MoaEfilibi 4 - Ohwihwim Olehe

Onyenye

¹ Okyku eka he nga agimi anáŋ ba ame e klo gimi nzenze, alo o kpo me ewu ba ame e dzu gimi e zga e gre eshri! Agimi e gbu me esõ obiŋ, nga ame e wo la ovye ma okyku gimi e gre eshri. Ohe lo o tsa ozhẽ okyku o da gimi e tspi la osheshye angyiŋ ibu odzudzu bimi okro ba Adigi-odne.

² Eyodiya ta la Esintike, ame e vẽ gimi okyku o da gimi e nyuŋ odlo e kpo eka moanáŋ-alashle angyiŋ okro ba Adigi-odne.

³ Aŋo are ba adlidzi la o kpo otum pa la me nga, ame e klo boŋ o kpo o ghwo la moashe he lo, okyku eshi moa a kpo otum ngre pa la me okyku o ngla Oshpaodzadzi he lo, pa la Eklimeti, pa la moahwõ la a kpo otum pa la me. Ashko mo a wo akpa ba esõ ba Ahogbrẽ.

⁴ Ahogbrẽ nga a shri ovye a shri a da gimi ombamba pyeŋ. Ame é bla alo é shĩ, e kpo ovye!

⁵ Agimi e tsa moare pyeŋ esõ la e wo ble-ble. Adigi-odne á ta adzadzi á ba á mo.

⁶ Agimi e da esõ e ngʼba gimi okyku akplokyeŋ mbo, ambo e vẽ Ahogbrẽ okyku ekployaŋ a mbo ba agimi e klo. Ombayaŋ a mbo e vẽ ŋa la esõ ba ovye.

⁷ Nga opyapyaŋ ba Ahogbrẽ la o gre okaobmye ba arehwĩ ó kpaŋ esõ bimi ta la aga bimi okro ba Ekristi Eyesu.

⁸ Ekplo ba amom-abgo nga agimi anáŋ, e shri esõ bimi e zga ayakplo la a wo adzi nga ba alo a tse ma ba moa a hlu lo eshko, ayakplo la a wo adlidzi ta la ofaolbi o di, ta la odlodzi, ta la ekplo la e wo pse, ta la ekplo la e shri oklo e ba, ta la ekplo la e gbu eshko adzadzi.

⁹ Agimi e kpo otum ta la ekplo bimi e nye nga e yga okro me. Alo pyeŋ a zgi okro ba odlo me ta la okro ba otum me angyiŋ. Nga Ahogbrẽ la a shri opyapyaŋ a shri a da gi, á dzu ka la gimi.

Ovye okyku okpoghwo

¹⁰ Ovye ba ame e wo la alo ma esõ me okro ba Adigi-odne o gre eshri! Ambla ba agbaku omba he, agimi e sa e tsa eka ba agimi e sko me e zga akplokyeŋ nganga. Ame e lu ma agimi e tspi okyku o kpo akplokyeŋ okyku me angyiŋ mbo. Ambo agimi e hwiŋ ozhẽ ba o kpo o ghwo la me mbo ku-ku.

¹¹ Ame e la e lu eka he okyku ba ame e ka eka ba moa a dzu me a zga angyiŋ mbo, ambo okyku ba ame e sheŋ e nye okyku o kpo oheheŋ ta la ekplo ba ame e wo la alo ma angyiŋ.

¹² Ame e yi eka ba ekŋe e wo, nga ame e yi eka ba alo o wo omba ba are a wo la angyiŋ ma a bmyi ibu. Ame e sheŋ e ka eshyẽ he lo e bmye. Okyku eka he, okroyaŋ a mbo ta la ombayaŋ a mbo ame e sheŋ e nye eda okyku o kpo ble-ble, omba ba ame e wyo ta la omba ba ame e kpu embyle, ta la omba ba ame e wo la ama ma nzenze ta la omba ba ame e wo la ama ma tsi sha.

¹³ Ame e wo la oshye okyku o tspi gaŋ ta la edgu odzudzuyaŋ a mbo okyku ekʼpo ba Ekristi a shri a da me.

¹⁴ Ambo agimi e kpo odzi e gre eshri ba agimi e kpo e ghwo la me ewu me.

¹⁵ Agimi arehwĩ ba Efilibi a mbo ababgo bimi e yi zhezheŋ ba agimi sha angyiŋ e wo Eklisiya la e kpo e ghwo la me okũ oriori, omba ba ame e zga esĩ ba o nyum Oshpaodzadzi omba ba ame e kso e sku Amasidoniya. Agimi sha angyiŋ e wo moare la e pu pa la me ohwihwiŋ ta la otsuogbu me.

¹⁶ Engyi oshushku omba ba ame e klo okpoghwo omba ba ame e wo osku ba Atasolonika, agimi e la e shri lo e kom me.

¹⁷ O wo okyku ba ame e la e klo okpoghwo angyiŋ mbo, ambo ame e klo ba moa a shri ohwihwiŋ a ta gimi ma.

¹⁸ Nga ohuhuhi, agimi e yga egŋe la e tsa ekployaŋ a mbo ba ame e hwiŋ okro bimi. Alo o gre eshri! Ame e wo la ekployaŋ a mbo ba ame e klo, okyku ba Ebafroditu a shri okpoghwo bimi pyeŋ a shri a ba ohuhuhi. Alo o wo eka efpi edzi ba ema ba moa a shri a ndba Ahogbrẽ angyiŋ, oshriondba baŋ a yga lo nga a gno oraŋ ta la lo.

¹⁹ Ahogbrẽ me nga, la edgu anyuŋ angyiŋ baŋ a wo la alo ma okro ba Ekristi Eyesu, á shri ekployaŋ a mbo ba agimi e klo á da gimi.

²⁰ Ekekʼpo e dzu e ba Ahogbrẽ Adigi, gbagbu-amo, Amin.

Oshko ba amom-abgo

²¹ Ame e shko moarehwĩ pyeŋ ba Ahogbrẽ la a wo a ba Ekristi Eyesu. Moanáŋ la a wo ahe a shko gimi.

²² Moarehwĩ ba Ahogbrẽ la a wo ahe pyeŋ a shko gimi. Ohe lo o wo anyuŋ pa la moarehwĩ ba odne ba Ekeza angyiŋ.

²³ Okpoghwo ba Adigi-odne Eyesu Ekristi o dzu ka la gimi pyeŋ.