MoAfisu 5 - Ohwihwim Olehe

Odzudzu ayimom

¹ Eka ba agimi e wo moanwye ba Ahogbrẽ a klo gimi, o raŋ o gre ba agimi e zga ngre nga e dzu eka baŋ a wo.

² Agimi e da oklo angyiŋ o ri ekʼpo eshri bimi, eka ba Ekristi a klo gi nga a shri esõ a shri a da gi eka ba oshriondba la o shka efpi edzadzi la o raŋ Ahogbrẽ esõ.

³ Eka ba agimi e wo moarehwĩ ba Ahogbrẽ he, o wo odzi ba moa a lu akplokyeŋ ba eshre o mbo le akplokyeŋ la a wo eka lo eshri bimi mbo, o mbo le moa a lu odlo eka ba agimi e kpo oriayi mbo.

⁴ O wo odzi ba agimi e lu odlobi, ta la odlo ototno o mbo le odlo eshre mbo. Ambo o raŋ o gre ba agimi e vye la Ahogbrẽ.

⁵ O dzu mbo agimi e sheŋ e yi odlo he lo zhezheŋ ba areyaŋ a mbo la a wo la eshre nga a la a kpo ayakplo la a wo eka lo mbo, nga a la a kpo oriayi, á hwiŋ egbrekyeŋ Oreŋ ba Ekristi ta la Ahogbrẽ mbo. Oriayi o wo otum ba o hlu okpko eshko angyiŋ.

⁶ Agimi e da arekyeŋ a bile gimi la odlo adro mbo. Okyku edgu ayakplo he lo angyiŋ Ahogbrẽ á ba a kpo moare la a kpaŋ odlo baŋ mbo ewu.

⁷ Okyku eka he, agimi e ngʼba e sku edgu moare he lo.

⁸ Agimi a mbo e la e wo evbu ayga. Ambo eka ba agimi e sheŋ e dzu moarehwĩ ba Adigi-odne he, agimi e wo ayimom angyiŋ a mo. Okyku eka he, o raŋ o gre ba agimi e dzu eka moarehwĩ ba ayimom.

⁹ Okyku eshi ayimom lo angyiŋ a wo la a shri oyayla nzenze la o wo odzi ta la odlodzi, ta la adlidzi a shri a ba.

¹⁰ Agimi e zga ngre nga e nye ekplo la e raŋ Adigi-odne esõ.

¹¹ Agimi e la e tla o kpo ayakplo pa la moarehwĩ ba ototno la a kpo ayakplo ba ototno ba evbu. Ambo agimi e se ayakplo ba ototno he lo e ta edzi angyiŋ o sku.

¹² O wo ekplo anzi angyiŋ o ba o lu odlo eshri ayakplo ba moa a la a kpo la esisi.

¹³ Ambo ambla ba moa a se ekployaŋ a mbo a ta edzi, omba he lo angyiŋ moarehwĩ á yi odzudzu mo la o wo ototno zhezheŋ.

¹⁴ Okyku eshi ekployaŋ a mbo ba moa a se lo a ta edzi pendeŋ é dzu ayimom angyiŋ a mo. Okyku eka he angyiŋ moa a lu mi le, Aŋo la o ndze enu, O kso eku! Nga Ekristi á shka ayi eshri boŋ.

¹⁵ Okyku eka he, e nyuŋ o kpo-kpo ta la odzudzu bimi. E dzu eka moarehwĩ la a wo evbu mbo, ambo e dzu eka moarehwĩ la a wo la eda ma.

¹⁶ E nyuŋ e kpo ta la ozhẽyaŋ a mbo ba agimi e hwiŋ, okyku eshi omba he o wo omba ba ewu angyiŋ.

¹⁷ Agimi e dzu moadro mbo, ambo e nyuŋ e mbli e ka ekplo ba Adigi-odne a klo ba agimi e kpo.

¹⁸ Agimi e da owowa o kpo gimi ayi mbo. Alo ó tpi gimi ayi sha angyiŋ. Ambo e da Ogbgaodzi angyiŋ o bli gimi.

¹⁹ Agimi e lu odlo ta la egimi ozhẽ ba ohlueshko ta la ofuabmo. E fu abmo nga e hlu Adigi-odne eshko la ohlueshko esõ bimi.

²⁰ Ombayaŋ a mbo agimi e vye la Ahogbrẽ la a wo Adigi okyku ekployaŋ a mbo, eshko ba Adigi-odne Eyesu Ekristi.

Moashe pa la moarealom

²¹ Agimi e fa olbi e da egimi, okyku oklo ba agimi e wo la alo ma okyku Ekristi.

²² Agimi ashe, e fa olbi e da moarealom bimi eka ba agimi e la e fa olbi e da Adigi-odne.

²³ Okyku eshi arealom a wo la ekʼpo eshri ashe baŋ eka ba Ekristi a mbo a wo la ekʼpo eshri ba Eklisiya. Ekristi angyiŋ a wo Areoshla ba Eklisiya la e wo egʼba baŋ angyiŋ.

²⁴ Okyku eka he o raŋ o gre ba moashe a fa olbi a da moarealom mo ogbukyekyeŋ, eka ba Eklisiya e la e fa olbi e da Ekristi.

²⁵ Agimi moarealom, e klo moashe bimi eka ba Ekristi a mbo a klo Eklisiya nga a gba a shri eshri baŋ a shri a di okyku lo.

²⁶ A kpo ohe lo okyku o shri Eklisiya o zga okyku Ahogbrẽ angyiŋ, ambla baŋ a ndza lo la odlo baŋ,

²⁷ okyku o da Eklisiya e dzu e baŋ, la egʼba edzadzi, la okyekye, la akpu mbo, la akpa abi mbo, o mbo le akpyli, o mbo le osheŋonye mbo.

²⁸ O raŋ o gre ba moarealom a klo moashe mo eka moa a klo egʼba mo. Arealom la a klo ashe baŋ le, a klo eŋa angyiŋ.

²⁹ Arekyeŋ a tla egʼba baŋ a ka mbo. Ambo aŋa a la a vgi lo nga a nyuŋ alo a kpo eka ba Ekristi a la a nyuŋ Eklisiya a kpo.

³⁰ O ka, agi e wo évgi ba egʼba baŋ angyiŋ.

³¹ Eka ba odlo ba Ahogbrẽ o lu mi le, Okyku eka he, arealom á dzu anaŋ ta la adaŋ á zga nga á yi á kŋe eshri baŋ á bga ta la ashe baŋ. Moa aha nga á dzu okyekyeŋ.

³² Moa a hwile anyuŋ adlidzi a ta edzi ibu odlo ba Ahogbrẽ he lo. Ame e lu odlo he lo eshri ba Ekristi ta la Eklisiya.

³³ Ambo o wo eshri bimi a mbo. O raŋ o gre ba arealomyaŋ a mbo a klo ashe baŋ eka baŋ a klo eshri baŋ. Nga o raŋ o gre ba asheyaŋ a mbo a fa olbi a da alom baŋ.