Otsotsa 20 - Ohwihwim Olehe

Eyi ezbi lo

¹ Ambla he nga ame e ka anwyeadga a zgi Ongyeŋ a ba obiŋ. A kom emakuli ba enzhe la e gyuŋ mgbyimgbyimgbyiŋ obgo baŋ, agbu la a dzõ a mbo a wo obgo baŋ.

² A vu emabi egagre, alo angyiŋ a wo atsoŋ emabi he lo. Alo angyiŋ a wo Areabi ta la Eshitaŋ. Anwyeadga he lo a ta ŋa agbu okyku eyi ezbi.

³ Anwyeadga he lo a shri ŋa a ndba a ta enzhe la e gyuŋ mgbyimgbyimgbyiŋ. A klu lo a khwo nga a reŋ lo, okyku o daŋ a bile moarehwĩ ba obiŋ hi ku-ku nga mbo ma-me eyi ezbi. Ambla he nga moa á ngla ŋa okyku omba fi sha.

⁴ Ambla he nga ame e ka émgbakyiŋ oreŋ, pa la moarehwĩ la a dzu ma. Moa a shri ekʼpo ba o sõ ombgu a shri a da mo. Nga ame e sa e ka ésõ moarehwĩ ba moa a bga moa a sheŋ a gre, okyku ba moa a su adlidzi ba Eyesu a tsa lo zhezheŋ, nga a sa a su odlo ba Ahogbrẽ. Moa a bmi a hlu ebyi la e wo ebi lo ta la ambgu ba ebyi he lo eshko mbo ku-ku. Nga moa a da mo a ta mo egŋe ba ebyi la e wo ebi he lo ondaŋ mo o mbo le abgo mo mbo. Moahi lo a dzu ta la Eyesu nga a ri ekʼpo ka la ŋa okyku eyi ezbi.

⁵ Moahwõ la a kpu nga, moa a kso la esõ mbo o wo le ambla ba eyi ezbi lo dne. Ohi lo angyiŋ o wo oksoeku ba ori.

⁶ Moa la a hwiŋ ozhẽ a kso eku omba ba oksoeku ba ori he lo moa á wo la oraŋ ma, nga moa á hwiŋ owlama nzenze. Eku ba oha é wo la ekʼpo eshri mo mbo ku-ku. Moa á dzu moandakʼpo olu ba Ahogbrẽ, ta la Ekristi, nga moa á ri ekʼpo ka la ŋa okyku eyi ezbi.

Moa a kpo a gre Eshitaŋ

⁷ Ambla ba eyi ezbi e khwo moa á ngla Eshitaŋ á sku enzhe la e gyuŋ mgbyimgbyimgbyiŋ he lo.

⁸ Nga á yi okroyaŋ a mbo obiŋ hi, nga á bile moarehwĩ ba obiŋ hi pyeŋ. Moarehwĩ he lo angyiŋ a wo Ogogu ta la Amagogu. Eshitaŋ é shri mo pyeŋ é ba okyku o da mo a ta eko. Moa a wo nzenze eka ba endase ba akaŋ anyuŋ-ondzu.

⁹ Moa a ngla nzenze a bli obiŋ hi, nga moa a ta apu moarehwĩ ba Ahogbrẽ ta la osku ba Ahogbrẽ a klo lo, a kpaŋ. Ambo ovo o gile o zgi Ongyeŋ o ba o ri mo pyeŋ.

¹⁰ Ambla he nga Areabi la a bile mo, moa a vu ŋa a shri a ta enzheovo la e shum la ovo ma nzenze. Moa a sheŋ a shri ebyi la e wo ebi lo ta la arehwĩ la a sheŋ akpro ma Ahogbrẽ angyiŋ a hom ŋa otum a shri a ndba a ygi enzheovo he lo. Nga ahe lo moa á kpo mo ewu la olulum ta la okyukyku gbagbu gbagbu-amo.

Ombgu ba amom-abgo

¹¹ Ambla he nga ame e ka anyuŋ emgbakyiŋ ba oreŋ ekyle ta la are la a dzu ma. Obiŋ hi ta la ongyeŋ moa a knye a sku ŋa, nga moa a ka mo ku-ku nga mbo.

¹² Nga ame e ka moa la a sheŋ a kpu, moa la a gbu eshko, pa la moa la a wo emakyeŋ ma mbo. Moa pyeŋ a tspi egi ayi ba emgbakyiŋ oreŋ lo. Moa a hwile akpekpa. Ambla he nga moa a sa a hwile akpakyeŋ, akpa he lo angyiŋ a wo akpa ba moa la a wo la esõ ma. Nga moa á sõ moa la a kpu ombgu eka ba ekplo ba moa a kpo, eka ba moa a ta lo akpekpa lo.

¹³ Ambla he lo nga anyuŋ-ondzu a shri ekom ba moa la a kpu anyuŋ-ondzu a shri a ba. Eku ta la obiŋ ba moarehwĩ la a kpu, moa a shri ekom moare la a kpu a shri a ba. Nga moa a sõ mo pyeŋ ombgu eka ekplo ba moa a kpo.

¹⁴ Ambla he nga, moa a shri eku ta la obiŋ ba moarehwĩ la a kpu, a shri a ygi enzheovo. Eku ba oha lo angyiŋ e wo enzheovo he lo.

¹⁵ Areyaŋ a mbo ba moa a ta eshko baŋ akpa ba esõ mbo le, moa a shri ŋa a ta enzheovo.