1 Korintus 5 - Eipomek

“Kil talye yolinye bira, anggun ap neika una kume. Anggun memepdopmunce, anye dobuka, anggun kan-kan noutamak arye, yaklulume,” nyabuk yupu

¹ Winira yuk yupu ton nyapnusine. Se, na kayapu, sik yuk nang arye, nyapnikba, kekepse ara, pia malye yupu nyanike. Ara, “Kume, sik Korintus mutuku dib tenebik ninye kan-kan bukni, tonoknye birye kil talye yobuk ning ara, sik dib kum tenenyak ninye ababye aning atonun kum wininyake. Anye birye, el li koprop arye, domuk kil ubula yobuk,” nyapnikba, kekepse.

² Se, aning ara, aupmal bukni, anggunda weik kanye erebuka kwalinauk ululume. Anggun ton moubuka kum tenelulum do? Teleb ning ara, anggunce, ‘Se,’ tenebuka, mun tulubuk ati, el li koprop domuk kil ati talye yobuknye bira dobuka, anggun kan-kan noutamak arye, bai tam yakdongoptumopura, aning tonok ara pia telebe. Aning kum winipmunyopura, tuba malye winilulume.

³ Ura, na nong ara, anggun ap dipkoprop neika kum unmap bukni, na kanye ara, na kanye ap, na kanye tenen ning ap ara, anggun ap neika unyabe. Anggun nirya na ap neika buktibirye, “Anye birye winipmala ara, pia malye ning,” nyabuka, yupu lipsisikdeiptinye touk, akunum nyapsine. Elda, pia malye winibuk, nyapsine.

⁴ Malye winibuka ati, aminyan ara, nun Deiyoknye Yesus Kristus el si ap, el mikip ap deice bulupmunce, na ap neika buktibirye, narye nyapsitinye touk, anye dobuka, ‘Isa Mutuku Dongonye arye, wenepnamle’ tenen, areplulume.

⁵ Ara, ‘Isa Mutuku Dongonye arye, anye talibuka, el nong deice pia ikin ning deiamliba, el nong ap, el malye winilul ning nirya ap, kulabuka oplopnamle bukni, nun Deiyoknye Yesus tamubuka tukwak mutuku yanamle talak arye, el kanya arebuk ning tonok ara, tuba lyebuka dopropnamle’ tenen, anye dobuka, Isa Mutuku Dongonye areplulume nyapsine. Na Paulus arye, nyapsine.

⁶ Amalye winibuknye ap, anggun ap neika tuba ululum talak ara, anggunce, ‘Nunda, Allah el mapu unyabe’ tenen, kanye erebuka kwalilulum ning ara, malye winilulume. Ura, domon yupu nyapnusine. Sik roti din ning dapmace nang arye, ‘Roti dapnuyap’ tenen, roti nena deiyok ning mitika aryuk, roti bun dongonyak bukni, roti bun noutamak nirya balirye, aroti nirya weik arye, nelule. Aning atonun, anggun dib tenelulum ninye kan-kan arye, tonok malye ululnye tuba aulamliba, anggun nirya arye, “Yo anye bira dauplye,” nyapmunyopura, aminyan ara, el malye winilamlye ning deice arye, yuk nang nirya ati, malye kilinamsile. Anye ap, anggun ap apia neikauk ulamunyeura, el malye winilula deice arye, anggun teleb buka ululum nang ababye, atonun malye ulinamsile. Winipsilyopura, anggun babye malye wininamlume.

⁷ Minop talak sik Yahudi yala ninye arye, ‘Kaplina ati Kwalina dipnamap’ tenen, minop kintinipmek roti nena deiyok ning nirya bai tam dopkwetebikce, nena kum roti winiryuk ning dabuka dibik touk, wininamlulume. Ayupu el nong noutamak ning ara, anggun dib teneplum ninye noutamak arye, malye winin ning nirya wibuka dopkwetepmunce, diksukum ninyeuk umunyopura, Yesus ap talima dukdongobuka telebuk unamlume. Winibuka unamluma deiyok ara, ani. Ara, sik Yahudi yala ninye, ‘Nun malye winin ning Allah arye, kum kipdaneipnamsil’ tenen, Kaplina ati Kwalina ati, domba basam opnarye, Allah ati arilamik touk, nun Kaplina ati Kwalina domba atonunye, Yesus Kristus akunum obikbuk, nun malye wininyap ning pununa ati dibuka deice arye, nun malye winin ning akunum kum kipdeipsuke. Elce akunum teleb kibuka deipsuka ati, anggunda, nena kum roti, winiryuk roti atonun, diksukum ninye umunye ning ara, kum tenepmalum bukni, Allah el kanye ara, ‘Akunum diksukum unyake,’ nyapdeipsukce, telebe tenesulule.

⁸ Aning ati ara, minop talak, sik Yahudi yala ninye Kaplina ati Kwalina yulamik talak arye, nena deiyok ning uamuk roti dopkwetebik touk, nunda yu una ap, malye winin ning yala nirya ap, bataknamabe. Tonda, sik minop Yahudi yala ninye arye, nena deiyok ning kum uamuk roti, nena kum roti, winiryuk ninguk dabuka dilamik touk, nun wini talak ara, tenebuka winina pia kum aryuk, diksukumuk ubirye, Kristus pil dopsuk ning ati ara, kanye deibuka unamabe. Na Paulus arye, nyapsine.

“Talye yolalamik ning ati, wenepnamlulume,” nyabuk yupu

⁹ Ura, yuk yupu ton nyapnusine. Ara, yuk talak sekeipsise surat noutamak arye, ayupu nyapsise. “Sik talye-talye yoldalamak ninye ap, neika din dibuka, neika bukuka, yupu talibuka kum unamlulume,” nyapsine.

¹⁰ Ayupu nyapsise ning ara, ‘Diba tenena kum ninye, malye-malye winilamice ninye ap, neika pia kum unamlum’ tenen, kum nyapsise. Ura, aning ara, yata wiriptum deice arye winiptum do? Kume. “Dip tenena kumce, talye yoldalamak ninye ap, tonda, ‘Bona weika arye, doproptibye,’ tenenyak ninye ap, tenepce talye nyaplobuka, ubula donyak ninye ap, tonda, ‘Aning nun Ni Koprop Allah’ tenen, talye ning si erenyak ninye ap, pia ati, neika kum uptume,” nyapsitinyopura, anggun adiparyuk atukwak mutuku noutamak nirya kum uptume. “Malye wininyak ninye ap, neika una meme,” nyapsitinyopura, dan mutuku binuka uptuma ati, nyaptinye do? Kume, tukwak mutuku nirya malye winin ninye unyaka anya arye, aning ati kum nyapsise.

¹¹ Bukni, wini talak nyapmasin yupu ara, ani. Ara, yatanye do, yata kil do, sikce, “Nunda, Yesus akunum dib tenebupe, Allah el mapu unyabe,” nyaltakanyak bukni, dipkoprop ara, talye yolana ap, ‘Bona weik doproptibye,’ tenena ap, talye ning ati, ‘Nun ni,’ nyabuka si erena ap, yuk ninye ak tilila yupu arye ati lululina ap, tenepce nyaplobuka, ubula dolona ap, yu mek ninye kanye wangalamak mek dena ap, wininyak ninye ara, anggun ap neika kum unamlulume. Anang ap, neika bukuka din dena ababye kume. Anang batakuka, pia memepdopnamlulume. Anggun ap neika una kume. Deiyok ara, ‘Nunda Yesus ati dib tenenyabe,’ nyaltakanyak bukni, sik wininyak ning ara, malye tuba wininyaka ati nyapsine.

^12-13 Ura, min arye, dib kum tenebikce, Allah el mapu kum unmak ninye ara, na yata deiyok deice arye, sik anang ati yupu lipsisiktinye do? Kume. Anang ati ara, Allah dib kum tenenyak ninye ara, sikda bai tam unyak ninye atonun anya arye, Allah elcuk sikti, yupu lipsisikuka bokeiplirye, wenepnamle. Winipnamle bukni, sik asik noutamak atonun ninye ara, Yesus dib tenebikbuk, Allah el mapu unyak bukni, malye tuba wininyak ninye ati ara, anggunce yupu lipsisikmunce wenenalulume. Ati, Allah yupu noutamak nyasilye touk wininamlulume. Ayupu ara, ani. ‘Tuba-tuba malye winilulnye bira, anggun kan-kan arye, bai tam dopkweteplulume.’ (Ulangan 17:7)