Eyakubu 2 - Ohwihwim Olehe

Oshĩ eshri o lu odlo ososla

¹ Agimi anáŋ! Odzudzu bimi, eka ba agimi e wo moare-hwĩ la a bmi ba adlidzi ta la Adigi-odne Eyesu Ekristi hi, aŋa la a wo Adigi-odne ba esesla angyiŋ. Agimi e sko moare e zga ondundum okyku edgu odzudzu mo ba egi edzi mbo.

² O wo ba arekyeŋ la a wo la angyiŋ, nga a ghwo arika ba azurfa, nga a ygi aknye adzadzi, nga a ba eshki bimi, ta la are ba ekŋe la a ba la akagre aknye le,

³ o wo ba agimi e ka are la a ygi aknye adzadzi la olbi nga e nyuŋ ŋa e lu mi le, Aŋo o ba o dzu emgbakyiŋ ba andakʼpo la e wo ahe, nga e nyuŋ are la a wo la ekŋe e lu mi le, O tspi angyeŋ, o mbo le, O dzu obiŋ osusku ta la emgbakyiŋ me,

⁴ agimi e la e kpo odlobi angyiŋ. Okyku eshi agimi e la e gʼba egʼba agʼbaha egimi, nga e la e sa osla la aga la a wo abi.

⁵ Agimi anáŋ, e ngli atuŋ e gno odlo me! Ahogbrẽ a sla moaekŋe ba obiŋ hi okyku o da mo a dzu la angyiŋ okro ba obmi ba adlidzi, nga okyku o da mo a hwiŋ oreŋ baŋ a hwim a zga ma okyku areyaŋ a mbo la a klo ŋa.

⁶ Ambo agimi e la e pre eshri moaekŋe obiŋ! Moayi a la a kpo gimi ewu nga a shri gimi a la a yi okro ba moa la a sõ ombgu? Moare la a wo la angyiŋ angyiŋ!

⁷ Moangyiŋ a la a lu odlo ba ototno eshri eshko edzadzi ba Ahogbrẽ a shri a da gimi.

⁸ O wo ba agimi e la e kpaŋ odaŋ ba Oreŋ le, agimi e kpo ekplo la e wo shasha angyiŋ. Odaŋ he lo o wo odlo ba Ahogbrẽ. O lu mi le, Aŋo o klo a ba ekpazhi boŋ eka boŋ o klo eshri boŋ.

⁹ Ambo o wo ba agimi e la e kpo pa la moare okyku odzudzu mo ba egi edzi sha angyiŋ le, agimi e sa osla la a wo odlobi angyiŋ. Okyku okũ he lo nga, odaŋ a mbo, ó sõ gimi ombgu okyku ba agimi e dzu moarehwĩ la a pre odaŋ.

¹⁰ Okyku eshi areyaŋ a mbo la a pre odaŋ okyekyeŋ sha a mbo ba ombgu he lo le, o dzu eka baŋ a pre odaŋ mvye.

¹¹ Okyku eshi are la a lu mi le, O ta ekpa mbo, aŋa angyiŋ a sa a lu mi le, O bga ebga mbo. O wo boŋ o ta ekpa mbo, ambo o bga ebga le, aŋo o dzu are la a pre odaŋ angyiŋ.

¹² Agimi e lu odlo nga e kpo ayakplo eka ba moarehwĩ ba moa á ba a sõ mo ombgu la odaŋ la o shri odzudum o shri o di angyiŋ.

¹³ Okyku eshi Ahogbrẽ á ka are la a wo la okayiekŋe mbo ayiekŋe mbo omba baŋ á sõ ŋa ombgu. Ambo okayiekŋe angyiŋ o kpo o gre osõmgbu.

Obmi ba adlidzi ta la odzudzu bi

¹⁴ Agimi anáŋ! O wo akplokyeŋ angyiŋ ba are a lu mi le, Ame e wo la obmi ba adlidzi ma, o wo ba odzudzu baŋ o ka o tsa eka he lo mbo? Edgu obmi ba adlidzi he lo ó shla ŋa?

¹⁵ O wo ba moanáŋ, moalalom o mbo le moalashle, moa a wo la aknye ma mbo, nga moa a wo la algo a tse ma ba oruri mbo le,

¹⁶ o wo akplokyeŋ angyiŋ boŋ o nyuŋ mo o lu mi le, Ahogbrẽ a dzu ka la gimi! Agimi e dzu pyapyaŋ nga e ri algo e gno egʼba! O wo ba agimi e shri ayakplo ba moa a gbaŋ e shri e da mo mbo, o wo akplokyeŋ angyiŋ?

¹⁷ O wo eka he angyiŋ ta la obmi ba adlidzi! O wo ba alo o wo ta la otum angyiŋ mbo le, o dzu ekplo ototno angyiŋ.

¹⁸ O dzu mbo arekyeŋ á lu mi le, Aŋo o wo la esõ ba obmi ba adlidzi angyiŋ e ma, nga ame e wo la esõ ba o kpo otum angyiŋ. Otnoma me eshri ohe lo, Ame e klo boŋ o tsa me eka ba are a kpo a gbu baŋ a wo la obmi ba adlidzi nga a gbaŋ esõ ba o kpo otum. Ame é tsa gimi obmi ba adlidzi me okro ba otum ba ame e la e kpo.

¹⁹ Agimi e bmi ba adlidzi ba Ahogbrẽ okyekyeŋ sha a wo ma mbo? O wo odzi! Egbgabi a mbo e bmi ba adlidzi ekakahelo, nga egʼba mo e la e zhga ara okyku eyli.

²⁰ Adro arehwĩ! Aŋo o klo moa a tsa ŋo obmi ba adlidzi la o wo ta la otum mbo, ba alo o wo otum ototno angyiŋ?

²¹ Adigi Ebrahim a hwiŋ onyuŋokpo okro ba Ahogbrẽ ekayaŋ? A hwiŋ alo okro ba otum baŋ angyiŋ, omba baŋ a bmi a shri anwye baŋ Eshaku a shri a ndba ambgu lo.

²² Agimi e ka lo ma? Obmi ba adlidzi baŋ ta la otum baŋ, moa a sõ ozhẽ okyekyeŋ angyiŋ. Obmi ba adlidzi baŋ o bli okro otum baŋ.

²³ Nga odlo ba Ahogbrẽ o bli. O lu mi le, Ebrahim a bmi ba adlidzi ta la Ahogbrẽ, nga okyku obmi ba adlidzi baŋ angyiŋ, Ahogbrẽ a sko ŋa eka arehwĩ ba odlodzi. Nga okyku okũ he lo, Ahogbrẽ a bzi Ebrahim a lu mi le, Akyemeazba Ebrahim.

²⁴ Okyku eka he, moa a la a shri onyuŋokpo a zga agʼbaha ba arehwĩ ta la Ahogbrẽ, ozhẽ ekplo baŋ a la a kpo angyiŋ. O wo okro obmi ba adlidzi baŋ a wo la alo ma sha mbo.

²⁵ Alo o wo ozhẽ okyekyeŋ angyiŋ ta la Arahab ashe eshra lo. Okyku otum baŋ angyiŋ, moa a shri onyuŋokpo a zga agʼbaha baŋ ta la Ahogbrẽ. La ovyevye a yga moarehwĩ Eyahuda ba moa a hom mo otum, nga a kpo a ghwo la mo a da mo a zgi a sõ ozhẽ ohwõ a gre.

²⁶ Eka ba ango egʼba la a ta ayaŋ mbo a wo ototno, ekakahelo angyiŋ, obmi ba adlidzi la o wo la otum ma mbo, alo o wo obmi ba adlidzi ba ototno.