Otum 5 - Ohwihwim Olehe

Ahananiya ta la Esafiratu

¹ Alomakyeŋ a wo ma, eshko baŋ e ri Ahananiya. Eshko ashe baŋ e ri Esafiratu. Moa a shri anzho mo akyeŋ a gbmo nga,

² moa a fa amgbaŋ lo a ra a ghre nga Ahananiya a shri ekplo la e ra a shri a gre a yi a da moa la a nyum oshpa.

³ Ebitru a nyuŋ ŋa a lu mi le, Ahananiya, okyku eshi aŋo o da Eshitaŋ anvaŋ o daŋ a la a kpo otum eso boŋ, nga aŋo o sheŋ Ogbgaodzi akpro angyiŋ omba boŋ o fa amgbaŋ lo o ra o ghre?

⁴ Omba boŋ o shri anzho lo o gbmo a wo mbo, alo a wo a boŋ. Ambla boŋ o shri lo o gbmo a mbo, alo a wo a boŋ angyiŋ. Okyku eshi aŋo o hwim eka he eso boŋ? Aŋo o sheŋ arehwĩ akpro angyiŋ mbo, ambo aŋo o sheŋ Ahogbrẽ akpro angyiŋ.

⁵ Ebitru a lu odlo eka he a khwo nga, Ahananiya a tsi a gbu obiŋ nga a kpu, nga moare la a gno oshpa lo mvye a kpo eyli.

⁶ Moa ola anwye a ba nga a shki okom lo la aknye nga moa a shri ŋa a gre a yi a ngybi.

⁷ Ambla awa atra nga ashe baŋ, Esafiratu, a ba okro moa la a nyum oshpa lo, ambo aŋa a sheŋ a gno ekplo la e kpo mbo.

⁸ Ebitru a nyuŋ ŋa a lu mi le, Aŋo o lu adlidzi o da me. Amgbaŋ bimi e shri anzho bimi e gbmo lo, a wo eka he sha? Esafiratu a tno ma a lu mi le, E, alo a wo eka he sha.

⁹ Ebitru a nyuŋ ŋa a lu mi le, Okyku eshi aŋo ta la alom boŋ agimi e klo e mbga Ogbgaodzi ba Adigi-odne e ka-ka? Moare la a gre a yi a ngybi alom boŋ a wo ozhẽ a ba, moa á shri ŋo a mbo á yi á ngybi ohuhuhi.

¹⁰ Ebitru a lu eka he a khwo nga, ashe lo a tsi a gbu obiŋ egi ayi baŋ nga a kpu. Moa ola anwye a ba nga moa a hwiŋ Esafiratu a sheŋ a kpu bgu. Moa a sko ŋa a gre a yi a ngybi osusku ta la ongybi alom baŋ.

¹¹ Moare la a lu Ahogbrẽ ma mvye, pa la moa la a gno ekplo la e kpo, moa a kpo eyli nzenze.

Egbregbre ayakplo

¹² Moa la a nyum oshpa a kpo egbregbre ayakplo a gre eshri egi ayi moarehwi. Moare la a bmi ba adlidzi mvye a pla emo a shki enjygu ba Osolomo.

¹³ Moare la a wo eshki lo mbo, a bmi a ba eshki pa la mo mbo okyku eyli. Ambo moa a la a lu odlo odzi eshri moa la a bmi ba adlidzi.

¹⁴ Moare la a bmi ba adlidzi lo, a la a ta ma ombamba mvye. Moa la a bmi ba adlidzi ta la Ahogbrẽ a wo moarealom pa la moashe.

¹⁵ Okyku ayakplo ebgregbre moa la a nyum oshpa a la a kpo, moare a shri moare la a no olo amgbla moa a lom ma, ta la akpekpa, moa a shri a akaŋ ozhẽ, okyku o da amu Ebitru a tka mo omba baŋ a bre a yi.

¹⁶ Moare nzenze a zgi esku la e la e wo akekaŋ ba Orushalima a ba. Moa a shri moare la a no olo pa la moa ba egbgabi e kpo mo ewu a ba. Moa a shaŋ mo mvye.

Moa a kpo moa la a nyum oshpa ewu

¹⁷ Anyuŋ-andakʼpo olu ba Ahogbrẽ, pa la moandakʼpo la a kpo otum ka la ŋa, moare ba ogu Esaduki moa a kpo efpu moa la a nyum oshpa lo a gre eshri. Okyku eka he moa a zga eso o vu mo.

¹⁸ Moa a vu moa la a nyum oshpa nga, moa a shri mo a ygi aku moa a vu areyaŋ a mbo a ta ma.

¹⁹ Okyukyku onda he lo, anwyeadga ba Ahogbrẽ a ba a hwile ayizhẽ aku lo, nga a da moa la a nyum oshpa a zgi nga a nyuŋ mo a lu mi le,

²⁰ Agimi e yi Anyuŋ-akulu nga e nyum oshpa ba eso ekahelo.

²¹ Moa la a nyum oshpa a bmi, nga endigigiŋ moa a gre Anyuŋ-akulu nga moa a zga esĩ a nyum oshpa lo. Anyuŋ-andakʼpo olu ba Ahogbrẽ, pa la moandakʼpo la a kpo otum ka la ŋa, pa la moandakʼpo moaEyahuda moa a gre a yi a yi a shki eshki. Ambla moa a shki a khwo pga, moa a hom otum a gre aku lo a lu ma moa a shri moa la a nyum oshpa lo a shri a ba a da mo a sõ mo ombgu.

²² Ambo omba ba moa la a kʼpu aku a gre aku nga, moa a hwiŋ moa la a nyum oshpa lo eshyẽ mbo. Moa a ba a lu a da moandakʼpo lo a lu mi le,

²³ Omba bi a gre aku, agi e ka ayizhẽ a klu gaŋ, nga moanwyeakyuŋ la a kʼpu ayizhẽ lo a wo ma, ambo omba bi e hwile ayizhẽ agi e ka arekyeŋ aku mbo!

²⁴ Omba ba anda-kʼpo moanwyeakyuŋ la a kʼpu Anyuŋ-akulu lo, ta la moandakʼpo olu ba Ahogbrẽ a gno eka he nga, moa a yi eka ekplo la e kpo pa la moa la a nyum oshpa lo ku-ku mbo.

²⁵ Arekyeŋ a ba nga a nyuŋ eshki a lu mi le, E gno! Moare bimi e shri mo e ygi aku, moa a wo Anyuŋ-akulu a la a nyum oshpa ohuhuhi!

²⁶ Okyku eka he andakʼpo moanwyeakyuŋ a gre pa la moanwyeakyuŋ nga a yi a vu moa la a nyum oshpa a shri a ba. Moa a kpo mo oshye mbo, okyku eshi moa a kpo eyli moare á ba a tra mo ézhim.

²⁷ Moa a shri moa la a nyum oshpa lo a ba nga moa a da mo a tspi egi ayi moandakʼpo la a sõ ombgu, nga anyuŋ-andakʼpo olu ba Ahogbrẽ a zhĩ mo a lu mi le,

²⁸ Agi e shĩ gimi e lu mi ma agimi e nye arekyeŋ eshko alom hi nga mbo. Ambo agimi e pre odaŋ lo! Agimi e sheŋ e nyum oshpa alom he lo osku ba Orushalima mvye bgu. Agimi e klo o da ombgu alom he lo o dzu eshri bi!

²⁹ Ebitru ta la are la a nyum oshpa ahwõ a tno ma a lu mi le, o raŋ o gre bi e fa olbi e da Ahogbrẽ angyiŋ nga bi e fa olbi e da arehwĩ mbo.

³⁰ Ahogbrẽ moadigi a kso Eyesu ongybi ambla bimi e gŋe ŋa egŋe aki nga e bga ŋa.

³¹ Ahogbrẽ nga a daŋ a dzu obgori eka Andakʼpo, ta la Areoshla. Okyku o da moarehwi ba Esrayila a hwiŋ anvaŋ a ghwo obiŋ nga a hwiŋ okyuabgo odlobi mo.

³² Agi e wo egŋe eshri ayakplo he lo, agi ta la Ogbgaodzi ba Ahogbrẽ. Ahogbrẽ a shri ŋa a da moare la a la a kpaŋ odlo baŋ ototno.

³³ Ambla moandakʼpo la a sõ ombgu a gno odlo hi a khwo eka he nga, eso e vre mo nga moa a sõ moa la a nyum oshpa lo ombgu eku.

³⁴ Ambo eshki mo alomakyeŋ a wo ma. Aŋa a ri Egamaliya. Aŋa a wo a ba Efarisi. A la a nye moare odaŋ. Moare pyeŋ a la a ka ŋa la anyuanyuŋ nzenze. Aŋa a kso egi ayi moandakʼpo la a sõ ombgu nga a lu mi le, Agimi e da moa la a nyum oshpa a zgi.

³⁵ Nga a sa a lu mi le, Agimi moarehwi ba Esrayila, e tne aga e ka ayga e kpo ekplo-kyeŋ pa la moarehwi hi.

³⁶ Agimi e ka, ombakyeŋ mi, alomakyeŋ moa a bzi ŋa ma Etiyoda a kso a sko eshri baŋ a zga anyuŋ are, nga moare eka endgaenyi a lu ŋa ma. Ambo ambla moa a bga ŋa, moarehwi he lo mvye a sla ayi, nga arekyeŋ a gno eshko baŋ ku-ku nga mbo.

³⁷ Ambla he nga, alomakyeŋ ba Egalili, moa a bzi ŋa ma Eyahuda, a zhiŋ moare a da mo a lu ŋa ma omba moa a tsi moare. Ambo ambla moa a bga ŋa, moarehwi la a lu ŋa ma mvye a sla ayi.

³⁸ Okyku eka he ohuhuhi ame e lu e da gimi, agimi e kpo moarehwi hi akplokyeŋ mbo. Agimi e dzu mo e zga. O wo ba otum moa a kpo hi o wo ba arehwĩ angyiŋ le, alo o kpu adga.

³⁹ Ambo o wo ba alo o wo o ba Ahogbrẽ angyiŋ le, agimi e kpo e gbu bimi e nyom lo mbo. Agimi e nyuŋ e kpo-kpo mbo, agimi e ta eko ta la Ahogbrẽ! Moandakʼpo la a sõ ombgu lo a kpo otum ta la odlo ba Egamaliya a lu.

⁴⁰ Moa a bzi moa la a nyum oshpa nga, moa a yla mo andzu nga moa a shĩ mo ma moa a nyum oshpa eshko Eyesu ondakyeŋ ku-ku nga mbo, nga moa a kyu mo abgo a da mo a gre.

⁴¹ Moa la a nyum oshpa lo a zhiŋ ogbu a gre la ovyevye okyku ba Ahogbrẽ a sla mo okyku o da mo a kpo ewu okyku eshko Eyesu.

⁴² Nga elululum, moa a la a nye moarehwi nga moa a la a nyum Oshpaodzadzi ba Eyesu la a wo Emisiya, Anyuŋ-akulu ta la adne moare.