Oluka 9 - Ohwihwim Olehe

Eyesu a hom moanwyeotum baŋ otsko otum

¹ Eyesu a bzi moanwyeotum baŋ otsko nga a shri ekʼpo ba o se egbgabi, ta la ekʼpo ba o shaŋ elolo a shri a da mo.

² Ambla he nga, a da mo a zgi okyku o nyum oshpa ba Oreŋ Ahogbrẽ, nga o shaŋ moare la a no olo.

³ A nyuŋ mo a lu mi le, Agimi e sko emakyeŋ ta la egimi okyku odzi he lo mbo. E sko opi ba o dzi oklo, ta la abro ta la algo, ta la amgbaŋ, nga e shri ariga aha mbo.

⁴ Okroyaŋ a mbo ba moa a yga gimi la ovyevye, agimi e dzu odne okyekyeŋ o tsa onda bimi é kso é sku osku lo.

⁵ Okroyaŋ a mbo ba moa a yga gimi la ovyevye mbo, agimi e zhiŋ ogbu e dzu mo e zga, nga e ndza abgo bimi e sku mo okyku o suŋ mo egʼba.

⁶ Moanwyeotum a kpo nga moa a gre esku andandandim, nga moa a la a nyum Oshpaodzadzi, nga moa a shaŋ moare la a no olo okroyaŋ a mbo.

Alo o so Ehirudu ayi

⁷ Ehirudu angyiŋ a wo are la a ri ekʼpo obiŋ ba Egalili. A gno edgu ayakplo la a kpo pyeŋ. A so ŋa ayi a gre eshri, okyku eshi moare a lu mi ma Eyohana la a kpo abaptisma angyiŋ a bla a kso ongybi.

⁸ Moakyeŋ a lu mi le, Eliya angyiŋ a bla a kso! Moakyeŋ a lu mi le, akyeŋ eshki moarehwi ba Ahogbrẽ a hom mo otum ogbyigbyi angyiŋ a bla a kso.

⁹ Ehirudu a lu mi le, Ame e da mo a kplu eshri ba Eyohana. Ayi angyiŋ moa a sa a lu edgu odlo he eshri baŋ? Okyku eka he a zga ngre a klo ezhẽ okyku o ka Eyesu.

Eyesu a vgi moarehwi ezbietno akla

¹⁰ Omba ba moa la a nyum oshpa lo moa a ba nga, moa a lu ekployaŋ a mbo ba moa a kpo a da Eyesu. A da mo ka la ŋa a gre oskukyeŋ ba moa a bzi lo ma Ebetseda.

¹¹ Omba ba moare nzenze a gno eka he nga moa a lu ŋa ma a gre osku he lo. A yga mo la ovyevye, nga a nyum oshpa eshri Oreŋ ba Ahogbrẽ a da mo, nga a shaŋ moare la a no olo.

¹² Omba ba olum o kpo o gbu-gbu a mo, moanwyeotum baŋ a ba okro baŋ nga a lu mi le, O kyu moare abgo a mo, okyku o da mo a yi anwye esku, ta la agbi la a wo ahe, okyku o da mo a klo algo a ri, nga a sa a klo okro o tum ma, okyku eshi okro he o wo akla angyiŋ.

¹³ Ambo Eyesu a tno mo ma a lu mi le, Agimi e klo algo e da mo a ri. Moa a tno Eyesu ma a lu mi le, Agi e wo la emakyeŋ ma e gre agbrotsa atno ta la atsa aha mbo. Aŋo o klo bi e yi e gbmo algo okyku eshki lo?

¹⁴ Moarealom la a wo ahe a wo eka ezbietno. Ambla he nga a nyuŋ moanwyeotum baŋ a lu mi le, E da moare a dzu obiŋ. E gʼba mo egʼba. E da ogʼbayaŋ a mbo o wo la moare ekʼpoetno.

¹⁵ Moanwyeotum a gʼba moare a khwo nga, moa a da mo a dzu obiŋ.

¹⁶ Ambla he nga Eyesu a sko agbrotsa atno ta la atsa aha. A vye Ahogbrẽ okyku lo a khwo nga, a kplu lo a shri a da moanwyeotum okyku o da mo a shri a gʼba moare.

¹⁷ Areyaŋ a mbo a ri algo a wyo gble. Moanwyeotum a pla ekplo la e ra, nga e bli aksu otsko.

Ebitru a ka Eyesu a bmye

¹⁸ Ombakyeŋ nga omba ba Eyesu a wo ambambga a la a fa olu, moanwyeotum baŋ a ba okro baŋ. Eyesu a zhĩ mo a lu mi le, Moa a la a bzi me ma ayi angyiŋ?

¹⁹ Moa a tno ŋa ma a lu mi le, Moakyeŋ a la a lu ma aŋo o wo Eyohana la a kpo abaptisma angyiŋ. Moakyeŋ a la a lu ma aŋo angyiŋ o wo Eliya, nga moakyeŋ a la a lu ma aŋo o wo akyeŋ eshki moarehwi ba Ahogbrẽ a hom mo otum a da mo a ba ogbyigbyi, o sa o kso ongybi.

²⁰ A zhĩ mo a lu mi le, Agimi e la e bzi me ma ayi angyiŋ? Ebitru a tno ma a lu mi le, Aŋo angyiŋ o wo Emisiya ba Ahogbrẽ!

Eyesu a lu odlo eshri ewu ta la eku baŋ

²¹ Ambla he nga Eyesu a shĩ mo ma moa a lu lo a da arekyeŋ mbo ku-ku.

²² Nga a sa a lu mi le, O dzu omgbybi ba Anwye Arehwĩ á ba a kpo ewu nzenze abgo moandakʼpo, pa la moandakʼpo olu ba Ahogbrẽ, pa la moa la a nye odaŋ. Moahi lo á tla ŋa nga moa á da mo a bga ŋa. Olum ba Otra nga Ahogbrẽ á ba a kso ŋa ongybi.

²³ Ambla he nga a lu pa la moare pyeŋ a lu mi le, O wo ba arekyeŋ a klo o lu me ma le, o dzu omgbybi baŋ a tla eshri baŋ, ombamba pyeŋ nga a bmi a kpo ewu ma-me la eku a mbo okyku me, nga a lu me ma.

²⁴ Okyku eka he are la a klo o shla eso baŋ sha le, eso baŋ é jygi. Ambo are la a shri eso baŋ a ndba okyku me le, á hwiŋ oshla.

²⁵ O wo ba arehwĩ a hwiŋ oraŋ obiŋ hi pyeŋ, ambo o wo ba eso baŋ é ba e yla le, o wo akplokyeŋ angyiŋ? O wo akplokyeŋ tsitsi a mbo mbo!

²⁶ O wo ba are a tla odlo me, ta la onyenye me le, omba ba Anwye Arehwĩ á ba a ba la ayimom ba esesla baŋ, ta la ba adaŋ, ta la moanwyeadga ba Ahogbrẽ le, omba he lo a mbo, Anwye Arehwĩ á tla are he lo.

²⁷ Agimi e gno! Moakyeŋ eshki hi, moa á kpu mbo, o wo le moa á ka Oreŋ Ahogbrẽ la ó ba o ba la ekʼpo ayga dne!

Ozhiozhiŋ

²⁸ Ambla ba asati akyeŋ a bli ba Eyesu a lu edgu odlo he nga, a da Ebitru, ta la Eyohana, ta la Eyakubu, a da mo a gre akũ-akyeŋ ka la ŋa okyku o fa olu.

²⁹ Omba baŋ a fa olu nga, eyayi baŋ e zhiŋ, nga aknye baŋ a shka ayi leleleŋ, a wo pse.

³⁰ Omba he lo nga moare aha a tspi egi ayi baŋ a la a kpla egba ka la ŋa. Moa a ri Omusa, ta la Eliya.

³¹ Moa a ba la ayimom esesla ba Ahogbrẽ la a wo Ongyeŋ. Moa a lu odlo ta la Eyesu eka baŋ á ba a yi á kpu Orushalima, okyku o bli ekplo ba Ahogbrẽ a sheŋ a hwim a zga.

³² Omba he lo Ebitru, pa la moahwõ moa a wo emo enu a la a ndze. Omba moa a vro enu a khwo nga moa a ka Eyesu la ayimom ba esesla baŋ, pa la moarehwi aha, moa a tspi egi ayi baŋ.

³³ Omba moare he a la a zhiŋ ogbu a dzu Eyesu a zga nga, Ebitru a nyuŋ ŋa a lu mi le, Andakʼpo, o wo odzi o gre eshri ba agi e wo ahe. Agi é kpo abro atra, akyeŋ okyku ŋo, akyeŋ okyku Omusa, nga akyeŋ okyku Eliya. Omba he lo Ebitru a yi eka ekplo baŋ a la a lu mbo.

³⁴ Omba ba Ebitru a lu eka he, etabro e gile e ba e shki mo pyeŋ. Moanwyeotum a kpo eyli.

³⁵ Enzi e zgi ongyeŋ e ba e lu mi le, Ahi lo angyiŋ a wo Anwye me ba ame e sla. Agimi e ngli atuŋ e gno odlo baŋ!

³⁶ Omba ba enzi e tspi nga, moa a ka arekyeŋ ta la Eyesu nga mbo. Moanwyeotum a dzu emo tki, moa a lu akplokyeŋ la a kpo omba he lo a da arekyeŋ mbo ku-ku.

Eyesu a shaŋ anwye ba ogbgabi o kpo otum ka la ŋa

³⁷ Onda ba oha nga, moa a gile a sku aku he lo. Moare nzenze nga a yi a tsa Eyesu ozhẽ.

³⁸ Arekyeŋ eshki moare a ta enzi angyangyeŋ a lu mi le, Andakʼpo, ame e vẽ ŋo okyku anwye me, aŋa sha angyiŋ a wo anwye me!

³⁹ Ogbgabi o kpo ŋa ewu. O la o daŋ a lu odlo angyangyeŋ, nga o daŋ a shye jgijgijgi, nga a kpo afumvu anyu. O la o kpo ŋa ewu nzenze, nga o kpo ŋa ekŋe o gre eshri!

⁴⁰ Ame e vẽ moanwyeotum boŋ okyku o da mo a se lo, ambo moa a kpo a gbu mbo.

⁴¹ Eyesu a tno mo ma a lu mi le, Agimi e wo la odlobi, nga e wo la obmi ba adlidzi ma mbo! Agimi e klo ba ame e dga ka la gimi ekayaŋ? Agimi e klo ba ame e kpo bleble ka la gimi ekayaŋ? Ambla he nga, a nyuŋ alom lo a lu mi le, O shri anwye boŋ o shri o ba ahe.

⁴² Omba ba anwye lo a ba nga, ogbgabi lo o heŋ ŋa o sheŋ obiŋ, nga o da egʼba baŋ e zhga ara. Ambla he nga, Eyesu a shrom ogbgabi, nga a shaŋ ŋa a khwo nga, a shri ŋa a da adaŋ.

⁴³ Moarehwi pyeŋ moa a ka egbregbre ta la anyuŋ ekʼpo ba Ahogbrẽ. Omba he lo a mbo, moare a ka ayakplo egbregbre ba Eyesu a la a kpo, Eyesu a lu a da moanwyeotum baŋ a lu mi le,

Eyesu a sa a lu odlo eshri eku baŋ

⁴⁴ Agimi e da odlo ba ame é ba e lu hi o blu gimi mbo! Moa á shri Anwye Arehwĩ á da moarehwi a kpo ekʼpo ka la ŋa.

⁴⁵ Ambo moanwyeotum a gno odlo baŋ a lu lo a bmye mbo. O wo mo ewu nzenze ba moa a ka lo a bmye. Moa pyeŋ nga, moa a kpo eyli okyku o zhĩ ŋa odlo eshri odlo he lo.

Ayi a wo ekʼpo a gre pyeŋ?

⁴⁶ Moanwyeotum a kla ekʼpo agʼbaha emo. Moa a kla eshri are la a wo ekʼpo a gre pyeŋ eshki mo.

⁴⁷ Eyesu a sheŋ a yi ekplo ba moa a la a kla, okyku eka he a da anwye afifi a tspi egbaŋ baŋ.

⁴⁸ Ambla he nga a nyuŋ mo a lu mi le, Areyaŋ a mbo la a yga akyeŋ eshki moanwye afifi he lo le, a yga me angyiŋ. Are la a yga me le, a yga are la a hom me otum. Nga areyaŋ a mbo ba moa a sko ŋa a zga akplokyeŋ eshki bimi mbo, moa á sko ŋa á zga anyuanyuŋ a gre pyeŋ.

Areyaŋ a mbo la a tla gimi mbo a wo arehwĩ bimi angyiŋ

⁴⁹ Eyohana a lu mi le, Andakʼpo, agi e ka arekyeŋ la a se egbgabi eshko boŋ. Agi e nyom ŋa okyku eshi a wo a bi angyiŋ mbo.

⁵⁰ Eyesu a tno ma a lu mi le, Agimi e nyom ŋa mbo, okyku eshi areyaŋ a mbo la a tla gimi mbo le, a wo a bimi angyiŋ.

Moarehwi ba anwye osku ba Asamariya a tla o yga Eyesu

⁵¹ Omba ba moa á ba a sko Eyesu a yi ongyeŋ o wo osusku a mo, Eyesu a zga aga eso baŋ, baŋ á ba a yi osku ba Orushalima.

⁵² A hom moarekyeŋ otum okyku o da mo a yi anwye osku ba Asamariya okyku o vu ekployaŋ a mbo abgo o tsa baŋ a ba.

⁵³ Moare ba anwye osku he lo a tla o yga ŋa okyku eshi moa a yi baŋ a wo ozhẽ ba o yi Orushalima angyiŋ.

⁵⁴ Omba ba moanwyeotum aha lo, Eyakubu, ta la Eyohana a ka eka he nga, moa a nyuŋ Eyesu a lu mi le, Adigi-odne, aŋo o klo bi e da embyliovo e zgi ongyeŋ e ba e ri moarehwi he lo?

⁵⁵ Eyesu a zhiŋ nga a shrom mo.

⁵⁶ Ambla he nga moa a zhiŋ ogbu a gre osku ohwõ.

Moa la a klo o lu Eyesu ma

⁵⁷ Omba ba moa a wo ozhẽ a la a yi oskukyeŋ nga, alomakyeŋ a nyuŋ Eyesu a lu mi le, Ame é lu ŋo ma é yi okroyaŋ a mbo boŋ ó ba o yi.

⁵⁸ Ambo Eyesu a tno ŋa ma a lu mi le, O ka, emgbeshka e wo la anzhe ma, nga awunu a wo la eygu ma, ambo, Anwye Arehwĩ a wo okro ba o dzu ma mbo.

⁵⁹ Eyesu a nyuŋ alomakyeŋ a lu mi le, O lu me ma. Ambo alom lo a lu mi le, Andakʼpo, o wo boŋ o bmi, o da me e yi e ngybi okom ba adugu ayga.

⁶⁰ Eyesu a tno ŋa ma a lu mi le, O da moa la a kpu a ngybi ekom mo. Okyku eka he aŋo o yi o nyum oshpa ba Oreŋ Ahogbrẽ o ygi moare.

⁶¹ Alomakyeŋ a sa a ba nga a lu mi le, Andakʼpo ame é lu ŋo ma, ambo o da me e yi e shri oyiamo e da moa-odne me ayga.

⁶² Eyesu a nyuŋ alom lo a lu mi le, O ka, o wo ba areyaŋ a mbo la a zga esi o laŋ agbi a zhiŋ ayi a ka ambla le, a wo la owlamakyeŋ okyku Oreŋ ba Ahogbrẽ mbo.