MoaOroma 8 - Ohwihwim Olehe

Eso okro Ogbgaodzi

¹ Ohuhuhi, ombgu ó bga arekyeŋ la a kŋe a bga pa la Ekristi Eyesu mbo,

² okyku eshi odaŋ ba Ogbgaodzi la o shri eso o da gi, nga o la o shri gi o kŋe o bga ta la Ekristi Eyesu, o zgi me o sku odaŋ ba odlobi ta la eku.

³ Ekplo ba odaŋ o kpo o gbu mbo, okyku ba eda ba arehwĩ e wo lgelge, ambo Ahogbrẽ a kpo lo a gbu. A kyku odlobi odzudzu ba arehwĩ, ozhẽ baŋ a da Anwye baŋ a ba a sko emle ba arehwĩ, arehwĩ ba odlobi. A ba eka he okyku o daŋ a kyku odlobi angyiŋ.

⁴ Ahogbrẽ a kpo eka he okyku o da gi la e lu Ogbgaodzi ma, nga e lu oklo ba egʼba angyiŋ e ma mbo, ambo okyku o da gi e lu odlodzi ba odaŋ o nye gi.

⁵ Ambo moa la a bmi ta la oklo ba egʼba, moa a shri aga mo a zga oklo ba egʼba angyiŋ. Moa la a la a dzi eka ba Ogbgaodzi o la o tsa mo, moa a la a shri aga mo a da otsotsa ba Ogbgaodzi.

⁶ O wo boŋ o shri aga boŋ o zga oklo ba egʼba sha, ó shri eku angyiŋ ó ba o shri ó kom ŋo. Ambo o wo boŋ o shri aga o zga otsotsa ba Ogbgaodzi angyiŋ le, aŋo ó hwiŋ eso, ta la opyapyaŋ.

⁷ Okyku eka he arehwĩ á dzu afpu ba Ahogbrẽ o wo baŋ a shri aga baŋ a zga oklo ba egʼba la o daŋ a pre odaŋ ba Ahogbrẽ. Oklo ba egʼba lo o kpo o gbu ba alo o kpaŋ odaŋ ba Ahogbrẽ mbo ku-ku.

⁸ Moa la a la a bmi ta la oklo ba egʼba, moa a kpo a gbu moa a raŋ Ahogbrẽ eso mbo.

⁹ Ambo agimi e bmi ta la oklo ba egʼba mbo, agimi e bmi ta la ekplo ba Ogbgaodzi o tsa gimi. Alo o kpo o gbu, ba Ogbgaodzi ba Ahogbrẽ o wo ma eso bimi. Areyaŋ a mbo ba Ogbgaodzi ba Ekristi o wo eso baŋ mbo le, aŋa a wo arehwĩ ba Ekristi angyiŋ mbo.

¹⁰ Ambo o wo ba Ekristi a wo ma eso bimi le, o wo ba egʼba bimi e kpu okyku odlobi a mbo, agimi é hwiŋ eso ba Ogbgaodzi, okyku ba moa a sheŋ a shri opyapyaŋ a zga agʼbaha bimi ta la Ahogbrẽ.

¹¹ O wo ba Ogbgaodzi ba Ahogbrẽ la o kso Eyesu eku o wo ma eso bimi le, aŋa la a kso Eyesu eku, á sa á kso gimi a mbo eku ibu ba ekʼpo ba Ogbgaodzi la o wo eso bimi.

¹² Okyku eka he agimi anáŋ, o dzu gi omgbybi ba agi e da oklo ba egʼba o bile gi mbo.

¹³ O wo bimi e bmi ta la odzudzu ba egʼba le, adlidzi angyiŋ, agimi é jygi, ambo o wo bimi e bmi ta la Ogbgaodzi nga okro ekʼpo ba Ogbgaodzi, agimi e zhiŋ okũ e blu ayakplobi bimi e la e kpo le, agimi é hwiŋ eso.

¹⁴ Moare ba Ogbgaodzi ba Ahogbrẽ o la o kpo otum pa la mo, moa a wo moanwye Ahogbrẽ angyiŋ.

¹⁵ Okyku Ogbgaodzi ba Ahogbrẽ a shri a da gimi, o la o da gimi e dzu moawaghrẽ angyiŋ nga o la o shri eyli o ghwo gimi egʼba mbo. Ambo Ogbgaodzi o la o zhiŋ gimi o da gimi e dzu moanwye ba Ahogbrẽ. Nga okyku ekʼpo ba Ogbgaodzi lo angyiŋ, agi e la e fa olu okro ba Ahogbrẽ e la e bzi ŋa Adigi! Adigi!

¹⁶ Ogbgaodzi ba Ahogbrẽ o kŋe ayaŋ ba eso bi o bga ta la eŋa okyku o tsa bi e wo moanwye ba Ahogbrẽ.

¹⁷ Eka ba agi e wo moanwye baŋ hi, agi é hwiŋ egbre baŋ a shri a zga ma okyku moarehwi baŋ. Agi nga é pu ekplo ba Ahogbrẽ a shri a zga ma okyku Eyesu ka la ŋa otsotse. O wo ba agi e bmi e kpo ewu ka la ŋa, agi é ri ekʼpo ka la ŋa otsotse.

Oraŋ la ó ba

¹⁸ Ame e tne aga e ka tki, ekʼpo bi é ba e gre ewu bi e la e kpo ohuhuhi nzenze.

¹⁹ Ekployaŋ a mbo ba Ahogbrẽ a kpo obiŋ hi, moa a la a ka ayi ozhẽ okyku o da Ahogbrẽ a tsa moanwye la a wo a baŋ.

²⁰ Ekployaŋ a mbo e mbi, e dzu é ba e jygi, moa angyiŋ a klo eka he lo mbo, ambo Ahogbrẽ angyiŋ a klo. Ambo moare a la a ka ayi ozhẽ.

²¹ Moa la a ka ayi ozhẽ ba ondakyeŋ moa a shla ekployaŋ a mbo abgo ba ovovrẽ, nga okyku o da mo a hwiŋ odzudum moanwye ba Ahogbrẽ.

²² Agi e yi, ma-me e ta ohuhuhi, ekployaŋ a mbo ba Ahogbrẽ a kpo moa a la a wu okũ, nga a ta agyim la a vu olo, eka ba ashe a la a sẽ akpyki omba baŋ a mbre anwye.

²³ Ekployaŋ a mbo ba Ahogbrẽ a kpo sha mbo, ambo agi a mbo la e wo la Ogbgaodzi ba Ahogbrẽ a shri a da gi ototno ma oriori, agi a mbo e la e ta agyim eso bi omba bi e la e kʼpu, okyku o da Ahogbrẽ a da gi e dzu moanwye baŋ, nga okyku o daŋ a kyu gi abgo.

²⁴ Okyku okayiozhẽ bi e wo la alo ma angyiŋ, agi e hwiŋ oshla lo. Ambo o wo bi e hwiŋ ekplo bi e la e ka ayi ozhẽ okyku lo le, o dzu eka ba okayiozhẽ angyiŋ mbo. Okyku eshi arekyeŋ a la a ka ayi ozhẽ okyku ekplo baŋ a sheŋ a ka lo mbo.

²⁵ Ambo o wo ba agi e la e ka ayi ozhẽ okyku ekplo ba agi e ka mbo le, o raŋ o gre ba agi e ghwo eso.

²⁶ Nga agi arehwĩ la e siŋ ma, Ogbgaodzi angyiŋ o la o kpo o ghwo la gi. Okyku eshi agi e yi eka ba o fa olu mbo. Ogbgaodzi nga o la o vẽ Ahogbrẽ okyku gi, o la o vẽ ŋa la agyim ba moa a nyom lo a gbu mbo.

²⁷ Ahogbrẽ nga la a yi eso moarehwi a yi eka ba aga ba Ogbgaodzi a wo, okyku eshi Ogbgaodzi angyiŋ o vẽ Ahogbrẽ okyku moarehwi ba Ahogbrẽ, eka ba Ahogbrẽ a zga eso ba o kpo-kpo.

²⁸ Agi e yi ba ekployaŋ a mbo e la e kpo adzadzi pa la moare la a klo Ahogbrẽ, moahi lo a mi a sla mo.

²⁹ Okyku eshi moare ba Ahogbrẽ a sheŋ mo a sla, a sla mo a zga agba nga a da mo a sko emle ba Anwye baŋ, okyku o da Anwye baŋ a dzu a ba oriori eshki moanáŋ mvye.

³⁰ Okyku eka he Ahogbrẽ a bzi moare baŋ a sla mo. A bzi mo nga a khwo mbo, ambo a da opyapyaŋ o dzu agʼbaha mo ka la ŋa. Aŋa a da opyapyaŋ o dzu agʼbaha mo ka la ŋa sha mbo, ambo a da mo a ri ekʼpo baŋ ka la ŋa.

Oklo ba Ahogbrẽ ibu Ekristi Eyesu

³¹ Okyku eka he, agi nga é lu la eshi? O wo ba Ahogbrẽ a wo ka la gi le, ayi angyiŋ a wo la a kpo a gbu ka la gi?

³² Aŋa a nyom gi Anwye baŋ mbo, ambo a shri Anwye baŋ a di okyku gi mvye! A shri Anwye baŋ a da gi, okyku eka he á shri ekployaŋ a mbo á da gi mbo?

³³ O ba alo o wo eka he, ayi angyiŋ a kpo a gbu baŋ a klo odlo pa la moarehwi ba Ahogbrẽ a sheŋ a sla? E ka, Ahogbrẽ a mbo a sheŋ a kyu mo abgo!

³⁴ Arekyeŋ a sa a kpo a gbu baŋ a jygi mo? Ekristi Eyesu angyiŋ a wo are la a kpu nga moa a kso ŋa eku, nga ohuhuhi a wo obgori ba Ahogbrẽ. Aŋa a la a vẽ Ahogbrẽ okyku gi.

³⁵ Ayi angyiŋ a kpo a gbu baŋ a ngʼba gi á sku oklo ba Ahogbrẽ? Otsla, ta la ewu, ta la avuolo, ta la embyle, ta la ososo, ta la oyla, ta la eku, moa a kpo a gbu ba moa a ngʼba gi a sku oklo ba Ahogbrẽ mbo.

³⁶ O wo eka ba odlo ba Ahogbrẽ o lu mi le, Okyku gimi angyiŋ agi e gre oyla ba eku ombamba mvye. Moa a la a kpo gi eka ékylu ba moa á yi obabga.

³⁷ O mbo, agi e kpo e gre ayakplo hi lo mvye, okyku baŋ a la a klo gi angyiŋ!

³⁸ Ame e bmi ba adlidzi zhezheŋ ba ekplokyeŋ e kpo e gbu ba alo e ngʼba gi e sku oklo baŋ e gbu mbo. Eku, ta la eso, e kpo e gbu mbo. Moanwyeadga, pa la moa la a ri ekʼpo, ta la ayakplo egbregbre ba ongyeŋ a mbo moa a kpo a gbu mbo. Ohuhuhi, ta la omba la ó ba mi a mbo o kpo o gbu mbo.

³⁹ Obiŋ la o wo ongyeŋ, ta la obiŋ la o wo egi eshyẽ ba obiŋ hi a mbo moa a kpo a gbu mbo. Ekplokyeŋ obiŋ hi e kpo e gbu ba alo e ngʼba gi e sku oklo ba Ahogbrẽ mbo. Oklo he lo agi e hwiŋ lo okyku Ekristi Eyesu Adigi angyiŋ.