2 MoaEtasolonika 2 - Ohwihwim Olehe

Areabi

¹ Odlo eshri ba oba-ba ba Adigi-odne Eyesu Ekristi, ta la eka moa á pla gi á shki otsotse ka la ŋa, ame e vẽ gimi anáŋ,

² agimi e da ekplokyeŋ e so gimi ayi mbo ku-ku, eka ba moakyeŋ a la a lu ma Onda ba Adigi-odne o sheŋ o ba bgu. Agimi e da ohe lo o kpo gimi ewu esõ mbo. O dzu mbo arekyeŋ angyiŋ a ka nga a lu, o mbo le o dzu mbo arekyeŋ angyiŋ a nyum oshpa nga a lu. O dzu mbo moa a lu ma agi angyiŋ e ta lo akpa bi e ta.

³ Ambo agimi anáŋ, e da arekyeŋ a bile gimi ku-ku mbo. Okyku eshi Olum he lo ó ba a wo mbo, o wo le Osomokroayi ba amom-abgo ó ba ayga dne, nga Areabi á ra á tspa, nga la á ba a yi enzheovo.

⁴ Aŋa á tla ekployaŋ a mbo la e wo e ba Ahogbrẽ ta la ekployaŋ a mbo ba moa a la a hlu lo eshko. Aŋa á ka eŋa anyuanyuŋ a gre mo pyeŋ. Nga á yi á dzu Anyuŋ-akulu ba Ahogbrẽ nga á bzi eŋa Ahogbrẽ.

⁵ Agimi e gre esõ e ghre? Ame e lu odlo he pyeŋ e da gimi omba ba ame e yi e wo ka la gimi.

⁶ Ambo ekplokyeŋ la e nyom ayakplo he lo o kpo-kpo ohuhuhi e wo ma. Agimi nga e yi ekplo lo. Omba lo ó kpo bgu le, Areabi lo á zgi.

⁷ Ohuhuhi, Ayakplobi ba moa a ka lo a bmye mbo a la a kpo otum a mo. Ambo ekplo la e nyom lo okpo-kpo, alo é kpo mbo, o wo le moa á mu are la a nyom lo okpo-kpo á sku ozhẽ lo ayga dne.

⁸ Omba he lo angyiŋ Areabi lo á ba a zgi. Nga Adigi-odne Eyesu á bga ŋa la ayaŋ ba anyu baŋ, nga á jygi ŋa la ekekʼpo baŋ a zgi la alo omba baŋ á ba.

⁹ Areabi lo á ba la ekʼpo ba Eshitaŋ nga á kpo edgu ayakplo ba egbregbre andandandim. Nga á zgi egŋe andandandim ba egbregbre la e wo akpro.

¹⁰ Nga á bile moare la á ba a jygi la edgu obile andandandim mvye. Moa á jygi okyku ba moa a yga adlidzi la ovyevye mbo, nga okyku ba moa a klo adlidzi la á ba a shri oshla á da mo mbo.

¹¹ Okyku eka he nga, Ahogbrẽ a da ekʼpo ba akpu e la e kpo otum pa la mo, okyku o da mo a bmi ta la ekplo la e wo e ba akpro.

¹² Okyku eka he nga, areyaŋ a mbo la a bmi ba adlidzi ta la adlidzi mbo le nga baŋ a la a vye la odlobi le, moa á sõ ŋa ombgu.

Moa a sla gimi okyku oshla angyiŋ

¹³ Agimi anáŋ, o raŋ o gre ba agi e vye la Ahogbrẽ ombamba pyeŋ okyku gimi arehwĩ ba Adigi-odne a la a klo gimi. Okyku eshi Ahogbrẽ a sla gimi angyiŋ ori okyku o da gimi e hwiŋ oshla okro ba ekʼpo ba Ogbgaodzi, okyku o da gimi e dzu moarehwĩ ba Ahogbrẽ, nga okyku o da gimi e hwiŋ oshla okro obmi ba adlidzi bimi ibu ba adlidzi.

¹⁴ Ahogbrẽ a bzi gimi okyku ohe lo okro ba Oshpaodzadzi ba agi e la e nyum e ygi gimi. A bzi gimi okyku o da gimi e hwiŋ ogʼba bimi ekʼpo ba Adigi-odne Eyesu Ekristi.

¹⁵ Okyku eka he, agimi anáŋ, e kom onyenye ba adlidzi ba agi e nye gimi okro oshpa ba agi e nyum e ygi gimi, ta la okro akpa ba agi e ta gimi.

¹⁶ Nga Adigi-odne Eyesu Ekristi ta la Ahogbrẽ la a wo Adigi la a klo gi, okyku okpoghwo baŋ a shri oshye-esõ ba gbagbu-amo ta la okayiozhẽ la o wo odzi a shri a da gi,

¹⁷ nga a da esõ bimi e bli la oshye-esõ, okyku o da gimi e hwiŋ oshye okyku o kpo nga o lu ekployaŋ a mbo la e wo edzi.