1 Korintus 13 - Eipomek

Paulus arye, “Yuk nang ati bico tenebuka melilana ning ara, weik mambul,” nyabuk yupu

¹ Yatanye do nirya, yuk nang ati bico tenebuka kum melilamlanye bira, yuk mutuku ninye nyalamak yupu ap, Allah el im deice pil melinang, malaikat sik yupu ap, deice arye, mambul yupu nyaptu babye, Allah el kanye ara, ‘Anye bira mambul kum ati awablye,’ tenelule. El winilul ning ara, nong kum upnamle ati, el pil ara, mambul weik kume. Winipmanto ara, besi ning obikiba, weik lelim talye nyalamle atonun, ulule. Ara anye birye, mambul yupu ap, kekena teleb yupu ap, nyalul bukni, yuk nang ati, bico tenebuka kum melilula ati, atonye bira dipkoprop weik mambul kume nyapsine.

² Yata ninye do nirya, anggunce yuk ninye ati, bico tenebuka kum melinyak ninye ara, talyeuk unyake. Allah el kanye ara, sikda mambul kume. Aning atonun, Allah El Dib Kanye arye, aminyan winipnamle ning ap, aning-aning nirya ap, ati, laka nyana pil dona deiyok ning areptuba, Allah arye, duknyamuk ning nirya ap, weik kel bikna ning nirya ap, moubuka tenepturye, laka nyapsutue babye, anye birye yuk nang ati bico tenebuka kum melilinye bira, Allah el kanye ara, ‘Anye bira mambul kum ati, dauplye,’ tenelule. Tonda, Allah arye, tonye ati, ‘Allah ara, ikin kum uptue. Aning-aning nirya kam aryuk uptue, tenenamle’ tenen, weik dib tenena deiyok ning areptuba, anye birye el pia dib tenelula deice arye, weik mutuku ati, “Tobuka bilyame,” nyaptopura, topraka betua babye, anye birye yuk ninye ati bico tenebuka kum melilulnye bira, talyeuk ulule. Allah el kanye ara, ‘Anye bira, dipkoprop mambul kum ati, dauplye,’ tenelule.

³ Aning atonun, tonoknye birye el talilye ning nirya dobuka, pia bona utotowa talina kum ninye ati urdem aryuk areblirye, ‘Malye nang arye nati, “Anye bira dib teneplanye binya arye, nun like,” nyabuka, na dopropnirye, uku noutamak dongopnitinge,’ tenepturye, el bidamnye nong ap, areptu babye, anye birye yuk nang ati bico tenebuka, kum melilulnye ulyopura, el babye talyeuk ulule. Awinilya deice arye, dekna ati, dekna ning, im deice binuka kum dopropnamle. Allah el kanye ara, ‘Anye bira dipkoprop mambul kume, daupmalye,’ tenelule. Deiyok ara, elce yuk ninye ati bico kum tenelula ati nyapsine.

⁴ Yuk ninye ati, pia bicoe tenebuka melilamice ninye ara, sik wininyak ning ton laka nyapnusine. Ara, yuk nang ati, ‘E, sik yata ati sikcuk winimak do?’ tenen, minopce arye yu upliba kum derenyake. Yuk nang ati bico tenenyak nang arye, yuk nang ati, ‘Yata wiribuka meliptinye do?’ tenen, pia nimalye aryuk melinyake. Yuk nang ati, bico tenenyak ninye arye, yuk ninye talinyak ning ap, sik wininyak ning ap, ati, ‘Se, naryuk taliptinirye winiptinye,’ kum tenenyake. Tonda, sikce sik bidamnye ati, “Nunda weik mambul nang unyabe,” nyabuka, kanye erebuka weik yupu nyana ap, dilana ap, kum wininyake. Yuk ninye ati bico tenebikirye, talima areplibuk, unyak ninye ara, kanye talima namin ninyeuk unyake.

⁵ Yuk ninye ati, bico tenebuka melilamak nang ara, yuk nang ati nimalye aryuk unyake. Sikda, ‘Na kwit birye, se tenebuka, malye kanye bopnunil do?’ tenena kum arye, yu upliba, malye yupu nyabuka, yuk nang ati kum yaninyake. Tonda, sikce, sik bidamang ati, ‘Na patapnile ninguk weik mambul bukni, yuk ninye pataplye ning ara, daupmalye,’ kum tenenyake. Yuk ninye pataplye ning ton tenebuka melinyake. Tonda, yuk nang arye, malye ubikiba, sik pol-pola yu uplibuk, derebikirye, kum wenenyake. Talye kanye bobuka nimalye aryuk unyake. Aning atonun, yuk ninye arye, sikti, malye ubikcopura, luba kina kumce, pia tuba tenenauk ulamikirye, “Malye winipnik ning ara, ani-ani,” tenebuka, nukikirye, kisok deice kum delinyake. Yuk nang arye, sikti, malye upmace ning ati ara, ‘Dauplye’ tenen, talye mangkau kibikirye, tuba tamubuka tonap tuba kum tenenyake.

⁶ Yuk ninye ati bico tenebuka melilamak nang ara, yuk ninye arye, sik malye wininyak ning ap, malye tenenyak ning ap, ati, kanye deibuka kum unyake. Bukni, pia diksukum teleb winin ning ati, sikce kanye deibuka unyake.

⁷ Yuk ninye ati bico tenebuka melilamikce nang arye, kanye imun ning aupmalye babye, batakana kum aryuk, ‘Nun kayapu ati, kalikinauk unamne’ tenen, pia bico tenebuka melinyake. Sik anang ara, yuk nang arye, sik kayapu nang ati, malye nyanyak yupu ara, kekebikirye, adiparyuk talye kanye bobuka minopce dib kum tenenyake. Tonda, sikce yuk nang ati, ‘Kume, malye upmal bukni, wini talak daupmalibuk, aminyan ara, teleb winipnamlarya’ tenen, dinauk unyake. Kanye imun ning winipmalye talak nirya ara, sikce, ‘Adip aryuk bataknuyabe,’ kum tenenyake. Aning kum bukni, batakana kum pia lamapdongobuka tuba telebuk unyake. Tonda, yuk nang ati bico tenenyak nang ara, sik bidamang tenen ning aupmalya babye, yuk nang ati, tuba bico tenebuka melinauk unyake.

⁸ Ara, Allah arye nunti, ‘Yuk ninye bico tenebuka melinamak’ tenen, bico tenena ati arisulul deiyok ning ara, kum kumdanapnamle. Pia aunamle. Bukni, dan mutuku do nirya, aminyan talak ara, aminyan winipnamle ning laka nyalamak ning ara, kum danamle. Sik kum kel bikamik bukni, Allah El Dib Kanye mikip deice arye, yuk mutuku ninye nyanyak yupu, talye kanye bobuka nyanyak yupu ara, aning babye kum danamle. Allah arye ariliba, weik kel bikamikce ning ara, aminyan kum danamle.

⁹ Deiyok ara, ani. Wini talak ara, ton tam ning ara, bikinyabe. Ton tam ning ara, kum bikinyabe. Aning atonun, aminyan kum danamle ning, ton tam ning ara, laka nyanyabe. Ton tam ning nirya ara, kum laka nyanyabe. Aning-aning nirya ara, wini talak arye kel kum biktibye. Aning nirya babye kum danamle.

¹⁰ Nyapmasin bukni, aminyan talak ara, aning-aning kum sungtaliplirye, pia winipman kum pil dolinye bira, Kristus tamubuka yalyopura, wini talak sukultalisilye ning nirya ara, kum winipnamle. Winiplirye, winipman kum ning uk, kum suktalipmanto ning arisilibuk, aning ara, pia aunamle. Aning ara, kum uptue.

¹¹ Na mitik mi ulamse talak ara, sik mitik mapu arye, yupu nyana ap, arikal dona ap, bik-bik abuka talye-talye kanye bona ap, ‘Deiyok ara, ani-ani,’ kum tenebikirye, talye-talye winilamak touk winilamse bukni, nepnin balamsa ani, akunum wisi danin basirye, ninye du nang akunum upnukopura, mitik mapu winilamak ning nirya ara, akunum batakse.

¹² Ayupu nyapmasina ara, deiyok ani. Mek kwen pum bisik dipdekirye, sik mining urasinuk yalyopura, kanya eibikirye, mitik teleb ubuka elilamak touk, wini talak ara, aning-aning nirya mitik anun kanya atonun elinyabe. Bukni, ninye epdanduka miningdam epdakirye, pia teleb ubuka urasin laka elilamak touk, aminyan sirya talak ara, aning-aning nirya lakak aryuk eibibirye, teleb ubuka nong noutamak ning moubuka kel kipnamabe. Wini talak ara, mitik anun bikamse, ton ning ara, kum bikamse bukni, Allah arye nati, na wininye ning ap, tenenun ning nirya ap, teleb ubuka kel bikinilye touk, aminyan sirya talak ara, na babye aning-aning nirya, moubuka kel bikuka unamne.

¹³ Wini talak ara, tukwak mutuku unamap talak ara, mambul ning ton winilye pia wininamle. Ara, dib tenena ap, ‘Aminyan talak ara, Yesus arye, dolyanamsile’ tenen, batakana kum aniryuk, pia dinauk una ap, yuk nang ati bico tenebuka melina ap, ara awinilye ning pia aunamle. Awinilye aupmal bukni, weik mambul ning ara, yuk nang ati bico tenebuka melinauk ulule. Na Paulus arye, nyapsine.