Otsotsa 2 - Ohwihwim Olehe

Oshpa okyku Eklisiya ba Afisu

¹ Ogbgaodzi o sa o lu mi le, Aŋo o ta akpa o kom anwyeadga ba Eklisiya ba Afisu o lu mi le, Oshpa he lo o wo oshpa la o zgi abgo ba are la a kom eyi enzo efoha lo obgori baŋ, nga la a dzi eshki ba emgbakha ovo efoha ba azurfa.

² A lu mi le, Ame e yi ayakplo boŋ o kpo, nga ame e yi eka boŋ o zga ayi ngre nga o kpo otum, nga o wo la esõ la e wo eheheŋ. Ame e yi boŋ o la o kpo ekpom pa la moarehwĩ ba ototno mbo. Nga agimi e sheŋ e mbga moarehwĩ la a bzi emo ma moare la a nyum oshpa e ka bgu, ambo moa a wo moare la a nyum oshpa angyiŋ mbo. Nga aŋo o ka lo o bmye ba moa a wo moare la a sheŋ akpro angyiŋ.

³ Aŋo o wo la esõ la e wo eheheŋ, nga o la o kpo ewu okyku me, ambo aŋo o ka o ndba me o ta mbo.

⁴ Ambo aŋo o klo me ohuhuhi eka boŋ o klo me oriori mbo. Okyku eka he nga, ame e gno oraŋ ka la ŋo mbo.

⁵ O ka, aŋo o tsi o gbu ogyugyuŋ nzenze! O raŋ o gre boŋ o ngʼba o sku edlobi boŋ nga o kpo ayakplo eka boŋ o kpo okũ oriori. Ame é ba okro boŋ nga é sko emgbakha ovo ba azurfa lo, o wo boŋ o ngʼba o sku edlobi boŋ mbo le.

⁶ Ambo o ka odlodzi boŋ o la o kpo, nga o tla ayakplo ba moaEnikolata eka ba ame a mbo e tla lo.

⁷ O wo ba agimi e wo la atuŋ ba o ngli o gno odlo le, agimi e ngli atuŋ e gno odlo ba Ogbgaodzi o la o lu o ygi moaEklisiya! Moare la a sheŋ a hwiŋ okpogre, ame é da mo ozhẽ okyku o da mo a ri ágbro ba esĩ aki ba esõ la a fu Agbi ba Ahogbrẽ.

Oshpa okyku Eklisiya ba Esemana

⁸ Ogbgaodzi o sa o lu mi le, Aŋo o ta akpa o kom anwyeadga ba Eklisiya ba Esemana o lu mi le, Oshpa he lo o wo oshpa la o zgi abgo ba are la a wo ori, ta la amom-abgo. Aŋa a kpu a khwo nga a sa a hwiŋ esõ.

⁹ A lu mi le, Ame e yi ewu boŋ, nga ame e yi boŋ o wo la ekŋe ma. Ambo egyagi a mbo, aŋo o wo are ba angyiŋ angyiŋ! Ame e yi edgu ayakplo ba ototno ba edgu moarehwĩ la a la a bzi emo ma moaEyahuda, a lu eshri bimi. Ambo moa a wo moaEyahuda angyiŋ mbo. Moa a wo eshki ba moarehwĩ ba Eshitaŋ angyiŋ!

¹⁰ Ambo o da ewu boŋ ó ba o kpo, e kpo ŋo eyli mbo ku-ku. O ngli atuŋ o gno! Eshitaŋ é shri moabze eshki bimi é ygi aku okyku o daŋ a mbga gimi a ka. Agimi é kpo ewu okyku elum okʼpo. Aŋo o kpo adlidzi ma-me o tsa onda boŋ o kpu. Ambla he nga, ame é shri anyuŋ egbre ba esõ é shri é doŋ.

¹¹ O wo ba agimi e wo la atuŋ ba o ngli o gno odlo le, agimi e ngli atuŋ e gno odlo ba Ogbgaodzi o la o lu o ygi moaEklisiya. Moare la a kpo a gre le, eku ba oha é ta mo etsa mbo ku-ku.

Oshpa okyku Eklisiya ba Epegamum

¹² Ogbgaodzi o sa o lu mi le, Aŋo o ta akpa o kom anwyeadga ba Eklisiya ba Epegamum o lu mi le, Oshpa he lo o wo oshpa la o zgi abgo ba are la a wo la akõ anyu aha la a ri hihihli.

¹³ A lu mi le, Ame e yi okro boŋ o dzu ma. Ibu he lo angyiŋ, emgbakyiŋ oreŋ ba Eshitaŋ e wo ma. Aŋo o kpo adlidzi pa la me, nga o ndba obmi ba adlidzi boŋ o bmi pa la me o ta a bi mbo omba ba moa a bga Antipa okro ba Eshitaŋ e dzu ma. Antipa a wo are la a zgi egŋe me la adlidzi angyiŋ.

¹⁴ Ambo ayakplo fi ba ame e gno oraŋ ka la ŋo mbo a wo ma. Eshki bimi moakyeŋ a la a kpo otum ta la onyenye ba Abalam. Abalam angyiŋ a nye Abalaka a daŋ a da moarehwĩ ba Esrayila a kpo odlobi okyku baŋ a da mo a ri algo ba moa a shri a ndba okyku okpko, nga a da mo a kpo ayakplo ba eshre.

¹⁵ Nga ekakahelo angyiŋ, eshki bimi agimi e wo la moarehwĩ la a kpo otum ta la onyenye ba moaEnikolata ma.

¹⁶ Aŋo o ngʼba o sku edlobi boŋ ohuhuhi! O wo eka he mbo le, ame é ba okro boŋ ambla fi, nga ame é kpo ambgu pa la moarehwĩ he lo ta la akõ la a zgi anyu me.

¹⁷ O wo ba agimi e wo la atuŋ ma le, agimi e ngli atuŋ e gno odlo ba Ogbgaodzi o la o lu o da moaEklisiya. Moare la a sheŋ a hwiŋ okpogre, ame é fa amana la a ghre é shri é da mo. Nga ame é shri ezhim ekyle é shri é da areyaŋ a mbo eshki mo. Nga moa á ta eshko elehe angyiŋ e ma. Arekyeŋ á yi lo mbo ku-ku, o wo le are la á ba a yga lo dne.

Oshpa okyku Eklisiya ba Etatira

¹⁸ Ogbgaodzi o sa o lu mi le, Aŋo o ta akpa o kom anwyeadga ba Eklisiya ba Etatira o lu mi le, Oshpa he lo o wo oshpa la o zgi abgo ba Anwye ba Ahogbrẽ. Ayi baŋ a shka ayi eka ovo. Adga baŋ nga a shka ayi eka ba ahwre abme ba moa a khwa lo adzadzi.

¹⁹ A lu mi le, Ame e yi eka ekplo boŋ o la o kpo, nga ame e yi eka ba oklo boŋ o wo, ta la adlidzi boŋ, ta la otum boŋ, nga oheheŋ boŋ. Ame e yi boŋ o kpo otum ohuhuhi o gre eka okũ oriori.

²⁰ Ambo ame e gno oraŋ ka la ŋo mbo okyku eshi aŋo o bmi ta la ashe ba moa a bzi ŋa ma Ejezeble. Aŋa a lu ma aŋa a wo anwyeadga ba Ahogbrẽ angyiŋ. Ashe he lo a la a nye moawaghrẽ me nga a la a bile mo, nga a la a da mo a kpo ayakplo ba eshre, nga a la a da mo a ri algo ba moa a shri a ndba okpko.

²¹ Ame e shri omba e shri e daŋ okyku o daŋ a ngʼba a sku edlobi baŋ he lo, ambo aŋa a klo o kyu ayakplo eshre baŋ a kpo he lo abgo mbo.

²² Okyku eka he, ame é shri ŋa pa la moare la a ri eshra ka la ŋa é ndba é ta agadu, nga ahe lo moa á kpo ewu ma nzenze. Ame é kpo ohi lo ohuhuhi, o wo ba moa a ghwo obiŋ ayakplobi moa a kpo ka la ŋa mbo.

²³ Ame é sa é bga moanwye baŋ. Nga moaEklisiya pyeŋ moa á yi ba ame angyiŋ e wo are la a yi aga esõ moarehwĩ ta la ayakplo ba moa a la a klo. Areyaŋ a mbo á hwiŋ egbre okro me eka ekplo baŋ a kpo.

²⁴ Ambo agimi ahwõ la e ra Etatira agimi e bmi ta la edgu onyenye ba eshre he lo mbo. Agimi e nye ayakplo ba moahwõ a la a bzi lo ma onyenye la o wo ogyugyuŋ ba Eshitaŋ ko mbo. Okyku eka he ame e da ewukyeŋ e hwiŋ gimi mbo.

²⁵ Ambo o raŋ o gre ba agimi e kom ekplo bimi e wo la alo ma gble ma-me o tsa onda ba ame é ba e ba.

^26-28 Nga, moare la á hwiŋ okpogre le, moarehwĩ la a kpo ayakplo ba ame e klo ma-me nga a ta ohuhuhi, ame é shri edgu ekʼpo ba Adugu a shri a da me angyiŋ é ba e shri é da mo. Ame é shri ekʼpo é da mo eshri ba émbre moare, okyku o da mo a ri ekʼpo eshri mo la opi ba amgbaŋ, nga moa á gom mo okyukyukyku eka ba eshyẽ ba ongyum. Nga ame é shri amdzi endigiŋ é shri é da mo.

²⁹ O wo ba agimi e wo la atuŋ ma le, e ngli atuŋ e gno odlo ba Ogbgaodzi o lu o ygi moaEklisiya!