1 Korintus 15 - Eipomek

“Yesus dipmoka ani, Allah arye, kam bukeibukopura, kam pia unamle,” nyabuk yupu

¹ Na Paulus arye, nyapsine. Winira, Yesus dib teneluluma ati, nun du weit atonun ululum ninyeo, anggun sal babye, kilapu babye kekepnululume. Narye Allah el laka teleb yupu peterelamsibuk, kekebuka dib tenyamlume. ‘Ayupu deice aryuk Allah lyepnamsile’ tenen, dib teneplumce, pia moubuka talibuka tuba winimunye ning ara, ‘Tuba tamubuka tenenamlum’ tenen, nyapnusine.

² Narye ayupu bobuka peterelamsisiba, kekelulum ning ara, kanye teniltona kumce, pia pi dobuka talipmunyopura, Allah arye, lyepnamsile. Ara, apeterepsise yupu, ninye lyena ati, Yesus el laka teleb yupu ara, dib teneluluma deice arye, Allah arye, lyepnamsile. Ayupu nirya ara, pia pi dobuka kum talipmunce, ‘Dauplye’ tenen, batakmunyopura, minopce dib tenemunye ning babye, kum dasilirye, nong kum upnamsile.

³ Aning ati ara, Allah el laka teleb yupu weik mambul deiyoknye bira, elce nyapdeipnukba, anggun kekena ati peterepsise touk, tonap nyapnusine. Minop talak Allah el yupu laka nyalamik nang arye, sekeiyamsik touk, Yesus Kristus arye, nunti, ‘Sik malye winina ap, tenena ap ati, kum kipdeipnirye lyepnamne’ tenen, nun pununa ati dibuk.

⁴ Nun wenena ati Allah arye, oplopsutu bukni, nun pununa ati, Yesus obikbuk, dibukopura, el weinak ati el nong dobuka keil deiya pum bisik dongobik. Dongopmeka ani, like winilye sum daunmoka ani, like winilye sum akunum ubukopura, Allah yupu noutamak sekeiyamsik touk, Allah arye, Yesus kam bukeibukba, kam tuba ulule.

⁵ Kam bukeibukura, aminyan ara, ‘Peterus eipnunil’ tenen, laka panabuka tikukba, Peterus arye, Yesus eibuk. Laka tikukba, Peterus eibuk touk, aminyan talak ara, tuba tamubuka tonap el mapu, sik 12 nang unmeka noutamak arye, panabuka tikukba, sikce ton Yesus eibik.

⁶ Aning akunum winibukopura, aminyan ara, elti, dib tenyamik nang, sal babye, kilapu babye, yupa weik 500 ninye bulubuka unmekak panabuka tikukba, sik tonok talak aryuk Yesus eibik. (Atalak eibik nang ara, weik talak ara, tuba kam unyak bukni, ton nang ara, akunum dibik.)

⁷ Ayupa weik arye, 500 ninye arye Yesus eibikba, aminyan ara, Yakobus unmokak panabuka tikukba, Yakobus arye, Yesus eibuk. Eibukopura, aminyan talak ara, Yesus arye, ‘Na yupu bobuka peterelbana ati, deiyok kouna deiyok nang, Rasul nang unamak’ tenen, wipdeiyamuk nang, sik dam panabuka tikilyayukba, anang 12 nang arye, Yesus eibik.

⁸ Anang pil dobuka winilamak touk, Yesus arye nati, ‘Anye birye na pil dopnamnil’ tenen, wibuka deipnukura, apiluk donune. Bukni, winibuka daulamnya ani, nara aminyan sirya koprop tamto weipnuknye binya arye, kilapu sikce, mi bomikca ani, mi delilamak atonunye unune. Na talye daulamsani, aminyan talak ara, na dam ton panabuka tikukba, na asing arye, Yesus eipse.

⁹ “Nara, sik asa delilamak mapu atonun unune,” nyapmasina deiyok ara, ani. Ara, narye Yesus dib tenebikbuk, Allah el mapu kibuk ninye nirya ati ara, minop talak narye, ‘Aninye ap, sik dib tenenyak ning nirya ara, aning nirya kum datue’ tenen, sik nong deice ikin ning weik arye deililamsirye, ton nang ati yupu nyapsiba, olamik. Winilamse ati ara, Allah arye, ‘Na yupu peterepnin bana ati, deiyok kouna deiyok nang, Rasul nang unamake’ tenen, wipdeiyamuk nang nirya ara, na deice tamto unyake. Sikda weik mambul bukni, na dib min kum tenepse talak ara, pia malye ulamse anya arye, sik amutamuk unirye, mitik mambulnye unune. Malye ulamse anya arye, yuk ninye arye, nati, “Elda, Allah yupu peterelbana ati deiyok kouna deiyoknye, Rasulnye ulule,” kum nyapnitinge bukni, nyaninyake.

¹⁰ Malye ulamse ati ara, ayupu kum nyapnitinge bukni, Allah arye nati, bico tenepnukce, el kanye aniryuk melibuka lyepnuka deice arye, el yupu peterelbana ati deiyok kouna deiyoknye una ati, wipdeipnuke. Bico tenepnukce, el kanye aniryuk melibuka lyepnuka nong ara, kum kum dayuk. Talya kum winilamse. Aning ara pia kume. Allah el yupu peterena deiyok nang nirya ara, pil mitik mikip arye, el Pil dolamik bukni, nara mikip arye, Allah el Pil dolamse. Pile weik dolamse nyapmasin bukni, dipkoprop ara, na mikip deice aryuk pil kum dolamse. Kume. Allah bico tenepnukce, el kanye aryuk melilamnukce, el mikip areamnuka deice aryuk, el Pil dolamse.

¹¹ Aning ati ara, “Allah el laka teleb yupu, ninye lyena yupu deiyoknye ara, ani,” nyabuka, asurat noutamak nyapmasuka ara, narye peterelamsisiba, dib teneplum do? Sik yuk peterena deiyok nang arye, peterelamsikba, dib teneplum do? Anirya atoto uka. Deiyok ara, tonoka. Nun nirya arye, Yesus el laka teleb yupu, ninye lyena yupu uk peterenyabe. Ayupu uk kekelamlumce, dib teneplume. Yuk yupu deice arye, kume.

“Akunum diamice ninye ara, Allah arye, kam bukeipnamle,” nyabuk yupu

¹² Ara, na kayapu. Nun nirya arye, ayupu uk peterenyabe, nyapmasina anya arye, ayupu deice arye, “Kristus dibukura, Allah arye kam bukeibuk,” nyabuka peterenyaba ati, anggun kan-kan bukni, ton nang ara, “Kume, diamik ninye ara, Allah arye, kam kum bukeipnamle. Ara kum winipnamle,” nyabuka peterenyaka ara, yata wiribuka kel bikamtingce, ayupu nyapting do? Anyanyak nang ara, sik yata deiyok ati nyanyak do? Sikda tililauk nyanyake, dipkoprop kum nyanyake.

¹³ Ara, anggun moubuka tenipdelulume. Allah arye, diamik ninye nirya ati kum ereipnamtu toura, adeice arye, ayupu nyaptibye. “Kume. Aning ati, Kristus babye, kum kam bukeibuk. Allah arye, diamice ninye kum kam bulilule,” nyaptibye.

¹⁴ Tonda, dipkoprop Kristus kum kam bukeiptu toura, nunce peterenyap yupu ap, peterebipyeba, dib tenelulum ning ap, nirya ara talyeuk uptue. Allah arye, Kristus kum kam bukeiptu toura, nun dib tenenyap ning nirya, nong una kum, talye uptue.

¹⁵ Aninguk kum bukni, nunce Allah el winibuk ning ati, “Kristus obikbuk, dibuk bukni, Allah arye kam bukeibuk,” nyabuka peterenyaba anya arye, dipkoprop ara, Allah arye, Kristus ati kum kam bukeiptu toura, nunce Allah winibuk ning ati ara, tilila yupu uk nyanyabe. Nunce, “Dipkoprop Allah arye, Kristus kam bukeibuk,” nyabuka peterenyaba anya arye, aning kum uptuopura, tilila nyan nanguk unyabe. Allah arye, akunum diamik ninye ati, kam kum bukeipnamtuopura, aning deice arye, Kristus babye kam kum bukeibuk, tenetibye.

¹⁶ Nunce, “Dipkoprop winibuke,” nyabuka peterenyap bukni, Allah arye, akunum diamice ninye ati kam kum bukeipnamtuopura, aning deice arye, ‘Kristus babye kam kum bukeibuk,’ tenetibye.

¹⁷ Tonda, Kristus dibuk bukni, Allah arye, kum kam bukeiamtu toura, anggunce dib teneplum ning ara, talye ning dib teneluluma ati, “Nong kum upnamle,” nyaptibye. Allah arye, Kristus kam kum bukeiamtu toura, nunti kum lyepsutue. Tenipdelulume, Kristus min kam kum bukeiamtu toura, anggunda, anggun malye Winilamlum ning ap, tenelulum ning ap, deice arye, talima tapu koulamsukba, malye winilamlum touk tuba ululume.

¹⁸ Tonda, Allah arye, Yesus ati kam kum bukeiamtu toura, sik Yesus ati dib tenebik bukni, aminyan talak ara, akunum diamik ninye ara, kum lyepmanto unyake. Uku din mutuku uk binamake.

¹⁹ Se, na kayapo, tukwak mutuku unyap talak noutamuk, Kristus lyepsilirye, melinamsil bukni, aminyan sirya talak ati ara, ‘Melibuka kum lyepnamsile,’ tenebuka dib teneptibyetoura, weik kanye imun upsute. Arup nyapmasin yupu ara, dipkoprop kum ulul bukni, Kristus arye, aminyan winipnamle talak ati kum lyepsetuopura, ninye mutuku-mutuku nirya, nun dib tenenyap ninye ati bico tenepsitinge. Ara, yuk ninye ati, mitika arye, bico tenipting bukni, nun dib tenenyap ninye ati weik arye, bico tenepsitinge. Deiyok ara, ani. Yesus arye, sirya talak kum lyepnamsutuopura, yuk nang nirya arye nunti, ‘Se, sikda talye ninguk dib tenenyaka anya arye, talye-talyeuk unyake. Ati sik bicoe,’ tenepsitinge. Bukni, Allah arye, dipkoprop Yesus kam bukibuk anya arye, yuk nang arye nunti, ‘Talye nang’ tenen, bico kum tenepsitinge. Kristus dipkoprop lyesulul ati nyapsine.

²⁰ Bukni, na kayapo, moubuka teniplulume. Arup nyapmasin yupu ara, Allah arye, Kristus ati, kum kam bukeiamtopura, weik kanye imun kanye boptibye, nyapmasin bukni, aning kum wininamabe. Dipkoprop ning ara nyapnusine. Ara, Kristus dibuk bukni, Allah arye kam bukdeibukba, wini talak ara, dipkoprop pia kam ulule. Ara, wa wibuka kouamikibuk, wisiplyopura, winiryuk kwaning minopce yongobuka libikirye, dilamak atonun, Allah arye, minopce kam bukeibuknye bira, Yesus aulule. Winiryuk kwaning minopce libikirye, bai kwaning aminyan lilamak touk, dib tenenyak nang akunum diamikca ani, aminyan ara, Allah arye, kam bukeipnamle.

²¹ Ayupu ara, talye kum nyapsine. Ninye dipna deiyok ning ara, minop talak tonoknye Adam arye, doprobuk. Adam arye, malye winibukura, dipna deiyok ning dopromuk anya arye, el dibukura, dadeipdanin yangalamika ani, wini talak unyap ninye tuba dibinyabe. Ninye tuba dibilamak touk, kam una babye atonun ulule. Ara, minopce tonoknye Yesus arye, deiya koubuka dibukura, Allah el mikip deice arye, anye bira tamubuka kam bukibuk deice arye, pia kam una deiyok ning ababye, tuba arisilibuk dolonyabe. Diba tenebibyopura, pia kam una deiyok ning aresulule.

²² Dibibibuk, kam bukeipnamsila deiyok ning ara, “Tonoknye deice arye, yanganamsile,” nyapmasina ara, talye ati kum nyapsine. Kume, Adam malye winibuka deice arye, nun tukwak ninye nirya tuba dibinyabe. Aning atonun, Kristus ati dib tenebibibuk, Kristus el nong tonok dukdongopsuka deice arye, kam bukdeipsiliba, pia kam unamabe.

²³ Kam bukeipnamsil bukni, Allah arye, ‘Aning ara minopce, aning ara aminyan,’ tenyamsuk touk, aninguk wininamabe. Ara, Kristus ara, wa wibuka kouamica ani, wisiplyopura, winiryuk kwaning minopce yongobuka libikirye, dilamak touk, Kristus minopce kam bukeibuk. Winibuka anya arye, Kristus sirya talak arye, tukwak mutuku tamubuka yalyopura, elce talilye ninye ara, el na tenelul ninye anya arye, aminyan Allah arye, kam bukeipsiliba, pia kam unamabe.

²⁴ Allah arye, tenyamuk talak akunum uplyopura, tukwak mutuku-mutuku nirya noutamak, ninye deiyok nang malye ning ap, im deice weik ninye deiyok ninye malye ning nirya ap, aning-aning talilya malye deiyok ning nirya ap, mikip aning-aning nirya malye ning ap ara, Yesus Kristus arye, aning nirya atu sung-sunga atonun kiploplirye, kum daneipnamle. Anirya ara, ‘Allah ati, nun lik’ tenen, yaninyak ninye nirya ati nyapne. Amikip ulul ning nirya ap, ninye deiyok ning nirya ap, Yesus arye, akunum kum daneiplyopura, elce aning-aning nirya, el talilye ning nirya ara, dopdoplirye, el Li Koprop Allah ati, tamubuka arepnamle.

²⁵ Ara, Kristus arye, aning-aning nirya deice tam ulirye, aning-aning nirya talibuka daulamlya ani, sikce, ‘Yesus ara, nun like’ tenen, elti, yaninyak ning ap, yaninyak ninye nirya ap ara, obisiblirye, malye kipnamle. Malye kibuka bisiplyoura, malye deiyok nang nirya kum kipdeiplyopura, Allah arye, aning nirya dobuka, Yesus el amu tam deipliba, Yesus arye, aning nirya yanipnamle. Aning nirya akunum winiplya deice arye, Yesus el talilye ning nirya dobuka, el Li Koprop Allah ati arepnamle. Aning nirya ara, el li Allah ati arepnamla anya arye, minopce apil nirya donamle.

²⁶ Yesus el malye kiyamika ati, yanilelul ning, ninye dipna deiyok ning ara, Yesus arye, sirya dakuka oploplirye, ninye dipna deiyok ning kum kipdeipnamle. Sirya daknamla ati, ninye dipna deiyok ning babye, kum kipdeipnamle.

²⁷ Malye mikip ning tonok ning babye kum bataknamle. ‘Nirya oplopnamle,’ nyapmasina ara, talye ati kum nyapsine. Kume, Allah yupu sekamik yupu noutamak ayupu ton aulule. Ayupu ara, ani. ‘Allah arye, aning-aning nirya dobuka, Yesus amu tam deiplyopura, Yesus arye, aning-aning nirya deice tam unamle. Aning nirya yanipnamle.’ (Mazmur 110:1) Ara, ayupu deice ara, “Allah arye, aning-aning nirya dobuka, Yesus amu tam deipliba, yanipnamle,” nyalul yupu aupmal bukni, Allah arye, el bidamnye ati, Yesus amu tam kum deipdanamle. Aning ara, kume. ‘Yesus Kristus arye, aning-aning nirya talipnamle’ tenen, aning nirya dobuka, Yesus amu tam deipnamlanye bira, Allah el bidamnye aryuk apil dopnamle atia.

²⁸ Allah arye, aning-aning nirya Kristus amu tam akunum deiplyopura, Allah el Mi Koprop Yesus babye, Allah el amu tam buknamle. Ara, Allah el bidamnye aryuk aning-aning nirya deice tam ulirye, ‘Aning nirya talibuka, Weik Deiyoknye pia unamle’ tenen, Yesus arye, Allah el amu tam buklirye, unamle.

Allah arye, kam bukdeipnamsil ning ati, Paulus arye, tabakuka nyabuk yupu

²⁹ Ton ninye ara, sik kayapo nang akunum deiamik ninye bukni, ‘Melipnuyap’ tenen, sik kayapu nang melina ati, morobiceba, mek dongonyake. Ara, anggun tenipdelulume. Allah arye, el mapu ati, kam kum bukeipnamsutu opura, aninye ara, yata wiripnamak do? Diamik ninye kum kam bukeiptu ura, apil donyak nang ara, yata ati mek dongoldanyak do? Aning ara, talyeuk wininyaka.

³⁰ Ara tonda, nun Allah yupu peterena deiyok nang wininyap ning ton tenipdelulume. Asum-asum nirya, akiting-akiting noutamak nirya ara, nun Allah yupu peterebipyeba, malye nang kekepsikirye, yu upliba, opmanto usinyake. Allah arye, dib tenen ninye kum kam bukeipnamsutu opura, apil ara, urdemuk dolamtibye. Aning ara, talyeuk wininyapa atia.

³¹ Ura, Yesus dib teneluluma ati, nun du weit atonun ululum ninyeo, anggun sal babye, kilapu babye kekepnululume. Na talye kum nyapsine. Asum-asum nirya Allah yupu peterenuna ati, yu nang arye, yu upliba, nati opmanto wininyake. Se, na kayapo, anggun Korintus mutuku umunce, Yesus ati dib teneplumba, nun ap, anggun ap, Yesus Kristus ap, talima dukdongobuka ubya noutamak arye, na kanye delisunune. Ayupu dipkoprop ulye touk, arup nyapmasin yupu ton, dib ulule.

³² Na kayapo, Efesus mutuku noutamak unye talak ara, Allah yupu peterenibuk, pia yu weik nang arye, opmanto uninyak bukni, apil donuna ara, na talye kanye aryuk tenebuka, talye ulamtinyetoura, aminyan ara, yata teleb ning winipnamle do? Kume, Allah el mapu akunum diamik ninye, kum kam bukeipnamsutopura, ‘Apil ara, talye urdemuk donune,’ teneptinye. Apil ara, nong kum upnamtutopura, dipkoprop kum uptopura, ‘Dauplye,’ teneptibye. Ara, minop talak Yahudi yala ninye ulamikce nyalamik touk winiptibye. Sikce nyalamikbuk, Yesaya arye, sekamuk yupu ara, ani. ‘Sikce nyalamik, “Nun kam unamap talak ara, mitik anunuk kam unmabya ani, minopce talye dibinyaba anya arye, talye kanye deibuka dina ap, kanye wangalamak mek ap, talye kanye bobuka dinamabe,” nyalamik.’ (Yesaya 22:13)

³³ Kume, na kayapo. Tilila ning dib teneldana kume. Dipkoprop yupu nyapnusine. Teleb ninye ulamice bukni, malye winin ninye ap, tabakuka unyaka deice arye, bol pibikba, aminyan ara, teleb winilamice ninye babye, malye winin ninguk doprobikirye, malye upnin banamake.

³⁴ Anango, anggun kan-kan arye, ton ninye ara, Allah el winilul ning ap, el yupu ap ati, moubuka min kum kel bikamikce, walwal ninyeuk tuba unyake. Aning ati, anggun Korintus mutuku ninye ara, anggun kanye walwal kipsukba, talye-talye ninguk tenepnin banmalumce, malye weik ululum bukni, pia teleb ning ara, anggun adiparyuk aning nirya batakuka, tuba tamubuka kanye moubuka unamlume. Anggun malye winilulum ning nirya batakuka diksukumuk unamlume. Ayupu nyapmasina nirya ara, ‘Kekepmunyopura, se tenen, alye dakdanamak’ tenen, na Paulus arye, nyapsine.

Allah arye, kam bukeipsilirye, winiryuk nong arepnamsil ning ati, nyabuk yupu

³⁵ Ara, Allah arye, kam bukdeipnamsil yupu ton nyapnusine. Ton nang arye, ‘Kam bulina ara, dib do, telela do?’ tenen, ayupu ati asildenyake. “Kume, akunum diamice ninye ara, Allah arye, yata wiribuka kam bukdeipnamsil do? Akunum kam bukeipsilye talak ara, yatato nong arisilyopura kam bukuka unamap do?” nyabuka asildenyake.

³⁶ Asildenyak bukni, aning ara, pia walwal arye, nyanyake. Winipmanto yupu ara, nyapnusine. Ara, anggun wa noutam koulamlum ning ton, winipmanto ning ton nyapsinyopura, tenipdelulume. Yala duk donoklamlum ning ara, minopce bola deice ning kum lyuplyopura, aminyan talak ara, nong kum palule.

³⁷ Yala duk ak doklamlum ning ara, yakong do, diklanye do, yuk ning do, yala ning donoklamlum ning aminyan ara, nong upnamle ning ara, kum dokolulume. Aning kum bukni, pia mitik ning el duk ninguk dokmunyeba, aminyan talak ara, el nong palule. Yala duk ning ara, el urasin yuk, aminyan nong palul ning ara, el urasin yuk bukni, sik deiyok tonoka.

³⁸ Yala duk ninguk dokolulum bukni, akunum dokamunya ani, Allah arye, “Ayala ning yala nirya el nong ap, urasin ap ara, winibuka, winibuka unamle,” tenyamuk touk Allah arye areplibuk, aminyan ara, pabliba, nong yuk-yuk ulule. Yakong ara, el nong yuk, diklanye yuk, sumik yuk, yata ning do nirya ara, Allah arye, nong yuk-yuk arelye touk palule.

³⁹ Aning atonun, kam ulul ning aning-aning nirya babye, nong ap, urasin ap, yuk-yuk ulule. Ninye nong ara, sik urasin yuk ulule. Ninye kum bukni, yan arye tukwak yanibuka balamle ning nirya ara, bal do, basam do, kambing do, yuk yala ning do, sik nong ap, urasin ap, tup babye yuk-yuk ulule. Winipmanto ara, maka yala ning ara, sik tup yuk, mekwen pum bisik ulul ning ara, sik tup yuk ulule.

⁴⁰ Ayupu nyapmasin touk, im deice ulul ning ara, sik nong urasin yuk ulule. Tonda, tukwak mutuku deice kam ulul ning ara, nong yuk ulule. Im deice ning yuk, tukwak ning urasin yuk ulule. Sik urasin teleb ulul ning ara, yala yuk-yuk ulule. Neiktoto atonun kume.

⁴¹ Aning atonun, keting ara, el urasin pia teleb ulya ara, yuke. Wala ara, el urasin pia teleb ulya ara, yuke. Kurya nirya ara, keting ap, wala ap, atonun kum bukni, sik urasin teleb ulya ara, yuk-yuk ulule. Tonda, kurya weik aupmala anya arye, sik kan-kan bukni, sik urasin teleb ulya ara, yuk-yuk ulule. Neiktoto kume.

⁴² Ara, aning nyapmasin touk, Allah arye, kam bukeipsiliba, nun winiryuk nong arepnamsil ning ara, pia urasin yuk kipdeipnamsile. Ninye tukwak nang dibibyeba, nun nong tup ap, bol ap, tuku lukusinyaka ara, urasin yuk lyun ninguk ulule. Bukni, diamibya ani, aminyan talak ara, Allah kam bukeipsilirye, arepnamsil nong ara, pia kum lyupmanto ninguk arepsilyopura, pia kam unamabe.

⁴³ Dibibyeba, nong tup ap, bola ap, tuku lukusinyaka ara, lyulul ning anya arye, malye kanye bobuka urasin bol malye ninguk lukusinyake. Bukni, Allah arye, kam bukeipnamsil talak ara, nun nong ara, pia urasin teleb ninguk arepnamsile. Nun nong tup ap, bola ap, tuku lukusinyaka ara, mikip kum ati, uk disilyeba, mitang ulul nonguk lukusinyake. Bukni, Allah arye, kam bukeipsilirye, winiryuk arepnamsil nong ara, mikip weik ning arepnamsile.

⁴⁴ Nun nong tup lukusinyaka ara, talye tukwak lyun boluk weisinyak bukni, Allah arye kam bukeipsilirye, arepnamsil nong ara, im deice ninguk arepnamsile. Ara, tukwak mutuku unyap talak ara, talye ninye nong, aupmasil bolauk unyabe. Aning atouk aminyan talak ara, kam bukeipnamsil talak ara, dipkoprop im deice nonguk arisilyopura, kam unamabe.

⁴⁵ Ayupu nyapmasina ara, talye kum nyapsine. Kume, deiyok ara, ani. Allah yupu sekamik ning noutamak ara, ayupu ton aupmale. Ara, ‘Allah arye, minopce kwepdeibuknye bira Adam ara, sal kwepdeibukura, kam ulamuk.’ (Kejadian 2:7) Bukni, aminyan sirya talak Adam atonun bukni, bitinye ning dopdeipsuknye bira, kam una deiyok ning arisululnye Yesus ara, im deice anye ulule, talye tukwaknye kume.

⁴⁶ Aning deice arye, bikinyabe. Im deice ning ara, minopce kum yayuke. Tukwak ninye nong ubuk ning ara, minopce kwepdeibuk. Ninye nong talye tukwak ning akunum ulamuk bukni, aminyan talak ara, im deice ning dobuka deipsukura, nun dam yayuke.

⁴⁷ Minop talak Adam kwepdeibuknye bira, tukwak mutuku deice ubuk ning, tuku sung-sunga dobuka adeice arye, el nong kwepdeibuk. Aminyan talak dopdeipsuknye, Adam atonunye Yesus ara, tukwak ning arye, kum kwepdeibuk bukni, elda im deice akunum kam ulamukce, nun dam yayuk.

⁴⁸ Aning ati ara, tukwak mutuku-mutuku nirya unyak ninye nirya ara, minopce kwepdeibuknye bira Adam ulamuk touk, tukwak ninguk unyake. Bukni, im deice arye, dopdeipsuknye ulye touk, sik im deice unyak ninye ara, el ulye touk unyake.

⁴⁹ Aning atonun, Adam arye, deibukura, dadeipdanin, yangalamika ani, nun ni yapu arye, deipsikba unyap nang babye, Adam ulamuk nong ap, el urasin ap, ulamuk touk, nun babye aning atonun unyabe. Aning ati ara, im deice arye, yayuknye bira, im deice nong ap, urasin ap, ubuka ulye touk, aminyan talak ara, nun babye, el ulul im deice nong ap, el im deice ulul urasin ap, mitik anun atonun ubuka deipsilibuk, kam pia unamabe.

⁵⁰ Ati, Yesus dib teneluluma ati, nun du weit atonun ululum ninyeo, anggun sal babye, kilapu babye kekepnululume. Pia dipkoprop yupu nyapnusine. Ara, Allah kam bukeipsilirye, aning-aning nirya talibuka, el ap neika unamap talak, im deice ning arenamsil ning nirya ara, nun wini talak tukwak ulamap nong deice aryuk, dipkoprop kum doproptibye. Tonda, dipliba lyulamle ning arye, lyuna kum, kam pia unamle ning ara, kum doproptue. Ati, kum lyupmanto nong ap, pia kam una deiyok ning ap, arepsilyopura, aning deice aniryuk im deice welepbibirye, Allah ap, neika kam pia unamabe.

⁵¹ Ara, anggun moubuka kekeplulume, na kayapo. Allah arye, minop talak duknyamuk ning bukni, wini talak akunum laka nyapnukba, kekepse yupu ton nyapnusine. Nun akunum dib tenebupu ninye kan-kan arye, nun nirya kum dipnamabe. Bukni, nun dib tenenyap ninye nirya ara, Allah arye, nun urasin ap, nong ap, kam unyap ning nirya ara, urasin pia yuk kipdeipnamsile.

⁵² Urasin ap, nong ap, yuk ning kipdeipnamsil ning ara, bebeya lingum ana pia minopce bebeya lingum alamle touk, tonda asing kuplamalamak touk, sirya talak Allah el bung-bung ana, el si ara, terompet, lelim nyaplyopura, aning nyaplye talak aniryuk, nong yuk ning kipdeipnamsile. Sik asa kume, minopce adiparyuk urasin yuk kipdeipnamsile. “Winipnamsil,” nyapmasina ara, talye kume. Sirya talak terompet lelim weik arye nyaplyopura, dib tenebik bukni, akunum diamik ninye ara, Allah arye kam bukeiplirye, kum lyupmanto nong, winiryuk ning arepnamle. Winiplyopura, nun dib tenebuka, kam tuba unyap ninye ara, atalak aniryuk urasin ap, nong ap, urasin pia yuk, teleb ning arepnamsile.

⁵³ Ninye dipnopura, lyulamle ning ara, adiparyuk diplirye, kum lyupmanto ning kintinibuka arisilyopura kam pia unamabe. Wini talak dipmanto ning nirya ara, aminyan talak ara, kum dipmanto ning pia kam unamle ninguk arisilyopura, kam pia unamabe. Aning ati ara, “Nun urasin ap, nong ap, urasin yuk ning kintinibuka arepnamsil,” nyapsine. Aning ara, talye ati kum nyapsine. Dib yupu uk nyapne.

⁵⁴ Anirya ara, nun dib tenenyap ninye ati nyapsine. Tukwak unyap talak ara, dipna ap, lyuna ap, ulul nong kipman unyap bukni, aminyan talak ara, Allah arye dipna ap, lyuna ap, upmanto kum ning arisilyopura, pia teleb kam upnamle ning dopropnamabe. Aning winipnamsil talak ara, dipmanto ning nirya, kum dipmanto ning, kam pia upnamle ning akunum doprobibyopura, atalak ara, sik minop talak Allah yupu noutam sekamik yupu ara, nong upnamle. Allah yupu noutamak aminyan talak ara, laka danamuk ning ati, sekamik ning ara, ani. ‘Allah arye, dipna deiyok ning ara, akunum kum daneipnamle. Allah arye, dipna deiyok ning nirya ara, akunum bisibuka sirya dakmale.’ (Yesaya 25:8)

⁵⁵ ‘Dipna deiyok ning deice arye nunti, tuba tamubuka tonap kum malye kipsitue. Winira dipna deiyok ning deice arye, kum opsutue. Tonda, dipna deiyok ning arye, tonap kanye imun kum upsutue.’ (Hosea 13:14)

⁵⁶ Ninye mutuku-mutuku nirya, ‘Se, aminyan talak ara, dipnamape’ tenen, ilil weik upliba, ilil kanye bonyake. Ilil kanye bonyaka deiyok ara, sik malye winilamice ning ati, ‘Allah wenepsilirye, opnamsil,’ tenen ati ilil ulule. Aning atonun, sik malye wininyak ning ati, dipnuce talak ilil weik ulula deiyok ara, Allah arye, ‘Wininamlume, aning ara, kum wininamlume,’ nyabuka, Allah yupu noutamak sekamik ning nirya batakuka, yaniltanauk unyaba anya arye, ‘Amem yupu deice arye, yupu lipsisikuka bokeipnamsil’ tenen, ilil weik usulule.

⁵⁷ Talye unyak ninye arye, wininyak bukni, nun Allah ati dib tenenyap ninye nirya arye, Allah ati, “Telebe,” nyanyabe. Deiyok ara, Allah el Mi Koprop Yesus Kristus arye, nun pununa ati dibuk. Dibuk deice arye, nunti lyepsukce, tapu kouamsuk ning noutamak arye, lopdeipsuke. Aning ati ara, nun Deiyoknye apil dopsuka deice arye, akunum teleb kipdeipsuke. Nun malye ning nirya, akunum malye kipdeipsukce, amalye ning kum kipdeipsuke. Winipsuka ati, ilil kum usulul bukni, nun Ni Koprop Allah ati, “Telebe,” nyabuka, el si erenyabe.

⁵⁸ Aning ati ara, na bico tenepsinirye, Yesus dib teneluluma ati, nun du weit atonun ululum ninyeo, anggun sal babye, kilapu babye kekepnululume. Anggun Korintus mutuku ninye, kanye bokoltona pia kum aniryuk, tonok kanye bobuka unamlume. Yata ning do nirya, ikin usilya deice arye, ‘Allah el yupu batakibiba, malye ning arye, yuk bisik bobisilyak’ tenen, teniltona kum, pia kalikdanuka unamlume. Allah eluk moubuka talipmunce, unamlume. Anggun kele, nun Deiyoknye Yesus ap, talima dukdongobuka ubirye, elti, ikin pil donyapa nirya ara, dipkoprop nong upnamle. Tilila pil kum donyabe. Aning ara, akunum kel kipluma anya arye, ‘Na nong ap, kanye talima tenen ning ap nirya, Yesus deiceuk deipnirye, Yesus el piluk donamne’ tenen, kanye bokoltona kum aniryuk, pia pi dobuka unamlume. Na Paulus arye, nyapmasine.