MoaEfilibi 2 - Ohwihwim Olehe

Opresõ-obiŋ ba Ekristi ta la ekekʼpo baŋ

¹ Odzudzu bimi ta la Ekristi o da gimi e hwiŋ oshye mbo? Oklo baŋ okyku gimi o kũ gimi esõ? Agimi e wo la ekpom ta la Ogbgaodzi mbo? Agimi e wo la okayiekŋe ta la oklo ma okyku egimi mbo?

² O wo ba alo o wo eka he angyiŋ le, ame e la e shĩ gimi, agimi e da aga bimi a dzu akyakyeŋ, nga agimi e dzu la oklo okyekyeŋ, nga e dzu okyekyeŋ esõ, okyku o da me e gno oraŋ.

³ O raŋ o gre ba agimi e kpo ekplokyeŋ la e shri ogogʼba e ba angyiŋ mbo, o mbo le la oklo ekʼpoeshri mbo. Ambo e pre esõ obiŋ ta la egimi. Arekyeŋ a la a sko eshri baŋ a zga eka baŋ a yi a kpo a gre moahwõ mbo.

⁴ Nga e ka okoklo moahwõ la olbi, ambo okyku ohwihwiŋ bimi angyiŋ mbo.

⁵ O raŋ o gre ba agimi e dzu la edgu odzudzu ba Ekristi Eyesu a wo la alo ma.

⁶ Aŋa a wo la edgu odzudzu ba Ahogbrẽ ombamba pyeŋ. Ambo aŋa a ka lo o wo odzi baŋ a zga gaŋ a da odzudzu baŋ a wo okyekyeŋ angyiŋ ta la Ahogbrẽ mbo.

⁷ E mbi baŋ a kpo otum la aga esõ baŋ, ambo a tla lo a ta. Nga a sko edgu odzudzu ba awaghrẽ. Moa a mbre ŋa eka arehwĩ, nga a ba la edgu egʼba ba arehwĩ.

⁸ A pre esõ obiŋ, nga a sõ ozhẽ ba ofaolbi o di, nga eku e hwiŋ ŋa ozhẽ he lo. Eku he lo angyiŋ e wo eku baŋ a kpu egŋe aki.

⁹ Okyku okũ he lo angyiŋ Ahogbrẽ a kso ŋa a gre Ongyeŋ la o gre pyeŋ. Nga a shri eshko la e gre ashko ahwõ pyeŋ la ekekʼpo angyiŋ a shri a daŋ.

¹⁰ Okyku o da areyaŋ a mbo la a wo Ongyeŋ ta la obiŋ hi, ta la obiŋ la o wo obiŋ hi eshyẽ, Okyku o da mo a kʼpu obiŋ la egbarum mo Okyku o hlu Eyesu eshko.

¹¹ Nga areyaŋ a mbo á su eka ba Eyesu Ekristi angyiŋ a wo Adigi-odne lo, Okyku ohlueshko ba Ahogbrẽ Adigi.

O shka ayi eka ayimom obiŋ hi

¹² Okyku eka he agimi akyemeazba, eka ba agimi e la e fa olbi e da me a zga omba ba ame e yi e wo ka la gimi, o raŋ o gre ba agimi e fa olbi e da me ohuhuhi angyiŋ okyku ba ame e ngʼba e sku gimi. Agimi e la e kpo otum e ta ma-ma, la eyli ta la egʼba la e zhga ara okyku o bli otum ba oshla bimi.

¹³ Okyku eshi Ahogbrẽ a kpo otum ombamba pyeŋ okyku o da gimi e bmi nga okyku o da gimi e kpo e gbu ba agimi e kpaŋ ekplo baŋ a klo.

¹⁴ Agimi e kpo ekployaŋ a mbo ta la onyiagla o mbo le oklaodlo mbo,

¹⁵ okyku o da gimi e wo la ombgu eshri bimi mbo, nga okyku o da gimi e dzu moa la a wo odlobikyeŋ ma mbo. Nga okyku o da gimi e dzu moarehwĩ ba Ahogbrẽ la e wo shasha la a dzu obiŋ hi la o wo kyekye mbo, pa la moarehwĩ la a wo ototno. O raŋ o gre ba agimi e la e shka ayi egi ayi mo eka ba eyi enzo e la e shka ayi ahrẽ,

¹⁶ eka ba agimi e shri oshpa ba esõ e shri e da mo. O wo ba agimi e kpo eka he lo angyiŋ le, ame e wo la ohwilegʼba ma e gre eshri olum Onda ba Ekristi lo, okyku eshi alo ó tsa ba ozgayi me ta la otum me o wo otum ba ototno angyiŋ mbo.

¹⁷ O dzu mbo amanzhli ba esõ me moa á zhiŋ lo á ygi eka oshriondba ba obmi ba adlidzi bimi e shri e da Ahogbrẽ. O wo ba alo o wo eka he lo angyiŋ le, ame e wo la ovye ma nga ame e pu ovye he lo ka la gimi pyeŋ.

¹⁸ Ekakahelo, o raŋ o gre ba agimi a mbo e da me e pu ka la gimi ovye bimi.

Etimoti ta la Ebafroditu

¹⁹ Ame e ka ayi ozhẽ ibu ba Adigi-odne Eyesu baŋ á da me e hom Etimoti otum okro bimi ambla fi, okyku o da oshpa ba odzudzu bimi o shri oshye-esõ o shri o da me.

²⁰ Aŋa sha angyiŋ a wo are la a da ekplo la e wo esõ me a mbo e wo esõ baŋ. Nga aŋa sha angyiŋ a wo are la a la a kpaŋ gimi.

²¹ Ambo moahwõ pyeŋ a la a kpo eshri emo sha. Nga moa a dzu otum ba Eyesu Ekristi a zga.

²² Agimi a mbo e yi eka baŋ a tsa owlama eshri baŋ zhezheŋ. Agimi e yi eka baŋ a dzu eka anwye me angyiŋ, nga eka baŋ a la a kpo otum ta la adaŋ okyku Oshpaodzadzi he lo.

²³ Ame e la e ka ayi ozhẽ okyku o hom ŋa otum okro bimi, omba ba ame e yi eka ba ekployaŋ a mbo é ba e zhiŋ é dzu pa la me.

²⁴ Ame nga e ka ayi ozhẽ ibu ba Adigi-odne baŋ á da me eshrishri me e ba okro bimi ambla fi.

²⁵ Ame e tne aga e ka ba alo o wo odzi ba ame e da anigi Ebafroditu a ba okro bimi. Aŋa angyiŋ a la a kpo otum nga a ta eko a ghwo la me, nga angyiŋ a la a kpo otum a ghwo la me eka anwyeadga bimi.

²⁶ A wo la ekhwo okyku o ka gimi pyeŋ. Esõ nga e ngʼba ŋa e gre eshri okyku eshi a yi ba agimi e gno baŋ a no olo.

²⁷ Adlidzi angyiŋ baŋ a no olo, nga a ra fi sha baŋ a kpu. Ambo Ahogbrẽ angyiŋ a ka ŋa ayiekŋe, ambo a ka me bubgu angyiŋ ayiekŋe. Nga a da esõ-ebili nzenze angyiŋ e hwiŋ me mbo.

²⁸ Ame nga e wo la ozgayi e ta ma-ma okyku eshi ame e klo o hom ŋa otum okro bimi okyku o da esõ e gbu gimi obiŋ omba ba agimi e ka ŋa. Omba he lo nga esõ e gbu me obiŋ.

²⁹ Agimi nga e yga ŋa la ovye eka ba anaŋ la a lu Adigi-odne ma. Agimi e fa olbi e da areyaŋ a mbo la a wo eka baŋ he,

³⁰ okyku eshi aŋa a bmi a shri esõ baŋ a di okyku ewu nga á ba a kpu okyku otum ba Ekristi, okyku o daŋ a mom okpoghwo ba agimi e shri e kom me o bli.