1 Korintus 10 - Eipomek

“Israel yala ninye malye winilamikba, Allah wenebuka deice arye, kel biktibye,” nyabuk yupu

¹ Ara, Yesus dib teneluluma ati, nun du weit atonun ululum ninyeo, anggun sal babye, kilapu babye kekepnululume. ‘Malye winibibyeba, aminyan talak ara, dekne ning kum doprobibyak’ tenen, nyapmasin yupu dib teneplumce, ‘Moubuka kanye moupnamlulum’ tenen, nun apu yapu Israel nang Mesir mutuku batakuka, bisik balamik talak malye winilamikba, Allah arye, wenebuk ning ton nyapnusine. ‘Walwal nang atonun kum wininamlulum,’ tenena ati nyapsine. Allah arye, weik dua kan-kan noutamak ulamukce, sik deice balamukba, nun apu yapu nirya elilamikce, ‘E, abisikuk binuyap’ tenen, dobolbalamik. Tonda, bisik balamika ani, weik Noutam Mek kwen kup-kup yayikce, ‘Se, weik mekwen deibukce, bisik sekdongopsuka anya arye, binmanto kum upsile’ tenen, malye kanye bobik bukni, Allah arye, amekwen dana-dana kipdopbukba, nun apu yapu nirya anoutamak tuku mikmok bisikuk biyik.

² Musa menekuka balamukba, nun apu yapu nirya arye, Allah dua kan-kan ulamukce, adua menekuka balamukba, sik nirya arye, adua amuak balamik ning ap, weik mekwen dana-dana kipdopbukba, tuku kel-kel abuk bisik biyik ning ap deice kel biklamikce, “Musa ara, nun deiyoknye ulule,” nyabuka ulamikce, Musa el yupu kekelamik. Winilamik ning ara, winipmanto ning ton nyapnusine. Ara, dib tenebibirye, yuk ninye nirya nunti, ‘Anye bira, Yesus el mi akunum ulule kel biknamsiak’ tenen, mek dongolamak touk, nun apu yapu ara, Musa el amu tam ulamikce, elti, melilamik.

³ Aning atonun, din patabukba, Allah im deice arye, dolilamukba, im deice roti din ning, el si ara, mana bulubuka, sik nirya neika dilamik.

⁴ Tonda, mek pia kum uamuk mutuku balamikba, mek weik patabukopura, Allah arye, ninye winipmanto kum pil dobuka deice arye, weik mutuku yangan keil noutamak arye, mek panabuka balamukba, nun apu yapu nirya arye, amek kwebuka kikliman dilamik. Aning mana dilamikce, akeil noutamak arye, mek panabuka balamukba, kwebuka dilamika deice arye, kum dibik. Aning nirya winilamuk touk, aning deice arye, winipmanto ning ton kel biktibye. Mutuku yangan keil noutamak arye, mek balamukba mek kwebuka dilamik touk, dipkoprop ning ara, Kristus menekuka balamukce, el pil dolamuka deice arye, nun apu yapu ati melilamukba, sik kum diamik.

⁵ Anyapmasin ning nirya ara, nun apu yapu, Israel ninye yupa weik ulamikce, ninye kum winipmanto ning ara, Allah arye, pil dolamukba sik nirya neika elilamik bukni, tuba malye winilamikopura, Allah arye, aninye ati yu ulamuk. Yu ubukba, aninye bokuka, yupa weik ning ati, malye kanye bobuka wenebukba, amutuku noutamak, mek kum uamuk mutuku dana-dana, weik arye, olamuk. Olamuka anya arye, sik diamikce aninye sirya daklamuk. Sik diamik ninye ara, weik diamikba, sik kayapu nang arye, tuku palibuka weilamik.

⁶ Ara, na kayapu, moubuka tenenamlume. Aning-aning nirya minop talak winilamuk ning ara, nun kel bikna ati, winipmanto ning winisulule. Minop talak nun apu yapu arye, malye ning patalamukba, sik kanye talima, malye ning deiceuk deiamikce, malye-malye ulamik ati, Allah arye, aninye wenebuka olamukba, diplamik. Aning atonun, ‘Nun babye tuba malye unyabbuk, Allah arye, nunti atonun wenebuka opsilirye, sirya daksilyak’ tenen, kanye moupnamnyabe.

⁷ Tonda, nun apu yapu Israel ninye kan-kan arye, bokuka ton nang ara, ‘Nun puturubuka deipmap ning ara, nun ni koprop atonun unamsile’ tenen, puturubuka deipnarye, talye ning si erelamika deice arye, Allah el si yanilamik. Winilamik touk, anggun wini talak ululum ninye arye, aning ton kum wininamlulume. Allah yupu deice ara, ayupu ton sekamik. Ayupu ara, ani. ‘Aninye arye, weik kwalina kwalibuka dinmeka ani, kwalin ning akunum dibuka sirya dakikura, mot senmek talak noutamak arye, talye-talye yoldanmek. Sikda Allah ati melilamik ninye bukni, sik wininmeka ara, Allah pia dib tenena kum ninye winilamik touk wininmek.’ (Keluaran 32:1-19)

⁸ Tonda, nun apu yapu kan-kan arye, bokuka ton nang arye, talye-talye yolalamik touk, kum wininamabe. Sik weik arye, ubula yoldalamikopura, Allah arye, aninye wenebuka oplobukba, tonok sum deice arye, yupa weik, 23 ribu ninye dibik.

⁹ Tonda, nun apu yapu arye, “Allah dipkoprop teleb ubuka kum winilamsutue. El yata ati amalye mutuku noutamak boyanmasilce batakasulul do?” nyabuka, Allah ati malye yupu nyabuka pirilelamikce, Allah ati winildelamik. Ara, nyalamika deice arye, ‘Allah arye, nunti bico tenebuka nimalye arye, tenesilye ara, dib do, telela do?’ tenen, Allah ati pia winilelamik. Nun apu yapu arye Allah ati, winilelamik touk kum wininamabe. Pirilelamik ati, Allah arye, sik wenena ati, sik dam yu kwatima deibukba, weik arye, yanuka si tolamukura, ninye weik diplamik.

¹⁰ Tonda, nun apu yapu arye, Allah ati, malye kanye bobuka, “Elce winipmasil ning ara, nun like. Elda yata ati ikin ning arisulul do?” nyabuka, Allah ati wenebuka derelamikce, elti, winildelamik touk, nunda kum wininamabe. Sikce Allah ati wenebuka winildelamikba, Allah arye, yu ubukba, el im deice melinanye malaikat tonok, el si ara, Ninye Ona Deiyok Malaikat, anye bira dobuka sik kan-kan dopdeibukura, ninye yupa weik oplobuk.

¹¹ Nun apu yapu malye ulamikba, Allah arye, aninye wenebuk ning ara, ‘Yuk ninye nirya kel biknamak’ tenen, winipmanto ning akunum winipsile. Nun wini talak unyap ninye ara, sirya daknamle talak akunum dam yanamsila anya arye, ayupu minop talak sekamik ning deiyok ara, ‘Sik sirya talak wini upnamak ninye mankau arye, malye winibicak’ tenen, yupu sekeldongona ati, ayupu sekeiyamsike. Ati aning nirya tenepdemunce, kanye moupnamlulume, nyapsine.

¹² Nun wini talak unyap ninye ara, yupu sekelongona ati, ayupu sekuka areamsike. Aning ati ara, anggunce, ‘Kume, nunda, akunum diksukumuk ubirye, kanye darapdongobuka unmabe,’ teneplum ninye ara, ‘Mankau asa malye winipmunyeba, Allah arye, wenepsilyak’ tenen, kanye pia moupnamlulume nyapsine.

¹³ Ara, ‘Aning winipnune’ tenen, pataplya deice arye, talima lilosulul ning nirya ara, ninye mutuku-mutuku nirya aning aryuk, nun talima nirya lilosulule. Bukni, Allah arye nunti, “Ura, ‘Na mapu malye winibicak’ tenen, kalekuka melinamsile,” nyalilamsuk touk, pia kum batakasulule. Elce nyalisilye atouk dipkoprop usilirye, melinauk usulule. Elce kalekuka melisilyopura, nun talima lilosulul ning, kum bisipmanto ning ton kum yanamsile. Allah melisilya deice arye, aning nirya ara, malye kibuka bisiptibye. Ati, malye winin ning tenebibirye, ‘Aning winipnun’ tenen, kanye teniptobibyopura, talima lilosulul talak nirya ara, Allah arye nunti, ‘Amalye winin ning bataktingce, diksukumuk unamak’ tenen, loplobuka diksukum balamak bisikuk laka kipdeipnamsile. Talima lilosilye ning awabsilya babye, Allah arye, kintinipsilye bisikuk bipyopura, kanye darapdongobuka telebuk unamabe.

Paulus arye, “Isa ap, Allah ap, talima dukdongobuka una ara, kum winipmanto,” nyabuk yupu

¹⁴ Na kayapu, bico tenesunune. Sik yuk nang arye, ‘Aning ara, nun ni unamsil’ tenen, talye ning si erelamak touk, pia kum wininamlume. Aning winina ati, pia leibuka memepropnamlulume. Yuk ninye arye, talye ning ati, Isa si erebikiba, eipmunyopura, anyaka batakuka bik-bik abuka yukak bindopnamlulume.

¹⁵ Ura, anggunda kanye bon ninye ululuma anya arye, anyapmasin yupu ara, ‘Dipdo, telela do?’ tenen, anggun yuk tenipdelulume.

¹⁶ Nun Deiyoknye Yesus el ining deice deksuka ara, ‘Pia tenepnamap’ tenen, mek makau bobuka, Allah ati, “Telebe,” nyabuka, neika dinyaba deice arye, Kristus el ining deice arye, lyepsuk ning ara, dopropbibyopura, el ap talima dukdongobuka neika unyap do, kum do? Aning atonun, Yesus el nong ara, wanwanun yo deice obikbuk dipsuka ara, ‘Pia tenepnamap’ tenen, tonok kwaning dobuka, bokibirye neika dinyaba deice arye, Kristus el nong arepsuka deice arye, lyepsuk ning ara, dopropbibyopura, el ap kanye talima dukdongobuka neika unyap do, kum do?

¹⁷ Kume, nunda yupa weik ninye yuk-yuk unyap bukni, kwaning tonok dobuka, bokibirye, nun nirya akwaning tonok neika dinyaba anya arye, nun nirya nong tonok atonun unyabe.

¹⁸ Tonda, Israel yala ninye wininyak ning ton tenipdelulume. ‘Allah el si erebuka kipnamap’ tenen, kam ning obuka kwalibikirye, ton tam bokuka, Allah arena ati, kintinibuka deibikirye, uku dongolamake. Bukni, ton tam ara, sik deiyok nang arye, dinyake. Aning dobuka Allah ati arenyak nang ap, sik bidamnye dina ati, aning bokuka dolonyak nang ap ara, sik ananguk ati sik tonok wininyake.

¹⁹ Ayupu nyapmasin bukni, adeice arye, ‘E Paulus ara, dib tenena kum nang arye, isa ati arinyak ning ara, mambul ning nyapsile. Tonda, talye ning si erenyak ning ara, isa babye mambul ning nyapsil,’ tenena kume. Ayupu ara, nati kum nyanamnulume. Kume, isa babye, isa si erena ati arelamak ning babye, talye ninguk ulule. Mambul ning kume, nyapsine.

²⁰ Aning ara, mambul kum bukni, sik Allah ati dib kum tenenyak ninye arye, ‘Isa si erepnuyap’ tenen, arenyak ning ara, isa mer si erena ati arinyake. Sikce, ‘Allah el si erebuka, el tonok kibuka si erenamak’ tenen, kum wininyake. Isa talibuka unyaka anya arye, anggun Korintus mutuku ninye arye, sik yuk ninye isa si erena ati, arilamikce ning neika dilamunyopura, ‘Mangkau arye, isa ap neika upmunyak’ tenen, nyapsine. Aning ara, na like.

²¹ Gume, ‘Nun Deiyoknye Yesus ap, neika unamap’ tenen, el si erena ati, mek dilulum talak ara, Kristus ap, Isa Mutuku Dongonye el ap ati, anggun neika tabakuka kum si erenamlulume. Ara, kum winipmanto. El si erena ati, dinyap kwaning ara, Yesus el si erena ati wininyabe. Ati, Isa Mutuku Dongonye ap tenebuka, el si erena ati, yuk kwaning ap, tabakuka kum dinamlulume. Ara Yesus ap, isa ap, nun ap, talima dukdongobuka kum upmanto ati nyapsine.

²² Anggun tukwak ninyeuk ululum bukni, ‘Nun mikip pia weik bukni, Allah el mikip mitik anunuk ulule,’ tenemunce winilulum do? Tonda, Yuk ning si erebuka dukdongobuka unyabbuk, Allah eipsilirye, ‘Se, na siuk ara, erepnitinge. Yata ati do?’ teneplirye, ‘Derepsutue’ tenen, winipnamap do? Aning ara, pia kume.

Paulus ara, yuk nang arye, ‘Talye ning si erepnuyap’ tenen, arenyak din ning dekuka dena ati, nyabuk yupu

²³ Ton ninye arye nyanyake, “Yata winin ning do nirya, nun kanye aryuk tenenyap ning nirya ara, talye kanye bobuka winiptibye,” nyanyak bukni, na Paulus arye, nyapsine. Awinin ning aning-aning nirya ara, talye kanye bobuka winiptibye babye, aning nirya kum melinamsile. Teleb kum kipdeipnamsile. Teleb ubuka kum deipnamsile. Tonda ninye arye, winipting ning nirya ara, talima dukdongobuka neika unamaba ati ara, teleb kum usulule, nyapsine.

²⁴ Yata nang do nirya, ‘Aning ara, teleb ubdeipnutue’ tenen, ‘Na patapnil ninguk tenebuka unamne. Nauk teleb-teleb ubuka banamne bukni, yuk nang ning ara, daupmalye,’ tenebuka kum wininamlulume. Aning kum bukni, ‘Se, na kayapu nang ati, na yata winiptinyeba, sik teleb wiripnamak do? Tonda, na kayapu nang ati, teleb updeiptu ning ap, sik talima melin ning ara, anye,’ tenepmunce, melildanamlulume. Nun unamap talak nirya ara, ayupu deiyok ara, pia tenenauk unamabe.

^25-26 Aning ati ara, isa si erena ati kam ning obikirye, ton kalibuka arenyak bukni, ton tam kwalibikirye, ‘Yuk nang dipnamak’ tenen, dobuka dekenyak ning ara, ‘Din teleb do, malye do?’ tenena ati, ayupu nyapnusine. Sik dekna deiyok nang arye, kam ulul ning, aning-aning nirya obuka tup doprobikirye, deklamakak deibicopura, ‘Aning dibikirye malye upnun do, kum do?’ tenen, “Aning ara, dantam arye, boyanmalum do?” nyabuka, asilena kum aniryuk, talye kanye bobuka dekmunce, denamlume. Ayupu nyapmasina deiyok ara, ani. Allah yupu deice sekik. Ayupu ara, ani. ‘Tukwak mutuku-mutuku nirya ap, amutuku noutamak awablye ning nirya ap, Allah el ninguk ulule. Aning nirya ara, elcuk talilula anya arye, aning nirya ara, el ning uka.’ (Mazmur 24:1)

²⁷ Dib tenena kum ninye arye, anggun Yesus ati dib tenelulum ninye ati, “Na ka koprop, din neika dipnuyaba ati, nun dam yalyame,” nyabuka moropsikcopura, anggunce, ‘Se, na malye ning dipnun do? Aripnuniyak ning ara, dan tam arye, dekuka boyanmak ning do?’ tenena kum arye, dib tenena kum nang arye, anggun din ning arepsikce ning ara, talye kanye bobuka denamlume. Asildena kume.

²⁸ Wininamlum bukni, min kum diamunye talak ara, tonoknye birye, “Adipnuyap domba tup ara, yuk nang arye, ‘Isa si erepnamap’ tenen, arepmangu ning ak kwalibuka deipmabe,” nyabuka laka nyabikiba, kekepmunyopura, aning kum dipnamlulume. Ara, anggunce talye kanye bobuka diptum bukni, arup laka nyapmasilanye biti tenena ati ara, ‘Malye updeibibyak’ tenen, isa ati arepmace ning ara, kum dipnamlulume. Tonda, ‘Se, aning dibibnyopura, ayupu nyapmanunye bira, eipnilirye, malye kanye boplyak,’ tenena ati, isa ati areamunye tup ning ara, kum dinamlulume nyapsine.

²⁹ Yesus arye, akunum lyepsuka anya arye, aning nirya talye kanye bobuka diptibye. Ati ara, yuknye birye nyapnutue. Yuknye birye, ‘Aning ara, malye ning darepe, kum diptinye,’ teneplyopura, yata ati el teneplya deice aryuk, nati malye updeipnutu do? Kume. Ati ara, ‘Se, aning dipnyopura, ayupu nyapmanunye biti, malye updeipnyake’ tenen, talima ikin ululnye bira, elti, kum nyapsine. Bukni, “Adomba tup ara, isa ati arepmangunge anya arye, aning dibibyopura, malye upnyabe darepe,” nyabuka, laka nyalinye biti nyapne. Ara anye bira, ‘Malye do tenen, ikin kanye bolul,’ tenena ati, aning kum dipnululume, nyapsine.

³⁰ Sik dib tenena kum ninye arye, din ning aning-aning nirya arepsikibuk, nun Ni Koprop Allah ati, “Telebe,” nyabibyopura, yuk ninye yata ning deiyok ati, “Anggunda, malye ning dipmalum,” nyabuka, malye yupu nun nong deice deipsiting do? Kume, aning atonun nyapsitingopura, malye kum wininyabe. Malye kum wininyap bukni, ‘Yuk ninye sik kanye ikin uplyak’ tenen, sik tenenyak ning ton moubuka tenenamabe.

³¹ Aning ati ara, anggun din ning ap, mek ap, dimunye talak babye, yuk winin ning nirya wininamlum talak babye, ‘Nun Ni Koprop Allah el siuk erebuka, elti, si erenamap’ tenen, wininamlulume.

³² Anggun wininamlum ning nirya deice arye, Yahudi yala ninye ap, Yunani yala ninye ap, yuk yala ninye nirya ap, Allah ati dib tenena ninye nirya ap ati, ‘Na winin ning eipnikirye, sik ikin kanye bobuka aminyan malye winibicak’ tenen, kanye moupmunce, diksukumuk wini unamlulume. Anggun dib tenelulum ninye arye, talye kanye bobuka winimunye ning deice arye, ‘Yuk ninye ati, mangkau arye, malye kum winililanamlulume’ tenen, nyapsine.

³³ Ara, narye yuk ninye nirya ati, ‘Na wininye ning eipnikirye, Paulus ara, telebuk ulule, tenepnamak’ tenen, wininye touk, anggun Korintus mutuku ninye babye, aning atonun tenebuka wininamlulume. Wininuna ara, talye ati kume. Deiyok ara, na patapnilye ninguk tenepnirye, ‘Na bidamang ati, teleb kipdeipdanamne,’ kum tenenun bukni, yuk ninye sik patan ning ton tenepnirye, ‘Sik ton, malye kanye bona kumce, teleb unamak’ tenen, kanye moupnirye, unune. Tonda aning tenenune. ‘Teleb ubuka, diksukumuk upnyopura, ninye weika arye Yesus ati, dib teneptingopura, Yesus arye aninye lyepnamle’ tenen, unune. Na Paulus arye nyapsine.