Otsotsa 3 - Ohwihwim Olehe

Oshpa okyku Eklisiya ba Esadi

¹ Ogbgaodzi o sa o lu mi le, Aŋo o ta anwyeadga ba Eklisiya ba Esadi akpa, o lu mi le, Oshpa he lo o wo oshpa la o zgi abgo ba are la a kom egbga efoha ba Ahogbrẽ, ta la eyi enzo efoha abgo baŋ. A lu mi le, Ame e yi ayakplo boŋ o la o kpo. Nga ame e yi boŋ o gbu eshko okyku boŋ o yi o wo la esõ ma, ambo egyagi a mbo aŋo o sheŋ o kpu!

² Okyku eka he nga o kso nga o nyuŋ ekplo la e ra ka la ŋo e zga, ayga o da lo e mom e kpu ogbu-kyekyeŋ. Okyku eshi ame e ka tki, ba ekplo boŋ o kpo, alo e bli egi ayi ba Ahogbrẽ me a wo mbo.

³ Aŋo o tne o ka ekplo ba moa a nye ŋo, ta la eka boŋ o gno lo. O raŋ o gre boŋ o kpaŋ lo nga o ngʼba o sku edlobi boŋ. O wo boŋ o vro enu mbo, ame é ba e gnyu ŋo eka ba asi. Aŋo ó yi omba ba ame é ba e ba ma mbo ku-ku.

⁴ Ambo moakyeŋ eshki bimi fi osku ba Esadi, moa a kpaŋ aknye mo a da lo a bili la erum mbo. Agimi é dzi pa la me la ariga akyle, okyku eshi agimi e tse ma ba agimi e kpo eka he lo.

⁵ Ekakahelo angyiŋ, moare la a hwiŋ okpogre lo pyeŋ, moa á ygi mo ariga akyle. Nga ame é bga ashko mo akpa ba esõ ku-ku mbo. Nga egi ayi ba Adugu pa la moanwyeadga baŋ, ame é lu ka la ŋa zhezheŋ ba moa a wo moarehwĩ me angyiŋ.

⁶ O wo ba agimi e wo la atuŋ ma le, e ngli atuŋ e gno odlo ba Ogbgaodzi o lu o ygi moaEklisiya efoha!

Oshpa okyku Eklisiya ba Efiladelfiya

⁷ Ogbgaodzi o sa o lu mi le, Aŋo o ta anwyeadga ba Eklisiya ba Efiladelfiya akpa o lu mi le, Oshpa he lo o wo oshpa la o zgi abgo ba are la a wo la esesla, nga a wo la adlidzi. Emakuli ba Adawuda e wo abgo baŋ angyiŋ. Aŋa angyiŋ a la a hwile ayizhẽ lo, nga arekyeŋ a shki lo a gbu mbo. Nga aŋa angyiŋ a la a shki lo, nga are-kyeŋ a hwile lo a gbu mbo.

⁸ A lu mi le, Ame e yi ayakplo boŋ o la o kpo. Nga ame e yi boŋ o wo la oshye ma nzenze mbo. Nga aŋo o la o kpaŋ onyenye me, nga o la o kpo adlidzi pa la me. Ame e sheŋ e hwile ayizhẽ e zga egi ayi boŋ. Are-kyeŋ a kpo a gbu baŋ a shki lo mbo ku-ku.

⁹ Aŋo o ngli atuŋ o gno! Eshri eshki moarehwĩ mi la a wo a ba Eshitaŋ, moa la a sheŋ akpro ma moa a wo moaEyahuda ambo moa a wo moaEyahuda angyiŋ mbo, ame é da mo a ba egi ayi bimi moa á tsi a gbu obiŋ nga á hlu gimi eshko. Pyeŋ mo moa á yi ba ame e klo ŋo.

¹⁰ Okyku eshi aŋo o kpaŋ odaŋ me nga aŋo o ghwo esõ, ame é kpaŋ ŋo é sku ewu la é ba e reŋ obiŋ hi pyeŋ, okyku o da me e mbga moarehwĩ ba obiŋ hi pyeŋ e ka.

¹¹ Ame é ba ambla fi. O kpaŋ ekployaŋ a mbo boŋ o wo la alo ma okyku o da arekyeŋ a ngʼga egbre ba okpogre boŋ ó hwiŋ mbo.

¹² Are la a hwiŋ okpogre, ame é daŋ a dzu emgbakha anyuŋ-akulu ba Ahogbrẽ me, nga aŋa á zgi á sku lo ku-ku nga mbo. Nga ame é ta eshko ba Ahogbrẽ me ta la eshko ba osku ba Ahogbrẽ me, ba moa a la a bzi lo ma Orushalima olehe. Alo ó zgi Ongyeŋ okro ba Ahogbrẽ me angyiŋ ó ba o ba. Ame é shri ashko he lo é bre egʼba baŋ. Nga ame é ta eshko elehe me é bre egʼba baŋ.

¹³ O wo ba agimi e wo la atuŋ ma le, e ngli atuŋ e gno odlo ba Ogbgaodzi o la o lu o ygi moaEklisiya.

Oshpa okyku Eklisiya ba Eladosiya

¹⁴ Ogbgaodzi o sa o lu mi le, Aŋo o ta anwyeadga ba Eklisiya ba Eladosiya akpa o lu mi le, Oshpa lo o wo oshpa la o zgi abgo ba Amin angyiŋ. Aŋa a wo are la a zgi egŋe ba adlidzi. Aŋa angyiŋ a wo esĩ ba ekployaŋ a mbo ba Ahogbrẽ a kpo.

¹⁵ A lu mi le, Ame e yi ayakplo boŋ o kpo. Ame e yi boŋ o ka o bʼbu mbo, o mbo le o ka o bmye ovo mbo. Ame e klo e mbi boŋ o wo okyeŋ eshki he lo e gre eshri!

¹⁶ Ambo okyku boŋ o wo zizizgi sha, aŋo o ka o bmye ovo angyiŋ mbo, nga aŋo o bʼbu mbo, o ra tsi sha ba ame e ta ŋo anyu me, e ygi a bi eka ba akyi!

¹⁷ Aŋo o lu mi le, Ame e wo la angyiŋ ma nga ame e wo anzho ma fkatka, nga ame e wo la ekployaŋ a mbo ba ame e klo. Ambo aŋo o yi boŋ o wo la esõ-ongʼba esõ boŋ nga boŋ o wo ayiekŋe mbo! Aŋo o wo ekŋe ototno, nga aŋo o wo ososo angyiŋ, nga aŋo o wo avgayi.

¹⁸ Ame e shri ebra angyiŋ e shri e doŋ. O raŋ o gre boŋ o gbmo azurfa okro me. Azurfa he lo a wo zhezheŋ, alo á doŋ o gbu angyiŋ. Nga aŋo o gbmo aknye akyle okyku o doŋ o ygi nga okyku o doŋ o shki oso la o ta ŋo anzi. Nga o gbmo agum o ta ayi boŋ, okyku o doŋ o ka okro.

¹⁹ Ame e la e nye, nga e la e kpo moare ba ame e klo ewu. O nyuŋ o kpo-kpo nga o ngʼba o sku edlobi boŋ.

²⁰ Aŋo o ngli atuŋ o gno! Ame e tspi ayizhẽ nga e la e ta enzi ma. O wo ba arekyeŋ a gno enzi me nga a hwile me ayizhẽ le, ame é ba odne baŋ nga é ri algo ka la ŋa, nga aŋa a mbo á ri algo pa la me.

²¹ Moare la a hwiŋ okpogre lo, ame é da mo ozhẽ okyku o da mo a dzu agbaŋ ba emgbakyiŋ ba oreŋ me, eka ba ame a mbo e hwiŋ okpogre, nga ohuhuhi, ame e dzu agbaŋ ba emgbakyiŋ ba oreŋ ba Adugu ka la ŋa.

²² O wo ba agimi e wo la atuŋ ma le, e ngli atuŋ e gno odlo ba Ogbgaodzi o lu o ygi moaEklisiya!