Amarku 5 - Ohwihwim Olehe

Eyesu a shaŋ alomakyeŋ ba egbgabi e kpo otum ka la ŋa

¹ Eyesu pa la moanwyeotum baŋ a gre akaŋ etetne ba atam ba Egalili obiŋ ba Egeraseni.

² Ambla ba Eyesu a zgi amgblami nga, alomakyeŋ a zgi engybi a ba a ka ŋa.

³ Ogbgabi o kpo otum ta la alom he lo, nga a la a lom engybi eshyẽ. Arekyeŋ a bʼbu ŋa la aslika a gbu mbo.

⁴ Engyi oshushku moa a ta ŋa agbu ba ahwre, adga ta la abgo. Ombayaŋ a mbo a sheŋ agbu ta la aslika moa a ta ŋa, nga a gre areyaŋ a mbo abgo.

⁵ Elelum ta la okyukyku, a la a dzi egi engybi, ta la akukũ, a la a wu okũ nga a ta akhi, nga a la a ta eŋa etsa la ézhim.

⁶ A gyuŋ ple omba baŋ a ka Eyesu, ambo a knye a ba okro Eyesu nga a kʼpu obiŋ egi ayi baŋ.

⁷ A ta enzi angyangyeŋ a lu mi le, Eyesu Anwye Ahogbrẽ ba esesla aŋo o klo eshi pa la me? Ame e vẽ ŋo eshko ba Ahogbrẽ, o wo boŋ o bmi le, o kyu me abgo.

⁸ Alom lo a lu eka he omba ba Eyesu a nyuŋ ogbgabi la o wo ka la ŋa, ma alo o zgi o sku ŋa.

⁹ Eyesu nga a zhĩ alom lo a lu mi le, Eshko boŋ e ri ayi? A tno ma a lu mi le, Eshko me e ri Nzenze. Agi e wo nzenze.

¹⁰ Alom lo a vẽ Eyesu okyku o daŋ a kyku egbgabi e sku obiŋ lo mbo.

¹¹ Osusku ta la okro he lo, moa a la a vgi okóko nzenze akaŋ akũ.

¹² Egbgabi e vẽ Eyesu e lu mi le, O wo boŋ o bmi le, o da gi e yi e gre egʼba ba okóko.

¹³ Eyesu a bmi nga, egbgabi e zgi e yi e gre egʼba ba okóko ezbieha he lo. Okóko lo o tsu o gre atam nga o kpu.

¹⁴ Moare la a kpaŋ okóko a knye a gre osku ta la agbi moare nga a da mo oshpa eshri ekplo egbregbre la e kpo.

¹⁵ Moare a knye a ba okro Eyesu nga moa a ka alom ba egbgabi nzenze e la e kpo otum ka la ŋa, a ygi aknye egʼba nga a dzu obiŋ la eda zhezheŋ. Moare nga a kpo eyli.

¹⁶ Moare la a ka eka ekplo la e kpo ta la are ba egbgabi e kpo otum ka la ŋa nga ta la okóko, moa a yi a lu a da moahwõ.

¹⁷ Okyku egbregbre ekplo la e kpo, moare a nyuŋ Eyesu ma a kso a sku obiŋ mo.

¹⁸ Omba ba Eyesu a gre amgblami nga, alom la a shaŋ he lo, a vẽ Eyesu a lu mi le, O wo boŋ o bmi le ame e klo e yi ka la ŋo.

¹⁹ Ambo Eyesu a bmi mbo. A tno ŋa ma a lu mi le, Aŋo ó yi pa la me mbo, ambo o bla o yi odne boŋ nga o lu o da moanóŋ eka ba Ahogbrẽ a ka ŋo ayiekŋe nga a kpo a ghwo la ŋo.

²⁰ Alom he lo a kso a dzi esku okʼpo ba obiŋ ba Edekapoli nga a lu ekplo ba Eyesu a kpo ka la ŋa a da mo nga moare a ka egbregbre nzenze.

Oshpa ba anwye-alashle ba Ojayiru ta la ashe la a tka oknye Eyesu

²¹ Eyesu a ba akaŋ olum-ore ba atam Egalili. Moare nzenze a ba a shki okro baŋ.

²² Ojayiru andakʼpo ba anwyeakulu, omba baŋ a ka Eyesu nga a ba a kʼpu obiŋ egi ayi baŋ.

²³ La ozgayi a vẽ ŋa a lu mi le, O ka, anwye-alashle me a no ababi, o wo boŋ o bmi le o ba o tka ŋa nga o daŋ a shaŋ.

²⁴ Eyesu a kso ka la ŋa, a yi nga moare nzenze a lu mo ma, nga moa a fye ŋa kpate.

²⁵ Ashekyeŋ a wo ma la a wo egi ehwõ, o kpo nga o zhiŋ o dzu olo. A no olo eyi otsko.

²⁶ A tpi amgbaŋ baŋ ayi mvye a la a wa agum ambo a shaŋ mbo. Olo lo o sa o ta ma-ma angyiŋ.

²⁷ A gno oshpa Eyesu, okyku eka he, aŋa a gre eshki lo nga a tspi egi okũ Eyesu.

²⁸ A lu esõ baŋ a lu mi le, O wo ame e tka oknye baŋ sha a mbo ame é shaŋ.

²⁹ A tka oknye Eyesu nga ebuebu amanzhli baŋ a tspi, nga esõ e gbu ŋa obiŋ okyku eshi a yi baŋ a shaŋ.

³⁰ Ekʼpo ba Eyesu a la a shaŋ moare la alo, e tsa ŋa, okyku eka he a zhiŋ ayi a ka moare nga a zhĩ mo a lu mi le, Ayi a tka oknye me?

³¹ Moanwyeotum baŋ a tno ŋa ma a lu mi le, Aŋo o ka ba eshki e wo nzenze mbo? Aŋo o zhĩ eka he, aŋo o kpo anyu o ba o yi are la a tka ŋo?

³² Ambo Eyesu a ka eshki tki, okyku o daŋ a ka are la a tka ŋa.

³³ Ashe he lo a ka a bmye nga a ba egi ayi Eyesu la eyli, la egʼba ezhgara, a ba a kʼpu obiŋ egi ayi baŋ, nga a lu adlidzi a daŋ.

³⁴ Eyesu a nyuŋ ŋa a lu mi le, Anwye-alashle me, obmi ba adlidzi boŋ o shaŋ ŋo. O yi ŋo la esõ ekyle.

³⁵ Omba ba Eyesu a lu odlo ta la ashe he lo, otum o zgi odne Ojayiru o ba o lu mi ma Ojayiru a kpo Eyesu ewu a daŋ a yi odne baŋ nga mbo, ma anwye baŋ a sheŋ a kpu bgu.

³⁶ Eyesu a sko ekplo moa a lu a da lo e dzu ŋa ekplokyeŋ mbo, nga a nyuŋ Ojayiru a lu mi le, O kpo eyli mbo, ambo o bmi ba adlidzi.

³⁷ Eyesu a bmi arekyeŋ a dzi ka la ŋa mbo o wo le Ebitru, ta la Eyakubu, ta la Eyohana anáŋ Eyakubu.

³⁸ Omba moa a gbu odne Ojayiru nga, moa a ka okro o som ayi la okũ eku.

³⁹ Eyesu a gre aku ba anwyeshe lo a lom ma nga a zhĩ mo a lu mi le, Okyku eshi agimi e som okro ayi la okũ eku? Anwye lo akpu mbo. A ndze enu angyiŋ.

⁴⁰ Eyesu a lu odlo a khwo nga, moare a lu odlo ototno eshri baŋ. A da moare mvye a zgi edzi o wo le anaŋ anwyeshe lo, ta la adaŋ sha, pa la moanwyeotum baŋ atra sha a ra a dzu aku lo.

⁴¹ Eyesu a kom anwyeshe lo obgo nga a lu la olomokyeŋ a lu mi le, Talita kum, o dzu, Ame e lu e doŋ eyi anwyeshe, o kso.

⁴² A kso embambaŋ nga a dzi. Ekplo he lo e dzu egbregbre e gre eshri okro moare, nga e kpo mo akpyki. Eyi anwyeshe he lo e wo eyi otsko sha ayga.

⁴³ Eyesu a shĩ mo a lu mi le, E lu e da arekyeŋ mbo, ambo e shri algo e kom anwyeshe he lo e daŋ a ri.