1 Korintus 2 - Eipomek

Paulus arye, Allah El Dib Kanye mikip deice arye peterelamuk ning ati, nyabuk yupu

¹ Na kayapo, Yesus dib teneluluma ati, nun du weit atonun ululum ninyeo, anggun sal babye, kilapu babye, kekepnululume. Narye anggun dam yasirye, Allah el laka teleb yupu, ninye lyena yupu dobuka peterelamsise talak ara, weik cang yupu ap, weik kel bikne yupu ap deice arye, kum peterelamsise. Ninye nirya kekepmanto yupu deice aryuk peterelamse. Winilamsa ara, deiyok aupmale.

² Ara, na tenyamsi ning ara, ani. ‘Kume, Korintus mutuku peterenye talak nirya ara, yuk ning kel bikamse ning tenena kumce, tonok weik mambul ninguk dobuka, peterenamne,’ tenepse. Ara, ‘Yesus Kristus arye nun lyena ati, wanwanun yo deice dibuk yupu, aninguk, peterenamne,’ tenepse. Utenepsirye, ayupu uk peterelamsise.

³ Na anggun dam yasirye ulamse talak ara, kele weik nang arye winilamak touk kum ulamse bukni, ilil upnukba, na mikip kum mitang asa arye una ap, ilil una ap deice arye, sirim talilamnukba, adip arye peterelamsise.

⁴ Narye peterelamse deiyok yupu ap, peterena talak laka nyalamse yupu ap ara, pia teleb ubuka mikip arye peterepnibuk, ‘Na pia teleb yupu nyapnye deice arye, sik adiparyuk dib tenepnamak’ tenen, peterelamsise. Ara, anggunce tamubuka kum nyapmanto yupu ap, weik kel bikne yupu ap deice arye, kum peterelamsise. Aning kum bukni, na peterelamse talak noutamak arye, ninye nirya kekepmanto yupu peterelamsise bukni, Allah El Dib Kanye arye, el mikip deice arye, anggun talima noutamak pil dolamsukba, anggun moubuka kel bikamlume.

⁵ Na peterelamse talak noutamak arye, lak kibuka peterelamsisiba, Allah El Dib Kanye, el mikip deice arye pil dopsuka ara, deiyok aupmale. Ara, ‘Korintus mutuku ninye dib tenepnamak ning ara, narye weik kel biknye yupu deice peterepnibuk, adeice aryuk dib tenepnamak’ tenen, winilamse. Aning kum bukni, teleb ning ara, ‘Allah elda, mikip weiknye’ tenen, kel bikikirye, ‘El deice aryuk dib tenepnamak’ tenen, ninye nirya kanam aryuk kekepmanto yupu deice arye peterelamsise.

“Dipkoprop weik kel bikne deiyok ning ara, Allah El Dib Kanye aryuk aresulule,” nyabuk yupu

⁶ Ura, nun Allah yupu peterena deiyok nang arye, dipkoprop weik kel bikne deiyok yupu peterenyap bukni, ara sik talima akunum wisibuka, dipkoprop Allah el bisikuk banyak ninye kekebikce talakuk, ato yupu deice arye, peterenyabe. “Weik kel bikne deiyok yupu,” nyapmasina ara, atalak noutamak talye-talye unyak ninye ap, atalak noutamak aning-aning nirya talibuka, weik ninye deiyok ninye ap arye, ‘E, ayupu ara, weik kel bikne yupu,’ tenenyak yupu atonun ning ati kum nyapsine. Wini talak ara, aninye weik nang unyak bukni, aminyan talak ara, Allah arye ato ninye nirya wenena ati, malye kibuka weneplirye, sik nyanyak yupu ap, sik wininyak ning ap, kum kipdeipnamle. Sikce, sik tenenyak ning babye, nong kum upnamle. Allah arye sik nirya kum kipdeiplirye, sirya daknamle.

⁷ Kume, nunce weik kel bikne yupu nyanyaba ara, Allah minop talak arye duknyamuk ning ati nyapsine. Allah arye aning-aning nirya min kum kwepdeiamuk talak arye, nunti utenyamsuk. ‘Aweik kel bikne ning deice arye, na ap, na mapu ap, talima dukdongobuka ulamibya ani, na pia teleb unye touk, sik babye, atonun teleb kipdeipnirye, na ap neika unamake. Winipnyopura, aninye ereipnamne,’ Allah arye, aning tenelamsuke.

⁸ Aunyap talak noutamak, tukwak mutuku weik ninye deiyok ninye nirya ara, Allah el weik kel bikne deiyok yupu moubuka kum kekenyake. Tonda, sik moubuka kekelamtingtoura, nun Deiyoknye Yesus dobuka, wanwanun yo deice arye kum opmatinge. Yesus ara, Allah el pia teleb weik mambulnye ulye touk, laka kilisululnye Yesus ulul bukni, atalak ninye deiyok nang arye Yesus obika anya arye, nun kele. Anang arye, Allah el weik kel bikne deiyok yupu moubuka kum kekelamikce, bita kel kum bikamike.

⁹ Sik moubuka bita kel kum bikamik bukni, Allah el yupu laka nyalamuknye, nabi Yesaya arye sekamuk yupu ara, nyalule. ‘Allah arye nyapdeibuk. “Na ti, sik kanye na deice delininyak ninye ati, ‘Pia teleb ning arepnamne’ tenen, akunum kintinipse ning ara, sik kum biktinge. Aning ara, yata ninye do nirya sik asing arye eibuka kum elilamik. Aning ati yuk nang ak kum nyalamikba, sik amul arye kum kekelamik. Tonda sik kanye talima pum tam arye tenebuka kum tenipmanto ning anya arye, kum tenelamik.” Allah arye nyabuk.’ Anirya ara, na Allah arye, kintinipdeipsiura, nabi Yesaya arye sekamuk. (Yesaya 64:4)

¹⁰ Yesaya arye, ayupu sekamuk bukni, wini talak ara, Allah arye nyapdeibukba, Allah El Dib Kanye arye, nun talima pum tamak pil dosilya deice arye, laka kilisulule. Yata ning do nirya, ara, Allah elce minop talak duknyamuk ning babye, el yuk datenelul ning babye, Allah El Dib Kanye arye, aning nirya bobuka kel kililulce, peteresulule.

¹¹ Yatanye birye, yuknye biti, anye bira el kanye talima noutamak tenelul ning kel biktu do? Kume, aning kum winipmanto. Aning tenelulnye, eluk ara, el kanye talima noutamak tenelul ning kel bikilule. Aning atonun, Allah El Dib Kanye aryuk, Allah el tenelul ning kel kilule. Ninye nirya arye kel kum kiptibye.

¹² Sik dib tenena kumce, talye-talye wininyak ninye tenenyak ning ara, nun dib tenenyap ninye arye, kum talinyake. Sik babye, kanye talima deice tenebikirye, talibuka wininyak ning ara, pia yuke. Ara, Allah arye nunti, bico tenepsukce, el Dib Kanye arepsukbuk, doprobupe. Aning babye, tilila ati kume. Ara, Allah arye talye arisulul ning, pia teleb ning nirya, ‘Moubuka kel bikinamak’ tenen, el Dib Kanye arepsuke.

¹³ Allah arye nunti, talye arisulul ning nirya ati, laka nyabuka peterenyap talak nirya ara, talye ninye arye weik kel bikne yupu peterenyaka deice arye kum nyanyabe. Aning kum bukni, Allah El Dib Kanye arye, el yupu peteresilyopura, nun kanye talima noutamak kekebibirye, ayupu deice aryuk, Allah El Dib Kanye akunum doprobik ninye ati, laka nyabuka peterenyabe.

¹⁴ Yatanye do nirya, dib tenena kumce, Allah El Dib Kanye min kum doprobuknye birye, Allah El Dib Kanye arye nyasilye yupu nirya ati, ‘Ayupu ara, talye yupu. Nong kum upnamle yupu,’ teneplirye, ayupu moubuka kum kekeptue. Aning ati ara, ayupu kekebuka kum talilule. Ayupu ara, Allah El Dib Kanye arye, nun talima pil dosilya deice aryuk moubuka kekenyapa anya arye, Allah El Dib Kanye min kum doprobuknye bira, Allah El Dib Kanye arye nyasilye yupu kum kekeptue. Aning ati ara, Allah El Dib Kanye arye, nyasilye yupu nirya ara, kum kekeplirye, kum dololule.

¹⁵ Yatanye do nirya, dib tenebukura, Allah El Dib Kanye arye akunum talilulnye bira, anye birye aning-aning nirya ati, kintinipdelirye, ‘Teleb ning ani, malye ning ani’ tenen, yupu bokdeiptue. Atonye birye winiptu bukni, yuk ninye ara, sik dib tenena kum, yuk talye wininyak ninye ara, aning nirya ati ara, moubuka kum teneptingce, yupu kum bokdeiptinge. Tonda moubuka kum kel biktinge. Deiyok ara, Allah El Dib Kanye arye, sik talima kum talilula ati, nunce peterenyap yupu, moubuka kum kel biktinge nyapsine.

¹⁶ Aning ara, tilila ati kum nyapsine. Nabi Yesaya arye, sekamuk yupu noutamak deiyok aupmale. Ayupu ara, ani. ‘Yatanye birye, Allah el kanye talima noutamak tenelul ning ara, akunum min arye kel bikam turye, Allah ati, “Aning winipnalyam, aning ara, kum winipnalyam,” nyaptu do? Kume, Aning ara, kum winipmanto.’ (Yesaya 40:13) Aning ati ara, dib tenena kumce, talye wininyak ninye ara, Allah El Dib Kanye arye peteresulul yupu ara kel kum bikamting bukni, nun dib tenebupuba, Allah El Dib Kanye arye, nun kanye talima talisulul ninye ara, aning moubuka kel biktibye. Deiyok ara, nun Allah yupu peteren nang ara, Allah El Dib Kanye arye, nun talima ak pil dosilya deice arye, Kristus tenelul ning ara, nun babye, atonun tenenyabe. Paulus arye, nyabuk.