Oluka 23 - Ohwihwim Olehe

Ebilatu a sõ Eyesu ombgu

¹ Moa la a sõ ombgu pyeŋ a kso a shri Eyesu a gre okro ba Ebilatu.

² Ahe lo, moa a kpyi ŋa a lu mi le, Agi e vu alom hi omba baŋ a la a so moarehwi bi ayi a la a lu ma moa a bmi a hre ewaŋ a da Ekeza mbo, ma aŋa angyiŋ a wo Ekristi, anyuŋ-areŋ.

³ Ebilatu a zhĩ Eyesu a lu mi le, Aŋo angyiŋ o wo Anyuŋ-areŋ moaEyahuda? Eyesu a tno ma a lu mi le, Aŋo angyiŋ o lu eka he.

⁴ Ambla he nga, Ebilatu a nyuŋ moandakʼpo olu ba Ahogbrẽ ta la eshki pyeŋ a lu mi le, Ame e hwiŋ ekplokyeŋ la e tse ma ba moa a sõ alom he lo ombgu ba eku mbo.

⁵ Ambo moa a lu odlo la osheshye a ta ma-ma a lu mi le, Alom he lo a so okro ayi la edgu onyenye baŋ a shri a ba! A zga esĩ obiŋ ba Egalili ma-me a ba a bre obiŋ ba Eyahuda ohuhuhi nga a wo ahe.

Eyesu egi ayi ba Ehirudu

⁶ Omba ba Ebilatu a gno eka he a khwo nga a zhĩ mo a lu mi le, Alom he lo a wo a ba obiŋ ba Egalili angyiŋ?

⁷ Omba baŋ a gno ba Eyesu a zgi ogʼba obiŋ ba Ehirudu a ri oreŋ ma angyiŋ a ba, a da mo a shri Eyesu a gre okro ba Ehirudu. Omba he lo Ehirudu a wo Orushalima.

⁸ Ehirudu a gno oraŋ a gre eshri omba baŋ a ka Eyesu, okyku eshi a la a gno oshpa ba Eyesu ba omumyi, nga a klo o ka ŋa, okyku o daŋ a kpo ekplo ba egbregbre o daŋ a ka.

⁹ Okyku eka he Ehirudu a zhĩ Eyesu odlo nzenze, ambo Eyesu a tno ŋa ma mbo.

¹⁰ Moandakʼpo olu ba Ahogbrẽ, pa la moa la a nye odaŋ, moa a fu eshri baŋ osheshye.

¹¹ Ehirudu pa la moanwyeakyuŋ baŋ moa a la a lu ega a ygi Eyesu, nga moa a dzĩ ŋa. Moa a ygi ŋa ariga adzadzi a khwo nga, moa a shri ŋa a bla a gre okro ba Ebilatu.

¹² Onda he lo angyiŋ, Ehirudu ta la Ebilatu moa a zhiŋ a ri ekpom.

Moa a sheŋ Eyesu ombgu eku

¹³ Ebilatu a bzi moandakʼpo olu ba Ahogbrẽ, pa la moandakʼpo, pa la moare.

¹⁴ A nyuŋ mo a lu mi le, Agimi e shri alom he e shri e ba okro me, agimi e lu ma olum lo a la a so moare ayi. Agimi e gno, ame e mbli odlo baŋ e ka egi ayi bimi adzadzi, ambo ame e hwiŋ ŋa la akpu eshri akplokyeŋ la a wo abi ba agimi e shri e ba eshri baŋ mbo.

¹⁵ Ehirudu a mbo a hwiŋ ŋa la akpu mbo, okyku eshi a da mo a shri ŋa a bla a ba okro bi. Alom he lo a kpo ekplokyeŋ la e tse ma baŋ a kpu okyku lo mbo.

¹⁶ Okyku eka he, ame é yla ŋa andzu nga é kyu ŋa abgo é daŋ a yi eŋa. [

¹⁷ Ombayaŋ a mbo ba moa a la a kpo Apaska, Ebilatu a la a kyu oprusuna akyeŋ abgo.]

¹⁸ Omba he lo nga eshki pyeŋ e ta enzi angyangyeŋ e lu mi Ie, O bga ŋa! O kyu Abaraba abgo okyku gi!

¹⁹ Moa a vu Abaraba a ta aku okyku baŋ a la a so moare ayi osku lo, nga baŋ a la a bga ebga.

²⁰ Ebilatu a klo o kyu Eyesu abgo, okyku eka he a bla a bzi eshki nganga.

²¹ Ambo moa a ta enzi angyangyeŋ a lu mi le, E gŋe ŋa egŋe aki! E gŋe ŋa egŋe aki!

²² Ebilatu a sa a lu pa la mo odgo ba otra a lu mi le, Alom he lo, a ta akpu eshi? Ame e hwiŋ ekplokyeŋ baŋ a kpo la e tse ma baŋ a kpu okyku lo mbo. Ame é yla ŋa nga é kyu ŋa abgo.

²³ Ambo moa a ta enzi angyangyeŋ a lu mi ma moa a gŋe Eyesu egŋe aki. Ambla he nga enzi odlo mo e kpo e gre.

²⁴ Okyku eka he nga Ebilatu a sheŋ ombgu eshri Eyesu eka ba moa a klo.

²⁵ Aŋa a kyu alom ba moa a klo lo abgo. Alom he lo moa a vu ŋa a ta aku okyku baŋ a la a so okro ayi, nga a la a bga ebga. Nga Ebilatu a shri Eyesu a da mo, okyku o da mo a kpo ekplo ba moa a klo ka la ŋa.

Moa a gŋe Eyesu egŋe aki

²⁶ Omba ba moa a shri Eyesu a shri a yi nga, moa a ri a sheŋ alomakyeŋ ba eshko baŋ e ri Esima. A wo a ba osku ba Esirini. A zgi okrokyeŋ a ba osku lo. Moa a vu ŋa a daŋ a shri egŋe aki a lu Eyesu ma okukũ.

²⁷ Moare nzenze a lu ŋa ma. Eshki moare he lo, moashekyeŋ a la a gbu ogbrẽ nga a wu okũ okyku Eyesu.

²⁸ Eyesu a zhiŋ ayi a ka mo nga a lu mi le, Agimi ashe ba osku ba Orushalima! Agimi e wu okũ okyku me mbo, agimi e wu okũ okyku egimi pa la moanwye bimi.

²⁹ Omba o yi ó ba ba moare á ba a lu mi le, Oraŋ o wo ma okyku moashe la a wo moanwye ma a ka mbo, moa la a mbre a ka mbo, pa la moa la a kpaŋ moanwye a ka mbo!

³⁰ Omba he lo angyiŋ moare á ba a nyuŋ akukũ a lu mi le, E kypi e pre gi! Nga moa á nyuŋ ehwla akũ a lu mi le, E ghre gi!

³¹ O wo ba moa a la a kpo edgu hi pa la moarehwi la a wo la owlama fifi sha le, moa á kpo eshi pa la moarehwi la a wo la owlama ku-ku mbo?

³² Moa a gŋe Eyesu egŋe aki pa la moare aha la a gre abgo.

³³ Omba moa a gbu Okro ba Akukʼpu Eshri, ahe lo angyiŋ moa a gŋe Eyesu egŋe aki. Moare aha ba moa a gŋe mo egŋe aki, akyeŋ a wo obgori baŋ, ahwõ a wo obgoehre baŋ.

³⁴ Eyesu a lu mi le, Ada, o kyu mo abgo! Okyku eshi moa a yi eka ekplo moa a kpo mbo! Moa a fye emvye nga moa a gʼba aknye ba Eyesu agʼbaha mo.

³⁵ Moare a la a tspi ahe lo a la a ka Eyesu. Omba he lo nga moandakʼpo moaEyahuda a lu ega a ygi ŋa. Moa a lu mi le, A shla moahwõ, aŋa a mbo a shla eŋa a da gi e ka, o wo baŋ angyiŋ a wo Emisiya ba Ahogbrẽ a sla!

³⁶ Moanwyeakyuŋ a mbo a lu ega a ygi ŋa, moa a ba okro baŋ nga moa a shri ami la a bza a daŋ.

³⁷ Moa a nyuŋ ŋa a lu mi le, Aŋo ó wo Anyuŋ-areŋ moaEyahuda bgu le, o shla eshri boŋ!

³⁸ Moa a ta engla a bre egi eshri baŋ a lu mi le, Ahi lo angyiŋ a wo Anyuŋ-areŋ moaEyahuda.

³⁹ Akyeŋ eshki moaha ba moa a gŋe mo egŋe aki a nyuŋ Eyesu ega a lu mi le, Aŋo angyiŋ o wo Emisiya lo mbo? O shla eshri boŋ ka la gi!

⁴⁰ Ambo ahwõ a nyuŋ are he lo a lu mi le, Alom, aŋo o kpo eyli Ahogbrẽ mbo? Aŋo o ka, agi pyeŋ e wo ahe okyku edgu ombgu okyekyeŋ angyiŋ.

⁴¹ Ombgu bi e mbi, o wo ozhẽ angyiŋ okyku eshi agi e wo ahe okyku ekplo bi e kpo. Ambo alom hi a kpo ekplokyeŋ la e wo akpu mbo ku-ku.

⁴² Ahi lo a nyuŋ Eyesu a lu mi le, Eyesu, o tne aga me omba boŋ o bla o ba eka Anyuŋ-areŋ!

⁴³ Eyesu a nyuŋ ŋa a lu mi le, Ame e lu e doŋ, olum anye hi, aŋo ó yi Aparades pa la me.

Eku ba Eyesu

⁴⁴ La eka amgbaŋ otsko, olum o zhiŋ o tra ayimom mbo, nga obiŋ o hwĩ evbu ma-me o bli amgbaŋ atra.

⁴⁵ Ashye oknye la a kha ayizhẽ ba Anyuŋ-akulu nga a dle aha.

⁴⁶ Eyesu nga a ta enzi angyangyeŋ a lu mi le, Ada! Ame e kyu eso me abgo e ghwo abgo boŋ! Ambla baŋ a lu eka he nga, a kpu.

⁴⁷ Andakʼpo moanwyeakyuŋ a ka ekplo la e kpo, okyku eka he a hlu Ahogbrẽ eshko, a lu mi le, Adlidzi angyiŋ, aŋa a wo are la a wo shasha!

⁴⁸ Omba ba moare la a gre okro he lo okyku o ka edgu ekplo la e kpo, a bla a zhiŋ ogbu a yi odne nga moa a la a bmmi abgo eshaku mo.

⁴⁹ Moa la a yi Eyesu zhezheŋ pa la moashe la a zgi Egalili a ba, moa a tspi ogyugyuŋ okyku o ka ayakplo la a ba a kpo.

Moa a ngybi Eyesu

^50-51 Alomakyeŋ a wo ma, eshko baŋ e ri Oyusufu. A zgi osku ba Arimatiya. O wo osku moaEyahuda angyiŋ. A wo are ba edadzi nga a gbu eshko. Aŋa a la a ka ayi ozhẽ okyku oba-ba ba Oreŋ Ahogbrẽ. A wo akyeŋ eshki moa la a sõ ombgu angyiŋ, ambo a bmi ta la ekplo ba moa a hwim mbo.

⁵² A gre egi ayi Ebilatu nga a zhĩ okyku okom Eyesu.

⁵³ Ambla he nga, a gile la okom lo nga a kpmye lo la oknye ba elili, nga a shri lo a ghwo ongybi ba onmwre. O wo ongybi olohe angyiŋ.

⁵⁴ Ohe lo o kpo onda Ojuma. Omba he lo, Asabat a ra nzenze nga mbo.

⁵⁵ Moashe la a lu Eyesu ma a zgi Egalili a ba, moa a lu Oyusufu ma nga a gre a yi a ka ongybi ta la eka ba moa a ngybi Eyesu ma.

⁵⁶ Ambla he nga, moa a bla a gre odne, nga moa a yi a nyuŋ awargi la a shka efpi a kpo okyku o shri o tsiŋ egʼba ba Eyesu. Onda ba Asabat nga moa a dzu a dum, eka ba odaŋ o lu.