Otsotsa 19 - Ohwihwim Olehe

¹ Ambla he nga ame e gno ekplokyeŋ la e kpo akyuŋ eka ba enzi egagre ba anyuŋ eshki moarehwĩ la a wo Ongyeŋ. Moa a lu mi le, E hlu Ahogbrẽ eshko! Oshla ta la esesla ta la ekʼpo moa a wo a ba Ahogbrẽ bi angyiŋ!

² Ombgu baŋ o wo adlidzi ta la odlodzi angyiŋ! Okyku eshi aŋa a tsa ashe-eshra la a gbu eshko nga a tpi obiŋ hi ayi la ayakplo eshre baŋ, ewu. Ahogbrẽ a tsa ŋa ewu okyku baŋ a bga moawaghrẽ baŋ.

³ Ambla he nga moa a lu odlo angyangyeŋ a lu mi le, E hlu Ahogbrẽ eshko! Odzo ba anyuŋ osku la o ri ovo lo ó yi ongyeŋ gbagbu-amo!

⁴ Moandakʼpo ekʼpoeha la anyi ta la ébyi enyi, moa a kŋe a shki obiŋ nga moa a hlu Ahogbrẽ la a dzu emgbakyiŋ ba oreŋ eshko, nga a lu mi le, Amin! E hlu Ahogbrẽ eshko!

Oriabgo ba Anwye Ekylu

⁵ Ambla he nga enzi e zgi emgbakyiŋ ba oreŋ e ba e lu mi le, Agimi moawaghrẽ ba Ahogbrẽ pyeŋ, pa la moarehwĩ pyeŋ moa la a wo agagre pa la moa la a wo afifi nga ba moa a kpo eyli ba Ahogbrẽ, e hlu Ahogbrẽ bi eshko!

⁶ Ambla he nga ame e gno enzi eka ba enzi ba eshki nzenze. E wo eka ba akyuŋ ba ami a dze awro ézhim la e wo egagre. E wo eka ba akyuŋ ba angyum-ogbu. Ame e gno ba moa a lu mi le, E hlu Ahogbrẽ eshko! Okyku eshi Adigi-odne la wo Ahogbrẽ bi ba ekʼpo pyeŋ angyiŋ a wo Anyuŋ-areŋ!

⁷ Agimi e da gi e kpo ovye nga e vye. Agimi e da gi e hlu ŋa eshko okyku ekʼpo baŋ! Okyku eshi omba ba o bʼbu eble ba Anwye Ekylu o kpo bgu. Nga anwyeshe baŋ a sheŋ a nyuŋ eŋa a vu abgo.

⁸ Moa a bmi baŋ a ygi aknye ba elili la a wo pse, nga ba alo a shka ayi. Elili he lo angyiŋ e wo otum ba ayakplodzi ba moarehwĩ ba Ahogbrẽ.

⁹ Ambla he nga anwyeadga lo a lu pa la me a lu mi le, O ta o lu mi le, Moarehwĩ ba moa a bzi mo okyku oriabgo eble ba Anwye Ekylu moa a wo la ognoraŋ ma. Anwyeadga lo a sa a lu odlo a ta ma a lu mi le, Odlo he lo o wo odlo adlidzi ba Ahogbrẽ angyiŋ.

¹⁰ Ame e kŋe e shki obiŋ egi ayi baŋ okyku o hlu ŋa eshko, ambo a lu mi le, O kpo eka he mbo! Ame a mbo e wo awaghrẽ eka boŋ pa la moanóŋ pyeŋ la a kpaŋ adlidzi ba Eyesu a tsa lo zhezheŋ. Aŋo o hlu Ahogbrẽ angyiŋ eshko! Okyku eshi adlidzi ba Eyesu a ra lo a tspa zhezheŋ angyiŋ a shĩ esõ moarehwĩ ba Ahogbrẽ a hom mo otum.

Are la a vre enyma ekyle

¹¹ Ambla he nga ame e ka Ongyeŋ o hwile nga enyma ekyle e wo ma. Are la a vre lo moa a la a bzi ŋa Oshasha ta la Adlidzi. Aŋa a la a sõ ombgu nga a la a ta eko la adlidzi.

¹² Ayi baŋ a wo eka ba embyliovo, nga a ghwo ekpmyeshri nzenze ba oreŋ eshri baŋ. Moa a ta eshko a bre egʼba baŋ. Arekyeŋ a yi eshyẽ ba eshko he lo mbo, o wo le aŋa sha.

¹³ Amanzhli a bmre ariga baŋ a ygi lo pyeŋ. Eshko baŋ e ri Odlo ba Ahogbrẽ.

¹⁴ Moanwyeakyuŋ ba Ongyeŋ nga a dzi a lu ŋa ma. Moa a vre ényma ekyle nga moa a ygi elili ekyle.

¹⁵ Akõ la a ri hihihli nga a zgi anyu baŋ. La alo angyiŋ aŋa á ba a kpo a gre moarehwĩ ba obiŋ hi pyeŋ. Aŋa nga á ri ekʼpo eshri mo la ekʼpo la e gre pyeŋ. Nga aŋa á da ami anab ba olom la o vu olo ba Ahogbrẽ ba ekʼpo pyeŋ, o zgi ibu ba moa a hwile ami anab ma o ba.

¹⁶ Moa a ta engla ariga baŋ, ta la odga baŋ a lu mi le, Anyuŋ-areŋ ba moanyuŋ-areŋ, ta la Adigi-odne ba moadigi-odne.

¹⁷ Ambla he nga ame e ka anwyeadga a tspi olulum. A ygi okũ a lu odlo pa la moawunu la a dzi agʼbaha ba ahrẽ la enzi egagre. A lu mi le, E ba e pla egimi e shki okyku oriabgo ogagre ba Ahogbrẽ!

¹⁸ E ba e taŋ ebyi ba moanyuŋ-areŋ pa la moanyuŋ andakʼpo ba moanwyeakyuŋ pa la moanwyeakyuŋ, ta la ebyi ba ényma, ta la ebyi moa la a vre ényma lo, ta la ebyi ba moarehwĩ pyeŋ, moa la a wo moawaghrẽ pa la moa la a wo moawaghrẽ mbo, pa la moa la a gbu eshko pa la moa la a wo emakyeŋ ma mbo!

¹⁹ Ambla he nga ame e ka ebyi la e wo ebi lo, pa la moanyuŋ-areŋ ba obiŋ hi, pa la moanwyeakyuŋ mo, moa a pla emo a shki okyku o da mo a ta eko ta la are la a vre enyma lo, pa la moanwyeakyuŋ baŋ.

²⁰ Moa a vu ebyi la e wo ebi lo, ta la arehwĩ la a sheŋ akpro ma Ahogbrẽ angyiŋ a hom ŋa otum, eka moa-oprusuna. Arehwĩ he lo angyiŋ a kpo ayakplo ba egbregbre egi ayi ba ebyi lo. La ayakplo ba egbregbre angyiŋ aŋa a bile moare la a wo la egŋe ba ebyi la e wo ebi he lo ma, pa la moare la a hlu ambgu ba ebyi lo eshko. Ebyi he lo nga ta la arehwĩ la a sheŋ akpro ma Ahogbrẽ angyiŋ a hom ŋa otum, moa a shri mo pyeŋ a shri a ndba a ygi enzheovo la e shum la ovo ma nzenze.

²¹ Moa a bga moanwyea-kyuŋ mo la akõ la a zgi anyu ba are la a vre enyma lo. Nga moawunu a ri ebyi lo eka ba moa a ri a gbu.