2 MoaEtasolonika 3 - Ohwihwim Olehe

E fa olu okyku gi

¹ Ekplo ba amom-abgo, ame e vẽ gimi anáŋ, agimi e fa olu okyku gi, okyku o da oshpa ba Adigi-odne o ngla o tsu o yi oshoshoŋ, nga okyku o da moare a ka lo la olbi, eka ba moa a kpo ta la lo agʼbaha bimi.

² Nga e fa olu okyku o da Ahogbrẽ a shla gi abgo moarehwĩ la a wo abi, moa ba eda mo e wo ebi, okyku eshi moarehwĩ pyeŋ angyiŋ a bmi ta la oshpa lo mbo.

³ Ambo Adigi-odne a wo are ba adlidzi angyiŋ. Aŋa nga á shri oshye á shri á da gimi, nga á kpaŋ gimi a sku abgo ba Areabi lo.

⁴ Adigi-odne angyiŋ a da gi e bmi ka la gimi, okyku eka he, agi e bmi ba adlidzi ba agimi e la e kpo, nga é ba e kpo ayakplo ba agi e nye gimi.

⁵ Adigi-odne nga a bmi le, a kpo otum esõ bimi okyku o da gimi e hwiŋ oklo okyku Ahogbrẽ, ta la oheheŋ ba Ekristi a la a shri a di.

O dzu omgbybi bimi e kpo otum

⁶ Agimi anáŋ, agi e jygu gimi odaŋ eshko ba Adigi-odne Eyesu Ekristi. Agimi e ngʼba e sku moanáŋ pyeŋ la a la a kpo oreŋ. Moahi lo a la a kpaŋ onyenye ba agi e tsa mo mbo.

⁷ Agimi a mbo e sheŋ e yi zhezheŋ ba alo o raŋ o gre bimi e kpo ekployaŋ a mbo ba agi e kpo. Agi e kpo oreŋ omba ba agi e wo ka la gimi mbo ku-ku.

⁸ Agi e la e yga okpoghwo abgo moare ototno mbo. Agi e hre okyku lo. Ambo agi e la e kpo otum nga e kpo ewu olulum ta la okyukyku. Agi e la e kpo otum okyku o da gi e kpo arekyeŋ ewu mbo.

⁹ Agi e la e dzu eka he lo okyku ba agi e wo la ozhẽ okyku o zhĩ okyku okpoghwo mbo angyiŋ mbo. Agi e la e dzu eka he okyku o da lo o dzu egŋe ba agimi a mbo é kpo otum ta la alo.

¹⁰ Omba ba agi e wo ka la gimi, agi e lu e da gimi e lu mi le, Areyaŋ a mbo la a kpo oreŋ le, moa a shri algo a daŋ a ri mbo.

¹¹ Agi e lu eka he okyku eshi agi e gno oshpa ba moabze eshki bimi a la a kpo oreŋ. Moa a la a kpo akplokyeŋ mbo o wo le moa a la a ghwo abgo akplo moahwõ sha.

¹² La eshko ba Adigi-odne Eyesu Ekristi angyiŋ agi e shrom moarehwĩ he lo, o raŋ o gre ba moa a dzu la edgu odzudzu la o wo odzi nga o raŋ o gre ba moa a kpo otum okyku o da mo a hwiŋ algori ba eshri emo.

¹³ Ambo agimi anáŋ, agimi e da lo o khwo gimi mbo, ta la o kpo otum la o wo odzi mbo.

¹⁴ O dzu mbo areabze eshki bimi, á bmi ta la oshpa ba agi e ta akpa he e shri e kom gimi mbo. O wo ba alo o wo eka he angyiŋ le, e nyuŋ edgu are he lo e ka e zga ayi, nga e ngʼba e sku ŋa, okyku o daŋ a gbu anzi.

¹⁵ Ambo e kpo ka la ŋa eka baŋ a wo afpu gimi angyiŋ mbo, ambo e kpo ka la ŋa eka baŋ a wo anigimi angyiŋ, nga e shrom ŋa.

Odlo ba amom-abgo

¹⁶ Ahogbrẽ la a wo esĩ ba opyapyaŋ bi ababgo baŋ, o wo baŋ a bmi le a shri opyapyaŋ he lo a shri a da gimi ombamba pyeŋ, ozhẽyaŋ a mbo. Adigi-odne nga a dzu ka la gimi pyeŋ.

¹⁷ Ame e ta oshko he ababgo me angyiŋ. Ame Oblus e shko gimi. Ame e la e ghwo obgo akpayaŋ a mbo eka he angyiŋ. Ame e la e ta engla eka he angyiŋ.

¹⁸ Okpoghwo ba Adigi-odne Eyesu Ekristi o dzu ka la gimi pyeŋ.