Amatiyu 16 - Ohwihwim Olehe

Moa a zhĩ okyku akplo ba egbregbre

¹ MoaEfarisi, pa la moaEsaduki, moa a ba okro Eyesu. Moa a klo o kpyi ŋa. Okyku eka he nga moa a zhĩ ŋa okyku o daŋ a kpo ekplo egbregbre la é tsa baŋ a wo arehwĩ ba Ahogbrẽ a hom ŋa otum.

² Ambo Eyesu a tno mo ma a lu mi le, Omba ba olum o la o gbu le, agimi e la e lu mi le, Akyi a yi á kre adzadzi okyku ba ahrẽ a wo zheŋ.

³ Nga endigigiŋ agimi e la e lu mi le, Ogbu ó ba okyku ba ogbu o hwĩ. Agimi e kpo e gbu bimi e ka e bmye eka ba ahrẽ a wo omba bimi e ka lo, ambo agimi e kpo e gbu bimi e lu akplo-kyeŋ eshri egbregbre ayakplo la a kpo omba he mbo!

⁴ Moarehwĩ ba ekplu hi moa a wo abi a gre eshri, nga moa a yi Ahogbrẽ mbo ku-ku! Eyesu a sa a lu a ta ma-ma a lu mi le, Agimi e zhĩ me okyku ekplokyeŋ ba egbregbre? Ame é shri ekplokyeŋ ba egbregbre é shri é da gimi mbo, o wo le ekplo egbregbre ba Oyunana a kpo dne ame e klo bimi e tne aga lo. Ambla he nga, a kso a dzu mo a zga nga a gre eŋa.

Eyist ba moaEfarisi pa la moaEsaduki

⁵ Omba moanwyeotum a bmyi atam a yi a gre ongre ohwõ, moa a gre esõ a ghre moa a sko agbrotsa mbo.

⁶ Eyesu a nyuŋ mo a lu mi le, Agimi e nyuŋ e kpo-kpo ta la eyist moaEfarisi, pa la moaEsaduki.

⁷ Moa a gno eka he a khwo nga moa a lu ta la emo a lu mi le, Aŋa a la a lu eka he okyku bi e shri agbrotsa mbo angyiŋ.

⁸ Eyesu a yi ekplo moa a lu, okyku eka he a zhĩ mo a lu mi le, Okyku eshi agimi e lu odlo eshri agbrotsa, eshri odlo ba ame e lu hi ta la egimi? Obmi ba adlidzi bimi o wo fi sha eka he angyiŋ?

⁹ Ma-me o ta ohuhuhi agimi e ka e bmye a wo mbo? Agimi e gre esõ e ghre eka ba ame e vgi moare ezbietno la agbrotsa atno? Ekplo la e ra nga e bli aksu ahrẽ?

¹⁰ Agimi e ka, moa a vgi moare ezbienyi la agbrotsa afoha mbo? Ekplo la e ra e bli aksu ahrẽ?

¹¹ Okyku eshi angyiŋ agimi e sko odlo ba ame e lu ka la gimi hi, e shri e zga eshri agbrotsa? Agimi e nyuŋ e kpo-kpo ta la eyist moaEfarisi, pa la moaEsaduki!

¹² Omba he lo, moanwyeotum baŋ a ka a bmye baŋ a ta egŋe eshri eyist ba moa a shri a ygi agbrotsa angyiŋ mbo, ambo moa a ka a tspi baŋ a ta egŋe eshri onyenye moaEfarisi, pa la moaEsaduki.

Ebitru a ka Eyesu a bmye

¹³ Eyesu a gre ogʼba obiŋ la o wo osusku ta la osku ba Esizariya Efilibi. Ahe lo Eyesu a zhĩ moanwyeotum baŋ a lu mi le, Moare a la a bzi Anwye Arehwĩ ma ayi?

¹⁴ Moa a tno ŋa ma a lu mi le, Moakyeŋ a la a bzi ŋo ma Eyohana la a kpo abaptisma, moakyeŋ nga moa a la a bzi ŋo Eliya, moakyeŋ nga moa a la a bzi ŋo Erimiya, moakyeŋ a la a lu ma aŋo o wo arekyeŋ ba Ahogbrẽ a hom ŋa otum angyiŋ.

¹⁵ Eyesu a zhĩ mo a lu mi le, Agimi e la e bzi me ma ayi?

¹⁶ Esima Ebitru a tno ŋa ma a lu mi le, Aŋo angyiŋ o wo Emisiya Anwye ba Ahogbrẽ la a wo la esõ ma.

¹⁷ Eyesu a nyuŋ Ebitru a lu mi le, Aŋo Esima, anwye Eyohana, oraŋ o wo ma okyku ŋo nzenze. O ka, arehwĩ angyiŋ a tsa ŋo adlidzi hi lo mbo, ambo Adugu la a wo Ongyeŋ angyiŋ a tsa ŋo alo.

¹⁸ Okyku eka he ame e lu e doŋ, Ebitru, aŋo o wo ezhim angyiŋ. Nga ame é mbdzi akulu me ezhim hi lo. Eku a mbo é kpo é gbu ba alo é ba e kpo é gre lo mbo.

¹⁹ Ame é shri emakuli ba Oreŋ Ongyeŋ é shri é doŋ. Ekplo boŋ o tla lo obiŋ hi, moa á tla lo a mbo Ongyeŋ. Ekplo boŋ o bmi ta la alo obiŋ hi, moa á bmi ta la lo Ongyeŋ.

²⁰ Ambla he nga Eyesu a shĩ moanwyeotum baŋ a lu mi le, Agimi e lu e da arekyeŋ ba ame angyiŋ, e wo Emisiya mbo.

Eyesu a lu eka moa á kpo ŋa ewu nga á bga ŋa

²¹ A zga omba he lo nga, Eyesu a lu odlo pim pa la moanwyeotum baŋ a la a lu mi le, O dzu omgbybi ba ame é ba e yi Orushalima, nga ba ame é ba e kpo ewu abgo moandakʼpo, pa la moandakʼpo olu ba Ahogbrẽ, pa la moa la a nye odaŋ. Moa á bga me, ambo olum otra nga moa á kso me ongybi.

²² Ambla he nga Ebitru a shri Eyesu a gre agba-kyeŋ nga a shrom ŋa a lu mi le, Ahogbrẽ a nyom ekplo hi lo, aŋo Adigi-odne! Ohi lo ó kpo ka la ŋo mbo ku-ku!

²³ Eyesu a zhiŋ ayi a ka Ebitru nga a nyuŋ ŋa a lu mi le, Aŋo Eshitaŋ! O kye o sku me! Aŋo o dzu oyla angyiŋ pa la me, okyku eshi aga boŋ hi a wo aga ba arehwĩ angyiŋ, a wo aga ba Aho-gbrẽ angyiŋ mbo!

²⁴ Eyesu a sa a lu pa la moanwyeotum baŋ a lu mi le, O wo ba are a klo o lu me ma le, aŋa a shri eshri baŋ a ndba nga a bmi o kpo ewu ma-me la eku a mbo okyku me, nga a lu me ma.

²⁵ Are la a klo o kpo ekployaŋ a mbo okyku ohwihwiŋ ba eshri baŋ sha le, á yla. Ambo are la a shri eshri baŋ a ndba okyku me le, á hwiŋ esõ.

²⁶ O wo ba arehwĩ a hwiŋ ohwihwiŋ obiŋ hi pyeŋ, ambo o wo ba esõ baŋ é ba e yla le, o wo ekplokyeŋ angyiŋ? O wo ekplokyeŋ tsitsi a mbo mbo! Ekplokyeŋ e wo ma ba are a shri a di okyku o daŋ a sa a hwiŋ esõ baŋ mbo.

²⁷ Omba o wo osusku a mo ba Anwye Arehwĩ á ba a ba la ayimom ba esesla ba Adaŋ, ta la moanwyeadga ba Adaŋ. Omba he lo angyiŋ, á ba a shri egbre areyaŋ a mbo á ba a shri á daŋ eka otum ba are a kpo obiŋ hi.

²⁸ Agimi e tne aga e ka! Moakyeŋ eshki hi, moa á kpu mbo, o wo le moa á ka obaba ba Anwye Arehwĩ á ba a ba eka Areŋ ayga.