Oluka 6 - Ohwihwim Olehe

Ozhiozhĩ eshri onda Asabat

¹ Onda Asabat Eyesu pa la moanwyeotum baŋ moa a dzi agbi ba esekʼpa nga moa a sheŋ ashri esekʼpa a khwa lo nga a la a taŋ.

² MoaEfarisikyeŋ a zhĩ a lu mi le, Okyku eshi agimi e kpo ekplo ba odaŋ bi o bmi moa a kpo onda Asabat mbo?

³ Eyesu a tno mo ma a lu mi le, Agimi e tsi ekplo ba Adawuda, pa la moarehwi baŋ a kpo omba ba embyle e kpo mo mbo?

⁴ Aŋa a gre anwyeakulu nga a sko agbrotsa a taŋ pa la moare la a wo ka la ŋa. Agbrotsa he lo a wo okyku Ahogbrẽ sha angyiŋ. Odaŋ bi o bmi ta la ekplo he lo mbo. Odaŋ o bmi ba moandakʼpo olu ba Ahogbrẽ sha a kpo a gbu moa a taŋ lo.

⁵ Eyesu a sa a lu mi le, Anwye Arehwĩ nga a wo Adigi-odne la a wo la ekʼpo ma eshri Asabat.

Andeobgo alomakyeŋ

⁶ Onda Asabat ahwõ nga, Eyesu a gre a yi a nye moare anwyeakulu. Ahe lo, andeobgo alomakyeŋ a wo ma ba obgori baŋ o mom.

⁷ Moarekyeŋ la a nye odaŋ, pa la moaEfarisi a klo ozhẽ okyku o da mo a kpyi Eyesu. Okyku eka he, moa a dzu a kʼpu okyku o ka o wo baŋ a shaŋ arekyeŋ onda Asabat.

⁸ Eyesu a sheŋ a yi aga mo, okyku eka he a da andeobgo alom lo a ba a tspi egi ayi moare.

⁹ A zhĩ mo a lu mi le, Odaŋ bi o bmi ba moa a kpo eshi onda Asabat? O bmi ba moa a kpo a ghwo le, ba moa a kpo efi? O bmi ba moa a shla eso arehwĩ le, ba moa a bga lo?

¹⁰ Eyesu a ka mo tki a khwo nga, a nyuŋ alom lo a lu mi le, O ndba obgo boŋ. A ndba lo nga o shaŋ.

¹¹ Ambla he nga, eso e tpi mo ayi nzenze, nga moa a klo ezhẽ eka ekplo ba moa á ba a kpo ta la Eyesu.

Eyesu a sla moanwyeotum otsko

¹² Omba he lo, Eyesu a gre akũ-akyeŋ okyku o fa olu. A dzu ahe lo a fa olu omba okyukyku lo pyeŋ.

¹³ Ayi a kre nga a da moa la a lu ŋa ma pyeŋ a ba okro baŋ. Eshki mo a a sla moare otsko. A bzi moahi lo Moa la a nyum oshpa.

¹⁴ Ashko mo a ri Esima, la a ri Ebitru, ta la anáŋ Andru, Eyakubu, Eyohana, Efilibu, Abatalamawu,

¹⁵ Amatiyu, Otoma, Eyakubu anwye Alafus, Esima anwye obiŋ,

¹⁶ Eyahuda anwye Eyakubu, ta la Eyahuda Eskariyoti la a yla Eyesu.

Eyesu a nye moare nga a shaŋ mo

¹⁷ Omba ba Eyesu a gile a zgi okũ aku a ba nga, a gbu asaŋ-akyeŋ nga a zhiŋ a tspi ma pa la moanwyeotum baŋ nzenze. Moare nzenze la a zgi obiŋ ba Eyahuda ta la osku ba Orushalima, ta la Ataya, ta la Esidoŋ, a ba. Esku eha he lo e wo akaŋ anyuŋ-ondzu.

¹⁸ Moare he lo a ba okyku o ngli o gno onyenye ba Eyesu nga okyku o daŋ a shaŋ mo. Moare ba egbgabi e kpo mo ewu, moa a ba nga, moa a shaŋ mo.

¹⁹ Moare nzenze moa a klo o tka ŋa. Ekʼpo e la e zgi e sku ŋa, nga moare a la a shaŋ okyku lo.

Oraŋ ta la ewu

²⁰ Eyesu a ka moanwyeotum baŋ tki nga a lu mi le, Oraŋ o wo ma okyku gimi la e yi bimi e sheŋ anye, okyku eshi Oreŋ Ahogbrẽ o wo okyku gimi!

²¹ Oraŋ o wo ma okyku gimi la e kpo ewu ohuhuhi, okyku eshi Ahogbrẽ á shri egbre bimi á da gimi! Oraŋ o wo ma okyku gimi la e wu okũ ohuhuhi, okyku eshi agimi é yi é ŋo eŋo!

²² Oraŋ o wo ma okyku gimi ba moare a tla gimi, nga a la a tsa gimi atsa, nga a sko gimi a zga abi okyku eshko Anwye Arehwĩ!

²³ Agimi e vye ovye angyiŋ omba ba edgu ayakplo he lo a kpo, okyku eshi anyuŋ egbre angyiŋ e wo ma Ongyeŋ okyku gimi. Moadimo a kpo ekakahelo angyiŋ pa la moarehwi ba Ahogbrẽ a hom mo otum.

²⁴ Ekplo ayiekŋe angyiŋ ka la gimi arehwĩ la e wo la angyiŋ ma ohuhuhi, agimi e sheŋ e hwiŋ oraŋ bimi obiŋ hi bgu!

²⁵ Ekplo ayiekŋe ka la gimi la e gno oraŋ ohuhuhi, okyku eshi agimi é hwiŋ egbrekyeŋ mbo! Ekplo ayiekŋe ka la gimi la e ŋo eŋo ohuhuhi, okyku eshi agimi é yi é wu okũ!

²⁶ Ekplo ayiekŋe, omba ba moare a la a tsom gimi, okyku eshi moadimo a mbo a kpo ekakahelo angyiŋ pa la moarehwi la a sheŋ akpro ma Ahogbrẽ angyiŋ a hom mo otum.

E klo moafpu

²⁷ Ambo ame e lu e da gimi la e gno odlo me. O klo moafpu ŋo, nga o kpo odzi pa la moa la a klo ŋo mbo.

²⁸ O fa anyuadzi o ygi moa la a la a ta anyuabi a ygi ŋo. O fa olu okyku moa la a kpo ofpu ka la ŋo.

²⁹ O wo ba arekyeŋ a yla ŋo obgo agba le, o daŋ a yla ŋo agba ba oha a mbo. Nga o wo ba arekyeŋ a ngʼga anyuŋ ariga boŋ o daŋ a yga ariga atsitsi boŋ a mbo a ta ma.

³⁰ O kpo o ghwo areyaŋ a mbo la a vẽ ŋo emakyeŋ. Nga o wo ba arekyeŋ a sko ema boŋ le, o bla alo o yga mbo.

³¹ O kpo moahwõ edgu ayakplo boŋ o klo moa a kpo ŋo.

³² O wo boŋ o klo moare la a klo ŋo sha le, okyku eshi aŋo o klo moa a shri owlama a shri a doŋ? Moa la a kpo odlobi a mbo a klo moa la a klo mo sha!

³³ Nga o wo boŋ o la o kpo odlodzi pa la moare la a la a kpo odlodzi ka la ŋo sha le, okyku eshi aŋo o klo moa a shri owlama a shri a doŋ? Moa la a kpo odlobi a mbo, a la a kpo ekakahelo!

³⁴ Nga o wo boŋ o kʼpo moare anzho la aga ba moa á ba a bla á hre ŋo le, okyku eshi aŋo o klo moa a shri owlama a shri a doŋ? Moa ba odlobi a mbo a la a kʼpo moare la a wo eka mo, la aga ba moa á ba a bla ekplo moa a shri a da mo á ba a shri á da mo!

³⁵ O klo moafpu ŋo, nga o kpo mo odlodzi. O kʼpo mo anzho, la aga moa á ba a bla alo á doŋ mbo. O wo boŋ o kpo eka he le, aŋo ó hwiŋ anyuŋ egbre. Nga ó dzu anwye Ahogbrẽ la a wo Esesla a gre pyeŋ, okyku eshi Ahogbrẽ a la a ka moa la a vye la ŋa mbo, pa la moa ba odlobi pyeŋ angyiŋ ayiekŋe.

³⁶ O ka ayiekŋe, eka ba Adoŋ a mbo a ka ayiekŋe.

Osõmbgu

³⁷ O sõ arekyeŋ ombgu mbo okyku o da Ahogbrẽ a sõ ŋo ombgu mbo. O shraŋ moahwõ mbo okyku o da Ahogbrẽ a mbo a shraŋ ŋo mbo. O kyu moahwõ abgo akpu ba moa a la a ta egi ayi boŋ, Ahogbrẽ nga á kyu ŋo abgo odlobi boŋ o kpo egi ayi baŋ.

³⁸ O kpo o ghwo la moahwõ, Ahogbrẽ nga á kpo á ghwo la ŋo. Ahogbrẽ á kpo á ghwo la ŋo nzenze. Okpoghwo ba esõ-ekyekyeŋ angyiŋ aŋo ó ba o hwiŋ. Eka boŋ o kpo pa la moahwõ, ekakehelo angyiŋ moa á ba a kpo ka la ŋo.

³⁹ Eyesu a sa a ta egŋe a lu mi le, Avgayi a kpo a gbu baŋ a shri avgayi opi mbo. O wo ba avgayi a shri avgayi opi le, moaha lo pyeŋ moa á tsi á gbu enzhe.

⁴⁰ Anwye-engla a wo anyuanyuŋ a gre are la a nye ŋa mbo. Ambla baŋ a nye a khwo bgu le, á dzu eka are la a nye ŋa.

⁴¹ Okyku eshi aŋo o dzu o ka aso la a wo eyi anóŋ, ambo aŋo o dzu ogbuokõ la o wo eyi boŋ o zga?

⁴² Aŋo ó kpo ekayaŋ ó ba o lut a la anóŋ o lu mi le, O da me e se ŋo aso eyi, ambo aŋo o dzu ogbuokõ la o wo eyi boŋ o zga? Aŋo are la o kpo abibli. O se ogbuokõ la o wo eyi boŋ ayga okyku o doŋ o kpo o gbu o ka nga o se aso la o wo eyi anóŋ.

Esi aki ta la agbro

⁴³ Esĩ aki la e wo edzi e fu agbro abi mbo. Esi aki la e wo ebi e fu agbro adzi mbo.

⁴⁴ Moa á yi edgu esi akiyaŋ a mbo okyku edgu agbro baŋ e la e fu. Ezga e fu agbro anga mbo. Eklu nga e fu agbro etspi mbo.

⁴⁵ Areodlodzi a lu odlodzi la o wo eso baŋ angyiŋ a ba edzi, nga areodlobi a lu odlobi la o wo eso baŋ angyiŋ a ba edzi. Ekplo la e zgi anyu are angyiŋ, e wo ekplo la e bli eso baŋ.

Moaha la a mbdzi odne

⁴⁶ Okyku eshi agimi e la e bzi me ma Adigi-odne, Adigi-odne, ambo agimi e kpo ekplo ba ame e klo bimi e kpo mbo?

⁴⁷ Areyaŋ a mbo la a ba okro me, nga a ngli atuŋ a gno odlo he nga a kpaŋ lo le, aŋa a wo eka ba are la

⁴⁸ a mbdzi odne baŋ onmwre. A kʼpo adga lo a da alo a gyuŋ adzadzi, nga a ta ahwim odne lo onmwre. Omba ba ondzu o bli o fu akaŋ nga, o ndza ahwim aku lo o gbu mbo, okyku eshi moa a mbdzi lo onmwre.

⁴⁹ Are la a gno odlo me ambo baŋ a kpaŋ lo mbo a wo eka ba are la a mbdzi odne baŋ endase ototno, nga a nyuŋ ahwim ba odne a ta ayga mbo. Omba ba ondzu o bli o vu adga, odne lo o ta abyi ayga o kypi mbo. Okyukypi ba odne la o kypi o wo ekplo eyli o gre eshri!