Amatiyu 11 - Ohwihwim Olehe

Moanwyeadga ba Eyohana la a kpo abaptisma

¹ Omba ba Eyesu a lu odlo pa la moanwyeotum baŋ otsko lo a khwo nga, aŋa a kso okro he lo a gre a yi a nye moare, nga a nyum oshpa esku la e wo osusku ta la okro he lo.

² Omba he lo, moa a vu Eyohana la a kpo abaptisma a sheŋ a ta aku. Omba ba Eyohana a gno oshpa ba otum Eyesu a kpo nga, a hom moanwyeotumakyeŋ eshki ba moanwyeotum baŋ otum a da mo a gre okro Eyesu.

³ Moa a zhĩ ŋa a lu mi le, Eyesu, aŋo o lu o da gi, aŋo angyiŋ o wo are ba Eyohana a su ma aŋa á ba le, agi e ka ayi ozhẽ okyku arekyeŋ ondundum?

⁴ Eyesu a tno mo ma a lu mi le, Agimi e bla e yi okro ba Eyohana, nga agimi e lu oshpa ayakplo bimi e gno, nga e ka e daŋ.

⁵ Agimi e lu e daŋ eka ba ame e hwile moavgayi ayi, nga e shaŋ moa la a buŋ adga, pa la moa la a gbu eshru, pa la moa la a som atuŋ, nga e vro moare la a kpu. Nga agimi e lu e daŋ eka ba ame e la e nyum oshpa e ygi moa la a wo ekŋe.

⁶ Are la a fu eha me esõ baŋ mbo le, a wo la ovye ma nzenze!

⁷ Omba ba moanwyeotum ba Eyohana a zhiŋ ogbu a yi nga, Eyesu a lu odlo ta la eshki moare eshri Eyohana. Aŋa a zhĩ mo a lu mi le, Omba bimi e gre okro Eyohana akla, agimi e gre okyku o ka eshi? Agimi e gre okyku o ka eka ba ogbga o la o hlu emgbu agzu angyiŋ le?

⁸ Agimi e gre okyku o ka eshi angyiŋ? Agimi e mbi e gre okyku o ka arekyeŋ la a ygi anzho bibibli angyiŋ? Moa la a ygi anzho eka he lo, a la a dzu ekpazhi moareŋ angyiŋ!

⁹ Agimi e mbi e klo o ka eshi angyiŋ? Agimi e tno me ma. Agimi e la e ka ma agimi é ka are ba Ahogbrẽ a hom ŋa otum? Adlidzi angyiŋ ame e lu e da gimi, are bimi e ka hi lo, a gre are ba Ahogbrẽ a hom ŋa otum a mbo.

¹⁰ Alo o wo eka he lo angyiŋ, okyku eshi Eyohana hi lo a wo are ba Odlo Ahogbrẽ o lu mi le, Ahogbrẽ a lu mi le, E ka anwyeadga me, ame é daŋ a yi a sku ŋo okyku o daŋ a yi a vu okro abgo okyku ŋo.

¹¹ Agimi e tne e ka, Eyohana hi lo, a wo anyuanyuŋ a gre areyaŋ a mbo eshki moare bimi e la e gno oshpa mo obiŋ hi. Ambo are la a ba Oreŋ Ongyeŋ amom-abgo, a sa a wo anyuanyuŋ a sa a gre Eyohana a mbo nganga.

¹² A zga omba ba Eyohana a nyum oshpa ma-me a ta anye he, Oreŋ Ahogbrẽ o kpo ewu o gre eshri. Moareabi a la a klo ezhẽ okyku o jygi lo.

¹³ Moare ba Ahogbrẽ a hom mo otum mvye, ta la odaŋ ba Omusa, moa a la a nye moare eshri Oreŋ Ongyeŋ ayga Eyohana a sa a ba a nye a ta ma.

¹⁴ Okyku eka he o wo bimi e klo e bmi ba adlidzi ta la oshpa lo bgu le, agimi e bmi ba adlidzi, okyku eshi Eyohana angyiŋ a wo Eliya ba moa a lu odlo eshri baŋ ma aŋa á ba.

¹⁵ Agimi e ngli atuŋ e gno o wo bimi e wo atuŋ ba o gno odlo ma le!

¹⁶ O wo ba alo o wo eka he le, ame é ta egŋe eshri moare-hwĩ ba ekplu hi ekayaŋ? Moa a wo eka moanwye la a kpo ekpyle asaŋ ekyku ototno. O dzu eka eshki ehwõ e la e lu e da eshki ehwõ e lu mi le,

¹⁷ Agi e bmmi ama okyku o da gimi e zhga ara, ambo agimi e zhga ara mbo! Agi e fu abmo eku, ambo agimi e wu okũ mbo!

¹⁸ Omba ba Eyohana a ba a la a nyom eshri baŋ algo, nga a wa ami anab la a no mbo. Ambo areyaŋ a mbo a sko ŋa a zga adro!

¹⁹ Anwye Arehwĩ a ba nga, a la a ri nga a wa, nga areyaŋ a mbo a lu odlo ototno eshri baŋ a lu mi le, Ahi lo, a wo ambyela, ta la are la a wa ami anab la a no, nga a sa a wo la a ri ekpom pa la moa la a yga ewaŋ, pa la moaedlobi! Otum okaobmye ba Ahogbrẽ o kpo, o tsa gi zhezheŋ eka ba okaobmye he lo o wo adlidzi angyiŋ.

Esku la e bmi ba adlidzi mbo

²⁰ Ambla he nga, Eyesu a shraŋ esku baŋ a la a kpo ayakplo egbregbre nzenze ma, okyku eshi moare a ghwo obiŋ mbo.

²¹ Eyesu a nyuŋ esku eha hi lo, a lu mi le, Aŋo Okoroziŋ, ta la Ebetseda, a ba eshri bimi! O wo moa a kpo edgu ayakplo ba egbregbre moa a kpo hi Ataya, ta la Esidoŋ angyiŋ e mbi, moare a sheŋ a ygi ashezhga aknye nga a fa otutuŋ a ygi egʼba okyku o tsa ba moa a ghwo obiŋ odlobi mo.

²² Agimi e ka, Onda Ombgu Ahogbrẽ á ka moarehwĩ ba Ataya ta la Esidoŋ, ayiekŋe á gre gimi!

²³ Aŋo Akafanahum! Aŋo o klo o si eŋo o yi ongyeŋ? Ambo, moa á shri ŋo á ta enzheovo! Moa a kpo edgu ayakplo egbregbre ba moa a kpo hi osku ba Osodom angyiŋ e mbi, alo o yi o wo ma ma-me a bli anye he!

²⁴ Aŋo o ka, Onda Ombgu, Ahogbrẽ á ka Osodom ayiekŋe á gre ŋo!

E ba e hwiŋ odzudum okro me

²⁵ Omba he lo nga Eyesu a lu mi le, Adugu, Adigi-odne la a ri Oreŋ Ongyeŋ ta la obiŋ hi! Ame e vye la ŋo okyku boŋ o tsa moare la a yi ekplokyeŋ mbo, eshyẽ ba odlo boŋ, nga o ra moa la a wo okaobmye la o wo ogyugyuŋ, pa la moa la a yi engla nzenze o zga.

²⁶ Adugu, aŋo o kpo eka he okyku ba alo o raŋ ŋo esõ.

²⁷ Adugu a kyu ekployaŋ a mbo abgo a shri a ghwo abgo me. Arekyeŋ a yi Anwye lo mbo ku-ku, o wo le Ada sha. Arekyeŋ nga a yi Ada lo mbo, o wo le Anwye sha, pa la moare ba Anwye lo a da mo a ka ŋa a bmye.

²⁸ Agimi la e kpo ewu la oshri la o lbi, e ba okro me, ame é shri odzudum é da gimi.

²⁹ Agimi e da me e ri ekʼpo eshri bimi, nga e nye ibu me, okyku eshi ame e wo la esõ ble-ble pa la opresõ-obiŋ, nga agimi é hwiŋ odzudum.

³⁰ Edgu ekʼpo ba ame e ri eshri bimi nga, é kpo gimi ewu tsi a mbo mbo. Nga oshri ba ame é shri é da gimi ó lbi mbo ku-ku.