1 Korintus 3 - Eipomek

Paulus arye Korintus mutuku dib tenelamik ninye arye, talima wilibuka bokolilalamik ning ati, nyabuk yupu

¹ Ara, Yesus dib teneluluma ati, nun du weit atonun ululum ninyeo, anggun sal babye, kilapu babye kekepnululume. Anggun mutuku peterelamsise talak noutamak ara, ‘Allah El Dib Kanye akunum talyamukba, talima akunum wisiamuk ninye unyak’ tenen, kum peterelamsitinye. Atalak ara, talye tukwak ninguk bobuka talinyak ninye atonun ulaluma ati, nong noutamak ara, kum kekepmanto ninye ulalume. Anggunda, Kristus akunum dib tenyamlum bukni, mitik mapu tenenyak kanye atonun bobuka ulalume. Ati, na ap ulamubu talak noutamak ara, ikin yupu ara, kum peterelamsitinye.

² Winipmanto ara, sik nin yapu arye, sik mapu ati dina aning-aning nirya min dipmanto kum talak, moum yunguk min arilamak touk, atalak ara, pia ikin noutamak yupu kum bukni, mitik kanam yupu, deice ninguk peterelamsise. Minop talakuk kume, wini talak babye, anggun talima min kum wisipsuka ati, noutam yupu min kum kekeptume.

³ Aning ara, tilila ati kum nyapsine. Deiyok ara, anggunda, dib tenena kum, talye tukwak ninguk tenenyak ninye atonun tuba ululume. Anggun kan-kan arye, yu upliba, yupu deice waldana ap, ‘Nun tam ninye ara, telebe, sik otam ninye ara, malye’ tenen, talima wililana ap, tuba winilalulume. Winilulum anya arye, talye dib tenena kum ninye atonun ululum do, kum do, nyapsine. Wini talak umunce, winimunye ning ara, dib tenena kumce, talye-talye unyak ninye winilamak touk ululum do, kum do?

⁴ Kume, anggun kan-kan bukni, tonoknye arye, “Nara, Paulus, el yupu uk kekebuka melinuna anya arye, nara telebnye,” nyaplyeura, yuknye birye, “Winilyam bukni, nara, Apolos el yupu uk kekebuka melinuna ati, dipkoprop nara telebnye unune,” nyalule. Winibuka wilildaluluma anye arye, tenipdelulume. Winibuka tenepdamunce, nyaldalulum talak ara, talye dib tenena kum ninye arye winildalamak atonun ululum do, kum do?

⁵ Ayupu atonun nyabuka, waldalulum bukni, Apolos ara, yatato weik mambulnye ululce yata ning ton nyalula ati, utenebuka nyalulum do? Tonda, na Paulus ara, yatato weik mambulnye upniba, utenebuka nyalulum do? Kume. Nun bitinye ara, talye pil melina nanguk, Allah el amu tam pil don nanguk unyame. Allah arye, nun bitinye ati, ‘Winibuka pil donamdake,’ tenyamsuka atonun, nun bitinye yuk-yuk bukni, peteresinyamba, dib tenelamlume.

⁶ ‘Yala ning bongopnamle’ tenen, doklamak touk, narye minopce Allah yupu deiyok koubuka peterelamsise. Winilamsibuk, wa deiyok ninye arye, ‘Yala ning paplirye, nepnamle’ tenen, doklamak ning dam mek kwebuka diklamak touk, Apolos arye aminyan ara, dukdongobuka, Allah yupu peterelamsuke. Winibuka pil dolamnumu bukni, Allah el mikip deice aryuk, adoklamnumu ning kwakuka bongobukce nebuke. Doklamnumu ning nebukce, duk moubuka wisibuke. Aning nirya deiyoknye bira, Allah el uka, nun bitinye kume.

⁷ Aning ati ara, yala ning doklamlanye babye, mek kwebuka dikilongolamlanye babye, sikti, “Anye bira, weik mambulnye. El pil dolye ning ara, weik mambule,” nyabuka sik si kum ereptibye. Dipkoprop weik mambulnye bira, ‘Aning-aning nirya paplirye, nepnamle’ tenen, mikip kililulnye, Allah el tonoka. Yuk nang ton kume.

⁸ Yala ning doklamlanye ap, mek kwebuka dikilongolamlanye ap, sikce, ‘Nong upnamle’ tenen, pil dona deiyok ara, tonok ninguk teneladurake. Tonda, sik bitinye yuk-yuk pil dorikcopura, sik pil yuk-yuk doprikce touk, Allah arye sik dekna ning yuk-yuk bokuka areplibuk, dopropnamdake.

⁹ Anggun Korintus mutuku ninye ara, Allah el wa dam atonun ululume. Tonda, anggunda, Allah el asik atonun ululume. Anggun Korintus mutuku ululum ninye ara, na ning kum ululume. Aning atonun Apolos, el ning kum ululume. Na ap, Apolos ap ara, Allah el amu tam pil melin nanguk unyame. Ati, na ap, Apolos ap, neika pil melibuka donyame.

¹⁰ Ara, winipmanto yupu deice arye, asik dona atonun ning ton nyapnusine. Allah arye nati, ‘Na pil dopnamnil’ tenen, pil dona deiyok ning, el mikip talye arepnuka deice arye, aik dona weik kel nang arye, aik ayukumna yo pia teleb ning iklamak touk, Allah yupu peterena deiya kouna ati, Allah yupu peterelamsise. ‘Anggun dib tenepnamlum’ tenen, aik ayukumna iklamaka atonun ning, pil dolamsa ani, aminyan ara, adeice arye yuknye ton, aik nong dolamaka atonun, wini talak pil dolirye, peteresulule. Bukni, apil-apil don nang nirya ara, ‘Mankau kanye arye, malye pil donyap’ tenen, sikce sik bidamang ati, adiparyuk pia moubuka dilanamake. Ara, talye ati kum nyapsine.

¹¹ Deiyok ara, Allah arye nyabukba, aik ayukumna yo atonun ning akunum iksa anya arye, yuk ninye nirya arye, yuk ayukumna yo kum iktinge. Winipmanto yupu deice ayukumna yo nyapman yupu nong ara, Allah arye dipkoprop ning kintinibuk ning ara, ayukumna yo atonun ning ara, tonokuk ulule ara, Yesus Kristus el uka.

¹² Asik nong domikce talak ara, ton nang arye, pia unamle ning, kat ning emas do, perak do, urasin pia teleb keil do, dekna weik ning arye teleb aik donyake. Ton nang ara, minopce kum danamle ning, yo do, maning do, kapce bok do, amitik ning arye donyake.

¹³ Wini talak ara, “Aning ara, telebe. Aning ara, malye,” tenyak touk pil donyak bukni, wini talak ara, ‘Aning ara, nong upnamle, aning ara, talye ning uka’ tenen, adiparyuk kum nyaptibye. Bukni, Yesus tamubuka yalirye, ninye nirya ati, yupu bokeipnamle talak ara, aning-aning nirya ati, lak kipdeipnamsile. Dirinarye, kunukmalyak laka kilamle touk, Allah arye yupu bokuka dipdesilirye, “Malye ning ani, teleb ning ani,” nyabuka, lak kipdeipnamsile. Ninye nirya arye dolamikce pil nong ati, ‘Teleb ning dan do, malye ning dan do’ tenen, Allah eluku buk deice arye asipdenamsile.

¹⁴ Allah el uku buk deice arye, ninye nirya sik dolamikce pil asipdeliba, uku buk deice arye apil nong diplirye, sirya dakna kum, tuba teleb uplyopura, Allah arye anang ati sik dekna ning areplibuk, dopdopnamake.

¹⁵ Allah el uku buk deice arye, sik pil dolamikce ning yuk-yuk asipdeliba, uku buk arye apil nong nirya diplyakarye, sirya daklirye, nong ton kum uplyopura, sik dekna ning arepliba kum dopropnamake. Bukni, apil don nang sik nonguk ara, Allah arye, lyepnamle. Lyepnamle bukni, winipmanto ara, uku buk arye ninye aik diliba, ‘Uku diplyak’ tenen, asik pum arye, bik-bik abuka uku buk noutamak arye wekuka, bai tam balamak touk, malye pil donyak ninye aminyan talak ara, aning atonun winipnamake.

¹⁶ Na kayapu, yuk yupu ton nyapnusine. Anggun moubuka kum tenepmalumce, kum kel bikmalum do? Allah El Dib Kanye ara, anggun talima noutam ulula anya arye, anggunda Allah el teleb aik atonun ululume.

¹⁷ Yatanye birye do nirya, el nong koprop bukni, Allah el aik ati, malye winililulba, el nong malye uplyopura, Allah arye anye biti, wenebuka oplopnamle. Ara, talye ati kume. Deiyok ara, dib nong ara, Allah el aik atonun ulula anya arye, anggun nong ara, pia mambule. Allah arye nunti, ‘Na ning’ tenen, akunum wipdeipsuke. Winipmanto yupu deice arye, “Nunda Allah el aik unyabe,” nyapmasina ara, dipkoprop ayupu el nong ara, anggun dib tenelulum ninye, anggun kanye talima ap, anggun nong ap ati nyapsine. Aning ati ara, anggun malye winilana bataklulume. Kanye moupnamlulume.

^18-19 Wini talak talye ninye arye, ‘Se ayupu ara, weik kel yupu. Weik mambul yupu,’ tenenyak ning ara, Allah el kanye ara, ‘Aning nirya ara, talye ning uka,’ tenelule. Na kayapu, anggun bidamang winilulum ning ati, tilila yupu nyapdamunce, dib kum tenenamlulume. Yatanye do nirya, wini talak dib tenena kum, weik kel ninye arye kel kiyamice ning ati ara, aning kel bikmunce, ‘Nara, weik kelnye akunum unune,’ tenebuka ulyamnye bira, kanye moupnulyame. Atalak ara, dib tenena kum ninye arye, ‘Se, aning ara, weik mambule. Aning ara, weik kel bikne ning ara, anye,’ tenebikirye, erenyak ning nirya ara, Allah el kanye ara, ‘Aning nirya ara, talya talye ning uka. Aning nirya ara, nong kum uplirye, kum danamle,’ tenelule. Aning ati ara, yatanye do nirya, sik dib tenena kum, talye ninye arye, ‘Aning weik mambule,’ tenenyak ning ati batakliba, talye nang arye elti, ‘Anye bira walwalnye,’ tenebikirye, nyabikca babye, mambul kume. Allah arye, talye tukwak ning bataklinye biti, ‘Na kanye ara, elda weik kelnye,’ tenelule. Allah arye anye biti, ‘Telebe,’ teneplyopura, ara weik mambule. Aning atonun, Allah yupu noutamak arye ayupu ton sekik. ‘Diba tenena kum ninye, aning-aning nirya kel bikamikce ninye ara, ‘Nunda, weik kel nang,’ tenelanyak bukni, atenelamaka noutamak arye, kabang mankau arye wena pum bisik wekliba youlamle touk, Allah arye anang ati wenepnamle. Ara, sik weik kel bikamikce ning deice arye, tenepce arye winilamice ning ati, wenepnamle.’ (Ayub 5:13)

²⁰ Tonda, Allah yupu noutamak arye ayupu ton sekamik. ‘Allah el kele. Dib tenena kum ninye arye, sik weik kel bikne deice arye, tenenyak ning ara, dipkoprop talye ning uka. Nong kum uplirye, kum danamle.’ (Mazmur 94:11)

²¹ Aning ati ara, na Paulus arye, anggun Korintus mutuku ninye ati nyapsine. Ninye deiyok nang si erebuka kum kwalinamlulume. Tonda, ninye arye kel bikikirye, pil dolamak ning ap ati, tonap kum kwalinamlulume. Yata yala ning do nirya, aning-aning nirya ara, Allah arye nun melina ati, aresulule. Anirya ara, anggun ning uka.

²² Ara, na Paulus do, Apolos do, Peterus do, tukwak mutuku noutamak ulul ning do, kam una deiyok ning do, dipna do? Wini talak usilye ning nirya ap, aminyan talak unamle ning nirya ap, Allah arye anggun melina ati, talye aresulule. Anirya ara, anggun ning uka.

²³ “Aning-aning nirya ara, anggun ning uka,” nyapmasina ara, tilila kum nyapsine. Deiyok ara, anggunda Yesus Kristus ap, talima dukdongobuka ululumba, elce anggunti talisulule. Yesus Kristus ara, Allah arye, talilule. Allah ara, aning-aning nirya deice tam ulirye, talilule. Elda anggun weik deiyoknye ulirye, talisulula anya arye, “Aning-aning nirya ara, anggun ning uka,” nyapmasine.