1 Korintus 4 - Eipomek

“Ninye arye, yuk nang ati, ‘Anye bira telebe, anye bira malye,’ nyabuka, yupu lipsisikuka bokoliana meme,” nyabuk yupu

¹ Ara, ninye nirya arye, nun Allah yupu peterena deiyok nang ati, tenenamsulum ning ara, nyapnusine. Ara, ‘Anang ara, Kristus el pil melinang unyakce, Allah duknyamuk yupu bukni, wini talak lak nyasilye yupu talibuka peterena deiyok nang usinyake,’ tenenamsulume.

² Ara, ‘Weik mambul ning talibuka, deiyok nang unamak’ tenen, pil dona deiyok ning arinmakibuk, apil deiyok nang arye, weik mambul kanye bobuka wininamak ning ara, nyapnusine. Ara, malye winina ap, pil batakana ap kum aryuk, pia dib tenepmanto ninyeuk unamake. Sikce, ‘Wininamap,’ nyanamak touk, aning batakana kumce, dipkoprop wininamake. Sik pil don talak nirya ara, weik mambul kanye bobuka unamaka ara, na Paulus arye, akunum nyapmasine.

³ Aning nyapmasin bukni, na Paulus ati ara, anggun Korintus mutuku ninye arye do, yuk yupu lipsisikuka bokolina deiyok ninye arye do nirya, ‘E, Paulus ara, teleb ulule. Tonda, Paulus ara, malye ulule,’ nyabuka yupu lipsisikuka bokeipnutuma babye, narye, ‘Se, aning ara, mambule,’ kum tenenune. ‘Se, yupu lipsisikuka bokeipnamniak do?’ tenen, mambul kanye kum bonune. Aninguk kume. Tonda, naryuk, na bidamnye ati, ‘Aning teleb, aning malye,’ tenebuka, yupu lipsisikuka kum bokolilanune.

⁴ Na wininun ning nirya ati ara, akunum tenipdenirye, ‘Aning nirya telebuka’ tenen, na kanye talima ikin kum unulule. ‘Malye ning kum upmanilya deice arye, telebuk unune’ tenen, ikin kanye kum bonune. Bukni, na tenenun deice aryuk, ‘Na Paulus ara, pia telebnye’ tenen, kum nyapdatinye. Narye kume, Yesus nun Deiyoknye aniryuk, “Aning telebe, aning ara, malye,” nyabuka yupu lipsisikuka bokolinamsile. Yupu bokolina Deiyoknye bira, el uka.

⁵ Aning ati ara, nun nirya ati nyapsine. Allah arye, ‘Yesus tamubuka tukwak yanamla ati, atalak ani’ tenen, wepdeibuk sum min kum upmalye talak nirya noutamak arye, yata winin ning do nirya ati, “Aning telebe, aning malye,” nyabuka, yupu lipsisikuka kum bokeipnamlume. Aning nirya daupmaliba, ‘Nun Deiyoknye Yesus dan talak yanamle do?’ tenen, dinauk unamlulume. El yalyopura, elcuk yupu lipsisikuka bokeipnamsile. Yesus tamubuka yalyopura, aning-aning nirya ati, yupu lipsisikuka bokeipnamsile. Yata ning do nirya, kunuknak duknulamak ning nirya ara, dirinak deibuka, lak kipdeipnamle. Ninye sik talima noutamak arye, ‘Winipnamne, winipnamne’ tenen, deiyok ning duknulamak ning nirya ara, laka kipdeipnamsile. Tonok ning babye, kum duknupmantoe. Anirya laka danamle. Winibuka akunum laka kipdeipsilyopura, atalak aniryuk, Allah arye, ninye nirya ati, sik winilamice ning auplye touk, yupu lipsisikuka bokeipnamsile. Teleb winin ning ati ara, “Telebe,” nyapnamsile. Malye ning ati ara, “Malye,” nyabuka wenepnamsile.

⁶ Ara, Yesus dib teneluluma ati, nun du weit atonun ululum ninyeo, anggun sal babye, kilapu babye kekepnululume. Winiryuk nyapmasin yupu nirya ara, ‘Anggun Korintus mutuku ninye kel biknalum’ tenen, asurat noutamak arye, ‘Na Paulus ap, Apolos ap ati, nun bitinye nang arye ara, winipmanto nang unume,’ nyabuka sekeipmasine. Ara, nun peterepnuma deice arye, ‘Allah yupu deice nyasirikce yupu ara, deiyok anye,’ tenebuka kel biklulume. Nun mutuku nang arye, nyanyak yupu ara, ani. ‘Allah el yupu deice arye, nyasilye touk wininamlulume. Anggun tenena deice aryuk, yuk yupu ap, dukdongobuka tabakalongona kume.’ Ayupu nyasilye touk winilulum ning ara, yuk nang ati, “E, anye bira weik mambul bukni, anye bira talinye,” nyabuka tonye erebuka, tonye lungnupdeibuka kum kinamlulume.

⁷ “Ninye si kum erelinamlulume,” nyapmasina ara, talye ati kum nyapsine. Deiyok aupmal ning ara, nyapnusine. Ura, ninye nirya pia ato touk, kum wininyak bukni, pil dona deiyok ning, yuk-yuk areplibuk, ‘Sik kanam aryuk, pil donamaka ara, yala yuk-yuk unamle’ tenen, kweipdeipsuknye bira, yatanye birye do? Anggun bidamnye arye kume. Aning atonun, anggun taliplum ning nirya ara, elce kum arepsukbuk, anggun bidamnye arye doproplum do? Anggun deice aryuk, aning nirya aupsuk do? Anggun taliplum ning nirya ap, anggun winimunye ning nirya ap, Allah el deice aniryuk arepsukbuk, dopropluma anya arye, ‘Nun deice aryuk usulule,’ tenemunce, dilana ap, kwalina ap, winimunye ning ara, yata ati do?

⁸ Ara anggunce, anggun bidamang ati tenelalulum ning nyapnusine. Anggunce, ‘Kume, nunda pia teleb ninye akunum unyabe. Allah el ulul ning kel bikne ati, nun patapsutu ning nirya ara, akunum aupmasila ati, nunda weik kel ninye akunum unyabe. Sik Paulus ap, Apolos ap talye nanguk ururake,’ tenesululume. Anggunce anggun bidamang ati, ‘Nunda weik ninye deiyok nang, Raja nang atonun akunum unyaba anya arye, sik Rasul nang ara, daupmalye,’ tenelulumce, kanye talima erelalulume. Winibuka anggun kanye erebuka tenelalulum bukni, dipkoprop anggunce tenelalulum touk kum winilulume. (Se, anggunda, dipkoprop Allah el talinamsil noutamak arye, weik ninye deiyok nang utumba, ‘Nun ap, anggun ap, aning-aning nirya talibuka utibye’ tenen, patanulule. Bukni, aning ara, kabula.)

⁹ Na kanye ara, Allah arye, ‘Na yupu dobuka peterelbana ati, deiyok koun nang unamak’ tenen, wipdeipsuk nang, nun Rasul nang ati winipsuk ning ara, nyapnusine. Ara ninye olanmace talak arye, ton tam nang arye, ton tam nang ati obisibuka, malye kibiceura, obuka bataklomice nang arye, obuka malye kiyamice nang ati ton dobuka, bisik noutamak pouklobikirye, pilibuka aisubuka akutulamak touk, Allah arye, nun peterena deiyok nang ati, aning atonun kipdeipsuke. Ara, aminyan, talye oplopnamak ninye anya arye, ‘Anang ara, talye nang, sikda mambul pia gume,’ tenelamak touk, Allah arye nun Rasul nang ati benepsukba, talye dib tenena kum nang arye, yaniltanauk malye tenesinyake. Aning-aning nirya winisilye ning nirya ara, ninye tukwak ninye ap, Allah el im deice melinang malaikat ap, sik nirya arye, nunti disinyakce, ‘Anang ara, mambul kume’ tenen, lubakisinyake. Nunda, yuk nang arye, akutulamak ninye atonun unyabe.

¹⁰ Nun Allah yupu peterena deiyok nang arye, Kristus el pil dobibiba, yuk nang nirya arye nunti, ‘Sikda talye walwal nanguk unyake,’ tenesinyake. Winibuka tenesinyak bukni, anggun Korintus mutuku ninye aryuk anggun bidamang ati, ‘Nunda Kristus el mapu unyaba anya arye, nunda weik kel ninye unyabe’ tenen, anggun kanye erelalulume. Yuk ninye arye nun peterena deiyok nang ati, ‘Sikda, mikip kum nang, deiyok kum nang unyak,’ tenesinyak bukni, anggunce anggun bidamang ati, ‘Nunda mikip ninye unyabe,’ tenelalulume. Yuk nang arye nunti, “Anang ara malye nang, nun like,” nyasinyak bukni, anggun Korintus mutuku ninye arye telalulum ning ara, ‘Nunda mambul ninye unyaba anya arye, yuk nang arye, kibuka si erebuka nun si erenamsiake,’ tenelalulume.

¹¹ Nun Allah yupu peterena deiyok nang ara, minop talak dorapce, dukdongobuka, wini talak babye nirya ara, din ning ap, mek ap patanauk unmasilibuk, talyauk lamapdongobuka unyabe. Tonda nun ongoldon baju ara, kwilikiltakne baju uk ongolyabe. Yuk ninye arye, nunti yu upliba, ikin ning nun nong deice delisinyake. Nunda, nun aik kopropa ton, kum upsuka anya arye, ninye asik nang atonun unyabe. Wininyaba anya arye, tia talakuk anyasik-anyasik amapna omapna kinyabe.

¹² Nun bidamnye taruk deice aryuk, ikin pil dobuka ulamibyopura, dikdik usiliba mitang asauk unyabe. Yuk ninye arye, nunti, malye yupu nyabuka, ikin ning nun nong deice deipsicopura, nunce tamubuka aninye ati, teleb yupu uk nimalye arye, nyanyabe. Allah el pil dopya ati ara, yuk ninye arye, ‘Anang ara nun lik,’ tenebuka, ikin ning weik nun nong deice delisinyak bukni, kwang dakna kum aryuk, talye lamapdongobuka, tuba pil donyabe.

¹³ Yuk ninye arye nun Rasul nang ati, utenesinyake. ‘Ninye nirya arye, sik Rasul nang ara, malye nang tenepnamak’ tenen, nunti tilila yupu deice lululisinyak babye, nunce sikti, tamubuka, nimalye arye, teleb yupu uk nyanyabe. Sikti tamubuka yu arye, kum nyanyabe. Minop talak danerye, wini talak ababye, yuk ninye arye nunti, “Kume, sik Allah yupu peteren nang ara, mambul pia kume. Sikda, nun din ning si sekdoba ap bama ap, din ning, dolkwetenyaba atonun unyake. Sikda talyauk unyake,” nyabuka yaniltasinyake.

¹⁴ Ura, na kayapu, anggunda bico tenesinirye, na mapu atonun tenesununa anya arye, ayupu nyabuka sekeipmasina ara, ‘Sik Korintus mutuku ninye alye unamale’ tenen, kum seksene. Aning kum bukni, ayupu kekepmunce, ‘Malye ubibyak do?’ tenen, kanye moupnamluma ati, ayupu sekeipmasine.

¹⁵ Gume, na kayapu, Kristus ap kanye dukdongobuka unamlum talak noutamak ara, sik peterena deiyok nang yupa pia weik yupa nukmanto kumce, sepuluh ribu (10.000) nang ato upting bukni, narye Allah el laka teleb yupu dobuka, deiyok koubuka, peterelamsisibuk, dib tenyamluma anya arye, Yesus Kristus dib tenebuka neika unyaba noutamak arye, na tonok ara, anggun ni koprop atonun akunum unune. Na peterepsisa deice arye, dib teneluluma ati nyapne.

¹⁶ Aning ati ara, “Na unye touk, anggun babye atonun wininamlulume. Yuk ton kume,” mikip deice arye, nyapdeipsine. ‘Na Paulus arye,’ nyapsine.

¹⁷ ‘Na wininye touk anggun babye, atonun wininamlulume,’ tenenun ati ara, narye Timotius dobuka, anggun dam dopdeipnusine. Timotius ara, pia kanye deibuka bico tenenun ati, elti, na mi atonun tenenune. Nun Deiyoknye Yesus el pil dona ati ara, pia batakana kumce, etekdop asa pil dolinye ulule. ‘Luba kina kum, aninguk wininamak’ tenen, Timotius arye, anggunti peterelyanamsile. Ara, na Paulus ap, Yesus Kristus ap, kanye talima dukdongobuka pia diksukumuk unye ning nirya ara, tuba tamubuka tonap peterepsilyopura, kel kinamlulume. Na wininye ning ap, narye mutuku-mutuku nirya dib tenebuka unyak ninye ati peterenye yupu ap ara, ansinibuka ulule. Timotius arye, anggun dam yalyopura, ayupu uk peterenamsile.

¹⁸ Ura, anggun Korintus mutuku ninye kan-kan bukni, ton nang ara, ‘Paulus ara, nun dam kum dilyanamsile’ tenen, weik kanye erebuka kwalinyake.

¹⁹ Wininyak bukni, nun Deiyoknye Yesus arye, ‘Telebe dabetue,’ tenepnutopura, dipkoprop anggun dam minopce dilyanamsine. Anggun dam yatinyopura, sik kwalinyak ninye nyanyak yupu kel kipnamne. Aninguk kum bukni, ‘Anang ara, Allah El Dib Kanye arye, mikip aribukba, mikip ninye unyak do, talye ninyeuk unyak do?’ tenen, dipdenirye, kel biknamne.

²⁰ Aning nyapmasina ara, talya ati kume. Deiyok ara, Allah arye lyepsilirye, talisilibuk, el ap neika unyaba noutamak ara, talye yupu deice arye, nyaltakalamak ning ati, ‘Se, aning ara mambule,’ kum tenenyabe. Aning kum bukni, ‘Allah El Dib Kanye arye, el mikip tuba-tuba arisiliba, el mikip arye, ulamap ning ara, aning tonok ara mambule,’ tenenyabe.

²¹ Aning ati ara, anggun patapsilye ning ara, dan ning do? Yu upniliba, wenepsinirye, kama dobuka olyanamsin do? Akumopura, bico tenepsinirye, kanye deibuka nimalye aryuk yanamsin do? Anggunce, ‘Teleb ning dan do?’ tenen, wipnamlulume. Na Paulus arye, nyapsine.