MoAfisu 3 - Ohwihwim Olehe

Otum ba Oblus okyku moaEyahuda mbo

¹ Okyku okũ he lo, ame Oblus la e wo oprusuna ba Ekristi Eyesu okyku gimi la e wo moaEyahuda mbo, ame e la e vẽ Ahogbrẽ.

² Agimi e sheŋ e gno ba Ahogbrẽ ozhẽ ba okpoghwo baŋ angyiŋ, a shri otum he a shri a da me okyku o da gimi e hwiŋ owlama.

³ Ahogbrẽ nga a hwile ohwihwim baŋ a hwim a ghre, nga a da me e yi lo. Ame e ta engla ple sha angyiŋ eshri lo.

⁴ Nga o wo ba agimi é ba e tsi ekplo ba ame e ta, agimi é kpo é gbu ba agimi é nye okaobmye ba eshyẽ ba Ekristi ba ame e wo la alo ma.

⁵ Ayga moa a hwile eshyẽ he lo a da moare a ka mbo. Ambo, ohuhuhi Ahogbrẽ a hwile moa la a nyum oshpa ta la moarehwĩ ba Ahogbrẽ a hom mo otum eshyẽ he lo ozhẽ ba Ogbgaodzi.

⁶ Eshyẽ he lo angyiŋ e wo Oshpaodzadzi. Ibu ba ozhẽ he lo angyiŋ moa la a wo moaEyahuda mbo pa la moaEyahuda, a pu owlama ba Ahogbrẽ. Moa a dzu évgi ba egʼba ekyekyeŋ angyiŋ a mo. Nga moa a mbo a wo la ogʼba ohwihwim ba Ahogbrẽ a hwim okro ba Ekristi Eyesu.

⁷ Moa a da me e dzu awaghrẽ ba Oshpaodzadzi. Ahogbrẽ angyiŋ a shri edgu okpogbu he lo a shri a da me. A shri lo a shri a da me ozhẽ otum ba ekʼpo baŋ.

⁸ Ame e wo arehwĩ ba amom-abgo ototno eshki moarehwĩ pyeŋ ba Ahogbrẽ la a sheŋ a nye. Ekakahelo a mbo, Ahogbrẽ a hwile me ozhẽ okyku o da me e shri Oshpaodzadzi e shri e da moa la a wo moaEyahuda mbo. O wo eshri owlama ba Ekristi la o gre mvye.

⁹ Nga alo o wo okyku o da moare pyeŋ a ka eka ba moa á ba a kpo otum ta la ohwihwim ba Ahogbrẽ a hwim a ghre ma. Ahogbrẽ la a kpo ayakplo pyeŋ, a ghre eshyẽ he lo omba la o sheŋ o gre he lo pyeŋ,

¹⁰ okyku o da moanwyeadga la a ri ekʼpo, ta la ekʼpo andandandim la e wo ahrẽ, a yi okaobmye ba Ahogbrẽ ezhẽ andandandim pyeŋ, ozhẽ ba Eklisiya ohuhuhi.

¹¹ Ahogbrẽ a kpo ohe lo ozhẽ ba gbagbu-amo baŋ a shri a zga esõ baŋ, aŋa a da lo o kpo adlidzi ozhẽ ba Ekristi Eyesu Adigi-odne.

¹² O wo bi e kŋe e bga ka la ŋa nga e bmi ba adlidzi ka la ŋa, agi e wo la ozhẽ ma ba o yi egi ayi ba Ahogbrẽ la oshye-esõ.

¹³ Ambo ame e vẽ gimi, agimi e da egʼba e shki gimi ami okyku ba ame e la e kpo ewu okyku gimi mbo. O wo okyku owlama bimi angyiŋ.

Oklo ba Ekristi

¹⁴ Okyku okũ he lo angyiŋ ame e kʼpu obiŋ egi ayi ba Ada.

¹⁵ Okro baŋ angyiŋ oguyaŋ a mbo Ongyeŋ ta la obiŋ hi, moa a la a yga eshko ba adlidzi he lo.

¹⁶ Ame e vẽ Ahogbrẽ, okyku ekekʼpo baŋ la e wo nzenze, okyku o daŋ a shri ekʼpo a shri a da gimi ozhẽ ba Ogbgaodzi baŋ, okyku o da gimi egi eshyẽ bimi e wo la oshye ma,

¹⁷ nga o wo bimi e bmi ba adlidzi ka la ŋa, Ekristi nga á kpo okro odzuma baŋ esõ bimi. Ame e la e fa olu okyku o da gimi e ta emgbʼbo e ghwo egʼba ba oklo, nga okyku o da oklo angyiŋ o dzu okũ bimi.

¹⁸ Nga agimi pa la moarehwĩ ba Ahogbrẽ pyeŋ, Ahogbrẽ a shri ekʼpo a da gimi okyku o da gimi e hwiŋ ekʼpo ba o ka o bmye ba oklo ba Ekristi o wo anyuŋ oklo la o gre eshri.

¹⁹ E, o kpo o gbu ba agimi e yi oklo baŋ, ambo alo o gre eshri ba agimi e yi lo e fu ma, o mbo le e ka lo e bmye. Amom-abgo ekpyemgbyeŋ nga moa a bli gimi mvye la obiobli ba Ahogbrẽ la o bli.

²⁰ Ahogbrẽ a kpo a gbu baŋ a kpo ekplo la e bre e gre ayakplo pyeŋ bi e vẽ ŋa okyku lo nga ba agimi e la e tne aga eshri lo, ibu ba ekʼpo la e la e kpo otum ka la gi.

²¹ Ekekʼpo lo e dzu ma okyku Ahogbrẽ, okro Eklisiya lo nga, ta la okro ba Ekristi Eyesu okyku omba pyeŋ, gbagbu gbagbu-amo! Amin.