Otsotsa 22 - Ohwihwim Olehe

¹ Anwyeadga he lo nga a tsa me ondzu ba ami ba esõ. Alo o wo zhezheŋ eka amihĩ. Alo o zgi emgbakyiŋ oreŋ ba Ahogbrẽ ta la Anwye Ekylu angyiŋ o ba.

² Alo o dzẽ o sõ agʼbaha ba anyuŋ-ozhẽ ba osku lo. Esĩ aki ba esõ e wo agba egiyaŋ a mbo ba ondzu lo. E la e fu agbro engyi otsko angyiŋ eyi. Ohwayaŋ a mbo alo e la e fu agbro odgo okyeŋ. Ayeya ba esĩ aki ba esõ he lo a wo okyku o shaŋ moarehwĩ ba obiŋ hi pyeŋ ibu ba elolo ba moa a la a no.

³ Nga ekplokyeŋ ba Ahogbrẽ a ta ogbukyu a ygi lo é hwiŋ ozhẽ é yi osku he lo mbo ku-ku. Emgbakyiŋ oreŋ ba Ahogbrẽ ta la ba Anwye Ekylu lo é dzu osku he lo. Nga moawaghrẽ baŋ á hlu ŋa eshko.

⁴ Nga moa á ka eyayi baŋ, nga moa á ta eshko baŋ á bre ondaŋ mo.

⁵ Okyukyku ó wo ahe lo nga mbo, nga émgbuovo ta la ayimom ba olum á wo owlama ahe lo nga mbo, okyku eshi Adigi-odne Ahogbrẽ angyiŋ á ba a dzu ayimom mo, nga moa á ri ekʼpo eka moanyuŋ-areŋ gbagbu gbagbu-amo.

Oba-ba ba Eyesu

⁶ Ambla he nga anwyeadga lo a lu odlo pa la me a lu mi le, Odlo he lo o wo adlidzi angyiŋ nga o wo odlo la o raŋ o gre ba moa a bmi ta la lo. Nga Adigi-odne Ahogbrẽ la a la a shri Ogbgaodzi baŋ a shri a da moarehwĩ baŋ a hom mo otum angyiŋ, a hom anwyeadga baŋ otum okro ba moawaghrẽ baŋ okyku o da mo a yi eka ba ekplo la é ba e kpo é ta adzadzi.

⁷ Eyesu a lu mi le, Agimi e ngli atuŋ e gno! Ame e wo osusku ba oba-ba! Moa la a kpaŋ odlo ba okaolu ba akpa he lo, moa a gno oraŋ!

⁸ Ame Eyohana, e gno, nga e sa e ka ayakplo he lo pyeŋ. Ambla ba ame e gno lo nga e ka lo e khwo nga, ame e kŋe e shki obiŋ egi ayi ba anwyeadga la a tsa me ayakplo he lo, okyku o hlu ŋa eshko.

⁹ Ambo a lu a da me a lu mi le, Aŋo o kpo eka hi mbo! Ame a mbo e wo awaghrẽ eka boŋ pa la moanóŋ ba Ahogbrẽ a hom mo otum, ta la areyaŋ a mbo la a kpaŋ odlo la o wo akpa he. Aŋo o hlu Ahogbrẽ angyiŋ eshko!

¹⁰ Ambla he nga aŋa a nyuŋ me a lu mi le, O ghre odlo ba otsotsa ba moa a ta lo akpa he mbo, okyku eshi omba o wo osusku ba ayakplo he lo pyeŋ á ba a bli.

¹¹ Nga areyaŋ a mbo la a la a kpo obi, a dzu ma ta la obi baŋ. Nga areyaŋ a mbo la a kpo eshre, a dzu ma ta la eshre baŋ, nga areyaŋ a mbo la a kpo odzi, a dzu ma ta la odzi baŋ. Nga areyaŋ a mbo la a wo la esesla, a dzu ma la esesla baŋ.

¹² Eyesu a lu mi le, Agimi e ngli atuŋ e gno! Ame é ta adzadzi é ba! Nga ame é shri egbre é da areyaŋ a mbo eka ekplo baŋ a kpo angyiŋ.

¹³ Ame angyiŋ e wo Alfa ta la Omega. Ame angyiŋ e wo ori ta la amom-abgo, nga ame angyiŋ e wo esĩ ta la eygi.

¹⁴ Moa la a ndza áriga mo a da lo a dzu akyle, moa á gno oraŋ, okyku eshi moa á wo ozhẽ ma ba o ri agbro ba esĩ aki ba esõ, nga moa á wo ozhẽ ba o sõ ayizhẽ otsko lo o yi osku he lo eshyẽ.

¹⁵ Moa la a tpi ayi pa la moa la a kpo ololo, pa la moa la a kpo ayakplo ba eshre, pa la moa la a bga ebga, pa la moa la a hlu okpko eshko, pa la moa la a la a gno oraŋ ta la osheŋ akpro nga ba moa a la a sheŋ akpro, moa á tspi egi edzi ba osku he lo.

¹⁶ Ame Eyesu e hom anwyeadga me otum okyku o daŋ a su odlo he lo a ygi gimi arehwĩ ba Eklisiya lo pyeŋ. Ame e wo arehwĩ ba ogu ba Adawuda, nga ame angyiŋ e wo ambzi endigiŋ la e shka ayi.

¹⁷ Ogbgaodzi ta la Anwyeshe a lu mi le, Agimi e ba! Nga e da areyaŋ a mbo la a gno odlo he lo, e daŋ a mbo a lu mi le, Agimi e ba! Areyaŋ a mbo ba oŋo o kpo ŋa nga baŋ a klo o wa ami, a ba a yga ami ba esõ he lo a wa ototno.

Amom-abgo

¹⁸ Ame Eyohana e la e shĩ areyaŋ a mbo la a gno odlo ba okaolu ba akpa he lo. O wo ba arekyeŋ a fa ekplokyeŋ a ta ma le, Ahogbrẽ a mbo, á ta ŋa ma la elolo ba moa a lu odlo eshri lo akpa hi.

¹⁹ Nga o wo ba arekyeŋ a fa emakyeŋ odlo ba okaolu ba akpa he lo a ra le, Ahogbrẽ á nyom ŋa ogʼba ba esĩ aki ba esõ, nga á daŋ a hwiŋ ogʼba emakyeŋ Osku ba Esesla ba moa a lu odlo eshri lo akpa hi mbo.

²⁰ Are la a zgi egŋe baŋ eshri odlo he lo pyeŋ a lu mi le, Adlidzi angyiŋ! Ame e wo osusku oba-ba! Alo o dzu eka he lo. Aŋo Adigi-odne Eyesu aŋo o ba!

²¹ Okpoghwo ba Adigi-odne Eyesu o dzu ta la areyaŋ a mbo.