Otsotsa 11 - Ohwihwim Olehe

Moaegŋe aha

¹ Nga moa a shri opi-ombganzho a shri a da me. Alo o wo eka ba ogbu ahwre. Ambla he nga moa a nyuŋ me a lu mi le, O kso nga a mbga Anyuŋ-akulu ba Ahogbrẽ ta la ambgu lo, nga o tsi moare la a la a hlu Ahogbrẽ eshko Anyuŋ-akulu lo a ka.

² Ambo aŋo o tsi moare la a wo ogʼba ba egi edzi ba Anyuŋ-akulu lo ko mbo. O mbga egi he lo ko mbo, okyku eshi egi he lo e wo okyku moaevbu angyiŋ. Moa á dzi Osku ba Esesla he lo okyku ehwa ekʼpoenyi la ehwa eha.

³ Ame é hom moaegŋe me aha otum. Moa á ygi akazhga aknye. Nga moa á su odlo ba Ahogbrẽ okyku elum endga otsko ta la elum ekʼpoef ĩ.

⁴ Moaegŋe aha he lo angyiŋ a wo asĩ aki aha ba olivi, ta la émgbuovo eha la e tspi egi ayi ba Adigi-odne obiŋ hi.

⁵ O wo ba arekyeŋ a zga esõ ba o ta mo etsa le, ovo ó zgi anyu mo ó ba o jygi moafpu mo. Nga ekakahelo angyiŋ, areyaŋ a mbo la a zga esõ ba o ta mo etsa le, moa á bga ŋa.

⁶ Moa a wo la ekʼpo ma ba o shki ahrẽ okyku o da ogbu o ba omba ba moa a la a su odlo ba Ahogbrẽ he lo mbo. Moa a wo la ekʼpo eshri ba anzhe ami a mbo. Moa a kpo a gbu ba moa a zhiŋ lo a da lo a dzu amanzhli. Nga moa a wo la ekʼpo ba o da edgu oloyaŋ a mbo o hwiŋ obiŋ hi ombayaŋ a mbo ba moa a klo.

⁷ Ambla ba moa a su odlo lo a khwo bgu le, ebyi la e zgi enzhe la e gyuŋ mgbyimgbyimgbyiŋ, e kpo ambgu pa la mo. Aŋa á kpo á gre mo nga á bga mo.

⁸ Ekom mo nga é lom anyuŋ ozhẽ ba anyuŋ osku he lo. Ahe lo angyiŋ moa a gŋe Adimo-odne egŋe aki omba la o sheŋ o gre mi. Osku lo o wo eka ba osku ba Osodom o mbo le obiŋ ba Amasla.

⁹ Moarehwĩ ba obiŋyaŋ a mbo ta la ba embreyaŋ a mbo, ta la ba olomyaŋ a mbo, moa á tspi á ka ekom moa la a su odlo ba Ahogbrẽ ayi okyku elum etra la ogbu, nga moa á bmi á da mo á ngybi mo mbo ku-ku.

¹⁰ Ambo moarehwĩ ba obiŋ hi, moa á gno oraŋ ta la eku ba moarehwĩ aha he lo. Moa á kpo ovye nga moa á shri ototno á shri á kom emo, okyku eshi moarehwĩ aha ba Ahogbrẽ a hom mo otum he lo, moa a byiŋ ewu nzenze a shri a ta moarehwĩ ba obiŋ hi.

¹¹ Ambla ba elum etra la ogbu nga, Ahogbrẽ a da ayaŋ ba esõ a ba a gre esõ mo, nga moa a kso. Nga moare pyeŋ la a ka ekplo la e kpo moa a kpo eyli a gre eshri.

¹² Ambla he nga moarehwĩ aha ba Ahogbrẽ a hom mo otum he lo, moa a gno ba anyuŋ enzi e zgi Ongyeŋ e lu odlo pa la mo. Alo e lu mi le, Agimi e vre e ba ahe! Omba ba moafpu mo a la a kpyi ayi a la a ka dzo nga, moa aha lo moa a vre a gre Ongyeŋ la etabro.

¹³ Omba he lo nga, obiŋ o zhga ara nzenze. Nga moa a jygi ogʼba okyeŋ eshki ba egʼba okʼpo ba osku he lo. Omba ba obiŋ o zhga ara, moarehwĩ ezbi efoha a kpu. Eyli e kpo moare la a ra, okyku eka he nga moa a hlu Ahogbrẽ la a wo Ongyeŋ eshko okyku ekʼpo baŋ.

¹⁴ Ongroshri ba oha o khwo, ambo e ka! Ongroshri ba otra ó ta adzadzi ó ba!

Egbaru ba ofoha

¹⁵ Ambla he nga anwyeadga ba ofoha a hlu egbaru baŋ, nga enzi egagre e lu Ongyeŋ e lu mi le, Adigi-odne ta la Emisiya baŋ angyiŋ a wo la ekʼpo ba o ri ekʼpo ta la obiŋ hi ohuhuhi. Aŋa á ri ekʼpo lo gbagbu gbagbu-amo!

¹⁶ Ambla he nga moandakʼpo ekʼpoha la anyi la a dzu emgbakyiŋ oreŋ egi ayi ba Ahogbrẽ, moa a tsi a ygi obiŋ la eyayi mo, nga moa a hlu Ahogbrẽ eshko a lu mi le,

¹⁷ Adigi-odne Ahogbrẽ la a wo ekʼpo pyeŋ, aŋo angyiŋ o wo ma ohuhuhi, nga aŋo o sa o wo ma ayga! Agi e vye la ŋo ba aŋo o tsa ekʼpo egagre boŋ, Nga aŋo o sheŋ o zga esĩ ba o ri ekʼpo a mo!

¹⁸ Esõ e tpi moaevbu ayi nzenze, Okyku eshi alo o wo omba boŋ ó tsa mo olom boŋ angyiŋ. Nga ba moa á ba a sõ moa la a kpu ombgu angyiŋ. Nga alo o wo omba ba o shri egbre o shri o da moawaghrẽ boŋ la a wo moarehwĩ ba Ahogbrẽ a hom mo otum angyiŋ, Pa la moarehwĩ boŋ pyeŋ, moa la a wo agagre pa la moa la a wo afifi, Pa la moa la a kpo eyli boŋ pyeŋ. Omba he angyiŋ o wo odzi ba moa a bga moa la a jygi obiŋ hi!

¹⁹ Moa a hwile Anyuŋ-akulu ba Ahogbrẽ. Akulu he lo a wo Ongyeŋ. Nga moa a ka akpati ba ohwihwim la o wo ma Anyuŋ-akulu baŋ lo. Ambla he nga ayimom a la a fa ngzangzangza, nga akyuŋ nzenze a ta, nga angyum-ogbu a ta, nga obiŋ o zhga ara, nga ehre-ogbu e ygi obiŋ nzenze.