1 Korintus 12 - Eipomek

Allah arye, ‘Teleb pil donamniak’ tenen, pil dona deiyok ning yuk-yuk arisilye ning ati, nyabuk yupu

¹ Ara, Yesus dib teneluluma ati, nun du weit atonun ululum ninyeo, anggun sal babye, kilapu babye kekepnululume. Allah arye, nun dib tenen ninye ati, ‘Teleb pil donamniak’ tenen, urdem aryuk aresilye pil dona deiyok ning ati asipdenuluma anya arye, yuk yupu ton nyapnusine. Ara, ‘Anggun walwal asa kum unamlulum’ tenen, nyapnusine.

² Anggun nirya kele. Allah min kum dib tenyamlum talak ara, yatato ninye ulamlum do? Yuk ninye arye, peterelamsik deice arye, dipkoprop teleb una kum bukni, yuk malye bisik dobuka bobinamsikba, anggunce talye ning ati, isa si erebuka ulalume. Anggun taruk arye, puturubuka delilalum ning ati, ‘Nun ni,’ nyabuka, aning si erelamlum bukni, aning nirya ara, yupu tonok babye kum nyapmanto ulamuk.

³ Winibuka ulaluma ati, narye ayupu nyapsine. Anggunce, ‘Aning ara, Allah arye, yanganmasil do, kum do?’ tenen, piripdelumba, kel biknamtum ning ara, ani. Ara, yata ninye do nirya, Allah El Dib Kanye, el mikip arye, aninye talibuka melilya deice arye, anggunce, “Yesus ara, talinye ulula ati, Allah weneplirye, uku din mutuku dopkwetepnamtue,” nyabuka, Yesus ati malye yupu nyabuka, pia kum yaniptinge. Aning atonun, yata ninye do nirya, talye nang arye, “Yesus ara, dipkoprop, nun Weik Ninye Deiyoknye usulule,” nyabuka, dipkoprop ning kum nyaptinge. Aning ara, Allah El Dib Kanye, el mikip deice melilya deice aryuk, ayupu dipkoprop ning nyaptinge.

⁴ Ara, Allah el mikip deice arye, arisulul pil dona deiyok ning ati yuk yupu nyapnusine. Apil dona deiyok ning ara, yala yuk-yuk ulule. Bukni, Allah El Dib Kanye tonok, el deice aniryuk aning talye aresulule.

⁵ Aning atonun, yuk ninye bico tenebuka, melibuka pil donyapa ara, yala yuk-yuk aupmal bukni, nun Weik Deiyoknye Yesus, el tonok aryuk talisilibuk, apil donyabe.

⁶ Ayupu nyapmasin touk, Allah el pil dona ati, pil aning-aning weik aupmal bukni, ninye mutuku-mutuku nirya ati, apil dona deiyok ning arisilirye, nun talima noutam melibuka pil dosilinye bira, Allah el tonok ulule. Yuknye birye ton apil dona deiyok ning kum aresulule.

⁷ Ara, Allah El Dib Kanye arye, tenesilye touk, Allah el pil dona deiyok ning, yuk-yuk bokuka aresulule. El Pil dona deiyok ning ara, yala yuk-yuk dobuka, ninye yuk-yuk ati, bokuka arisulul bukni, deiyok ara, ‘Aning deice arye, sik dib tenenyak ninye nirya, neika melipdakirye, teleb kililanamak’ tenen, aresulule.

⁸ Allah El Dib Kanye arye, tonoknye biti, Allah el ulul ning ap, el laka teleb yupu deiyok noutamak ning ap laka nyana deiyok ning ariliba, anye bira weik kelnye ulule. Yuknye ati ara, Allah El Dib Kanye melipliba, Allah el yupu kekeplinye bira, “Ayupu nong noutamak ara, ani. Ati winibuka unamabe,” nyabuka, nyalina Deiyoknye usulule.

⁹ Allah El Dib Kanye aryuk, yuknye ati, ‘Allah ati ikin kum uptue. Aning-aning nirya Allah arye, winipsutu’ tenen, weik dib tenena deiyok ning ariliba, weik arye, dib tenebuka ulule. Aning atonun, Allah El Dib Kanye aniryuk yuknye biti, ninye kwetena deiyok ning ariliba, aning arelinye birye Allah moropliba, adiparyuk sik uk dilamle ninye ila tamubuka uk lopliba bulongonyake.

¹⁰ Yuknye biti, Allah el mikip ariliba, ninye kum winipmanto ning, mikip ning pil dolule. Yuknye bira, aminyan winipnamle ning min kum winyamlye talak arye, laka nyana deiyok ning ariliba, laka nyasulule. Allah El Dib Kanye arye, yuknye biti, Allah el teleb pil dona deiyok ning areplibuk, teneplirye, nyalule. “Apil ara, Allah el mikip deice arye, dolule. Bukni, apil ara, Isa Mutuku Dongonye mikip deice arye, dolule,” tenebuka weneplirye, laka nyasulule. Ara, ‘Tilila ning ani, dipkoprop ning ani’ tenen, wibuka kintinilina deiyok ning dololirye, ulule. Yuknye biti, elce min kel kum bikamuk yupu bukni, Allah El Dib Kanye arye, ayupu nyana deiyok ning areplibuk, dopdoplirye, yuk mutuku ninye arye, nyanyak yupu, adiparyuk teleb ubuka nyalule. Tonye bira, yuk nang arye, Allah El Dib Kanye, el mikip deice yuk mutuku nang yupu kekena deiyok ning areplibuk, yuk nang arye, yuk mutuku yupu deice arye, nyakiba, anye birye kekeplirye, “Ayupu deiyok ara, ani. Ayupu deice ara, Allah arye, nyasulule,” nyabuka yupu lipsisikuka bokolilule.

¹¹ Allah el mikip arye, el pil dona deiyok ning areselilye ning ara, yala yuk-yuk ulul bukni, anirya ara, Allah El Dib Kanye aryuk aresulule. Tonda, dib tenen ninye nirya ton batakana kum anggun nirya ati, el kanye aniryuk tenesilye touk bokuka yuk-yuk arisulule.

Paulus arye, “Allah el dip tenen ninye nirya, nun yuk-yuk unyap bukni, nong tonok atonun unyabe,” nyabuk yupu

¹² Ara, na kayapu, yuk yupu ton nyapnusine. Nun nong ara, kisok, taruk, yan, aning-aning nirya weik aupmalibuk, yuk-yuk usulul bukni, nun nong tonok dukdongobuka unyabe. Aning atonun, nun Kristus ati dib tenenyap ninye ap, el ap talima dukdongobuka unyaba deice arye, nong tonok unyabe.

¹³ Nun nirya ara, Yahudi yala nang babye, Yahudi yala kum nang babye, yo bok deice dekenyak ninye babye, nun kanye aryuk talye pil dobuka unyap nang babye, nun nirya ati ara, Allah El Dib Kanye tonokuk arepsukbuk, nun talima ak weksuke. Tonda, Allah El Dib Kanye tonok, nun talima ak usulula deice arye, nong tonok kipdeipsukce dukdongopsuke.

¹⁴ Ara, anggun kele. Ninye nong deice upsuk ning ara, tonok ninguk kum usulule. Kume, kisok ap, taruk ap, yan ap, asing ap yala weik aulule.

¹⁵ Ati, winipmanto yupu nyapnusine. Nun yan arye, “Kume, nara taruk kum ununa anya arye, ‘Anong dukdongobuka mambul kum unune’ tenen, nong kalibuka sekuka bataknirye, na yanuk unamne,” nyaptu babye, aning deice arye, yuk kum uptue. El nong deice pia aubuk ning anya arye, kum winipmanto.

¹⁶ Aning atonun nun amul ara, “Kume, nara asing kum kununa anya arye, ‘Anong dukdongobuka mambul kum unune’ tenen, nong sekuka bataknirye, na amuluk unamne,” nyaptu babye, ayupu deice arye, yuk kum uptue. El nong deice pia aubuk ning anya arye, kum winipmanto.

¹⁷ Ara, nun nong ara, tonok ning uk, asing dem upsilyopura, yata ning deice arye, yupu kekeptibye do? Aning atonun, nun nong ara, tonok ning uk, amul dem upsilyopura, yata ning deice arye, nintong teleb ning kekeptibnye do? Kume, ue kum upsutopura, nintong ning kum kekeptibnye.

¹⁸ Gume. Allah arye, kweipdeipsuk talak ara, tonok ninguk kwepdeiamsukba, wini talak babye kum delisinyake. Aning kum bukni, Allah arye, ‘Aning arye, apil donamak’ tenen, kisok, taruk, yan, aning-aning nirya kwepdeiamsukba, wini talak babye nong tonok ubuka delisinyake.

¹⁹ Kisok do, taruk do, yan do, tonok ninguk upsutu toura, yata wiribuka arye, nun nong tonok ubuka uptibye do? Aning ara, kum winipmanto.

²⁰ Allah arye, kwepdeiamsukba, delisinyaka ara, aning-aning yuk-yuk usulul bukni, anirya dukdongobuka, nong tonok delisinyake. Aning atonun, el mapu ati ara, ‘Na pil yuk-yuk donamak’ tenen, el mikip arye, pil dona deiyok ning yala yuk-yuk arisulul bukni, Allah ap, talima dukdongobuka unyaba deice arye, nong tonok dukdongobuka neika unyabe.

²¹ Nun nong ara, dukdongobuka tonok unyaba anya arye, nun asing arye, nun taruk ati, “An pil dolul ning ara, kum patanulule. Anda talye daulyame,” kum nyaptu. Tonda, nun kisok arye, nun yan ati, “Anggun pil dorurum ning ara, kum patanulule. Anggunda, dauplye,” kum nyaptu.

²² Aning ara, pia kum bukni, nun nong noutamak ara, mikip ara, mitang usilye ning babye, kum winipsutu toura, pia kanye imun upsute. Aning-aning nirya patasilya atia.

²³ Tonda, nun nong noutamak ara, ‘Se, aning ara, urasin malye ning,’ tenepmabye ning ara, ‘Urasin teleb upnamle’ tenen, adeice ara, kweirya ning donyabe. Tonda, nun nong noutamak ara, ‘Aning ara, laka upsiliba, yuk nang arye, eipsikiba alye dakaldanyabe,’ tenenyap ning ara, teleb ubuka, moubibirye duknuna ati, sanyum ap, lye ap, kinyabe.

²⁴ Wininyap bukni, nun nong noutamak ara, mambul kum ning ara, taruk do, yan do, ‘Aning ara, mambul kumanya arye, yuk nang arye, eipsikca babye, daupmalye,’ tenenyap ning ati ara, talye kanye bobuka, nong bananguk unyabe. Unyaba ara, deiyok aupmal. Ara, Allah elcuk nun nong kweipdeipsuk talak ara, nong noutamak usilye ning yuk-yuk awamuk bukni, anirya dukdongobuka nong tonok kipdeipsuke. Bukni, nun nong noutamak, ton tam ati ara, yuk ninye arye, aning eipsikiba, alye usulul anya arye, Allah arye, nun nong noutamak bukni, atam ati ara, ‘Mambul tenebikirye, kanye mounamak’ tenen, kwepdeipsuke.

²⁵ Winipsuka deiyok ara, sik nong nirya ati ara, ‘Aning ara, pia telebe, aning ara, malye ning,’ kum tenebikirye, ‘Anirya ara, weik mambul’ tenen, sik nong nirya ati, ‘Kanye moubuka unamak’ tenen, kwepdeipsuke.

²⁶ Winibuka kwepdeipsuka anya arye, nun nong noutamak kwepdeipsuk ning tonok ning ton, uk disilyebuk do, opsilyebuk do, winipsilyopura, nun nong nirya, uk disilyeba unyabe. Aning atonun, nun nong noutamak bukni, yuk tam ning ati, “Se, aning ara, urasin pia telebe,” nyapsikcopura, nun nong nirya ati, kanye deibuka unyabe.

²⁷ Ara, ayupu nirya nyapmasin touk, ayupu el deiyok noutamak ning ton tabakuka nyapnusine. Anggun dib tenelulum ninye nirya ara, Kristus el nong tonok atonun ululume. Anggun yuk-yuk yupa weik ululum bukni, anggun nirya ara, el ap talima dukdongopsuka deice arye, el nong tonok ululume. Ati anggun nirya ara, neika atonun mambul ninye ululume.

²⁸ Allah ati dib tenebuburye, el mapu unyaba noutamak ara, Allah arye, nun nirya ati, ‘Pil yuk-yuk donamak’ tenen, kwepdeipsukce, pil dona deiyok ning yuk-yuk bokuka aresulule. Ara, minopce weik mambul ning ara, ‘Na yupu dobuka peterelbana ati deiya kouna deiyok nang, Rasul nang unamak’ tenen, nun Rasul nang wipdeiamsuke. Bitinye ning ara, el nyalye yupu laka peterena ap, aminyan unamle ning min kum upmalye talak, laka nyana ap, ati, ‘Nabi nang donyak pil dobuka unamake’ tenen, yuk nang wipdeiyamuk. Winilye ning ara, el yupu nirya peterena ati deiyok nang wipdeiamsuke. Yuk nang ati ara, ninye kum winipmanto ning, winipman kum pil donyak ninye ap, wipdeiyamuk. Tonda, Allah El Dib Kanye arye, mikip ariliba, ninye kwetena ninye ton wipdeiyamuk. Ton ning ara, ‘Yuk nang ati bico tenebikirye, sik patan ning ati melinang unamake’ tenen, wipdeiyamuk. Tonda, ‘Pil nirya teleb ubuka donamak’ tenen, “Wininamabe, wininamabe,” nyabuka, pil dona deiyok ning moubuka tenebikirye, pil laka nyan nang, administrasi nyalamak ap, wipdeiyamuk. Tonda, sik min kum kel bikamik bukni, Allah El Dib Kanye mikip deice arye, yuk mutuku ninye nyanyak yupu, aninye areplibuk, ayupu dobuka, nyanyak nang ton wipdeiyamuk.

²⁹ Ara, Allah arye, ‘Apil, apil yuk-yuk donamak’ tenen, pil dona deiyok ning arisulula anya arye, anggun ton tenipdelulume. Anggun kan-kan noutamak ara, anggun nirya Allah yupu peterelbana ati deiya kouna deiyok nang, Rasul nang ululum do? Tonda, anggun nirya Allah arye, nyalye yupu kekebuka laka nyana ap, aminyan winipnamle ning tenebuka laka nyana ati, nabi pil don ninye ululum do? Anggun nirya ara, Allah yupu sekik ning peterena deiyok nang ululum do? Anggun nirya ninye kum winipmanto ning winipman kum pil don nang ululum do?

³⁰ Anggun nirya Allah el mikip ariliba, ninye kwetena nang ululum do? Anggun nirya Allah El Dib Kanye, el mikip deice arye, yuk mutuku ninye nyanyak yupu dobuka talye kanye bobuka nyalulum do? Anggun nirya ara, Allah El Dib Kanye arye, yuk mutuku ninye yupu nyanyaka ara, arisilibuk, “Ayupu deiyok ara, ani,” nyabuka laka nyalulum nang ululum do?

³¹ Gume, anggun Korintus mutuku dib tenelulum ninye ara, anggun nirya arye, apil yala yuk-yuk nirya, neiktoto atonun kum dolulume. Kume, Allah arye, bokuka yuk-yuk areamsuk touk pil yuk-yuk dobuka winilulume. Bukni, ‘Allah arye, el pil dona deiyok ning, weik mambul ning arepsutuba, apil doptibye’ tenen, pia patasiliba, kanye deibuka unamlume. Aning-aning nirya babye awapsuk bukni, wini talak pia weik teleb ning arepsutuba, aning bobuka wininamlum ning ara, nyapnusine. Ati moubuka kekenululume.