Otsotsa 10 - Ohwihwim Olehe

Anwyeadga ta la ashye akpa atsitsi

¹ Ambla he nga ame e sa e ka anwyeadga agagre, aŋa a gile a zgi Ongyeŋ a ba obiŋ hi. Moa a shki ŋa la etabro, nga owrogbu o ta eshri baŋ o kpaŋ. Eyayi baŋ nga e wo eka ba olulum. Nga adga baŋ a wo eka ba embyliovo.

² Aŋa a kom ashye akpa afifi abgo baŋ. Moa a hwile lo a ta ayimom. A shri odga ba ori baŋ a shri a zga anyuŋ-ondzu, nga a shri odga ba ehre baŋ a shri a zga obiŋ.

³ Ambla he nga a bzi la anyuŋ enzi, enzi lo e zhle eka ba enzi ba émbdze e la e gbre. Ambla baŋ a bzi la enzi egagre a khwo nga angyum-ogbu afoha a tno ma la anyuŋ akyuŋ.

⁴ Ambla ba moa a lu odlo nga, Ame é ba e ta lo engla. Ambo ame e gno enzi e zgi Ongyeŋ e lu odlo e lu mi le, Aŋo o ghre ekplo ba angyum-ogbu afoha he lo a lu. O ta lo akpa mbo ku-ku!

⁵ Ambla he nga anwyeadga ba ame e ka ŋa baŋ a tspi anyuŋ-ondzu ta la obiŋ, a tsa obgori baŋ ongyeŋ,

⁶ nga a kʼpi ashum la eshko ba Ahogbrẽ la á dzu ma gbagbu gbagbu-amo, nga aŋa angyiŋ a kpo Ongyeŋ ta la ekployaŋ a mbo la e wo Ongyeŋ ta la obiŋ hi, ta la ekployaŋ a mbo la e wo obiŋ hi, ta la anyuŋ-ondzu ta la ekployaŋ a mbo la e wo anyuŋ-ondzu lo. Anwyeadga lo nga a lu mi le, Ongingli ó wo ma ku-ku nga mbo!

⁷ Ambo ambla ba anwyeadga ba ofoha a hlu egbaru baŋ, omba he lo angyiŋ, Ahogbrẽ á ba a kpo otum ta la ayakplo baŋ a shri a zga esõ baŋ, eka baŋ a lu a da moa-waghrẽ baŋ, la a wo moarehwĩ baŋ a hom mo otum.

⁸ Ambla he nga enzi la e zgi Ongyeŋ e lu odlo pa la me, e sa e lu pa la me nganga e lu mi le, Aŋo o yi o sko ashye akpa afifi ba moa a hwile lo a ta ayimom, a wo abgo ba anwyeadga la a tspi anyuŋ-ondzu ta la obiŋ.

⁹ Ame e gre okro ba anwyeadga lo nga e daŋ a shri ashye akpa afifi lo a shri a da me. A nyuŋ me a lu mi le, O sko lo nga o taŋ. Alo á zhiŋ á bza akpyki boŋ. Ambo alo á raŋ eka be eso anyu boŋ.

¹⁰ Ambla he nga ame e yga ashye akpa lo abgo baŋ nga ame e taŋ lo Alo a raŋ eka ba eso anyu me, ambo ambla ba ame e mbgi lo e khwo, alo a zhiŋ a bza akpyki me.

¹¹ Nga moa a lu a da me a lu mi le, O raŋ o gre boŋ o bla o nyum oshpa ba odlo ba Ahogbrẽ o tsa moarehwĩ nzenze ta la embre nzenze, ta la elom nzenze, pa la moareŋ.