Otsotsa 15 - Ohwihwim Olehe

Moanwyeadga la a wo la elolo ba amom-abgo

¹ Ambla he nga ame e ka egŋe egagre la e wo egbregbre Ongyeŋ. Egŋe he lo angyiŋ e wo moanwyeadga afoha ta la edgu elolo efoha. Elolo he lo angyiŋ e wo elolo ba amom-abgo. Olom ba Ahogbrẽ ó khwo ta la elolo he lo.

² Ambla he nga ame e sa e ka atam ami la a shka ayi leleleŋ, nga a kŋe a bga ta la ovo. Nga ame e ka moare la a kpo a gre ebyi la e wo ebi ta la ambgu ba ebyi he lo, nga moa a kpo a gre are ba moa a shri eshko baŋ a shri a di la alamba lo. Moahi lo a tspi akaŋ atam la a shka ayi leleleŋ lo. Moa a kom égbani ba Ahogbrẽ a shri a da mo abgo.

³ Moa a la a fu abmo ba Omusa la a wo awaghrẽ ba Ahogbrẽ ta la abmo ba Anwye Ekylu lo. Moa a fu abmo a lu mi le, Adigi-odne, Ahogbrẽ la a wo ekʼpo pyeŋ, Otum boŋ o kpo o wo ogagre nga o wo egbregbre nzenze! Aŋo Anyuŋ-areŋ ba moarehwĩ ba obiŋ hi pyeŋ, Ozhẽ boŋ o wo shasha nga o wo adlidzi o gre eshri!

⁴ Adigi-odne, ayi angyiŋ a kpo eyli boŋ mbo? Ayi á ba a tla okyku o daŋ a su ekʼpo boŋ? Okyku eshi aŋo sha angyiŋ o wo la esesla. Moarehwĩ ba obiŋ hi pyeŋ moa á ba Nga á hlu ŋo eshko egi ayi boŋ. Okyku eshi areyaŋ a mbo a ka otum ba odlodzi boŋ o kpo.

⁵ Ambla he nga ame e ka Anyuŋ-akulu la a wo Ongyeŋ a hwile, nga ame e ka abro ba Ahogbrẽ a dzu ma Anyuŋ-akulu lo.

⁶ Moanwyeadga afoha ba elolo efoha ba amom-abgo a wo pa la mo, moa a zgi Anyuŋ-akulu lo. Moa a ygi aknye akyle ba elili, nga moa a shri ashye akpa ba azurfa a shri a bʼbu eshaku.

⁷ Ambla he nga akyeŋ eshki ba ébyi enyi lo, a shri étku ba azurfa efoha a shri a da moanwyeadga afoha. Étku lo e bli slu la olom ba Ahogbrẽ. Ahogbrẽ á dzu ma gbagbu gbagbu-amo.

⁸ Anyuŋ-akulu a bli la odzo la o zgi okro ba esesla ta la ekʼpo ba Ahogbrẽ. Arekyeŋ a kpo a gbu baŋ a yi Anyuŋ-akulu lo eshyẽ mbo, o wo le elolo efoha ba moanwyeadga afoha a shri a ba e khwo ayga dne.