Amarku 4 - Ohwihwim Olehe

Egŋe ba arekyeŋ la a ta edgo agbi

¹ Eyesu a sa a nye moare akaŋ atam ba Egalili, moare a wo ma nzenze okyku eka he Eyesu a gre a yi a dzu amgblami. Amgblami a wo akaŋ atam nga moare a tspi oshyi.

² Eyesu a nye mo la egŋe nzenze. Onyenye baŋ a nyuŋ mo a lu mi le,

³ Agimi e ka, alomakyeŋ a gre o yi o ta edgo agbi baŋ.

⁴ Omba baŋ a ta edgo lo agbi nga, eyiebze e gro e gbu akaŋ ozhẽ nga awunu a ri lo.

⁵ Eyiebze nga e gro e gbu awro ezhim ba obiŋ o wo ma nzenze mbo. Okyku eka he nga alo e zgi shoshoŋ.

⁶ Nga omba ba olum o tra nga, eyi la e zgi e kpu okyku ba e ta emgbʼbo e gre obiŋ ogyugyuŋ mbo nga obiŋ o bmye ovo.

⁷ Eyiebze e gro e gbu okũ asĩ afpu, asĩ afpu nga a hlu a kha eyi la e zgi. Okyku eka he, e hlu e kpo ashri mbo.

⁸ Eyiebze e gro e gbu obiŋ odzi nga e zgi, nga e hlu e kpo ashri adzadzi. Ashriabze a kpo eyi ekʼpoetra, abze a kpo ekʼpoefĩ nga abze a kpo eyi endgaekyeŋ.

⁹ Eyesu a nyuŋ moare a lu mi le, Agimi e kpo atuŋ ba o gno odlo le, e ngli e gno.

Ekplo la e da Eyesu a nye la egŋe

¹⁰ Omba ba eshki e som ayi, moabze la a gno onyenye ba Eyesu ta la moanwyeotum baŋ otsko, a ba okyku o da Eyesu a hwile egŋe baŋ a nye moare pim a da mo a ka.

¹¹ Eyesu a tno mo ma a lu mi le, Ahogbrẽ a tsa gimi eshyẽ ba Oreŋ baŋ. Ambo moahwõ la a wo egi edzi moa a gno ekployaŋ a mbo la egŋe angyiŋ,

¹² okyku eshi Ibu okoka moa a ka, ambo moa a ka a bmye mbo, Ibu ogogno moa a gno, ambo moa a ka a bmye mbo, Okyku eshi o dzu mbo, moa á zhiŋ á ba okro Ahogbrẽ, Nga Ahogbrẽ á kyu mo abgo odlobi mo.

Eyesu a sla egŋe ba are la a ta edgo

¹³ Eyesu a zhĩ mo a lu mi le, Agimi e ka egŋe he lo e bmye mbo? O wo bimi e ka lo e bmye mbo, agimi é kpo anyu é ba e ka egŋe ehwõ é bmye?

¹⁴ Are la a ta edgo, a la a ta odlo Ahogbrẽ.

¹⁵ Odlo la o gbu akaŋ ozhẽ, o dzu eka moare la a gno lo nga ba Eshitaŋ e ba e ngʼga lo e sku mo.

¹⁶ Moahwõ a dzu eka ba eyi la e gbu onmwre ba obiŋ o wo ma nzenze mbo. Omba moare la a gno odlo nga, moa a yga lo la ovyevye.

¹⁷ Ambo moa a yga lo la osheshye esõ mo mbo, okyku eka he omba ba ewu e ba eshri lo, ebuebu moa a tla lo.

¹⁸ Moahwõ a dzu eka ba eyi moa a ta lo okũ asĩ afpu. Moahi lo a dzu eka moa la a gno odlo Ahogbrẽ.

¹⁹ Ambo ewu obiŋ hi, ta la oklo angyiŋ ba obiŋ hi, ta la okayiogro ba anzho obiŋ hi o nyom odlo lo o kpo ashri.

²⁰ Ambo moahwõ a wo eka ba eyi moa a fu obiŋ la o wo erim ma. Moahi lo a gno odlo Ahogbrẽ, nga moa a yga lo, nga moa a kpo ashri. Ashriabze a wo eyi ekʼpoetra, abze a kpo eyi ekʼpoefĩ, nga abze a kpo eyi endgaekyeŋ.

Emgbuovo

²¹ Eyesu a sa a zhĩ moare a lu mi le, O wo moa a ta ovo emgbuovo, moa a la a shri atku a shum lo le, moa a la a shri lo a zga okũ amgbla o lom ma le, moa a la a shri lo a kha eshum angyiŋ?

²² Ekployaŋ a mbo moa a ghre lo le é gbu edzi, nga ekployaŋ a mbo moa a pre lo odga, é sa é zgi.

²³ Eyesu a lu mi le, Are la a wo atuŋ ma ba o gno, a ngli a gno.

²⁴ Nga a sa a nyuŋ moare a lu mi le, E nyuŋ e kpo-kpo ta la akplo bimi e gno, la odaŋ bimi e la e sõ moare ombgu, la alo Ahogbrẽ á ba a sõ gimi ombgu. Ombgu bimi ó sa ó lbi ó gre o mo a mbo nganga.

²⁵ Are la a wo emakyeŋ ma le, moa á shri á ta ŋa ma, ambo are la a wo emakyeŋ ma mbo le, moa á ngʼga ela fi baŋ a wo alo ma á sku ŋa.

Egŋe eshri anzho moa a fu

²⁶ Eyesu a sa a lu mi le, Oreŋ Ongyeŋ o wo eka arekyeŋ la a fu eyi anzho agbi baŋ.

²⁷ Areagbi a ndze enu okyukyku, nga a kso elelum. Eyi e zgi nga e hlu ombayaŋ a mbo, ambo a yi eka ba alo e hlu mbo.

²⁸ Obiŋ o la o da eyi anzho e hlu nga e kpo eyi. Oriori owyi o la o zgi ambla he nga eshri e ta e ka, nga eshri la eyi e zgi.

²⁹ Eyi é bmye e khwo bgu le, areagbi á sko elenje baŋ nga á yla lo.

Egŋe eshri eyi ba amastad

³⁰ Eyesu a zhĩ, a lu mi le, Eka bimi e ka, Oreŋ Ahogbrẽ o wo anyu? Egŋeyaŋ agi é ba e ta okyku o sla lo?

³¹ O wo eka eyi amastad. E wo tsitsi e gre eyi asĩ aki ahwõ mvye la e wo obiŋ hi. O wo ba moa a fu lo le,

³² ambla fi nga, e kpo nga e hlu agagre, e gre asĩ aki ahwõ mvye, nga awunu a ba a ta eygu mo embgu lo.

³³ Eyesu a nyum oshpa a ygi moare la edgu égŋe nzenze he lo okyku o da mo a ka a bmye.

³⁴ Eyesu a lu odlo pa la moare la égŋe angyiŋ, ambo omba baŋ a wo pa la moanwyeotum sha le, a bla lo a zhiŋ a da moanwyeotum.

Eyesu a da ogbga ogbu o dum

³⁵ Olum-ore onda he lo, Eyesu a nyuŋ moanwyeotum baŋ a lu mi le, Agimi e da gi e yi ongre ohwõ ba atam amgblami.

³⁶ Moa a dzu eshki a zga nga moanwyeotum a yi a gre amgblami. Eyesu a sheŋ a wo amgblami lo nga moa a daŋ a gre pa la mo otsotse. Amgblami ahwõ a mbo a wo ma okro he lo.

³⁷ Anyuŋ ogbga ogbu o la o hlu nga, ondzami o pom o bli amgblami lo.

³⁸ Eyesu a lom egi okũ amgblami a ndze enu. Moanwyeotum baŋ a vro ŋa, nga moa a nyuŋ ŋa a lu mi le, Eyesu are la a nye gi, agi e kpo e jyijygi. Aŋo o ka gi ayiekŋe mbo?

³⁹ Eyesu a kso a jygu ogbga odaŋ ma alo o dum, nga a jygu ondzami odaŋ ma alo o dzu tki. Ogbga ogbu ta la ondzami o dum. Nga esõ e gbu moanwyeotum obiŋ.

⁴⁰ Ambla he nga Eyesu a nyuŋ moanwyeotum a lu mi le, Okyku eshi agimi e da eyli e kpo gimi eka he? Okyku eshi agimi e wo obmi ba adlidzi ma mbo?

⁴¹ Moanwyeotum a kpo eyli nzenze nga a lu mi le, Eshi edgu arehwĩ la ogbga ogbu, ta la ondzami a mbo o gno ŋa?