MoAfisu 4 - Ohwihwim Olehe

Okŋeobga ba egʼba

¹ Ame la e wo oprusuna okyku ba ame e kpo otum okyku Adigi-odne angyiŋ e la e shĩ gimi, okyku o da gimi e dzu la odzudzu ba Ahogbrẽ a shri a zga omba baŋ a bzi gimi.

² E pre esõ obiŋ, nga e kpo ble-ble, nga e ta esõ akpyli ombamba pyeŋ. Nga e tsa oklo ozhẽ ba o kpo o ghwo la egimi.

³ Agimi e zga ayi ngre okyku o kpaŋ okŋeobga ba Ogbgaodzi o shri o ba, ozhẽ ba opyapyaŋ la o kŋe gimi o bga.

⁴ Egʼba ekyekyeŋ, ta la Ogbgaodzi okyekyeŋ angyiŋ o wo ma, eka ba okayiozhẽ okyekyeŋ ba Ahogbrẽ a bzi gimi okyku lo o wo ma.

⁵ Adigi-odne akyakyeŋ a wo ma, ta la obmi ba adlidzi okyekyeŋ, ta la abaptisma akyakyeŋ.

⁶ Ahogbrẽ akyakyeŋ sha a wo ma, nga aŋa angyiŋ a wo adimo-arehwĩ pyeŋ. A wo Adigi-odne pyeŋ, aŋa a la a kpo otum okro moare pyeŋ, nga a wo pa la moare pyeŋ.

⁷ Ahogbrẽ nga a shri edgu okpogbukyeŋ a shri a da areyaŋ a mbo eshki bi, eka ba Ekristi a mbo a shri a di.

⁸ Odlo ba Ahogbrẽ o lu mi le, Omba baŋ a vre a gre Ongyeŋ okpyemgbyeŋ, Aŋa a shri moa-oprusuna nzenze, Nga a shri okpogbu a shri a da moarehwĩ.

⁹ Eshi e wo okũ baŋ a gre Ongyeŋ he lo? Okũ lo o wo okyku eshi aŋa a ba obiŋ hi, obiŋ la o wo egi eshyẽ ba obiŋ lo.

¹⁰ Okyku eka he aŋa la a ba obiŋ hi lo angyiŋ, a bla a gre ongyeŋ la o gyuŋ o gre Ongyeŋ mvye okyku o daŋ a bli okroyaŋ a mbo la odzudzu baŋ.

¹¹ Aŋa angyiŋ a shri okpogbu a shri a da moare. A sla moakyeŋ okyku o da mo a nyum oshpa. Moakyeŋ nga okyku o da mo a dzu moarehwĩ ba Ahogbrẽ a hom mo otum. Moakyeŋ nga okyku o da mo a dzu anwye esku nga a nyum oshpa. Moakyeŋ nga okyku o da mo a dzu moa-opasto. Moakyeŋ okyku o da mo a dzu moa la a nye moare engla.

¹² A kpo ohe lo okyku o nye moarehwĩ ba Ahogbrẽ pyeŋ okyku otum ba Ekristi angyiŋ, nga okyku o mbdzi egʼba ba Ekristi.

¹³ Agi mvye é kŋe é bga okyekyeŋ ibu ba obmi ba adlidzi bi nga ibu ba oyioyi bi eshri Anwye Ahogbrẽ, nga okyku o da gi e dzu eka moarehwĩ la a bmye ayi a klu, nga okyku o da gi e hlu e gbu ohlu ba egʼba ba Ekristi.

¹⁴ Omba he lo nga agi é dzu eka moanwye ba ogbga ba onyenye ba moarehwĩ la a la a bile moare angyiŋ o la o kaŋ mo ayi wayawaya nga mbo. Onyenye he lo o la o da moare a la a ta akpu okyku edgu eda ebi ba obile ba moa a la a kpo.

¹⁵ O raŋ o gre ba agi e hlu eka ba Ekristi la a wo eshri a wo, nga e lu adlidzi la oklo esõ bi e sku o kpo ayakplo ba eda ebi.

¹⁶ La ekʼpo baŋ angyiŋ évgi ba egʼba e kŋe e bga otsotse. Évgi he lo angyiŋ e kŋe egʼba pyeŋ e bga. Okyku eka he o wo ba evgiyaŋ a mbo e la e kpo otum shasha le, egʼba lo pyeŋ e la e hlu, nga e la e mbdzi e yi ongyeŋ ozhẽ ba oklo.

Esõ elehe okro ba Ekristi

¹⁷ La eshko ba Adigi-odne angyiŋ ame e lu odlo he, nga ame e la e tspi gaŋ okyku lo. O dzu omgbybi ba agimi e dzu eka moaevbu ku-ku nga mbo. Aga mo a wo adzi ku-ku mbo.

¹⁸ Esõ mo nga e wo evbu. Moa a wo la ogʼbakyeŋ ibu odzudzu ba Ahogbrẽ a la a shri a di mbo, okyku eshi moa a wo la evbu eshri, nga moa a shpi esõ a gre eshri.

¹⁹ Moa a wo la aga ba anzi ma ku-ku mbo. Moa a la a shri eshri mo a la a di okyku o kpo ayakplobi, nga moa a la a kpo edgu ayakployaŋ a mbo la a wo eka lo mbo, nga ekplokyeŋ e kpo mo ewu esõ mbo.

²⁰ Agimi e nye edgu ohe angyiŋ eshri ba Ekristi mbo!

²¹ Agimi e gno odlo zhezheŋ eshri baŋ. Nga eka ba agimi e wo moa la a lu ŋa ma he, moa a sheŋ a nye gimi adlidzi la a wo eshri ba Eyesu.

²² Okyku eka he agimi e ngʼba e sku odzudzu ogbyi bimi. Odzudzu ogbyi he lo o la o da gimi e kpo ekpom la ezhẽ la e wo edzi mbo. Odzudzu ogbyi la moa a la a jygi lo ibu okayiogro ba obile.

²³ E da mo a nyiŋ esõ bimi ta la aga bimi ogbukyekyeŋ okyku o da lo e dzu ahe.

²⁴ Agimi e sko odzudzu moarehwĩ ahe ba Ahogbrẽ a kpo mo eka baŋ, nga odzudzu ohe he lo o la o tsa eŋa pendeŋ eka ba odzudzu ba odlodzi la o wo kye nga o wo la esesla o wo.

²⁵ E sheŋ akpro nga mbo! O raŋ o gre ba areyaŋ a mbo a la a lu adlidzi angyiŋ ta la anáŋ. Okyku eshi agi e wo ekplu ekyekyeŋ angyiŋ egʼba ba Ekristi.

²⁶ O wo ba esõ e tpi gimi ayi angyiŋ le, agimi e da lo e dzu ozhẽ ba agimi e kpo odlobi mbo, nga agimi e da olum o gbu gimi la alo mbo.

²⁷ Agimi e hwile Eshitaŋ ozhẽ akplokyeŋ mbo.

²⁸ O raŋ o gre ba are la a la a kpo ogʼga a kyu ogʼga abgo, nga a kpo otum okyku o daŋ a dzu la odzudzu la o wo odzi. Nga okyku o daŋ a la a kpo a ghwo la moare la a wo la ekŋe.

²⁹ Agimi e la e kpo otum ta la odlo la o vu olo omba bimi e kpla egba mbo. E kpo otum ta la odlo la o kpo o ghwo sha. E kpo otum ta la edgu odlo la o mbdzi angyiŋ nga e shri ekplo la e gbaŋ e shri e ba, okyku o da moa la a gno odlo boŋ a hwiŋ owlama eshri odlo lo.

³⁰ Agimi e tpi Ogbgaodzi ba Ahogbrẽ esõ ayi mbo. Okyku eshi Ogbgaodzi o dzu evgo ba Ahogbrẽ a bre eshri bimi angyiŋ. Alo o la o tsa ba agimi e wo moarehwĩ baŋ. O wo zhezheŋ ba onda ba Ahogbrẽ á ba a kyu gimi abgo ó ba.

³¹ Agimi e dzu la esõ la e wo ebi ta la arekyeŋ mbo, nga e dzu ta la ogroayi, ta la olom mbo. Nga e la e kʼpi ohwa la ota enzi angyangyeŋ o mbo le e la e dzĩ egimi nga mbo! Nga e la e kpo edgu ofpuyaŋ a mbo ta la egimi ku-ku nga mbo.

³² Ambo agimi e la e kpo e ghwo la egimi la esõ ble-ble angyiŋ. Nga agimi e la e kyu egimi abgo akpu eka ba Ahogbrẽ a mbo a kyu gimi abgo okro ba Ekristi.