Otsotsa 14 - Ohwihwim Olehe

Abmo ba moa la a hwiŋ oshla

¹ Ambla he nga ame e zhiŋ e ka nga, ame e ka Anwye Ekylu a tspi Aku ba Ezayoŋ. Moarehwĩ ezbi endga la ekʼpoenyi la anyi a tspi ka la ŋa ma. Moa a ta eshko baŋ ta la eshko ba Adaŋ ondaŋ mo.

² Nga ame e gno enzi e zgi Ongyeŋ e ba. Akyuŋ ba enzi lo a wo eka ba ami a kpo awro ba ezhim, ta la akyuŋ ba angyum-ogbu. Enzi ba ame e gno lo e zhle eka ba enzi ba moa a bymi egbani.

³ Moa a tspi a zhiŋ ayi a ka emgbakyiŋ oreŋ ta la ébyi enyi pa la moandakʼpo, moa a fu abmo alahe, arekyeŋ a mbo a nye lo a gbu mbo, o wo le moare ezbi endga, la ekʼpoenyi la anyi lo sha. Moa a sheŋ a shla moahi lo a sku obiŋ hi bgu.

⁴ Moahi lo angyiŋ a wo moarehwĩ la a shri eshri mo a zga shasha, nga moa a kpo akplokyeŋ pa la moashe a ka mbo ku-ku, moa a kyu moashe a ka mbo. Moa angyiŋ la a lu Anwye Ekylu lo ma a yi okroyaŋ a mbo baŋ a la a yi. Moa a sheŋ a shla mo eshki moarehwĩ. Nga moa angyiŋ a wo moarehwĩ ba moa a shri mo a ndba Ahogbrẽ ta la Anwye Ekylu ori.

⁵ Moa a hwiŋ mo la akpro ondakyeŋ mbo ku-ku. Moa a wo la akpu ma mbo.

Moanwyeadga atra

⁶ Ambla he nga ame e ka anwyeadgakyeŋ a la a knye ahrẽ, ta la Oshpaodzadzi ba gbagbu-amo. A shri lo okyku o su lo o ygi moarehwĩ ba obiŋ hi, pa la moarehwĩ ba obiŋyaŋ a mbo, ta la embreyaŋ a mbo, pa la moarehwĩ ba olomyaŋ a mbo, pa la moarehwĩ pyeŋ.

⁷ A lu odlo la enzi egagre a lu mi le, Agimi e kpo eyli ba Ahogbrẽ nga e hlu ŋa eshko okyku ekʼpo baŋ! Okyku eshi omba baŋ á sõ moarehwĩ ba obiŋ hi pyeŋ ombgu o kpo bgu. Okyku eka he nga, agimi e kʼpu obiŋ egi ayi ba Ahogbrẽ la a kpo Ongyeŋ ta la obiŋ hi, ta la onyuŋ-ondzu, ta la anzhe ami, nga e hlu ŋa eshko!

⁸ Anwyeadga ba oha a lu anwyeadga ba ori ma nga a lu mi le, Osku ba Ababilo a sheŋ a tsi a gbu! Ababilo la a wo anyuŋ-osku, a tsi a gbu! A shri ajige baŋ a shri a da areyaŋ a mbo, nga a da mo a wa. Ami baŋ ba eshre ba ogroayi he lo, a wo oshye nzenze!

⁹ Anwyeadga ba otra a lu moanwyeadga aha he lo okũ nga a lu la enzi egagre a lu mi le, Areyaŋ a mbo la a hlu ebyi he lo ta la ambgu ba ebyi he lo eshko nga a sa a bre egŋe he lo ondaŋ baŋ, o mbo le obgo baŋ le,

¹⁰ are he lo á wa ami anab ba Ahogbrẽ. Ami he lo angyiŋ a wo olom ba Ahogbrẽ. Aŋa á zhiŋ lo gbugbu, a ygi aridi ba olom baŋ! Moare pyeŋ la a kpo eka he lo, moa á kpo mo ewu ovolaovẽsla egi ayi ba moanwyeadga ba esesla, ta la Anwye Ekylu.

¹¹ Odzo ba ovo la ó ba o kpo mo ewu lo ó yi ongyeŋ gbagbu-amo. Olulum ta la okyukyu odzudum ó wo ma mbo okyku moa la a hlu ebyi lo ta la ambgu ba ebyi lo eshko, ta la areyaŋ a mbo la a yga egŋe ba eshko ba ebyi he lo.

¹² Okyku eka he lo, o dzu omgbybi ba moarehwĩ-ba Ahogbrẽ la a kpaŋ odaŋ baŋ, nga ba moa a tspi la adlidzi okyku Eyesu, moa a ta esõ mo akpyli.

¹³ Ambla he nga ame e gno enzi e zgi Ongyeŋ e lu mi le, Aŋo o ta odlo hi. A zga ohuhuhi a yi moa la a kpu okyku otum ba Adigi-odne, moa á gno oraŋ! Ogbgaodzi o tno ma o lu mi le, Adlidzi, alo o wo eka he lo angyiŋ. Ambla ba moa a kpo otum la o vu olo eka he, moa a sa á dzu á dum á gno oraŋ okyku eshi moa a shri egŋe ba otum mo lo a shri a kom ma.

Oyayla ba obiŋ hi

¹⁴ Ambla he nga ame e zhiŋ e ka, ame e ka etabro ekyle. Ema la e ka eka ba arehwĩ e dzu etabro lo. Okpmyeshri ba azurfa o wo eshri baŋ, nga elenje la e wo hihihli e wo abgo baŋ.

¹⁵ Ambla he nga anwyeadgakyeŋ a zgi Anyuŋ-akulu nga a lu odlo la anyuŋ enzi egagre egi ayi ba are la a dzu etabro lo nga a lu mi le, O yla algo lo la eningyi boŋ a mo, okyku eshi omba lo o kpo bgu. Obiŋ hi o bmye o tse ma ba moa a yla lo a mo!

¹⁶ Ambla he nga are la a dzu etabro lo a zhiŋ eningyi baŋ obiŋ hi, nga a yla emayaŋ a mbo la e wo obiŋ hi lo.

¹⁷ Ambla he nga ame e ka anwyeadga ahwõ, a zgi Anyuŋ-akulu la a wo Ongyeŋ, aŋa a mbo a wo la elenje la e ri hihihli ma.

¹⁸ Ambla he nga anwyeadga ahwõ a zgi okro ba ambgu a ba. Aŋa angyiŋ a wo la a kʼpu ovo lo. Aŋa a lu odlo osheshye ta la anwyeadga la a wo la elenje la e wo hihihli hi lo a lu mi le, Aŋo o kpo otum pa la elenje boŋ, nga o yla andzgu anab la a bmye la e wo agbi ba obiŋ hi lo, okyku eshi alo a bmye bgu!

¹⁹ Okyku eka he nga anwyeadga lo a zhiŋ eningyi baŋ obiŋ hi. Nga a yla andzgu lo. Ambla he nga aŋa a shri andzgu lo, a shri a ygi ohwĩ ba olom ogagre ba Ahogbrẽ.

²⁰ Moa a hwile andzgu lo, ohwĩ lo o wo edzi la osku lo. Nga amanzhli a zgi ohwĩ lo nga a dzẽ okyku emil endgaeha. Ogyuŋ ba amanzhli lo o wo adga atno.