Amarku 16 - Ohwihwim Olehe

Oksongybi

¹ Ambla ba Asabat a khwo nga, Emeri Amagadaliya ta la Esalomi ta la Emeri anaŋ Eyakubu, a gbmo awargi moa a la a khwa ekom la alo, okyku o khwa okom Eyesu.

² Endigigiŋ onda Aladi la etetne, moashe lo a gre ongybi.

³ Omba moa a yi ongybi nga moa a lu ozhẽ ta la emo a lu mi le, Ayi á ba a byiŋ ayaŋ anyu ongybi á sku gi?

⁴ Ayaŋ moa a shki anyu ongybi la alo, a wo agagre. Moa a gbu okro ongybi lo nga, moa a ka moa a sheŋ a byiŋ lo bgu.

⁵ Moashe lo a mbli ongybi a ka nga, moa a ka ola anwye la a ygi ariga kyekyle a dzu agba obgori ongybi lo eshyẽ. Nga eyli e kpo mo.

⁶ Ola anwye lo a nyuŋ mo a lu mi le, Agimi e kpo eyli mbo. Ame e yi ba agimi e klo Eyesu ba Anazarata moa a gne ŋa egŋe aki. Ambo a wo ahe nga mbo, a sheŋ a kso bgu. Agimi e ka, okro moa a shri ŋa a lom ma o wo ohi.

⁷ Okyku eka he, agimi e yi e da Ebitru pa la moanwyeotum ahwõ oshpa lo. E lu mi le, Eyesu a gre gimi ori a yi Egalili. Agimi é ka ŋa eka baŋ a lu.

⁸ Eyli e kpo moashe lo nzenze, okyku eka he moa a knye a sku ongybi lo. Moa a lu ekplo la e kpo a da arekyeŋ mbo okyku eshi moa a kpo eyli. [

Emeri Amagadaliya a ka Eyesu

⁹ Ambla ba Eyesu a kso eku endigigiŋ onda Aladi, a da Emeri Amagadaliya a ka ŋa oriori. Aŋa a se egbgabi efoha a sku ashe lo.

¹⁰ Ashe lo a gre a yi a da moanwyeotum baŋ oshpa baŋ a ka Eyesu. Omba he lo moanwyeotum a la a wu okũ.

¹¹ Omba ba ashe lo a lu a da mo ba Eyesu a kso ongybi nga baŋ a ka ŋa, moa a bmi ba adlidzi ku-ku mbo.

Moanwyeotum aha a ka Eyesu

¹² Ambla he nga, omba ba moanwyeotum aha a yi anwye osku, Eyesu a da mo a ka ŋa.

¹³ Moaha lo a gre a yi a lu a da moanwyeotum ahwõ ba moa a ka Eyesu, ambo moa a bmi ba adlidzi mbo.

Eyesu a ba okro moanwyeotum okʼpoakyeŋ

¹⁴ Okpyemgbyeŋ nga, Eyesu a ba okro moanwyeotum okʼpoakyeŋ omba moa a ri algo. A shrom mo nzenze okyku eshi omba moare a ka ŋa nga moa a lu a da mo baŋ a kso ongybi, moa a bmi ba adlidzi mbo okyku moa a shpi esõ mo.

¹⁵ Eyesu a nyuŋ mo a lu mi le, Agimi e ngla obiŋ hi, nga e nyum Oshpaodzadzi e da moarehwi obiŋ hi mvye.

¹⁶ Are la a bmi ba adlidzi nga moa a kpo ŋa abaptisma á gro. Are la a bmi ba adlidzi mbo, Ahogbrẽ á sõ ŋa ombgu.

¹⁷ Moa la a bmi ba adlidzi á hwiŋ ekʼpo ba Ogbgaodzi okyku o se egbgabi eshko me, nga moa á lu elom andandandim.

¹⁸ Nga, o wo moa a vu amabi abgo, o mbo le a wa ekpre, ekplokyeŋ é kpo pa la mo mbo. Nga o wo moa a tka moa la a no ololo le, moa á shaŋ.

Moa a sko Eyesu a gre Ongyeŋ

¹⁹ Ambla ba Eyesu Adigi a lu odlo pa la moanwyeotum baŋ okʼpoakyeŋ a khwo nga, moa a sko ŋa a gre Ongyeŋ, nga a dzu obgori ba Ahogbrẽ.

²⁰ Moanwyeotum nga a gre a yi a nyum oshpa ayaŋ a mbo. Adigi-odne a kpo otum pa la moanwyeotum lo, nga a shri ekʼpo a da mo a kpo ayakplo egbregbre okyku o da moare a ka adlidzi ba oshpa lo.]