MoaEgalasiya 1 - Ohwihwim Olehe

Akpa ba Oblus a ta a kom moaEgalasiya

¹ Akpa he lo a zgi abgo ba Oblus. Obzi baŋ okyku o daŋ a nyum oshpa o zgi aga arehwi o mbo le okro arehwi angyiŋ mbo. Ambo Eyesu Ekristi ta la Ahogbrẽ Adigi la a kso ŋa eku angyiŋ, a wo okũ lo.

² Moanáŋ la a wo ahe pyeŋ, moa pa la me, agi e shko moaEklisiya obiŋ ba Egalasiya pyeŋ.

³ Ahogbrẽ la a wo Adigi ta la Adigi-odne Eyesu Ekristi a shri okpoghwo, ta la opyapyaŋ a shri a da gimi.

⁴ Ekristi a shri eshri baŋ a di okyku odlobi bi, nga okyku o da gi e hwiŋ odzudum ayakplobi ba omba he, eka ba Ahogbrẽ la a wo Adigi a klo baŋ a kpo.

⁵ Ekekʼpo e dzu e ba Ahogbrẽ gbagbu-amo! Amin.

Oshpaodzadzi okyekyeŋ

⁶ Ame e ka egbregbre ka la gimi! Ohuhuhi agimi e tla are la a bzi gimi la okpoghwo ba Ekristi, nga agimi e yga oshpakyeŋ ondundum.

⁷ Adlidzi angyiŋ, oshpakyeŋ ondundum o wo ma okrokyeŋ mbo ku-ku. Ame e lu eka he okyku eshi moarekyeŋ a klo o so gimi ayi nga o nyiŋ Oshpaodzadzi ba Ekristi.

⁸ Ambo o wo bi o mbo le moanwyeadga ba Ahogbrẽ la a wo Ongyeŋ a mbo, o wo moa a nyum oshpakyeŋ la o wo ondundum ta la oshpa bi e nyum e ygi gimi le, a ba eshri mo!

⁹ Agi e sheŋ e lu odlo he lo, ambo ame é bla alo é shĩ ohuhuhi. O wo ba arekyeŋ a nyum oshpa la o wo ondundum ta la oshpa bimi e sheŋ e yga le, a ba eshri baŋ!

¹⁰ Odlo ba ame e la e lu he, o dzu eka ba ame e kpo okyku o da moare a bmi pa la me angyiŋ? O mbo! Ame e klo ba Ahogbrẽ angyiŋ a bmi pa la me. Ame e la e zga ngre okyku o da moare angyiŋ a yi me nzenze? Ame e zga ngre e ta ma-ma okyku o da moare a yi me nzenze angyiŋ e mbi, ame e bmi e dzu awaghrẽ ba Ekristi mbo.

Eka ba Oblus a dzu are la a nyum oshpa

¹¹ Agimi anáŋ, e ngli e gno. Oshpa ba ame e la e nyum he, o wo oshpa ba arehwi angyiŋ mbo.

¹² Ame e yga lo okro ba arehwi angyiŋ mbo, nga arekyeŋ a nye me alo mbo. Ambo Eyesu Ekristi eshrishri eŋa angyiŋ a hwile oshpa lo zhezheŋ a tsa me.

¹³ Moa a sheŋ a lu edgu odzudzu me omba ba ame e wo are la a lu ozhẽ ba Eyahuda a da gimi bgu. Moa a lu eka ba ame e kpo Eklisiya ba Ahogbrẽ ewu e gre eshri, nga ame e zga ayi ngre okyku o bga lo.

¹⁴ Ame e zga gble e gre moaEyahuda ba oluŋ me nzenze. Ame e tspi gaŋ ta la onyenye moadigi e gre mo pyeŋ.

¹⁵ Ambo okyku okpoghwo ba Ahogbrẽ, aŋa a sla me omba moa a ka a mbre me a wo mbo a bzi me okyku o da me e yi e kpo ŋa otum.

¹⁶ Omba baŋ a zga eso nga, a ra Anwye baŋ a tspa a da me e ka okyku o da me e nyum Oshpaodzadzi baŋ e ygi moa la a wo moaEyahuda mbo, ame e gre okro ba arekyeŋ okyku ebra akplokyeŋ mbo.

¹⁷ Nga ame e ka e gre Orushalima okyku o ka moare la a wo otum ba onyumoshpa lo a sku me mbo. Ambo ame e gre obiŋ ba Arabiya, ambla he nga ame e bla e gre osku ba Adamasku.

¹⁸ Ambla ba eyi etra angyiŋ ame e bla e gre Orushalima okyku o yi o hwiŋ oshpa ayakplo okro ba Ebitru. Ame e dzu ka la ŋa okyku asati aha.

¹⁹ Ame e ka arekyeŋ eshki moa la a nyum oshpa lo mbo o wo le Eyakubu anáŋ Adigi-odne sha.

²⁰ Ekployaŋ a mbo ba ame e ta e wo adlidzi angyiŋ. Ame e sheŋ akpro angyiŋ mbo. Okyku eka he, aŋo Ahogbrẽ o kpo o ghwo la me!

²¹ Ambla he nga, ame e gre ekro ba Esiriya ta la Esilisiya.

²² Omba he lo nga, moanáŋ ba Eklisiya ba Ekristi obiŋ Eyahuda, moa a yi me mbo.

²³ Moa a yi ekplo ba moahwõ sha a lu. Moa a lu mi le, Are la a kpo gi ewu ayga, ohuhuhi aŋa a la a nyum oshpa ba obmi ba adlidzi baŋ e mbi a zga ngre okyku o bga lo ayga!

²⁴ Okyku me nga moa a hlu Ahogbrẽ eshko.