1 Korintus 1 - Eipomek

Asurat deiyok kouna ati, nyabuk yupu

^1-2 Telebe, na kayapu. Na Paulus ap, na weit atonunye Sostenes ap, nunce anggun Korintus mutuku ninye, Allah dib tenyamlumce, elce talisulul ninye ati, asurat sekeipsiname. Na Paulus ara, Allah arye nati, ‘Anye bira, Yesus Kristus, el yupu bobuka peterepnin bana ati, ayupu min kum kekenyakak, deiyok kouna deiyoknye, Rasulnye unamle’ tenen, wipdeiamnuke. Sostenes ababye dib tenebuka anya arye, nun weit koprop atonun ulule. Anggun Korintus mutuku dib tenelulum ninye ara, Allah arye, anggun ap, Yesus Kristus ap, kanye dukdongopsuka deice arye, “Anggunda na tenen, ninye unamluma anya arye, pia diksukum ninye unyake,” nyapdeipsuke. Ara, anggun Korintus mutuku ninye ap, yata mutuku ninye do nirya, nun Deiyoknye Yesus Kristus arye, nun pununa ati dibuka deice arye deksuke. El ti, dib tenenyap deice arye, ‘Anggun nirya malye winina pia kum aryuk, diksukum ninye unamak’ tenen, Allah arye yukubsukce, wipdeiamsuke. Ara, nunuk kume, yuk ninye bukni, sik dib tenenyak ninye nirya ababye, ‘Yesus Kristus aryuk lyepnamsil’ tenen, dib tenenyap deice arye, Allah arye el na tenen, ninye kilisulule. Yesus Kristus elda, nun Weik Deiyoknye usulule.

³ Na Paulus arye, anggun Korintus mutuku ninye ati, Allah morosunun ning ara, ani. Ara, ‘Nun Ni Koprop Allah ap, nun Weik Deiyoknye Yesus Kristus ap, sik kanye aryuk bico tenesurudakce, talye melisirice ning ap, kanye deibuka nimalye arye, neika teleb una ati, melisirikce ning ap, arenamsirak’ tenen, na Paulus arye, anggun Korintus mutuku ululum ninye ati, Allah morosunune.

Paulus arye, Korintus ninye ati tenelamukce, Allah ati, “Telebe,” nyalamuka ati, lake nyabuk yupu

⁴ Na Paulus arye, anggun Korintus ninye ati tenenirye, Allah ati, “Pia telebe,” nyanune. Deiyok ara, elce anggunti, Yesus Kristus ap kanye dukdongopsuka deice arye, el kanye aryuk bico tenepsukce, nun melina ati, talye arisilye ning ara, weik arye talye arepsuke. Aning ati ara, narye anggunti tenesinirye, “Telebe,” nyabuka, Allah morosunune.

⁵ Anyapmana ara, talye kum nyapne. Kume, Yesus Kristus ap, kanye dukdongopsukba, umunya noutamak arye, aning-aning nirya teleb winina ati, weik arye melisulule. Melipsilyopura, Allah el yupu nyana ap, peterena ap, el yupu nong noutamak ning nirya, moubuka kel kipmunce, akunum telebuk kibuka ululume.

⁶ Aning nirya akunum teleb winisilye ning deiyok ara, nunce, ‘Sik dib tenepnamak’ tenen, Kristus el yupu laka nyalamububa, Allah arye anggunti, meilyamsuka deice arye, anggun weik arye dib tenyamlume.

⁷ Allah arye melyamsukba, mikip arye dib teneluluma anya arye, Allah El Dib Kanye arye ninye ati, ‘Allah el mambul pil donamak’ tenen, pil dona deiyok ning, talye aresirica ning nirya ara, anggun Korintus mutuku ululum ninye akunum dololulume. Tonok ning babye kum sukultalisulule. Aning ati ara Allah arye, ‘Nun Deiyoknye Yesus Kristus aning-aning nirya talinamla ati, laka kipdeipnamsil talak, minopce yanamle’ tenen, anggun nirya arye, kanye deibuka, dinauk umunce, dib tenebuka telebuk ululume. Ara, Allah arye arisilye ning nirya, kum sukultalisilya ati nyapne.

⁸ Tonda, Allah arye anggunti, ‘Aminyan sirya talak ara, anggun malye winin ning tonok ning babye kum upnamle’ tenen, anggun kanye kwa diprongobuka melisilye talak ara, anggun dib tenelulum ning ara, pia darapdongobuka mikip unamsile. Winibuka daulamunye ani, aminyan talak ara, nun Weik Deiyoknye Yesus Kristus tukwak mutuku tamubuka yalyopura, anggunda diksukumuk unamlume. Ati yata nang do nirya, ‘Aninye ara, malye wininyak,’ nyabuka anggunti kum nyapmanto unamake.

⁹ Allah arye anggunti, ‘Na Mi Koprop Yesus Kristus ap, aninye ap kanye dukdongobuka neika unamak’ tenen, wipdeipsuknye bira, yupu talye kum nyaltakalule. Elce, ‘Wininamne,’ nyasilye touk, dipkoprop winisulula anya arye, arup nyapmasin touk melisilyeba, sirya talak ara, diksukumuk unamlume. Yesus ara, nun Weik Deiyoknye usulule.

Korintus ninye arye kanye wililana kum aryuk, ‘Teleb ubuka neika unamak’ tenen, nyabuk yupu

¹⁰ Ara, Yesus dib teneluluma ati, nun du weit atonun ululum nango, anggun sal babye, kilapu babye kekepnululume. Nun Weik Deiyoknye Yesus Kristus arye, nati deiyok arepnukbuk, el si deice arye, ‘Wininamlum’ tenen, morona atonun ayupu nyapnusine. Anggun nirya, anggun kanye tenena ara, tonok ninguk talibuka, kanye deibuka neika unamlulume. ‘Wininalum’ tenen, nyapdeipnamasin yupu ara, deiyok ani. Ara, anggun yuk-yuk ululum bukni, anggun tenelulum ning ap, anggunce, ‘Wininamap’ tenen, pil donamlum ning ap, ansinibuka utibirye, tonok ninguk talibuka ulamtumopura, ‘Kanye wililana kum aryuk, teleb kibuka neika unamlume’ tenen, nyapmasine. Ati “Tonok kanye bobuka telebuk unamlulume,” nyapsine.

¹¹ Se, Yesus Yupu ati dib teneluluma ati, nun du weit atonun ululum nango, anggun sal babye, kilapu babye, kekepnululume. Anggunda, na weit yapu atonun ululume. Bukni, tonok kil, el si ara Keloe, el aik unyak ninye kan-kan arye, ton nang ara, nyapnike. “Kume, Korintus mutuku ninye noutamak arye, yu upliba, yupu deice arye oldana ap, waldana ap, wininyake,” nyapnikba, kekepse.

¹² “Kanye wilildamunce, pakalilalulume,” nyapmasina ara, ani. Anggun kan-kan bukni, ton nang ara, yuk nang ati, “Kume, nunda Paulus el yupu kekebuka dobolbanyabe. El mapu unyabe,” nyanyake. Aning atonun, yuk nang ara, “Kume, nunda Apolos el yupu kekebuka dobolbabirye, el mapu unyabe,” nyakiba, ton nang ara, “Nunda, Kefas el mapu unyabe,” nyakiba, ton nang ara, “Kume, nunda Kristus el yupu kekebuka dobolbabirye, el mapu unyabe,” nyabuka bokoldanyake. Winilulume ati, nyapsine.

¹³ Winibuka nyalulum bukni, na kayapu, Kristus el nong ara noutamak bokuka yuk-yuk ulul do, kum do? Tonda, anggun lyena ati, na Paulus dopropnikce, anggun malye winimunye ning ati, aning kilibuka pununa ati wanwanun yo deice deipnikce opnik do, kum do? Tonda, na si deice arye, mek dongopsik do, kum do? Kume.

¹⁴ Nara, bitinye nanguk, sik si Krispus ap, Gaius ap dib teneprikba, mek dongopse. Aning atonun ning deice arye, anggun yupu deice waldaluluma anya arye, ayupu nyapsine. Yuk nang tonap mek kum dongopsisa ati, na kanye deipne.

¹⁵ Ati ara, yatanye do, yata kil do nirya, “Paulus el si deice arye, mek dongopnika anya arye, el mi unune,” kum nyaptinge.

¹⁶ (Diba, winira tuba tamubuka tonap tenepne. Tonye, el si ara Stefanus, el ap, el asik neika unyak ninye ap, dib tenebikba, mek dongopse. Ninye mitik bukni, yuk nang tonap mek dongopse do, kum do, na luba kipse. Bukni, mek dongona ara, ‘Anye birye do, yuknye birye do?’ tenena ara, mambul kumanya arye, dauplye.)

¹⁷ Gume, na kayapu, Kristus arye nati, ‘Anye bira, ninye weik mek dongolbinamle’ tenen, kum wipdeipnuke. Aning kum bukni, ‘Paulus ara, Yesus Kristus ati, Allah el laka teleb yupu peterenamle’ tenen, wibuka dopdeipnuke. Tonda, ayupu peterenye talak nirya ara, talye ninye arye, ‘Ayupu ara, weik kel yupu deice arye peteresulule, tenepnetinge’ tenen, ayupu atonun yupu deice arye kum nyanune. Weik kel bikne yupu deice arye kume. Ninye nirya kekepmanto yupu deice aryuk peterenune. Ara, talye ati kume. Wininuna deiyok ara, “Kristus wanwanun yo deice arye dibuk deice arye lyepsuke,” nyabuka peterepnibuk, kekebikirye, ‘Amikip yupu deice aryuk, dib tenepnamak’ tenen, nyanune. Na kanye aryuk nyapmanto yupu do, talye ninye arye, ‘Weik kel yupu ara ani,’ nyapnamting yupu do, anirya deice arye kum peteresunune.

“Kristus pil dopsuka deice arye, Allah el mikip ap, Allah el weik kel bikne deiyok ning ap, laka usulule,” nyabuk yupu

¹⁸ “Weik kel yupu deice arye kum peterenune,” nyapmasina ara, deiyok ton nyapnusine. Ara, dib kum tenebikceura, Allah arye oplopnamle ninye ati ara, “Kristus wanwanun yo deice dipsuka deice arye lyepsuke,” nyabuka peterebibibuk, kekebikirye, ‘Ayupu ara, nong kum ulule. Ayupu ara, walwal arye, lup nang nyalamak touk nyanyake,’ tenepsikirye, akutusinyake. Bukni, nun kele. Diba tenebibibuk, Allah arye, lyesulul ninye ati ara, Kristus el yupu ara, mikip weik ulule. Ayupu kekebuka dib tenebibya deice arye, Allah mikip weik arye pil dosulule.

¹⁹ Anyapmasina ara, talye ati kum nyapsine. Deiyok ara, ani. Allah el yupu noutamak ara, Yesaya arye ayupu sekeibuk. ‘Allah arye nyabuk. “Sik weik kel bikamik ninye arye, weik kel yupu deice nyanyak ning ara, narye kum daneipnamne. Tonda, talye tukwak ninye arye, ‘Nunda weik kel bikamubu ning ara, ani,’ tenenyak ning ara, narye yupu sekniba, nong kum uplirye, kum kipdeipnamne.” Allah arye nyabuk.’ (Yesaya 29:14) Diba tenena kum ninye arye, ‘Ayupu ara, talye,’ tenenyak bukni, nun aning ara, ‘Allah arye nyabuka anya arye, el yupu ara, mikip weik yupu ulule’ tenen, bikinyabe.

²⁰ Ati ara, wini talak tenipdelulume. Sik weik kel bikamik ninye ap, Musa arye mem yupu sekeibukura, ayupu weik arye kel kibuka peterelamik ninye ap, yata yupu do nirya, “Deiyok ani-ani,” nyabuka laka nyalamik ninye ap, wini talak ara, anggun dan do? Allah arye aninye ati, ‘Se, sikda, weik mambul’ tenelul do, kum do? Allah el pil dopsuka deice arye, lakak kum kipdeipsuk do, kum do? Kume, akunum kel bikinyaba ara, talye tukwak ninye arye, weik kel bikamik ning nirya ara, nong kum upnamle ning, talye ninguk ulule.

²¹ Allah elda kele weiknye binya arye, elce, ‘Talye tukwak unyak ninye nirya, sik kel weik bikinyak ning deice arye, na ap kanye dukdongobuka una ara, kum kel biktinge,’ akunum tenyamuk. Kel weik bikne deice arye, kum bukni, Allah el kanye deibuka tenebuka ara, ani. Kume, kel weik bikne yupu deice arye kum bukni, ninye nirya kekepmanto yupu deice arye, na yupu peterepnamake. Peterebikcopura, ton nang ara, ‘Ayupu ara, walwal arye nyanyake,’ tenenamake. Bukni, na lyenamne ninye ara, na yupu dib tenepnikcopura, aninyeuk lyepnamne, Allah arye tenyamuk.

²² Yahudi yala ninye ara, ‘Ninye kum winipmanto ninguk, pil dosilyam ning ara, adeice aryuk, dib tenepnamabe,’ tenenyake. Sik Yunani ninye ara, ‘Kel weik bikne yupu deice aryuk nyapsumunba, kekebibirye, nun dib tenenyap touk, aning aublyopura, adeice aryuk dib teneptibye,’ tenenyake.

²³ Sik yuk-yuk winibuka unyak bukni, nunda aning atonun kum unyabe. Nunda, “Kristus wanwanun yo deice arye obikbuk, apil dopsuka deice aryuk lyesulule,” nyabuka peterenyabe. Ayupu uk peterebibyeura, sik Yahudi yala ninye kekebikirye, bisik noutamak keil arye yan dum dukliba balamle touk, nun peterenyap yupu ati, ‘Ayupu ara kume,’ tenebikirye, lik upliba batakanyake. Sik Yahudi yala kum ninye arye, nun yupu kekebikirye, ‘Ayupu ara, pia walwal arye lup nang nyalamak touk nyanyake,’ nyasinyake. ‘Nong kum upnamle’ tenen, lik upliba batakanyake.

²⁴ Sikda wininyak bukni, yata mutuku nang do nirya, Allah arye, ‘Aninye lyepnamne’ tenen, akunum wibuka yukupsuk ninye nirya ati ara, Kristus el wanwanun yo deice, pil dopsuka deice arye, akunum laka usulule. Ara, Allah el weik kel kopropnye wini lulul ning ap, el weik mikip weiknye ulul ning ap, lak kilisululba, Kristus el deice arye bikinyabe.

²⁵ Aning ara, talye kum nyapsine. Deiyok ara, nyapnusine. Ara, talye tukwak ninye arye, Allah el ulul ning ap, el yupu ap ati, ‘Aning ara, walwal ninguk ulule,’ tenenyak bukni, dipkoprop ning ara, yata weik kelnye do nirya, sik bikinyak ning pia mitikuka, Allah el weik kel ulul ning ara, pia weike. Allah ara, walwalnye kum ulul bukni, walwal uptu babye, el walwal arye winiptu ning babye, dipkoprop weik kel ninguk winiptue. Aning atonun, Allah el yupu ati, ninye arye, ‘Aning ara, nong kum upnamle,’ tenenyak bukni, dipkoprop ning ara, yata mikipnye do nirya, sik mikip ara, pia mitikuka. Bukni, Allah el yupu ara, mikip weik ning ulule. Allah ara, mikip kumnye kum ulul bukni, mikip kum pil doptopura, aning babye, dipkoprop weik mikip pil doptue.

²⁶ Ara, Yesus dib teneluluma ati, nun du weit atonun ululum nango, anggun sal babye, kilapu babye, kekepnululume. Anggun tenipdelulume. Allah arye anggunti, ‘Aninye lyepnamne,’ tenebukce, yukupsuk talak ara, anggunda yatato ninye ulalum do? Atalak talye tukak mutuku unyak ninye arye, ‘E, anang ara, weik kel ninye unyake,’ tenelamak touk ulalum do, kum do? Anggun kan-kan arye, weik kel nang tonok-tonokuk ulamik bukni, weikto kum ulamike. Tonda, yuk nang arye anggunti, “Sikda weik mambul nang anya arye, sik nyanyak yupu moubuka kekenamabe,” nyalamak ninye ara, anggun kan-kan arye weik kum ulamikbuk tonok-tonokuk ulamike. Tonda, anggun weik ninye deiyok nang arye deipsik do, kum do? Anggun kan-kan arye, ato ninye ara, tonok-tonokuk ulamike. Weik kume. Dipkoprop Allah arye yukupsuk ninye noutamak arye, talye tukwak mutuku unyak nang arye, ‘Weik mambul ninye,’ tenelamak touk kum unyabe.

²⁷ Ura, anggun kan-kan arye, weik mambul ninye weik kum unyak bukni, talye ninye arye nunto nang ati, ‘Sikda walwal ninye unyake,’ tenesinyak nang ara, Allah arye, ‘Aninye na mapu unamak’ tenen, wiamsuke. Wibuka dopropsuka deiyok ara, Allah ati dib kum tenenyak ninye arye, ‘Nunda weik kel ninye,’ tenelanyakce, aminyan talak, ‘Alye dakdanamak’ tenen, Allah arye nunti wiamsuke. Aning atonun, talye ninye arye nunto ninye ati, ‘Sikda, mikip kum ninye anya arye, anang ara, talye nang,’ tenesinyak nang ara, Allah arye wiamsuke. Winipsuka deiyok ara, Allah ati dib kum tenenyak ninye arye, ‘Nunda weik mikip nang, weik mambul nang,’ tenelanyakce, ‘Aminyan talak ara, alye dakdanamak’ tenen, Allah arye nunti wiamsuke.

²⁸ Talye ninye arye yuk nang ati, ‘Anang ara, mambul pia kume, sikda pia bona utotowa talina kum ninye anya arye, dauplye. Sik ni yapu ap, sik nin yapu ap, mambul ninye kumanya arye, nun like. Nun like,’ tenesinyak ninye ati ara, Allah arye nunto ninye ati, ‘Na mapu unamak’ tenen, wipdeiamsuke. Winipsuka deiyok ara, yata ning do, yata ninye do nirya, talye ninye arye, ‘Se, aning ara, pia mambule,’ tenenyak ning nirya ara, ‘Kum kipdeipniba, nong kum upnamle’ tenen, winibuke.

²⁹ Allah arye anirya winibuka deiyok ara, ani. Ara, yata ninye do nirya, sirya talak, Allah el dam bicopura, dipdanuka kwalibukabikirye, “Nunda weik mambul ninye unyaba anya arye, Allah arye, ‘Na mapu unamake’ tenen, wipsuke,” kum nyapmanto upnamaka ati, el tenyamuk touk, nunuk wipdeipsuke.

³⁰ Allah el kanye aryuk, ‘Aninye ara, Yesus Kristus ap, kanye talima dukdongobuka neika unamake’ tenen, el mapu kipdeipsuke. Yesus Kristus nun kanye noutam pil dosilya deice aryuk, Allah el weik kele arye, pil teleb kibuka dosilye ning ara, moubuka bikinyabe. Kristus elcuk nun malye winin ning kilipsilirye, diksukum un ninye kilisulule. Allah ap, ansinilisulule. Kristus el pil dopsuka deice aryuk, nun malye winin ning kilibuka pununa ato ning punupsukce, nun malye winilamubu noutamak arye, lobuka lyepsukce, Allah el mapu kilisulule.

³¹ Anirya ati ara, Allah el yupu laka nyalamuknye, nabi Yeremia arye sekeiyamsuk touk wininamabe. Yeremia sekamuk yupu ara, ani. ‘Yatanye do nirya, weik kanye deibuka, kekebikirye, sik bidamang si erelana pia kume. Allah el si tonok ati, kanye deibuka el siuk kibuka si erenamake, nyabuk.’ (Yeremia 9:24)