Amatiyu 22 - Ohwihwim Olehe

Egŋe eshri oriabgo ba anwyeshe

¹ Eyesu a sa a lu odlo pa la moare a ta egŋe nganga.

² A lu mi le, Oreŋ Ongyeŋ, o wo eka ba areŋ a kpo abgo okyku ba anwye baŋ a kyu ashe.

³ A hom moanwye-odne baŋ otum okyku o da mo a bzi moare ba moa a sheŋ a lu a da mo, okyku o da mo a ba oriabgo lo. Ambo moa pyeŋ, moa a tla o ba-ba.

⁴ Okyku eka he aŋa a sa a hom moanwye-odnekyeŋ otum nganga a lu mi le, Agimi e yi e lu e da moare moa a sheŋ a bzi mo e lu mi le, Moa a dzu a bli gimi a mo, moa a sheŋ a bga andu la a gbrẽ rerereŋ bgu, nga moa a sa a kpo ekployaŋ a mbo a khwo. E lu e da mo a ba oriabgo a mo!

⁵ Ambo moare ba moa a bzi mo, moa a sko lo a zga ekplokyeŋ mbo, okyku eka he areyaŋ a mbo a gre eŋa otum baŋ. Akyeŋ a gre agbi baŋ, ahwõ a gre eŋa akanti baŋ.

⁶ Moakyeŋ nga moa a vu moanwye-odne he lo nga moa a pom mo andzu, nga a bga mo a ta okom.

⁷ Esõ e tpi areŋ lo ayi nzenze, okyku eka he, a da moanwyeakyuŋ baŋ a gre nga a yi a bga mo a ta okom a khwo nga moa a ta osku mo la ovo.

⁸ Ambla he nga aŋa a bzi moanwye-odne baŋ a lu mi le, Moa a nyuŋ ekployaŋ a mbo a kpo okyku oriabgo bgu, ambo moare ba ame e bzi okyku lo, moa a wo shasha okyku obzi mbo.

⁹ Okyku eka he, agimi e yi anyuŋ-ezhẽ ohuhuhi nga e bzi areyaŋ a mbo bimi e hwiŋ, e daŋ a ba.

¹⁰ Okyku eka he nga moanwye-odne moa a gre anyuŋ-ezhẽ eka he, nga moa a bzi moare ba moa a hwiŋ pyeŋ, moa la a wo la eda edzi, ta la eda ebi pyeŋ moa a bzi mo. Aku ba oriabgo nga a bli.

¹¹ Omba ba areŋ a gre o yi o ka moare ibu moa a ri abgo, a ka akyeŋ eshki mo la a ygi ariga ba oriabgo mbo.

¹² Okyku eka he aŋa a nyuŋ ŋa a lu mi le, Akyemeazba, o kpo anyu o gre o ba ahe la ariga ba oriabgo mbo? Ambo are lo a tno akplokyeŋ ku-ku mbo.

¹³ Areŋ nga a nyuŋ moanwye-odne baŋ a lu mi le, Agimi e bʼbu ŋa endzi abgo, ta la adga, nga e shri ŋa e ndbi e ta evbu. Ahe lo nga, aŋa á wu okũ á taŋ azhga anyu.

¹⁴ Eyesu nga a sa a lu a ta ma-ma a lu mi le, Moa a bzi moare nzenze, ambo eshki mo, moare fi sha moa á sla.

Ozhiozhĩ eshri ohre eivaŋ

¹⁵ MoaEfarisi a klo ozhẽ okyku o da mo a kpyi Eyesu la ozhiozhĩ.

¹⁶ Ambla he nga, moa a da moanwyeotum mo, pa la moa la a lu Ehirudu ma a gre okro Eyesu. Moa a zhĩ ŋa a lu mi le, Andakʼpo, agi e yi boŋ o wo are ba adlidzi angyiŋ, o la o nye moare adlidzi eshri odlo ba Ahogbrẽ. Nga aŋo o la o kpo eyli ayakplo ba moare a tne eshri lo mbo.

¹⁷ O lu o da gi, aŋo o ka anyu? Odaŋ bi o bmi bi e hre ewaŋ e da Ekeza le, o bmi mbo?

¹⁸ Eyesu a ka a bmye ba moa a ba okyku o kpyi ŋa okpyi angyiŋ. Okyku eka he aŋa a nyuŋ mo a lu mi le, Agimi abibli moarehwĩ! Okyku eshi agimi e klo e kpyi me?

¹⁹ Agimi e shri eyiamgbaŋ ba ohre ewaŋ e da me e ka! Moa a shri eyiamgbaŋ a kom ŋa.

²⁰ Ambla he nga, a zhĩ mo a lu mi le, Eshri ayi, ta la eshko ayi e wo ma? Moa a tno ma a lu mi le, E wo ba Ekeza angyiŋ.

²¹ Okyku eka he nga, Eyesu a tno mo ma a lu mi le, Agimi e shri ekplo la e wo ba Ekeza e shri e daŋ, nga ekplo la e wo ba Ahogbrẽ, e shri e da Ahogbrẽ.

²² Ambla ba moa a gno edgu otnoma hi nga, moa a ka egbregbre a gre eshri. Moa a dzu ŋa a zga nga moa a zhiŋ ogbu a gre emo.

Ozhiozhĩ eshri oksoeku

²³ Onda he lo nga, moaEsaduki a ba okro Eyesu. MoaEsaduki, moa a bmi ba adlidzi ba moare á ba a kso eku mbo.

²⁴ Moa a zhĩ Eyesu a lu mi le, Andakʼpo, Omusa a nye a lu mi le, O wo ba are a wo anwye ma mbo nga baŋ a kpu le, o dzu omgbybi ba anáŋ a sko ashe-eshaku baŋ a kyu okyku o daŋ a mbre moanwye okyku ŋa.

²⁵ O ka, moanáŋ afoha a wo ma. Andakʼpo ekpyemgbyeŋ a kyu ashe. A kpu omba baŋ a ka a wo la anwye ma mbo. Nga a dzu ashe-eshaku a zga anáŋ.

²⁶ Ekakahelo e kpo ta la anáŋ ba oha, pa la ba otra ma-me ta la moa afoha a mvye.

²⁷ Amom-abgo pyeŋ nga, ashe lo a kpu.

²⁸ Onda ba moare á ba a kso eku le, ashe lo á dzu ashe ba ayi? O ka, moa pyeŋ angyiŋ a kyu ŋa!

²⁹ Ambo Eyesu a tno mo ma a lu mi le, Agimi e lu odlo ototno e gre eshri! Agimi e lu eka he okyku bimi e ka Odlo Ahogbrẽ, ta la ekʼpo ba Ahogbrẽ e bmye mbo angyiŋ.

³⁰ Okyku eshi omba ba moare la a kpu á ba a kso eku, moa á zhiŋ á dzu eka moanwyeadga ba Ahogbrẽ angyiŋ Ongyeŋ. Nga moarealom pa la moashe, moa á kyu eble nga mbo.

³¹ Nga eshri oksoeku, agimi e tsi akpa e ka eka ba Ahogbrẽ a lu a da gimi mbo? Aŋa a lu mi le,

³² Ame angyiŋ e wo Ahogbrẽ ba Ebrahim ta la a ba Eshaku, ta la a ba Eyakubu. Ohe lo o tsa baŋ a wo Ahogbrẽ moa la a wo la esõ ma, a wo Ahogbrẽ moa la a kpu mbo.

³³ Omba ba moare a gno eka he nga, moa a ka egbregbre nzenze ta la edgu onyenye ba Eyesu.

Anyuŋ Odaŋ

³⁴ Omba ba moaEyahuda a gno ba Eyesu a lu odlo a so moaEsaduki ayi nga, moa a pla emo a shki.

³⁵ Akyeŋ eshki mo, aŋa angyiŋ a wo are la a nye odaŋ, a klo okyku o kpyi ŋa la ozhiozhĩ.

³⁶ A zhĩ ŋa a lu mi le, Andakʼpo, odaŋ-oyaŋ angyiŋ o wo anyuanyuŋ o gre pyeŋ?

³⁷ Eyesu a tno ŋa ma a lu mi le, O dzu omgbybi boŋ o klo Adigi-odne Ahogbrẽ boŋ la esõ boŋ pyeŋ, la oshye boŋ pyeŋ, la aga boŋ pyeŋ.

³⁸ Odaŋ he lo angyiŋ o wo anyuanyuŋ o gre pyeŋ.

³⁹ Odaŋ ba oha la o wo anyuanyuŋ nzenze eka ba odaŋ ba ori nga, o lu mi le, O klo are la a lom osusku ka la ŋo eka boŋ o klo eshri boŋ.

⁴⁰ Odaŋ ba oha he lo angyiŋ o wo esĩ ba odaŋ ba Omusa, ta la onyenye moarehwĩ ba Ahogbrẽ a hom mo otum.

Ozhiozhi eshri ba Emisiya

⁴¹ Omba moaEfarisi a kŋe eshri mo a bga okro okyekyeŋ nga, Eyesu a zhĩ mo a lu mi le,

⁴² Agimi e tne aga anyu eshri ba Emisiya? A wo a ba ogu ba ayi angyiŋ? Moa a tno ma a lu mi le, Aŋa a wo a ba ogu ba Adawuda angyiŋ.

⁴³ Eyesu a zhĩ a lu mi le, O wo ba alo o wo eka he angyiŋ le, okyku eshi Ogbgaodzi o tsa Adawuda o daŋ a bzi ŋa ma Adaŋ-odne? O ka, Adawuda a lu mi le,

⁴⁴ Ahogbrẽ a nyuŋ Adime-odne a lu mi le, O dzu obgori me, O tsa ba ame e da moafpu ŋo a tsi a gbu egi ayi boŋ.

⁴⁵ O wo ba Adawuda a mbo a bzi ŋa ma Adaŋ-odne le, Emisiya a kpo anyu a dzu a ba ogu ba Adawuda?

⁴⁶ Arekyeŋ a kpo a gbu baŋ a tno Eyesu akplokyeŋ mbo ku-ku. A zgi onda he lo nga moa a zhĩ ŋa ekplokyeŋ ku-ku nga mbo.