2 MoaEtasolonika 1 - Ohwihwim Olehe

¹ Akpa he lo a zgi abgo Oblus ta la Esila, ta la Etimoti. Alo a wo okyku moarehwĩ ba Eklisiya ba osku ba Etasolonika. Moa a wo moarehwĩ ba Ahogbrẽ la a wo Adigi, ta la Adigi-odne Eyesu Ekristi.

² Ahogbrẽ la a wo Adigi, ta la Adigi-odne Eyesu Ekristi, moa a bmi le, moa a shri okpoghwo ta la opyapyaŋ a shri a da gimi.

Ombgu omba ba Ekristi á ba a ba

³ O raŋ o gre ba agi e vye la Ahogbrẽ okyku gimi anáŋ ombamba pyeŋ! O raŋ o gre ba agi e kpo eka he lo, okyku eshi obmi ba adlidzi bimi o la o ta ma o ta-ta, nga oklo ba agimi e wo la alo ma okyku moahwõ a mbo o la o ta ma-ma.

⁴ Okyku eka he angyiŋ agi a mbo e la e hwile egʼba okyku gimi egi ayi moaEklisiya ba Ahogbrẽ. Agi e la e hwile egʼba okyku eka ba agimi e tspi la oghwo-esõ nga e bmi ba adlidzi, nga okyku ba ewu ta la avuolo ba agimi e wo la alo ma a zhiŋ gimi mbo.

⁵ Ohe lo angyiŋ o wo otsotsa ba ombgu ba odlodzi ba Ahogbrẽ. Nga eshri ohe lo, aŋa á da gimi é tse ma okyku o da gimi e hwiŋ Oreŋ baŋ ba agimi e kpo ewu okyku lo.

⁶ Ahogbrẽ nga á kpo ekplo la e wo shasha, nga á da ewu e hwiŋ moare la a kpo gimi ewu.

⁷ Nga aŋa á shri odzudum á da gimi la e la e kpo ewu, nga á shri odzudum á da gi a mbo. Aŋa á kpo ohe lo omba ba Adigi-odne Eyesu a zgi Ongyeŋ a ba. Eyesu á ba la moanwyeadga baŋ la a wo la ekʼpo a gre eshri,

⁸ ta la ovo la o vu nzenze, okyku o kpo moare la a yi Ahogbrẽ mbo ewu la alo, nga okyku o kpo moare la a kpaŋ Oshpaodzadzi ba Adigi-odne Eyesu mbo.

⁹ Ewu moa á ba a kpo o wo ewu ba eku la é khwo ku-ku nga mbo. Moa á ngʼba mo á sku egi ayi Adigi-odne ta la anyuŋ ekʼpo baŋ ba ekekʼpo,

¹⁰ omba baŋ á ba a ba Onda mi lo okyku o da moarehwĩ baŋ pyeŋ a hlu ŋa eshko, nga moa pyeŋ la a bmi ba adlidzi ka la ŋa, a fa olbi a daŋ. Agimi a mbo e wo eshki mo, okyku eshi agimi a mbo e bmi ba adlidzi ta la oshpa ba agi e nyum e da gimi.

¹¹ Okyku eka he angyiŋ agi e fa olu ombamba pyeŋ okyku gimi. Agi e vẽ Ahogbrẽ okyku o daŋ a nyuŋ gimi a kpo nga a da gimi e tse ma okyku odzudzu baŋ a bzi gimi okyku lo. Aŋa la ekʼpo baŋ, o wo baŋ a bmi le, aŋa a bli ekhwo bimi okyku odzudzu la o wo odzi, nga a bli gimi okro ba otum bimi ba obmi ba adlidzi he lo.

¹² Ozhẽ he lo angyiŋ, agimi é da moare a ka eshko ba Adigi-odne Eyesu la onyuonyuŋ. Nga á da moare a ka gimi a mbo la onyuonyuŋ, okyku okpoghwo ba Ahogbrẽ, ta la Adigi-odne Eyesu Ekristi.