1 Korintus 16 - Eipomek

Yuk mutuku ninye bukni, dib tenebik ninye, sik melina ati, yo bok bulubuka delina ati, nyabuk yupu

¹ Winira, yuk yupu ton nyapnusine. Sikce nati, “Allah dib tenebik ninye, talye bona utotowa talina kum ninye unyak nang, sik melina ati, yo bok bulubuka deibupu ning ara, yata wiripnamap do?” nyabuka, asipdenulum ning ati, nyapnusine. Sik Galatia mutuku unyak ninye, Allah dib tenenyak ninye ati, ‘Winipnamlume,’ nyabuka laka nyapse touk, anggun Korintus mutuku ninye babye, aning atonun wininamlume.

² Winibuka wininamlume. Minggu-minggu nirya, anggun Allah yupu kekena ati bulubuka weknamlum talak deice arye, anggun yuk-yuk bukni, anggun nirya arye, yo bok awapsilye ning awapsilye touk, noutamak arye bokuka, ‘Yuk mutuku dib tenebik ninye ati melibuka arenamap’ tenen, delinamlulume. Weika arye dololulnye bira, weika arye delinamle. Mitika aryuk dololulnye bira, mitika aryuk delinamle. Anggun yo bok awapsilye touk delinamlulum ning ara batakna kumce, pia arenauk unamlulume. Ara, na Paulus arye, anggun dam yanyopura, anggunce, ‘Se, Paulus yanmala anya arye, nun adiparyuk yo bok yata wiribuka bulupnuyap do?’ tenen, ‘Kanye imun upsilyak,’ tenena ati, nyapsine.

³ Yo bok bulubuka akunum deipmunyopura, na aminyan yanyopura, anggunce wibuka deipnamlum nang ati, ayo bok dobuka arena ati, laka nyan surat seknirye, arepnyopura, anang arye, sik bulyamikce yo bok ap, asurat ap bobuka, Yerusalem mutuku dib tenebikce, talye bona utotowa talina kum unyak ninye ati, sik dam bicak arye, arepnamake.

⁴ Aminyan ara, na yanyeba, yupu talibibirye, ‘E teleb ning ara, Paulus ap, anang ap ara, Yerusalem mutuku neika arelbiting,’ tenebibyopura, anggunce wipnamlum nang ap, na ap, neika uk, Yerusalem mutuku binamabe.

Paulus arye, Korintus mutuku ninye ati, morobuk yupu

⁵ Na kayapo, yuk yupu ton nyapnune. ‘Makedonia tam mutuku peterepra binamne,’ tenepsa ati, amutuku noutamak nirya peterepra banmanya ani, akunum binyopura, aminyan talak ara, anggun dam Korintus mutuku ton tamubuka yanamne.

⁶ Min kum tenepse bukni, anggun dam akunum yanyopura, ‘Nun neika mapnamap do, adiparyuk yuk mutuku benamne do?’ tenenamne. Tonda, yata mutuku do, na aminyan talak ara, benamne mutuku ati, ‘Sik Korintus mutuku ninye arye, melipnamniak’ tenen, ‘Arukna wala nirya anggun ap neika mapnamap do, kum do?’ tenen, tuba tenenune.

⁷ Adip aryuk anggun dam yatinye bukni, ‘Anang ap eipdabirye, adiparyuk kirikuka yuk mutuku binamne’ tenen, kum patanulule. Aning kume. ‘Anggun ap, na ap neika mabuka, din dibuka, yupu talibuka weik arye, unamabe’ tenen, patanulule. Bukni, aning babye, nun Deiyoknye Yesus arye, ‘Aning telebe,’ tenepnutopura, wininamne. Kumopura kume. El kanye aryuka.

⁸ Wini talak Efesus mutuku ununa anya arye, apia unmanya ani, Kaplina kwalina talak, el si ara, Pentakosta talak akunum uplyopura, amutuku batakuka yuk mutuku benamne. Min kum binamna deiyok ara, nyapnune.

⁹ Ara, na nyanye yupu ap, na wininun ning ap ati, ‘Aning ara, nun like’ tenen, yanipnikirye malye kibuka bisininyak ninye weik amutuku unyak bukni, Allah yupu peterena ati, pil dona talak lo weik teleb ning, amutuku tuba upmanile anya arye, asukumuk tonap weik tonun mapnamne. Ara, ‘Peterepnibuk, ninye weik arye, dib tenepnamak do?’ tenen, unamna ati nyapsine.

¹⁰ Narye nun Deiyoknye Yesus, el amu tam unirye, el pil dopra balamne touk, nun kwit Timotius babye atonun, pil dobuka ulula anya arye, elce anggun dam, Korintus mutuku yalyopura, anggun ap, neika unamlum talak nirya, teleb ubuka neika unamlume. Ara, ‘El ilil uplyak’ tenen, anggunce elti, taruk talibuka, “Telebe,” nyabuka, melibuka unamlume.

¹¹ Ati, yata nang do nirya, ‘Anye Timotius ara, nun lik anya arye, taruk arebibyak arye, kum yukupnuyap’ tenen, batakana meme. Ara, ‘El ilil una kumce, kanye deibuka unamle’ tenen, nyapsine. Anggun ap neika umunye bukni, el binulirye, kintiniblyopura, ‘Tamubuka Paulus dam melibuka bitue’ tenen, anggunce Timotius biti, “Telebe Paulus dam dabilyame,” nyabuka, nimalye arye melipmunce, na dam dopdeipnamnulume. Yuk nang dib tenebikbuk, nun weit yapu atonun ninye, yuk nang ap, el Timotius ap, na dam yanamaka anya arye, ‘Dan talak yanamak do’ tenen, na dinauk unune.

¹² Winira, nun kwit Apolos biti nyapnusine. ‘El ap, sik yuk nang, dib tenebik nang ap, sik Korintus mutuku neika biting’ tenen, na mikip arye, el Apolos biti nyapse bukni, wini talak ati ara, elce, “Kume, na wini talak kum benamne,” nyapnuke. Ati, aminyan lo uplye talakuk, elce anggun dam yanamsile.

¹³ ‘Malye winibibyak’ tenen, kanye moubuka pia kalikildanauk unamlume. Allah ati dib tenelulum ning ap, Allah el yupu ap ati, ‘Dip do, telela do?’ tenena kum arye, pia talibuka unamlume. ‘Se, yata wiripnamsiyak do?’ tenen, ilil asa una kume. Pin-pin kanye bobuka, mikip aryuk wininamlume.

¹⁴ Anggun wininamlum ning nirya noutamak arye, yuk ninye ati bico tenebuka, ‘Melinamabe’ tenen, deice aryuk unamlume.

¹⁵ Ara, na kayapo, anggunda Yesus ati dib tenemunyeba, du weit atonun unyabe. Anggun kele, sik Akaya tam unyak ninye kan-kan, Stefanus ap, el aik unyak ninye ap, Allah yupu peterebupeba, sik minopce dib tenebike. Sik yuk nang nirya ara, aminyan tamuk dib tenebike. Yuk nang bukni, Allah ati akunum dib tenebikbuk, Allah arye, ‘Na’ tenen, wepdeibuk ninye nirya ati, Stefanus ap, el aik neika unyak ninye arye, ‘Aninye melinamabe’ tenen, apiluk dobuka unyake.

¹⁶ Wininyaka anya arye, na kayapo anggun Korintus ninyeo, mikip arye, ayupu ton nyapsine. Stefanus ap, el aik unyak nang ap, sik diksukum ulamak atonun unyak ninye arye, ‘Yesus ati diba tenebik ninye melinamap’ tenen, pil donyak ninye nirya ara, sik amu tam bukuka, sik nyanyak yupu nimalye arye, kekebuka unamlume. Sik anang arye, ‘Allah el piluk donamape’ tenen, tabakikirye, nun ap pil mikip arye, donyapa ati, ayupu nyapmasine.

¹⁷ Ara, Stefanus ap, Fortunatus ap, Akaikus ap na dam yayikba, neika ulamubu talak nirya ara, na kanye deibuka unune. Ara, anggun Korintus mutuku ninye na dam kum yanuka utibirye, kum melipnutum bukni, anggun ap, na ap neika kum ulamubu talak ara, asi nyapmasin nang arye, na patalamnuk ning ati, aribuka melyamnika anya arye, na kanye deibuka unune.

¹⁸ Anang arye nati, na kanye talima tuba kwa barilamnikba, kanye deibuka ulamse. Aning atonun, sik anyapman nanguk, sikce anggun Korintus ninye ati, atonun winilamsike. Anang atonun nang nirya ara, pia teleb nang anya arye, kibuka si erenamlume.

Paulus arye, asurat sirya dakna ati, nyabuk yupu

¹⁹ Ara, Asia tam dib tenebuka unyak ninye nirya arye, anggun Korintus mutuku ululum ninye ati, “Nun kayapu, telebe,” nyalisinyake. Aning atonun, Akwila ap, el kil Pereskila ap, nun nirya ap, Yesus ap talima dukdongobuka neika unyaba anya arye, sikce, anggun Korintus mutuku ululum ninye ati kanye deibuka, “Telebe,” nyalisururake. Tonda, sik aik pum wekuka Allah yupu kekenyak ninye arye, anggunti, “Telebe,” nyalisinyake.

²⁰ Na unyak Efesus mutuku dib tenekirye, nun weit yapu atonun ninye, sal babye, kilapu babye, sik nirya arye, anggun Korintus mutuku ululum ninye ati, “Telebe,” nyalisinyake. Nun dib tenenyap ninye nirya arye, yuk dib tenenyak ninye ati eipdabirye, ‘Na kwit koprop’ tenen, talima melisiliba, si erebuka mutulanyap touk, anggun Korintus mutuku ululum ninye babye, yuk dib tenenyak ninye nirya ati aning atonun wininamlume.

²¹ Nara, Paulus, na taruk aryuk asurat sirya dakna yupu, “Telebe,” nyan yupu ati sekmasine. Yuknye birye kume.

²² Yata nang do nirya, sikce nun Deiyoknye Yesus ati, ‘Elda talinye’ tenen, el deice sik kanye kum delinyak ninye ati ara, na kanye ara, ‘Allah arye, sik weneplirye, uku din mutuku dopkweteptue’ tenen, nyapsine. “Se, na Deiyoknye Yesus, adiparyuk tamubuka yalyame,” nyapne.

²³ Nun Deiyoknye Yesus, bico tenepsilirye, el kanye aniryuk melisilye ning, ‘Weika arye, arenamsile’ tenen, Allah morosunune.

²⁴ Anggun ap, na ap arye, Yesus Kristus ati dib tenebupeba, el ap, talima dukdongobuka neika unyaba noutamak arye, anggunti, na kanye deipnirye, bico tenesunune. Asukumuk deipne. Na Paulus arye, akunum nyapsine.