1 Korintus 11 - Eipomek

Paulus arye, “Na kayapu, ‘Allah si erebuka kipnuyap’ tenen, bulupmumnye talak arye, wininamlume,” nyabuk yupu

¹ Na kayapo, narye Kristus winilamuk touk, ‘Aninguk talibuka wininamne’ tenen, diksukum unye touk, anggun babye, na unye ning eibuka, aninguk talibuka diksukumuk unamlume.

² Na kayapo, na winilamse ning ap, anggunti peterelamsisiba, kekelamlumce, na peterelamsise touk tuba tenepmunce, aninguk talibuka dobolbaluluma ati, narye, “Telebe, anggun teleb winilulume,” nyapsine.

³ Wini talak ara, ‘Yuk yupu ton moubuka teneplumce, kel biknulum’ tenen, nyapnusine. Ara, yatanye do nirya, ninye nirya, sik Deiyoknye bira, Yesus Kristus el uka. Aning atonun, kilapu nirya ara, sik deice tam unyakce, deiyok nang ara, sik dolalamak nang unyake. Aning atonun, Kristus el deice tam ulul Deiyoknye bira, Allah eluk ulule.

⁴ Tonda, yatanye do nirya, yuk ninye bulubuka kekenyak sukum arye, ninye arye Allah ati morolamak talak ap, Allah yupu ati, peterelamak talak ap, winipnuce talak nirya, sik kisok deice kalun ning tuba kalupmacopura, malye unyake. Deiyok ara, kisok deice kaluna kalubica deice arye, sik deiyoknye Kristus ati, malye kilinyaka ati nyapsine.

⁵ Bukni, yata kilapu do nirya, ninye bulubuka wekmakcak arye, Allah ati morolamak talak ap, Allah yupu peterenyak talak ap ara, kilapu nirya arye, sik kisok kalun ning kum ongobikcopura, sik deice tam unyak nang, sik dolalamak nang sik akanye yapu ati, malye kilinyake. Cang kain arye, kisok kalun kain, kisok deice kum kalubicopura, sik kisok potong nirya, dilo colamaka atonun wininyake. Nun nirya akunum kele, kilapu ara, kisok potong nirya dilo coptingopura, ‘Malye wininmake,’ tenenyabe.

⁶ Kilapu arye, ‘Kisok deice baju bola kaluna ara, nun like,’ tenebikirye, kum kalubikcopura, pia malye winin ning bukni, yata kil do, ‘Na kisok kum kalupnune,’ teneplyopura, akunuma, el kisok potong nirya dilo kuktue. Bukni, nun kele, kilapu kisok potong nirya kobuka dilo cona ara, pia malye un ning anya arye, teleb ning ara, Allah morona talak ap, Allah yupu peterena talak ara, kisok kalun ning dobuka, sik kisok deice kalunamake.

⁷ Ninye nirya ara, Allah kum elinyap bukni, Allah arye, ‘Na urasin atonun kwepdeipnune,’ tenebukce, el urasin atonun bukni, mitik yuk tamubuka kwepdeipsuke. Tonda, Allah el pia teleb ap, mambul weik ap ulye touk, Allah arye, nun ninye ati, mitik atonun tamubuka kwepdeipsuke. Sal ara, wininyaka anya arye, Allah moron talak ap, Allah yupu peteren talak ap, atalakuk sik kisok deice kaluna ara, pia kum wininamake. Sal ara, kisok kaluna ara, kume. Ati, sik kisok deice kum kalubikcopura, yuk ninye eibikirye, sik Deiyoknye Allah ati, el siuk erenamake. Bukni, kilapu ara, ninye amu tam unyaka anya arye, sik kisok deice kaluna kalubikcopura, yuk ninye eibikirye, ‘Akilapu sik akanye yapu ara, teleb wininyak nang,’ tenepnamake. Deiyok ara, sal sik deice tam ulul Deiyoknye bira, Allahuk ulule. Kilapu sik deice tam ulul deiyoknye bira, sik dolalamak nang unyake. (Wini talak ara, nun Yahudi yala ninye ara, winibuka wininyaba anya arye, ayupu nirya nyapsine.)

⁸ “Kilapu ara, kisok deice kalunamake,” nyapmasina ara, deiyok ton aupmala ara, ani. Ara, minopce ulamuknye bira, kilapu arye, kum deibik bukni, Allah el kanye aniryuk talye kwepdeibuk. Bukni, minopce kwepdeibuk kil ara, Allah arye, sal yace yok doprobukce, kil kwepdeibuk. Ati kilapu ara, sal sik amu tam atonun ukirye, sik akanye yapu nyanyak yupu ati, kekebikirye, si erelanamake.

⁹ Aninguk kume. Allah arye, kil tonok akunum kwepdeibukce, ‘Akil melina ati, sal ninye tonok kwepdeipnamne,’ kum tenebuk. Aning kum bukni, sal tonok akunum kwepdeibukce, aminyan ara, ‘Anye el melina ati, kil tonok kwepdeipnune,’ tenebukce, akil tonok kwepdeibuk.

¹⁰ Aning ati ara, kilapu nirya ara, ninye bulubikirye, ‘Allah morona ap, el si erena ap winipnuyabe’ tenen, wininyak talak ara, Allah morona ap, Allah yupu peterena talak ap, cang kain dobuka, sik kisok deice kalunamake. Wininamaka deiyok ning ton, ani. Ara, sik im deice melin nang, malaikat tukwak kilapu wininyak ning ara, elinyaka ati, kilapu sik kisok deice kalunamake.

¹¹ Ayupu nirya nyapmasin bukni, nun Deiyoknye Yesus ap talima dukdongobuka unyaba noutamak ara, ninye nirya arye, sik kilapu nirya ati, “Sik dauplye, nunuk ara mambule,” kum nyaptinge. Aning atonun, kilapu arye sal ati, “Sik dauplye, nunuk ara, mambul unyabe,” kum nyaptinge. Nun nirya ansinibuka, teleb ubuka neika unamabe. Sal babye, kilapu babye, mambul unyaba ati, nyapsine.

¹² Yupu deiyok ton aupmal. Ura, minop talak ara, Allah arye, sal ninye nong noutamak yace yok dobukabukce, kil kwepdeibuk. Tonda, wini talak ara, kilapu arye, sal delisinyake. Bukni, yata ning do nirya ara, Allah elcuk arisilibuk winisulula anya arye, “Aning ara, mambule, aning ara, mambul kume,” kum nyaptibye. Anirya ara, mambul uka.

¹³ Anggun bidamnye aryuk, nun wini talak wininyap ning ara, tenipdelulume. Ninye wekmacak arye, Allah moropnucopura, kilapu arye, cang kain bola kisok deice kum kalubikcopura, talye kanye bobuka Allah morobikcopura teleb do, malye do? Kume, aning ara malyeuk ulule.

¹⁴ Aning atonun, Allah arye, awinilul ning nirya kwepdeibukba, awinilye touk elinyaba deice arye, kum kel biktum do? Sal ara, sik kisok potong cang weik uplyopura, aning ara teleb do, malye do? Aning ara, malye anya arye, aning ati ara, alye kum dakalanamak do?

¹⁵ Bukni, Allah arye, kilapu ati, sik kisok kaluna atonun ning, kisok potong cang ning ara, akunum areamsuka ati ara, ‘Sik kisok potong cang uplyopura, sik urasin teleb una atia,’ tenenyabe.

¹⁶ Ura, yuk nang arye, ‘Aning ara, kume, kisok kaluna nyapmasil yupu ara, nun like. Elce talye nyapsile’ tenen, lik upliba, yupu yuk-yuk nyaptingopura, ayupu ton nyapsine. Allah dib tenenyak ninye, mutuku-mutuku nirya ap, nun peterena deiyok nang ap, yuk-yuk kum nyanyabe. Anyapmasin touk, tonok kanye bobuka atouk tenebuka, anyapmasin touk wininyabe. Yuk ton kume.

Anggun Korintus mutuku ninye arye, ‘Yesus el ining deice arye, lyepsuk ning ara, pia tenenamabe’ tenen, kwaning din talak malye ulamik ning ati, nyabuk yupu

¹⁷ Winira, yuk yupu nyapnusin deice arye, “Anggun teleb ubuka ululume,” kum nyapsitinye. Malye ululuma ati wenepnusin yupu ara, ani. Dipkoprop ara, ‘Yesus lyepsuke’ tenen, bulupmunce kwaning dimunye talak ara, malye ning weik arye winilulume. Teleb winimunye ning ara, mitikuka.

¹⁸ Minop nyapnusin yupu ara, sik yuk nang arye, nyapnikba, kekepse ning ara, nyapnune. Ara, “Sik Korintus mutuku ninye ara, ‘Allah yupu kekebuka, el si erepnuyak’ tenen, bulubikce talak ara, sik kanye tonok tenebuka, ansinibuka kum unyake. Sikda, kanye yuk-yuk tenebuka, talima wililanyakce, yuk-yuk kilongonyake,” nyapnikba, kekepse. Ayupu kekepse ning ara, mitika aryuk dib tenesunune. Ton nyapnik ning ara, ‘Telila do, dib do?’ tenenune.

¹⁹ Ninye yuk-yuk unyaka noutamak arye, Allah arye, ton ninye wibuka, ‘Anang nyanyak yupu ap, wininyak ning ap dib wininyake,’ tenepsilirye, kanye delisulule. Ton nang wininyak ning ap, tenenyak ning ap ati, kanye kum delisulule. Allah arye, ‘Ninye unyaka noutamak, Allah kanye delilul ninye ara atia, kel biknamak’ tenen, yuk-yuk unyaba deice arye, laka kilisululba, bikinyabe. Aning ati, kanye yuk-yuk tenena ap, yuk-yuk ululuma ap ara, dipkoprop aupnamle.

^20-21 Anyapmasin bukni, Yesus arye, lyepsuk ning ati, ‘Pia tenepnamap’ tenen, kwaning dilyangamunye talak ara, anggun nirya arye, ‘Na kayapo nang yakibuk, neika dipnamape,’ tenena kum arye, talye kanye bobuka, minopce dibuka sirya dakalulume. Winipmunyopura, ton nang arye, anggur mek weik arye, dibikiba, sik kanye wanganyake. Ton nang arye, din dibikcopura, yuk nang yanuka talye yaceura, tamubuka banyake. Winilulum ati ara, ‘Yesus lyepsuke’ tenen, si erena ati, kwaning ap, mek ap, dinyap ning ara, anggunda dipkoprop ning, kum dilulume. Anggunda, talye din sirika dilamak touk, talyeuk dilulume.

²² Aning winiluluma ara, yata deiyok ati winilulum do? Anggun aik kum upmasutuba, anggun aik pum arye, talye din ap, mek ap kum diptum do? Akumopura, aik awamli bukni, Allah dib tenena ati bulubikce ninye ara, ‘Aning ara, mambul kume’ tenen, talye tenelulumce ululum do? Tonda, sik aning-aning nirya kum uplye ninye, talye bona utotowa talina kum ninye ati, kum dibikiba, ‘Dauplye,’ teneluluma deice arye, ‘Bona utotowa talina kum ninye sik nong deice, alye dakna ning debibyeba, alye daknamake,’ tenemunce, aning winilulum do? Na kayapu, yata yupu ton nyapsitinye do? Anggun amalye ning winilulum ning ati, narye anggunti, “Urdem, aning ara, dauplye. Anggunda teleb ninye ululume,” talye nyapnusin do? Kume, aning ara, kum nyapsitinye.

Yesus lyepsuk ning tenena ati, dinyaka ati, nyabuk yupu

²³ Paulus arye, nyabuk. Nun Deiyoknye Yesus arye, nyapdeipnukba, anggun kel bikna ati, peterepsise yupu ara, aupmala anya arye, anggun winimunye ning ara, “Malye winilulume,” nyabuka, talye kum nyapsine. Bukni, Yesus arye, nyapdeipnukba, peterepdongopsise ning ara, tonap nyapnusine. Yesus arye, winibuk ning ara, ani. ‘Malye nang arye opnamak’ tenen, Yudas Iskariot arye, ninye yupu laka nyalbiyuk lukunyanuk, Yesus arye, roti kwaning doptalibuk.

²⁴ Doptalibukce, el li Allah ati, “Telebe,” akunum nyabukopura, aroti kwaning bokuk. Bokukce ayupu nyabuk. “Aroti kwaning ara, na nong atonun ulule. Na nong ara, ‘Anggun malye winin ning ati, punupsinirye, anggun lyepnamsin’ tenen, arepsine. Wini talak aroti kwaning dipmap touk, aminyan babye aroti kwaning dinamlum talak nirya ara, na nong ati pia tenenamnulume.” Yesus arye, nyabuk.

²⁵ Tonda, aning winibuk touk, sik din nirya akunum dibikopura, Yesus arye, tonok anggur mek makau dobuka ereiptalibukce, ayupu nyabuk. “Amek ara, na ining atonun ulule. Minop talak ara, Musa sekamuk yupu nirya moubuka kekelamika deice, Allah arye, Israel ninye, sik malye winilamik ning namin kilamuk bukni, wini talak ara, Allah arye, nyalisilye yupu yuke. Ara, ‘Na ining deice arye, ninye malye winin ning, Allah arye, kum daneiplirye, lyepnamsile,’ nyapsine. Ati, amek dipmap touk, aminyan talak babye amek dinamlum talak nirya ara, na ining ati tenepnumunce, pia denamlume.” Yesus arye, nyabuk.

²⁶ Nyabukopura, ayupu ton nyabuk. “ ‘Winibuka aninguk wininamlulume,’ nyapmasina ara, talye ati kum nyapsine. Deiyok ara, aroti din ning ap, amek ap dinamlum talak nirya ara, aning diluluma deice arye, ‘Nun Deiyoknye Yesus arye, ninye lyena ati, nunti punupsukce lyepsuke,’ nyabuka, laka nyana atonun, wininamluma ati nyapsine. Apia winibuka ulamunya ani, aminyan ara, na tamubuka dolyanamsine,” Yesus arye, nyabuk. Yesus arye, nyapsuka ati, na Paulus arye, ayupu tuba tamubuka tonap nyapsine.

“Talima noutamak malye ning aupmalibuk, ‘Yesus dipsuk ning,’ tenena ati dinyaka ara, kum denamlume,” nyabuk yupu

²⁷ Paulus arye, nyabuk. Ara, talye dina ati kume. Amek ap, aroti din ning ap ara, Yesus dibukce lyepsuk ning ati tenebuka denamluma anya arye, yatanye do, yata kil do, ‘Na malye winin ning akunum batakse do, malye tuba unun do?’ tenen, moubuka kum tenebikirye, kanye moubuka tenena kum, talye kanye bobuka dilinye ap, talye dilye kil ara, pia malye weik wininamake. Pia malye winin ning ara, ani. Ara, sik moubuka tenena kumce, talye kanye bobuka diluluma deice arye, nun Deiyoknye Yesus el nong ap, el ining ap ati, yanipmunce pia malye winilulume.

²⁸ Aning ati ara, yatanye do nirya, ‘Amek ap, adin ning roti ap, dipnun’ tenen, kintinipnulye talak ara, ‘Na talima ak ara, malye winin ning tuba aupmanil do, kum do?’ tenen, moubuka tenipdelirye, atalak aniryuk malye winin ning nirya akunum bataklyopura, aminyan denamle. Talye kanye bobuka dena meme. Anggun talima ak malye ning tuba aupmalye bukni, talye kanye bobuka dipmunyopura, Allah arye, anggunti wenepnamsile.

²⁹ Ayupu ara, urdem ati kum nyapsine, na kayapu. ‘Yesus el nong arepsuka deice arye, lyepsuka ati, aning ara, mambule’ tenen, kanye moubuka tenena kum arye, el talima ak malye ning awamli bukni, adin ning ap, mek ap talye kanye bobuka dilinye bira, winilya deice arye, Allah arye, weik wenebuka oplopnamle. Amalye winilulnye opnamla deiyok ara, anye bira el deiceuk unamle.

³⁰ Ayupu nyapmasin touk, anggun moubuka tenena kumce, talye kanye bobuka, amambul mek ap, roti din ning ap, diluluma deice arye, anggun kayapu nang weik mikip ara, mitang upliba, bol malye bona ap, uk dina ap, unyake. Tonda winimunya deice arye, uk delepa, anggun kan-kan arye, ninye weik arye, dibinyake. Deiyok ara, anggun moubuka tenena kum arye, anggun talima ak malye ning tuba aupmasilibuk, Yesus el kwaning ap, mek ap, talye kanye bobuka diluluma deice arye, aikin ning usulule.

³¹ Anggun kan-kan arye, dibilulum bukni, nunce nun bidamang ati, moubuka kalikdatibirye, malye winin ning ati, “Aning ara malye,” nyabuka bataktibyopura, aminyan talak Allah arye aning ati wenebuka kum opnamsile. Bukni, nun bidamnang nun malye ning kum batakipyopura, elce dipkoprop aning ati wenepnamsile.

³² Yesus arye, “Anggun malye ning ani,” nyabuka yupu lipsisikuka bokeipsilirye, nun nong deice ikin ning delisilya ara, ‘Na mapu ati, wini talak yupu bokipnirye, wenepyopura, aminyan talak ara, Allah arye, talyeukirye dib kum tenenyak ninye nirya ati, yupu lipsisikuka bokuka weneplirye, oplopnamle talak ara, na mapu ap tabakuka, Allah arye, kum oplopnamle’ tenen, wini talak Yesus nimalye arye, wenesulule.

³³ Ayupu nirya ati ara, ayupu tuba tamubuka tonap nyapsine. Ura, Yesus dib teneluluma ati, nun du weit atonun ululum ninyeo, anggun sal babye, kilapu babye kekepnululume. Arup nyapmasin touk, ‘Nun neiktoto dipnuyap’ tenen, bululum talak nirya ara, anggun nirya arye, sik yuk ninye nirya ati, ‘Nun kayapu yakibuk, teleb ubuka neikauk dipnamape,’ tenenamlulume.

³⁴ Yatanye do nirya, dina pataplyopura, el bidamnye aik pumuk din akunum diplirye, aminyan yanamlule. Ara, ‘Nun neika bulubibirye, wininyap ning deice arye, malye winibibyopura, aminyan talak ara, Allah arye, wenepsilyak’ tenen, nyapmasine. Tonda, na Paulus arye, anggun dam yanyopura, “Winipnamlulume, winipnamlulume,” nyabuka, yupu tonap tabakuka nyapnamsine.