Amatiyu 6 - Ohwihwim Olehe

Onyenye eshri okpoghwo

¹ Aŋo o kpo otum ba ozhẽ Ahogbrẽ okyku o da moarehwĩ angyiŋ a ka mbo. O wo boŋ o la o kpo okyku o da moare-hwĩ angyiŋ a ka le, Ahogbrẽ Adoŋ la a wo Ongyeŋ á shri egbre-kyeŋ á shri á doŋ nga mbo.

² Okyku eka he, omba boŋ o la o shri ekplokyeŋ o da are la a wo ekŋe le, aŋo o shri lo o tsa eyayi moare mbo. Moa la a la a nyom egʼba, a kpo ekakahelo angyiŋ anwyeakulu, ta la anyuŋ-ezhẽ. Moa a la a kpo eka he lo okyku o da moare a hlu mo eshko. Agimi e nyuŋ e ka! Edgu moahi lo, moa a sheŋ a hwiŋ egbre mo a bli bgu.

³ Okyku eka he omba boŋ o la o kpo o ghwo are la a wo ekŋe le, aŋo o kpo lo ozhẽ ba akyeŋoazba la a wo kpate a mbo a kpo a gbu baŋ a yi lo mbo.

⁴ Aŋo o da lo a dzu ekplokyeŋ ba eyayi mbo, nga Adoŋ la a la a ka esõ, á shri egbre boŋ á doŋ.

Onyenye eshri ofaolu

⁵ Nga omba boŋ o la o fa olu le, aŋo o kpo eka moa la a la a nyom egʼba a kpo mbo! Edgu moahi lo, moa a la a gno oraŋ o tspi anwyeakulu, ta la anyuŋ-ezhẽ a la a fa olu, okyku o da areyaŋ a mbo a ka mo. Agimi e ka! Moa edgu ahi lo, a sheŋ a hwiŋ egbre mo a bli bgu.

⁶ Okyku eka he omba boŋ o klo o fa olu le, aŋo o yi aku boŋ, nga o shki ayizhẽ, nga o fa olu o vẽ Adoŋ ba moa a ka ŋa a gbu mbo. Adoŋ nga, la a la a ka esõ, á shri egbre á shri á doŋ.

⁷ Omba ba agimi e fa olu le, agimi e lu odlo nzenze eka moaevbu a la a lu mbo. Moa a la a ka eka ba Ahogbrẽ á ba a gno mo okyku olu odzodzõ moa a fa.

⁸ Agimi o kpo eka moa a la a kpo mbo. Ahogbrẽ angyiŋ a wo Adigimi, okyku eka he omba bimi e ka e vẽ ŋa a wo mbo, aŋa a sheŋ a yi ekplo bimi e klo.

⁹ Agimi e fa olu eka he, Adigi la a wo Ongyeŋ, O da gi e hlu eshko boŋ.

¹⁰ O da Oreŋ boŋ o ba. O da gi e kpo ayakplo boŋ o klo obiŋ hi, Eka ba moa a la a kpo la a wo Ongyeŋ.

¹¹ O shri algo bi ba anye o da gi.

¹² O kyu gi abgo odlobi ba agi e la e kpo egi ayi boŋ, Eka bi e la e kyu moa la a kpo odlobi agi ayi bi abgo.

¹³ O da ombambga la o gre gi eshri o hwiŋ gi mbo. O shla gi abgo Eshitaŋ.

¹⁴ Okyku eshi, o wo bimi e la e kyu moahwõ abgo odlobi moa a la a kpo egi ayi bimi le, Adigimi la a wo Ongyeŋ a mbo, á kyu gimi abgo.

¹⁵ Ambo o wo bimi e la e kyu moahwõ abgo odlobi moa a la a kpo egi ayi bimi mbo le, Adigimi la a wo Ongyeŋ a mbo á kyu gimi abgo odlobi bimi e la e kpo egi ayi baŋ mbo.

Onyenye eshri onyomshrialgo

¹⁶ Omba bimi e la e nyom eshri algo le, agimi e kpu eyayi rba-rba eka moa la a la a nyom egʼba a kpo mbo. Moa a la a dzi la eyayi ba embyle okyku o da areyaŋ a mbo a yi ba moa a la a nyom eshri algo. Agimi e ka! Moa a sheŋ a hwiŋ egbre mo a bli bgu.

¹⁷ Omba ba bimi e la e nyom eshri algo le, agimi e ndza ayi bimi, nga e se eshri bimi adzadzi,

¹⁸ okyku o da arekyeŋ a yi bimi e la e nyom eshri algo mbo, okyku o da Adigimi ba moa a la a ka ŋa mbo sha angyiŋ a yi. Adigimi la a la a ka esõ nga, á shri egbre á shri á da gimi.

Angyiŋ la a wo Ongyeŋ

¹⁹ Agimi e kpaŋ angyiŋ-akyeŋ e zga ma obiŋ hi mbo, okyku eshi omle, ta la akpadzidzi a la a tpi lo ayi, nga moasi a la a gom okro moa a shri lo a zga ma nga a la a si lo.

²⁰ Ambo o raŋ o gre bimi e kpaŋ angyiŋ e shri e zga Ongyeŋ angyiŋ. Ahe lo nga, omle, ta la akpadzidzi, moa á tpi lo ayi á gbu mbo, nga moasi á gom á yi á si lo á gbu mbo.

²¹ Alo o wo eka he okyku eshi, esõ are ombamba pyeŋ e wo okro ba angyiŋ baŋ a wo ma angyiŋ.

Ayimom ba egʼba

²² Ayi a wo eka ba ayimom ba egʼba angyiŋ. O wo ba ayi boŋ a wo zheŋ le, egʼba boŋ a mbo e wo zheŋ.

²³ Ambo o wo ba ayi boŋ a wo abi le, egʼba boŋ nga é dzu evbu. Okyku eka he, o wo ba ayimom la a wo egʼba boŋ a zhiŋ a dzu evbu le, evbu lo é wo kpyke é gre eshri!

Ahogbrẽ ta la angyiŋ

²⁴ Arekyeŋ a kpo a gbu baŋ a dzu awaghrẽ ba moarehwĩ aha mbo. O dzu omgbybi baŋ a klo akyakyeŋ sha. O dzu omgbybi baŋ a dzu akyeŋ a zga nga a kŋe eshri baŋ a bga ta la akyeŋ. O wo ekakahelo angyiŋ ka la gimi. Agimi é kpo é gbu bimi é sko Ahogbrẽ ta la angyiŋ, e da mo a ri ekʼpo eshri bimi otsotse mbo.

²⁵ Okyku eka he angyiŋ ame e lu e da gimi, e lu mi le, Agimi e da esõ e ngʼba gimi okyku ekplo bimi é ba e ri nga é wa okyku o da gimi e dzu ma mbo. Agimi e ngʼba esõ eshri aknye bimi é ba e ygi egʼba mbo. E ka, esõ e wo anyuanyuŋ e gre aknye mbo? Egʼba e wo anyuanyuŋ e gre algori mbo?

²⁶ Agimi e ka awunu la a la a dzi, moa a la a fu emakyeŋ mbo, moa a la a yla emakyeŋ mbo, nga moa a wo ebmro ma mbo, ambo Adigimi la a wo Ongyeŋ a la a kpaŋ mo! Agimi e wo anyuanyuŋ e gre awunu mbo?

²⁷ Ayi angyiŋ eshki bimi a kpo a gbu baŋ a ta eyi baŋ ma, o wo baŋ a dzu, nga a la a da esõ e ngʼba ŋa okyku lo?

²⁸ Okyku eshi e la e da esõ e ngʼba gimi okyku aknye? Agimi e ka eka ba ambwumbwi ba akla a la a hlu. Moa a la a kpo otum okyku o kpo aknye okyku emo mbo.

²⁹ Ambo ame e lu e da gimi, Osolomo la a wo angyiŋ nzenze a mbo a ygi aknye la a wo adzi eka ba ambwumbwi he lo a ka mbo.

³⁰ Ahogbrẽ angyiŋ a wo la a kpaŋ asoso ba akla. Asoso lo a ta abyi fi a khwo nga, moa á kpo nga, moa á kpoŋ lo ovo ashle. Okyku eka he aŋa á kpaŋ gimi adzadzi á gre eka he mbo? Obmi ba adlidzi bimi o gaŋ mbo!

³¹ Okyku eka he agimi e da esõ e ngʼba gimi mbo, nga e zhĩ e lu mi le, Algori me, ta la owa-wa me, ta la aknye me, ahi lo á zgi ayaŋ?

³² Edgu anzho he lo angyiŋ, moaevbu a la a bga emo okyku lo ombamba pyeŋ. Adigimi la a wo Ongyeŋ a yi bimi e wo anzho he lo ma mbo.

³³ Okyku eka he, agimi e shri aga pyeŋ e zga Oreŋ baŋ, ta la ekployaŋ a mbo baŋ a la a klo, aŋa nga á shri ayakplo ahwõ pyeŋ á shri á da gimi.

³⁴ Okyku eka he, agimi e ngʼba esõ ekplokyeŋ la e wo ba akyi mbo. Ewu ba akyi e tse ŋa ma. Okyku eka he, o raŋ o gre ba agimi e shri ewu ekyeŋ e ta ewu ba olum ondayaŋ a mbo e la e kpo ma mbo.