye’ tenen, lamapdongobuka unamlulume.

⁸ Teleb ning ara, aninguk ulamtum bukni, winina kumce, anggunce, anggun weit yapu atonun ubuka, neika dib tenenyak ninye ati, malye una ap, ubula dolona ap, malye winilalulume. Anggunda Yesus dib akunum tenyamlum ninye ululuma anya arye, aning ara, pia malye ululume, na kayapu. Na Paulus arye, nyapsine.

⁹ Na kayapu, anyapnusin yupu ara, kel kum biklum do? Kume, sik tuba-tuba malye wininyak ninye ara, Allah lyepsilirye, talinamsil ning ara, kum doproptinge. Lyepsilirye, aning-aning nirya pia talinamsil talak ara, el ap pia teleb unamap bukni, sik awininyak nang ara, kume. Tilila yupu nyapdamunce, talye dib kum tenenamlulume. Pia dipkoprop ninguk nyapsine. Sik talye-talye yolanyak ninye ap, yuk talye ning si erenyak ninye ap, kil akunum domiki bukni, yuk kilapu talye yolamak nang ap, ‘Yo bok arepnamsiak’ tenen, sal arye, sal mamunuk yolanyak nang ap, tonda, kilapu arye, akilapu mamunuk yoldalamak ninye ap ara, Allah lyepsilirye, talinamsilak kum wektinge.

¹⁰ Ara, ubula donyak ninye ap, ‘Bona weik doproptibye’ tenen, pia patalye ninye ap, yu mek ninye kanye wangalamak mek dilamak ninye ap, yuk nang ati tilila yupu nyabuka lululilamak ninye ap, ‘Yo bok weik dopropnamap’ tenen, tenepce talye yupu nyabuka, winilamice ninye ap, anang nirya ara, Allah lyeplirye, kum talinamle. Sik awininyak ninye ara, wenebuka bataknamle.

¹¹ Amalye winin ning nirya nyapmasina ara, minop talak anggun Korintus mutuku ninye, anggun babye aning atonun winilamlum bukni, nun Deiyoknye Yesus Kristus el si deice ap, Allah El Dib Kanye pil dopsuka ap deice arye, Allah akunum teleb kipdeipsuke. Ara, malye ning talibikirye, mek iliklamak touk, Allah arye, nun malye winin ning nirya kum kipdeipsukce, ‘Na ninye, unamak’ tenen, ansinibuka wipsukce, teleb kipdeipsuke. Winipsuka deice arye, Allah el kanye ara, ‘Aninye ara, akunum diksukumuk unyake,’ tenesulule. ‘Sikda, teleb ninye unamak,’ nyabuka wipdeipsukce, wini talak ara, kanye deibuka tenesulule.

“Anggun nong ara, Allah el aik atonun ulula ati, diksukumuk unamlulume,” nyabuk yupu

¹² Ton ninye arye, nyanyake. “Yata winin ning do nirya, nun kanye aryuk tenenyap ning nirya ara, talye winiptibye,” nyanyak bukni, na Paulus arye, nyapsine. “Ninye winilamak ning yala-yala nirya ara, talya winipniba min teleb kum kipdeipnilirye, kum melinamnile.” Aning atonun yuk nang arye, nyanyake. “Nun tenenyap ning nirya ara, yata nang arye, ‘Meme,’ nyapsitingba, talye kum winiptibye do? Nun tenenyap touk talye winitibye,” nyanyake. “Anirya ara, talye winina uka,” nyanyake. Nyanyak bukni, narye nyapsine. “Yata ning do nirya, pia weika arye, winilamiceba, aminyan ara, awinilamice ning arye, ‘Tapu koupnilyeba, kum lopdanun’ tenen, pia kalikilanune. Amalye winin ning nirya ara, kum melinamsil,” nyapsine.

¹³ Ton nang arye, nyalamak yupu ara, ani. “Allah arye, ‘Din ning aning-aning nirya ara, ninye arye, dinamak’ tenen, kwepdeipsuke. Tonda, ninye mun ara, ‘Din ning aning-aning nirya dinamak’ tenen, nun mun kwepdeibuke,” nyanyake. Nyanyak bukni, aminyan talak ara, Allah arye, din ning yala nirya babye, ninye mun ababye, kum kipdeipnamle. Allah arye, nun nong kwepdeipsuka deiyok ara, ‘Sik nirya arye, talye yoldanamak’ tenen, kum kwepdeipsuke. Aning kum bukni, nun nong kwepdeipsuka deiyok ara, ‘Na siuk erebuka, na mapu ukirye, diksukumuk unamak’ tenen, kwepdeipsuke. Aning atonun, Allah arye, nun nong ati tenesilye ara, ‘Na lyepnirye, pia talinamne. Tonda, kanye talima dukdongobuka neika unamabe,’ tenesulule. Ati, talye yoldana meme, nyapsine.

¹⁴ Nun Deiyoknye Yesus dibukura, Allah el mikip deice arye, kam bukeibuk. Tonda, nun dibibyopura, sirya talak arye, nun babye kam bukdeipnamsile.

¹⁵ Anggun dib tenelulum ninye nirya ara, Yesus Kristus el nong atonun akunum umunye ning ara, moubuka kel kum bikildalulum do? Bikna kumce, talye wininyaba anya arye, dipkoprop ara nunda, Kristus el nong atonun unyap bukni, ton tam bokuka dopropnirye, talye-talye yolamak kil ap dukdongopnaman do? Kume, na kayapu, aning ara, pia malye anya arye, aning ara, kum winiptibye ning nyapsine.

¹⁶ Aning ara, pia kum winiptibye ning bukni, yatanye do nirya, talye yolamak kil dobuka yoplyopura, awiniplya deice arye, sik nong tonok kililanyake. Allah arye, el kanye ara, tonok nong atonun akunum ururake. Allah yupu deice arye, ayupu sekeipsike. ‘Sik bitinye yuk-yuk ururak bukni, nong tonok unamdake.’ (Kejadian 2:24) Ayupu ara, aupmala anya arye, ‘Sik yopdarikceba, nong tonok ururake,’ nyapmasina ara, talye kum nyapsine.

¹⁷ Bukni, yata ninye do nirya, nun Deiyoknye Yesus ati, dib tenebikirye, sik kanye Yesus el deiceuk deibikcopura, el ap, sik ap, sik kanye talima tonok dukdongopdanuka unyake.

¹⁸ Aning ati ara, talye yolanyak ning nirya ara, pia kum wininamlulume. Yuk malye ning winilamak ning ara, sik nong bai tam atonun wininyak bukni, talye yoldakirye malye wininyak ning ara, sikce sik bidamnye nong noutamuk, malye ulilanyake.

¹⁹ Na kayapu, anggun moubuka kum kel kiplum do? Anggun nong ara, Allah El Dib Kanye arye, wekuka usulula anya arye, el aik atonun ululume. Allah arye, el Dib Kanye arepsukbuk, nun talima ak wekuka usulula ati, anggunda, el aik atonun ululume nyapsine. Aning ati ara, anggun nong ara, anggun kanye aniryuk tenelulum ning, ‘Talye luparakuka winiptibye’ tenen, kum wininamlulume. Allah arye, anggun nong talisilya anya arye, anggun nong ara, anggun ninguk kume. Allah el ninguk ululume.

²⁰ Allah el weik mambul ning deice arye, deksuka ati, el na tenen ninye akunum ululume. Aning ati ara, anggun nong ap, anggun nong deice arye, wininamlum ning nirya ap, anirya deice arye, ‘Allah el siuk erebuka, eltibuk kinamap’ tenen, diksukumuk unamlulume. Na Paulus arye, nyapsine.