1 Korintus 14 - Eipomek

Paulus arye, “Allah dib tenenyak nang ara, anggun nirya kanye talima baribuka melilanamlulume,” nyabuk yupu

¹ Na kayapu, anggun wininamlum ning nirya noutamak arye, bico tenebuka melilanauk wininamlume. Tonda, Allah el pil dona ati, el Dib Kanye mikip deice arye, ‘Pil dona deiyok ning arepsutue’ tenen, patasiliba kanye deibuka unamlume. Apil dona deiyok ning yala nirya patana teleb bukni, ‘Weik mambule’ tenen, pia patanamsil ning ara, Allah arye nyalyeba, el yupu laka nyabuka peterenya deiyok ning ati, pia patanamsile nyapsine.

² Aning nyapmasina deiyok ara ani. Ara, yata nang do nirya, sik kel kum bikamikce, kum nyalamak yupu bukni, Allah El Dib Kanye mikip deice arye, sik talima ak dongopliba, yuk mutuku yupu deice nyalinye bira, anye birye yuk ninye sik moubuka kekena ati kum nyalule. Allah El Dib Kanye arisilye yupu nyalinye bira, Allah el kekena ati nyalule. Ayupu ara, dipkoprop nyapmasine. Allah El Dib Kanye arye, anye bira el talima ak nyalisiliba, yuk mutuku yupu deice nyalinye birye ayupu nyaplyopura, yuk ninye nirya amul deiceuk kekeltakanyak bukni, ‘Deiyok ani,’ tenebuka, moubuka kum kel biktinge. Ara, Allah El Dib Kanye mikip deice arye, ayupu dobuka, anye biti ariliba, anye birye duknuna yupu, ninye kum kekepmanto yupu uk nyalula ati nyapsine. Aning ati ara, weik arye pataplyeba, ‘Se, Allah arye, arepsutue,’ tenenamlum ning ara, ‘Yuk ninye ton kekepting’ tenen, Allah arye nyalyeba, ‘El yupu lak akarye, laka nyabuka, peterena deiyok ning arepsutuba, petereptibye’ tenen, pataplyeba, ‘Allah ati moronamlum’ tenen, ati nyapsine.

³ Allah El Dib Kanye mikip deice arye, yuk mutuku yupu nyanyak nang ara, Allah el yupu kekena ati nyanyake. Bukni, Allah arye nyapliba, el yupu lak kibuka, laka nyabuka peterena deiyoknye birye, el yupu nyalyeba, yuk ninye nirya, sik talima melina ap, mikip kilina ap, ati, ‘Melipnun’ tenen, nyalule. Ara sik dib tenen ning mikip kilina ap, sik talima melina ap, talima wisisilye ning kilina ap, sik kanye imun usilye ning, ‘Kanam upnamle’ tenena ap, ati, teleb yupu lak akarye nyalyeba, ninye nirya arye, teleb ubuka, kekenyake.

⁴ Allah El Dib Kanye mikip deice arye, areplibuk yuk mutuku yupu deice arye, nyalulnye bira, elcuk el bidamnye ati nyaldalirye, talima kwa diprongobuka mikip kililalul bukni, Allah arye nyalyeba, el yupu lak akarye, laka nyabuka peterena deiyoknye birye, Allah dib tenenyak ninye nirya moubuka kekebikiba, sik talima kwa dakuka mikip kililule. El bidamnye ati kum nyalule.

⁵ Anggun Korintus mutuku ninye nirya ara, Allah El Dib Kanye mikip deice arye, arepsutuba, yuk mutuku yupu nyaptumopura, na kanye mitik deipsitinye bukni, weik mambul ning ara, anggun nirya arye, Allah nyasilye yupu, lak akarye laka nyabuka peterenyak nang ulamtumopura, aning ati, weik arye, kanye deipsitinye. Allah yupu laka nyabuka peterelinye bira, weik mambul pil dolul bukni, Dib Kanye arye, deiyok ning areplibuk, yuk mutuku yupu deice arye, nyalulnye bira, mitik mambul piluk dolule. Deiyok ara, Allah yupu lak kibuka peterenanye birye el yupu nyalyeba, Allah dib tenenyak ninye nirya kekenyak deice arye, sik kanye talima kwa baribuka, mikip kililula ati nyapsine. Yuk mutuku yupu deice nyalinye birye, “Deiyok ani, ani,” nyabuka laka nyaptopura, sik keken ninye nirya moubuka kel biktingopura, aning babye teleb nyaptinye. Ayupu deiyok ning moubuka kum teneptingce, kum kel keptingopura, aning ara, teleb kume. Na Paulus arye, nyapsine.

⁶ Ara, Yesus dib teneluluma ati, nun du weit atonun ululum ninyeo, anggun sal babye, kilapu babye kekepnululume. Anggun ton tenipdelulume. Anggun dam yatinirye, Allah El Dib Kanye mikip deice arye, yuk mutuku yupu deice nyapsitinye babye, ayupu talye nyaploptibya deice arye, melipsitinye do? Kume. Bukni, Allah arye, duknyamuk ning lak kibuka laka nyan yupu do, weik kel bikne yupu do, Allah arye nyaplyeba, laka nyabuka peteren yupu do, tonda, diksukum una ati, “Wininamlulum, wininamlulum,” nyabuka peteren yupu do, ayupu nirya atonun yupu nyapsitinyetoura, adeice aryuk melipsitinye. Anggun moubuka kum kekepmanto yupu nyaptinya babye, anang arye, kum melipsitinye.

⁷ Ara, nun kam unyap ninye ati, tonda kam kum ulul ning ati ara, anyapmasin yupu dipkopropuk ulule. Ati kam kum ulul ning, bung-bung ana el si ara, seruling ap, yuk ning ara, el si ara, kecapi ap, ati nyapnusine. Bung-bung ana dobuka nyalinye birye, tonok yupu mot nyalye touk, teleb ubuka kum nyaplyopura, yuk ninye kekebikirye, yata wiribuka moubuka kel bikting do? Ara, bung-bung anarye, malye nyaplyopura, anang arye, ‘El nyalye mot atia,’ tenebuka kel bikting do? Kume, aning kum kel biktinge.

⁸ Aning atonun, sik yin talin nang arye, bung-bung ana, el si ara, terompet deice arye, tonok mot nyakiba, kekebikirye, adiparyuk, ‘Ura, amot kekepmapa anya arye, malye nang olbinuyabe’ tenen, kel kinyake. Bukni, aterompet nyalinye birye, teleb ubuka kum nyalyopura, lelim talye kekepnamak bukni, yata wiribuka moubuka tenipting do? Kum bikmanto ning nyaplyeba, sikce, ‘E, winira olbinuyabe’ tenen, kel bikting do? Kume, talye lelimuk kekenamak bukni, lelim malye nyaplyeba, moubuka tenena kum ati, yin talin nang arye, kintinina kumce, talye kanye bobuka unamake.

⁹ Ayupu winipmanto ning nyapmasin touk, anggun Korintus ninye babye atonun winilulume. Allah El Dib Kanye, el mikip deice arye, yuk mutuku ninye nyanyak yupu arisilibuk, ayupu deice arye, anggunce, yuk ninye nirya kekepmanto yupu, teleb ubuka lak kum nyapmunyopura, yata wiribuka, yuk nang nirya ayupu kekeptingce, ‘E, sik nyapmasiyak yupu ara, deiyok ani’ tenen, moubuka kel bikting do? Kume, kum kel biktinge. Aning ati ara, anggunce yuk mutuku yupu deice aryuk, anggun mutuku nang ati nyamunyopura, yupu talye nyaltakanauk unamlume. Aning ati ara, kum wininamlume nyapsine.

¹⁰ Na kayapu. ‘Dip do, telela do?’ tenen, kanye kum boktopsutue. Tukwak mutuku noutamak ara, ninye yuk-yuk nyanyak yupu ara, yala pia weik aupmal bukni, ayupu nirya ara, deiyok ton aupmale. Sik bidamang arye, sik yupu koprop nyakiba, sik ayupu nyanyak nang kekebiceura, adiparyuk, ‘E, ayupu deiyok ara, ani’ tenen, moubuka kekenyake.

¹¹ Ayupu nirya ara, deiyok aupmala anya arye, sikce yuk mutuku yupu deice nyabiceura, kekeptini bukni, deiyok kum biktinyopura, anang arye nati, ‘Anye bira, yuk mutukunye anya arye, elda ninye asiknye atonun ulule. Nun yupu kum kekeptue,’ tenepnamniyake. Aning atonun narye sik yuk mutuku yupu nyanyak nang ati, ‘Sikda yuk mutuku yupu nyanyak ninye unyake. Na tam nang gume,’ tenepnamne.

¹² Anyapmasina atonun, anggunce anggun ap neika ululum ninye ati, Allah El Dib Kanye mikip deice arye, yuk mutuku yupu diribuka nyapmunyopura, anggunce anggun bidamang nang ati, “Sikda, yuk mutuku ninye atonun unyake,” nyalanamlulume. Anggun Korintus mutuku ninye arye, ‘Se, Allah el pil dona ati, el mikip deice arye, pil dona deiyok ning aning-aning nirya arepsutue’ tenen, patasilibuk, ululuma anya arye, ayupu nyapsine. Allah dib tenenyak ninye nirya, sik talima kwa dina ap, mikip kilina ap, ati, moubuka kel biknamting ning uk, ‘Allah arye, apil dona deiyok ninguk arepsutuba, nun neika unyap ninye ati melimdatibye’ tenen, pia patasiliba, unamlume. Yuk ninye ati kum melipmanto ning ara, patana kume.

¹³ Allah dib tenenyak ninye, “Sik kanye talima kwa baribuka mikip kelina ara, aninguk mambule,” nyapmasina ati ara, ayupu ton nyapnusine. Anye birye kel kum bikamuk bukni, Allah El Dib Kanye mikip deice areplibuk, yuk mutuku ninye nyanyak yupu deice arye, nyaptunye bira, ‘Se, Allah arye melipnutuba, ayupu moubuka kekepnirye, lak kibuka laka nyapteneba, na kayapu nang nirya bita teleb kibuka kel bikting’ tenen, Allah moronamle.

¹⁴ Aning ara, urdem ati kum nyapsine. Kume, yuk mutuku yupu deice arye, Allah moronye talak ara, Allah El Dib Kanye melipniliba, na kanye arye, Allah moronun bukni, na kanye tenen ning deice arye, moubuka kum kekeptinya anya arye, ‘Deiyok ani’ tenen, kum kel biktinye.

¹⁵ Aning ati ara, yata wirinamne do? Ura, aning ton nyapnusine. Allah moron talak babye, Allah el si eren ati, mot nyanamne talak babye, Allah El Dib Kanye mikip deice melipniliba, na kanye arye, yuk mutuku yupu deice Allah moronamne talak nirya ara, na kanye tenen deice arye moronamne. Tonda, na tam nang nun nyanyap yupu deice arye, kekepmanto yupu ton tabakuka Allah moronamne. Ara, Allah El Dib Kanye melinilya deice arye, yupu nyanamne bukni, ninye kekepmanto yupu deice aryuk nyaptinyetoura, aninguk ara, telebe. Yuk ninye arye, kum kekepmanto yupu ara, talye nyana kume.

¹⁶ Allah El Dib Kanye, el mikip deice arye, yuk mutuku yupu arisilibuk, anggun kanye arye, yuk mutuku yupu deice, Allah el si erebuka elti, “Telebe,” nyalulumopura, sik yuk ninye kum kekenmating noutamak arye, tonoknye ton moubuka kum keketurye, kum kel biktopura, anye birye yata wiribuka, “E, narye ton, dipkoprop moubuka tenepmana ati, ‘Anyanmak touk winipnamle’ tenen, Amin nyapne,” nyabuka tenepturye, nyaptu do? Yuk mutuku yupu deice arye, Allah ati, “Telebe,” nyaptuma babye, anggun nyalulum yupu ara, amutukunye birye moubuka kum kekeptu anya arye, “Na ton kekepmane,” kum nyaptue.

¹⁷ Ara, Allah el Kanye arye, yuk mutuku yupu areplibuk, anggun ayupu deice arye, Allah ati, “Telebe,” nyabuka el si teleb kibuka ereptuma babye, anye birye moubuka kekepturye, kel kum kiptua anya arye, ayupu nyaluluma deice arye, el talima mikip kum kililulume. El moubuka kekena kum ati, ara kum winipmanto.

¹⁸ Ura, na kayapu, anggun Korintus mutuku ninye ara, Allah El Dib Kanye mikip deice arye, yuk mutuku yupu mitik nyalulum bukni, na kanye ara, Allah meliniliba, el Dib Kanye mikip arenilya deice arye, yuk yala mutuku nang yupu pia weik arye, nyanune. Aning ati ara, narye Allah ati, “Telebe,” nyanune.

¹⁹ Aning arenilya anya arye, Allah ati, “Telebe,” nyanun bukni, na kanye ara, Allah dib tenenyak ninye arye, ‘Allah si erepnuyap’ tenen, bulubikce talak ara, ‘Ninye nirya moubuka kekeptingce, kel bikting’ tenen, sik kekepmanto yupu pamubaryeuk nyapteneba kekeptingopura, ‘Aning ara, pia telebe,’ tenenune. Bukni, sik kum kekeptingce, moubuka kum kel bikting yupu, Allah Kanye arye, arepnilibuk, yuk mutuku yupu deice arye, 10 ribu yupu nyaptinya babye, ‘Aning ara, mambul kume, daupmalye,’ tenenune. Deiyok ara, sik yuk ninye kum kekepting yupu deice arye, nyapnyopura, sik kanye talima kwa baribuka mikip kum kipdeiptinya ati nyapmasine.

²⁰ Ura, Yesus dib teneluluma ati, nun du weit atonun ululum ninyeo, anggun sal babye, kilapu babye kekepnululume. Mitik mapu tenelamak touk tenemunya ara, bataklulume. Ura, malye ning pataplyeba, malye winina ati ara, pia mitik aling pum lin mapu arye, aning-aning kum tenebikirye, malye kum winilamak touk, anggun adiparyuk telebuk unamlulume. Bukni, anggun kanye tenen ning noutamak nirya ara, teleb nang, wisi akunum deibik ninye arye, kanye bobuka diksukum ninguk tenyak touk, anggun Korintus mutuku ululum ninye babye adiparyuk tenenamlulume. Malye winina ati ara, mitik mapu atonun unamlume. Teleb winina ati ara, wisi ninye atonun tenepmunce, telebuk wininamlume.

²¹ Allah arye nyapdeibukba, minop talak ulamuk nabi Yesaya arye, Allah yupu buku noutamak sekeiamuk. Allah yupu lak kibuka sekamuknye sekamuk yupu ara, ani. Allah arye, nyabuk. “Aninye ara, na tenepse ninye ati, ‘Na yupu kekepnamak’ tenen, yupu laka nyan nang sik dam dobuka deipnamne. Ara, yuk mutuku ninye dobuka, na tenepse nang, sik dam dopdeipniba, na yupu bukni, yuk mutuku ninye nyanyak yupu deice arye, laka nyanamake. Wininamak bukni, anang dopdeipniba, na yupu nyanamtinga babye, na wipdeiamse nang arye na yupu kum kekepnamniyake. Na yupu kum dolonyakce, lik ati batakanamke. Na Allah arye, nyapne,” nyabuk. (Yesaya 28:11-12) Ayupu nyabuk ning ara, Yesaya arye, sekeiyamsukba, na Paulus arye, nyapsine.

²² Ayupu aupsuka deice arye, bikinyabe. Allah arye, utenelule. Sik kum kel bikamik nang bukni, Allah El Dib Kanye mikip deice, yuk mutuku nang nyanyak yupu areplibuk, peterelbikcopura, peterebikibuk, dib tenena kum ninye kekebikirye, sikda, ‘Se, aning ara, dipkoprop Allah el mikip deice aniryuk nyapmasiyake,’ tenebikirye, ‘Diba tenepnamak’ tenen, Allah arye, aning aresulule. Ati, ‘Dib tenena ninye arye, kekenamak’ tenen, Allah El Dib Kanye mikip deice arye, ayupu kum aresulule. Ara, dib tenena nang arye, ‘E, Allah el mikip deice wininyak ning atia, tenepnamak’ tenen, kum aresulule. Bukni, Allah el yupu seklamika ap, nyasirikce ap, laka nyabuka peterena deiyok ning areplibuk, el mikip deice arye, peteresinyak ara, dip tenen ninye, anggun melina ati arisilibuk, peteresinyake. Aning ara, anggun dib tenena kum ninye ati, arisulul ning kume.

²³ Aning ati ara, anggun dib tenelulum ninye nirya arye, ‘Allah el si erepnuyap’ tenen, bulumunye talak ara, anggun nirya Allah El Dib Kanye mikip deice arye, yuk mutuku nyanyak yupu arisilibuk, ayupu deice arye, nyalulumopura, yuk talye nang kekebikcopura yata tenenamak do? Ara, sik yuk nang ayupu kum kekeptingce, moubuka kum kel bikting ninye ap, dib kum tenenyak ninye ap, anggun Korintus mutuku ululum ninye, anggun Allah yupu keken aik wekukapsikirye, kum kekepmanto yupu kekebikcopura, “Kume, anyasik ninye nirya ara, motona talin ninye unyak atia,” nyabuka kum tenepnamsiyak do, kum do? Na kanye ara, aninguk tenepnamsiake.

²⁴ Dipkoprop aninguk tenesinyak bukni, anggun dib tenelulum ninye nirya arye, Allah nyasulul yupu ap, kumce akunum sekeiyamsik yupu ap, laka nyabuka peterelulum talak noutamak, sik dib tenena kum nang ap, ‘Ayupu ara, dib do, kum do?’ tenen, kanye tenilton nang, sikce anggun Korintus mutuku Allah yupu keken aik wekikirye, anggun nyanamlum yupu moubuka kekepsitingopura, telebuk unamake. Ara, anggun nyalulum yupu kekenamak deice arye, ‘Se, nunda dipkoprop malye winin ninye unyaba anya arye, Allah arye, yupu lipsisikuka bokeipsilirye, wenebuka opnamsil nang ara, nun unyabe,’ tenebikirye, malye kanye bopnamake. Aning ara, telebuka.

²⁵ Anggunce Allah yupu lak kibuka peterepmunyopura, dib tenena kum ninye, ayupu kekebikca deice arye, sik talima noutamak malye winibuka, dungnulamice ning ara, laka upliba, kisok talipdanuka malye kanye bobikirye, “Se, Allah ara, aninye sik talima noutamak dipkoprop ulule. Bukni, nunda malye ninye tuba unyabe,” nyabuka, Allah ati, dib tenebikirye, el si erenamake. Na Paulus arye, nyapsine.

Paulus arye, “Na kayapo, ‘Allah yupu kekepnuyap’ tenen, Allah yupu aik bulubuka weknamlum talak wininamlum ning ani,” nyabuk yupu

²⁶ Ara, Yesus dib teneluluma ati, nun du weit atonun ululum ninyeo, anggun sal babye, kilapu babye kekepnululume. Anyapmasin yupu nirya ati ara, Allah yupu keken aik binuka, el si ati erenamlum talak ara, “Teleb winin ning ani,” nyabuka kel bikna ati ara, ‘Yata nyaptibye do?’ tenena kume. Aning ara, nyapnusine. Anggun bulubuka Allah yupu kekenamlum talak nirya ara, anggun nirya yuk-yuk bukni, tonye bira, Allah arye, elti, aribuk mot nyapnamsile. Tonye birye, “Diksukum una ati, winibuka unamabe,” nyabuka peterenamsile. Tonye birye, Allah el yupu duknyamuk bukni, anye biti lak nyabukura, kel bikuk ning ara, anggun kekena ati Allah duknyamuk yupu nong noutamak ara, lak kibuka peterenamsile. Tonye birye, el kum kel bikamuk bukni, Allah El Dib Kanye arye, areplibuk yuk mutuku yupu deice nyapnamsile. Bukni, elce peterepsilyopura, tonye bira, Allah El Dib Kanye arye, “Ayupu nong ara, ani,” laka nyabuka melipsilyopura, ayupu kekebuka kel bikilinye birye, “Ayupu deiyok ani,” nyabuka, ayupu lak kibuka laka nyapnamsile. Aning-aning nirya ara, deiyok tonokuk aupnamle. Ara, Allah dib tenena ninye kekebikca deice arye, ‘Sik talima kwa baribuka mikip kilinamap’ tenen, wininamlume. Yuk ton kume. Na Paulus arye, nyapsine.

²⁷ Allah El Dib Kanye arye, el tenyamlye nang ati, yuk mutuku nyanyak yupu areplibuk, ‘Nyapnusiyabe,’ tenebikcopura, tonokto, bitinyeto nyapsitiring bukni, pia weik ning ara, winilye nang arye, nyapsitinge. Aning nyapsitinge bukni, tonok talak aniryuk, neika talye ansinibuka kum nyapnamake. Aning kum bukni, tonok-tonok arye, lak nyapnamake. Nirya tabakuka talye kanye bobuka nyana kume. Tonda, akunum yuk-yuk tonok-tonok arye, yuk mutuku yupu deice arye, nyapsikcopura, adiparyuk tonoknye birye, “Ayupu deiyok ara, ani,” nyabuka laka nyapnamsile. Kumopura, yuk mutuku yupu kum nyaplopsitinge. Ara, ayupu deiyok ning kum laka nyapsitingtoura, anang arye, yuk mutuku yupu deice arye, nyana kume, nyapsine.

²⁸ Ton nang arye, ‘Yuk mutuku nang yupu deice nyapnuyap,’ tenebikirye, kintinipting bukni, ayupu kekepturye, laka nyapmantonye kum ulyopura, ato yupu ara, kum nyaptinge. Kum laka nyapmantoopura, yuk mutuku yupu nyapmanto nang arye, anggun dib tenelulum nang bulubuka, Allah yupu keken aik noutamak ara, talye yupu kum asa bunamake. Ayupu talye kanye bobuka kum nyaptinge. Sikce, sik bidamang ati sik talima noutamak aryuk nyapdatinge. Tonda, sikce Allah el kekena ati, sik talima noutamak aryuk tenebuka nyaptinge. Yuk ninye arye, amul deiceuk talye kekeltakana ati, talye kanye bobuka nyana kume.

²⁹ Ara, aning atonun, Allah el nyasilye yupu ap, min talak seklamik yupu ap, peterena deiyok nang ap, tonda aminyan winipnamle ning laka nyana deiyok nang ap, sik Allah yupu keken aik ulamtingce, aning ara, like bitinyeto, winiliyeto nyapsitinge bukni, yuk-yuk nyanamsiake. Sikce peterepsikcopura, ayupu kekenamak ninye nirya arye, ‘Ayupu deiyok ani. Dib nyapmasiyak do, kum do’ tenen, moubuka tenenamake. Tonda, kekebikirye, ‘Nyapsila anya arye, wininamabe, winipnambe’ tenen, kanye deibuka moubuka kekenamake.

³⁰ Anggun nirya kekenmamunye ani, sik tuba bukmace ninye kan-kan, Allah arye, duknyamuk yupu dobuka tonoknye biti, “Ayupu nyapnulyam,” nyapliba, anye el talima noutamak nyaplyopura, anye kekeplirye, ‘Na ton nyapnune,’ teneplyopura, minop peterenmalye deiyoknye birye yupu nyana kumce tunim abuka buklyopura, ‘Na ton nyapnusine,’ teneplinye birye, aminyan nyapnamle. Ansinibuka tonok talak aryuk nyana kume.

³¹ Winibuka tonok-tonok nyapra banamluma deiyok ara, sik Allah yupu peteren nang nirya nyapnin bakiba, anggun bululum ninye nirya moubuka kekepmunyopura, anggun nirya arye, moubuka kel kinamlulume. Tonda, anggun diksukum una ati, “Wininamlum, wininamlum,” nyabuka melibuka nyabikibuk, kekepmunyopura, anggun kanye talima kwa baribuka mikip kilinamsiyake. Aning ati ayupu nyapsine.

^32-33 Ara, nun ni Allah lyebuka talisilirye, melisilyopura, el pil dosilya deice arye, kanye deibuka diksukum ninguk unyabe. Allah pil dosilya deice arye, talye-talye yupu nyabuka, kouldana atonun kum unyabe. Amalye winin ning pil kum dolula ati ara, sik Allah yupu peterena ap, aminyan winipnamle ning laka nyana ap, wininyak ninye ara, sik bidamang kanye ap, nong ap, kalikildakirye, teleb ubuka nyanyake. Sik bidamnang aryuk, sik badamnye ati, lipsisikdakirye, teleb yupu uk nyanamake. Talya-talya kwalibuka una ara, kum wininamnyake. Winina ara, meme, na Paulus arye, nyapsine.

³⁴ Winira, yuk yupu ton nyapnusine. Anggun Allah yupu kekenamlum talak nirya ara, kilapu ara, yupu nyana kum aniryuk, talye lamapdongobuka bukikirye, kekenauk unamake. Allah arye nyabukba, Musa sekamuk yupu noutamak nyasilye touk, kilapu ara, Allah yupu keken aik bulupmunye talak ara, yupu kum nyaptinge. Aning kum bukni, sik peterena deiyok ninye amutamak bukuka, nimalye aryuk unamake. Mutuku-mutuku nirya, Allah ati dib tenenyak ninye nirya arye, aning atonun unyaka ati, ‘Anggun Korintus mutuku ninye babye kekenamlum’ tenen, ayupu nyapsine.

³⁵ Kilapu arye, ‘E anyapmasil yupu ara, deiyok yata yupu nyapmasil do?’ tenen, ‘Asipdetibye’ tenen, pataplyopura, Allah yupu pakuka, sik bidamang asik tuba tamubuka bakirye, sik bidamang domikce nang atibuk asipdenamke. ‘Allah yupu kekepnuyap’ tenen, Allah yupu aik bulubuka weklalum talak nirya ara, kilapu yupu laka arye nyabikcopura, adeice arye malye ubikirye, Allah si yaninyaka anya arye, Allah yupu keken talak ara, kilapu arye, yupu laka arye, kum nyanamake. Winina meme, na Paulus arye, nyapsine.

³⁶ Narye anyapmasin yupu ati, anggun Korintus mutuku ninye arye, ‘E, el nyapmasil yupu ara, talye dem atibuk nyapsile,’ tenepnamnulum do? Winibuka tenenumunyopura, narye anggunti asipdenamsine. Allah el yupu ara, anggun Korintus mutuku ululum ninye arye, anggun tenena deice aryuk deiyok koubuka tenyamlumce, peterelamsulumba, nun aminyan kel bikamubu do? E, akumopura, yuk nang arye, anggunti peterelamsikba, anggunuk kekebuka kel bikamlumba, nun yuk ninye nirya ara, kum kel bikamubu do, kum do? Allah dib tenenyak ninye mutuku-mutuku nirya akunum laka nyapmasin touk unyaka anya arye, anggun Korintus mutuku ninye babye atonun wininamlume.

³⁷ Tonda ayupu ton nyapsine. Yatanye do nirya, ‘Kume. Allah arye, nyasilye yupu laka nyabuka peterena ap, aminyan winipnamle ning laka nyana ap ati, deiyok ning akunum arepnuka anya arye, aning laka nyananye nabi unune’ tenen, nyalinye ap, ‘Nara, Allah El Dib Kanye arye, el pil dona ati, pil dona deiyok mikip weik arye arepnukbuk, el Pil donune’ tenen, nyalinye ap ati, anggun kekenululume. Narye nyapmasin yupu ati ara, ayupu nyapsine. Na Paulus arye, sekeipsin yupu ara, talye yupu kume. Nun Deiyoknye Yesus arye, nyasilye yupu uk peteresunune. Na kanye aryuk ayupu kum nyanune. Ati, aninguk tenepmunce unamlume.

³⁸ Anyapmasin yupu ati, ‘Talye nyapsile’ tenen, luba kilinye bira, anggun ap, nun nirya ap arye, anye biti, luba kibirye, ‘Elda talinye’ tenen, elti, batakibirye, el yupu pia kum kekenamabe.

³⁹ Ara, Yesus dib teneluluma ati, nun du weit atonun ululum ninyeo, anggun sal babye, kilapu babye kekepnululume. Moubuka kekenululume. Arup nyapmasin yupu nirya ati ara, wininamlume. ‘Aning ara, weik mambul’ tenen, weik arye patasiliba, ‘Allah arye, apil deiyok ning arepsutue’ tenen, kanye deibuka wininamlum ning ara, Allah nyasulul yupu ati, deiyok noutamak ning laka nyabuka peteremunce, ‘Aninguk weik mambule,’ tenenamlume. Tonda, Allah El Dib Kanye arye, el mikip deice arisilibuk, sik yuk mutuku yupu deice arye, nyanyak yupu ara, “Aning ara, pia kum nyapsitinge,” nyabuka yupu kum sekenamlume.

⁴⁰ Yupu kum sekenamlum bukni, anggun wininamlum ning nirya noutamak arye, talye kanye bobuka walana kum aniryuk, teleb-teleb ubuka, na akunum laka nyapmasin touk wininamlume. Na Paulus arye, nyapsine.