Otum 3 - Ohwihwim Olehe

Moa a shaŋ abuŋadga

¹ Ondakyeŋ nga Ebitru ta la Eyohana moa gre Anyuŋ-akulu omba amgbaŋ atra ba olulum okyku o fa olu.

² Ayizhẽ Anyuŋ-akulu moa a bzi lo ma Ayizhẽ Adzadzi, moa a shri alomakyeŋ baŋ a buŋ adga omba moa a mbre ŋa, a zga ma. Moa a la a shri ŋa a yi a zga ayizhẽ he lo elulum okyku o daŋ a vẽ amgbaŋ ta la moa la a yi olu.

³ Omba ba alom lo a ka Ebitru ta la Eyohana a yi olu nga, a vẽ mo okyku o da mo a shri emakyeŋ a daŋ.

⁴ Moa a ka ŋa dzo, nga Ebitru a nyuŋ ŋa a lu mi le, Aŋo o ka gi!

⁵ Alom he lo nga a zhiŋ ayi a ka mo, a la a ka ma moa a shri emakyeŋ a shri a daŋ.

⁶ Ebitru a nyuŋ ŋa a lu mi le, Ame e wo amgbaŋ ma mbo, ambo ame e shri ekplo ame e wo alo ma e shri e doŋ. Eshko Eyesu ba Anazarata, ame e lu e doŋ, aŋo o kso!

⁷ Nga Ebitru a kom ŋa obgori nga a daŋ a kso. Nga adga alom lo ta la ekplu adga baŋ e ndba nga a hwiŋ oshye.

⁸ A kso nga a ta egba, nga a la a dzi a ta okro lo a kpaŋ. Nga a gre olu pa la mo nga a la a dzi a la a ta egba, nga a la a hlu Ahogbrẽ eshko.

⁹ Eshki mvye e ka ŋa baŋ a la a dzi nga a la a hlu Ahogbrẽ eshko.

¹⁰ Omba ba moa a ka ŋa a tspi baŋ angyiŋ a wo agrogro la a la a dzu Ayizhẽ Adzadzi a la a vẽ amgbaŋ, moare mvye a ka egbregbre ekplo la e kpo.

Ebitru a nyum oshpa Anyuŋ-akulu

¹¹ Omba ba alom lo a lu Ebitru ta la Eyohana ma la ovyevye a gre enjygu moa a bzi lo ma Enjygu ba Osolomo, moare mvye a knye a lu mo ma a gre lo.

¹² Omba ba Ebitru a ka eka he nga, a nyuŋ eshki a lu mi le, Agimi arehwĩ ba Esrayila, okyku eshi agimi e da ekplo he lo e dzu egbregbre ka la gimi nga e la e ka gi dzo? Eka bimi e ka, la ekʼpo bi o mbo okyku bi e wo moarehwi ba Ahogbrẽ angyiŋ agi e da alom hi a dzi?

¹³ Ahogbrẽ ba Ebrahim, ta la Eshaku, ta la Eyakubu, Ahogbrẽ moadigi angyiŋ a shri ekʼpo baŋ a shri a da Eyesu Anwye-odne baŋ. Agimi e yga ŋa e shri e da moandakʼpo, nga agimi e tla ŋa egi ayi ba Ebilatu omba ba Ebilatu a klo o kyu ŋa abgo.

¹⁴ Eyesu a wo esesla, nga a raŋ odlo a gre eshri, ambo agimi e tla ŋa, nga agimi e vẽ Ebilatu a daŋ a kyu are la a kpo ebga angyiŋ abgo o sku Eyesu.

¹⁵ Okyku eka he, agimi e bga Are la a la a kpo eso. Ambo Ahogbrẽ a kso ŋa ongybi, agi nga e wo egŋe okyku ohe lo.

¹⁶ Ekʼpo ba eshko Eyesu angyiŋ e shri oshye e da alom he lo. Ekplo bimi e ka, nga e yi, e kpo okyku obmi ba adlidzi eshko baŋ. Okyku obmi ba adlidzi ta la Eyesu angyiŋ, alom he lo a shaŋ egi ayi bimi.

¹⁷ Agimi anáŋ, ame e yi ekplo bimi pa la moandakʼpo bimi e kpo Eyesu, agimi e kpo lo efĩ angyiŋ.

¹⁸ Ogbyigbyi, moarehwi ba Ahogbrẽ a hom otum a lu mi ma Emisiya á kpo ewu. Ahogbrẽ nga a bli odlo lo.

¹⁹ Agimi e ghwo obiŋ nga e ba egi ayi Ahogbrẽ, okyku o daŋ a kyu gimi abgo odlobi bimi,

²⁰ okyku o da gimi e hwiŋ oshye ba eso okro ba Adigi-odne, nga okyku o daŋ a hom Eyesu otum okro bimi, aŋa angyiŋ a wo Emisiya baŋ a sheŋ a sla okyku gimi bgu.

²¹ O dzu omgbybi baŋ a dzu Ongyeŋ ayga o tsa baŋ a nyiŋ ekployaŋ a mbo, eka ba Ahogbrẽ a lu a da moarehwi baŋ a hom otum ogbyigbyi.

²² Omusa a lu mi le, Adigi Ahogbrẽ á hom arehwĩ otum okro bimi eka baŋ a hom me, aŋa á wo a ba ogu bimi. O raŋ o gre bimi e ngli atuŋ e gno ekployaŋ a mbo baŋ a lu a da gimi.

²³ Areyaŋ a mbo la a ngli a gno ekplo baŋ a lu mbo le, moa á se mo a sku eshki moarehwi ba Ahogbrẽ nga á jygi mo.

²⁴ Eshki moarehwi ba Ahogbrẽ a hom otum, Asamuyila pa la moa la a ba ambla baŋ, moa mvye la a shri oshpa ba ayakplo la a ba a kpo omba he, a shri a ba.

²⁵ Ohwihwim ba Ahogbrẽ a hwim pa la moarehwi baŋ a hom otum okro bimi, o wo okyku gimi angyiŋ. Agimi e hwiŋ owlama okyku ohwihwim ba Ahogbrẽ a hwim pa la moadigimi. Aŋa a hwim ta la Ebrahim a lu mi le, Okro moanwye boŋ ame é da moarehwi obiŋ hi mvye á hwiŋ owlama.

²⁶ Okyku eka he, Ahogbrẽ a sla gimi nga a da Anwye baŋ a ba okro bimi ori, okyku o da gimi e kyu ayakplobi abgo nga e hwiŋ owlama baŋ.