Otsotsa 16 - Ohwihwim Olehe

Étku olom ba Ahogbrẽ

¹ Ambla he nga ame e gno anyuŋ enzi e zgi Anyuŋ-akulu e lu odlo pa la moanwyeadga afoha. E lu mi le, Agimi e yi e zhiŋ olom ba Ahogbrẽ la o wo étku efoha lo e ygi obiŋ hi!

² Anwyeadga ba ori a gre nga a zhiŋ olom la o wo atku baŋ a ygi obiŋ hi. Ambla he nga éro la e ngro eshri e zgi egʼba moare la a wo la egŋe ba ebyi la e wo ebi lo ma, pa la moare la a hlu ambgu ba ebyi lo eshko.

³ Ambla he nga anwyeadga ba oha a zhiŋ olom la o wo atku baŋ a ygi anyuŋ-ondzu. Ami nga a zhiŋ a dzu abme eka ba amanzhli ba arehwĩ la a kpu. Nga ekployaŋ a mbo la e ta ayaŋ la e wo anyuŋ-ondzu lo e kpu.

⁴ Ambla he nga anwyeadga ba otra a zhiŋ olom la o wo atku baŋ a shri a ygi éhwla pyeŋ ta la anzhe ami pyeŋ, nga moa a zhiŋ a dzu amanzhli.

⁵ Ambla he nga ame e gno ba anwyeadga la a kʼpu ami lo, a lu mi le, Aŋo la o wo a ba Esesla, aŋo o kpo shasha angyiŋ eka boŋ o sheŋ ombgu lo eka he. Aŋo o wo ma ohuhuhi, nga ayga a mbo aŋo o wo ma!

⁶ Moarehwĩ ba obiŋ hi a zhiŋ amanzhli ba moarehwĩ ba Ahogbrẽ a ygi a bi. Moa a zhiŋ amanzhli ba moarehwĩ ba Ahogbrẽ a hom mo otum a mbo a ygi a bi. Okyku eka he aŋo o shri amanzhli o da mo a wa. Egbre la e raŋ e gre ba moa a hwiŋ angyiŋ, moa a hwiŋ alo ohuhuhi.

⁷ Ambla he nga ame e gno enzi la e zgi ambgu ba oshriondba e lu mi le, Adigi-odne, Ahogbrẽ ba ekʼpo pyeŋ! Ombgu boŋ o sõ, o wo la adlidzi ta la odlodzi ma!

⁸ Ambla he nga anwyeadga ba onyi a zhiŋ olom la o wo atku baŋ a shri a ygi olulum. Nga moa a bmi a da olum o dzõ moare la ovo la o bmye ovo nzenze.

⁹ Moa a dzõ moare la ovo la o bmye ovo o gre eshri, nga moare he lo a ta ogbukyu a ygi eshko ba Ahogbrẽ la a wo la ekʼpo eshri ba elolo he lo. Ambo moa a ka a nyiŋ odzudzu mo mbo nga moa a hlu ŋa eshko okyku ekʼpo baŋ mbo.

¹⁰ Ambla he nga anwyeadga ba otno a zhiŋ olom la o wo atku baŋ a ygi emgbakyiŋ oreŋ ba ebyi la e wo ebi he lo. Evbu e shki oreŋ ba ebyi lo pyeŋ, nga moare a la a taŋ azhga anyu okyku avuolo.

¹¹ Nga moa a ta ogbukyu a ygi Ahogbrẽ la a wo Ongyeŋ okyku avuolo ba moa a gno ta la ero ba moa a no. Ambo moa a nyiŋ edgu odzudzu mo la o wo obi mbo.

¹² Ambla he nga anwyeadga ba ofĩ a zhiŋ olom la o wo atku baŋ a ygi anyuŋ-ondzu ba Oyufrati. Ambla he nga ondzu lo o mom, okyku o da moanyuŋ-areŋ la a zgi egi etne a ba a hwiŋ ozhẽ.

¹³ Ambla he nga ame e ka egbga ba eshre etra. Moa a wo eka ba áwyle. Moa a zgi anyu ba anyuŋ emabi ta la anyu ba ebyi la e wo ebi, ta la anyu ba arehwĩ la a sheŋ akpro ma Ahogbrẽ a hom ŋa otum.

¹⁴ Egbga ba eshre etra he lo e wo egbga ba ábili la a kpo ayakplo ba egbregbre. Egbga etra he lo e zgi e gre ekro moanyuŋ-areŋ obiŋ hi pyeŋ, okyku o pla mo o shki okyku eko ba moa á ba a ta anyuŋ olum onda ba Ahogbrẽ ba ekʼpo pyeŋ.

¹⁵ Agimi e ngli atuŋ e gno! Ame é ba eka ba asi angyiŋ! Are la a la a dzu a kʼpu, nga a la a nyuŋ aknye baŋ a la a kpaŋ á gno oraŋ! Aŋa nga á dzi wayawaya la ososo mbo, nga á gbu anzi eshki mbo!

¹⁶ Ambla he nga, egbga lo e da moanyuŋ-areŋ pyeŋ a pla a shki okro ba moa a bzi lo la olom ba Eyahuda ma Armagido.

¹⁷ Ambla he nga anwyeadga ba ofoha a zhiŋ olom la o wo atku baŋ a ygi ahrẽ. Nga enzi egagre e zgi emgbakyiŋ ba oreŋ la e wo Anyuŋ-akulu e lu mi le, O khwo!

¹⁸ Ayimom ba angyum-ogbu a tra wayawaya, nga akyuŋ a kpo, nga akyuŋ ba angyum-ogbu a ta, nga obiŋ o zhga ara la a gbu moare eyli. Edgu ozhgara-obiŋ he lo o kpo ondakyeŋ a zga omba ba moa a kpo arehwĩ obiŋ hi mbo ku-ku. Obiŋ hi o zhga ara ondakyeŋ eka he ku-ku o ka mbo!

¹⁹ Anyuŋ osku he lo a gʼba eŋa egʼba etra. Nga moa a kypi esku ba obiŋ hi lo pyeŋ. Ahogbrẽ a tne aga ba anyuŋ-osku ba Ababilo. Ahogbrẽ a daŋ a wa ami anab atku baŋ he lo. Ami anab he lo a wo olom baŋ la o vu olo nzenze angyiŋ.

²⁰ Omba he lo nga anwye-ebiŋ pyeŋ a dam, nga akukũ a mbo pyeŋ a blu.

²¹ Anyuŋ agbro ba ehre-ogbu la a wo eka anyuŋ ézhim la e lbi e wo alaba endga, alo e zgi ahrẽ nga e ba e zhga moarehwĩ. Moarehwĩ a ta ogbukyu a ygi Ahogbrẽ okyku elolo ba ehre-ogbu he lo. Okyku eshi elolo he lo e vu olo nzenze.